দ্বি’লম্বর বিররণ 6 - Chakma Bibleলগেপ্রভুরে ভোক্তি গুরিবার্ উগুম 1 তমা গোজেন লগেপ্রভু এ বেক্ উগুমানি, নিয়ম আর হুকুমানি তমারে শিগেবাত্তে মরে উগুম্ দিয়্যে, যেনে যর্দন গাঙান্ পার্ ওইনে যে দেজ্ছান তুমি গজক্ গুরিবাত্তে যর্ সিদু তুমি সিয়েনি পালন গুরিনে চলিবা। 2 সেক্কে তুমি, তমা ঝি-পূঅগুনে আর তারার্ বংশধরুনে তমা গোজেন লগেপ্রভুরে ভোক্তি গুরিনে তার্ দিয়্যে এ বেক্ সুদোমানি আর উগুমানি সারা জিংকানিবর্ পালেবা আর সেনত্তে ভালোক্ দিন সং বাঁঝি থেবা। 3 ইস্রায়েলীয়গুন, তুমি মঅ কধাগান শুনো আর উঝিয়ার্ ওইনে এ বেক্কানি মানি চলঅ, যেনে দুধ আর মধুলোই ভোজ্যে সেই দেজত্ যেবার্ পরেন্দি তমার পুরোণি মানুচ্চুনোর্ গোজেন লগেপ্রভুর এগেম্ মজিম তমার্ ভালেদি অয় আর তুমি মান্জ্যন্দি ভালোক্কুন্ বেশ্ ওইনে উদি পার। 4 ইস্রায়েলীয়গুন, শুনো, আমার গোজেন লগেপ্রভু এক্কো। 5 তুমি বেক্কুনে তমার্ বেক্ মনান্, বেক্ পরাণান আর বেক্ বলান্ দিইনে তমা গোজেন্ লগেপ্রভুরে কোচ্পেবা। 6 এ বেক্ উগুমানি যিয়েনি এচ্চ্যে মুই তমারে দুয়োঙর্ সিয়েনি যেন তমার মনত্ থায়। 7 তমার ঝি-পূঅগুনোরে তুমি বার্ বার্ সিয়েনি শিগেবা। ঘরত্ বৈ থেবার্ অক্তত্, পধন্দি যেবার্ অক্তত্, ঘুমেবার্ অক্তত্ আর বিচ্ছোনত্তুন্ উদিবার্ অক্তত্ তুমি এ বেপারানিলোই তেম্মাং গুরিবা। 8 তুমি সিয়েনি মনত্ রাগেবার্ চিহ্নো ইজেবে তমা আদত্ বাঁনি রাগেবা আর কবালত্ লিবি রাগেবা। 9 তমা ঘরর্ দোরো চের্কোণাত্ আর গেট্টোত্ তুমি সিয়েনি লিগি রাগেবা। 10 তমার পুরোণি মানুচ্ অব্রাহাম, ইস্হাক আর যাকোব ইদু তমা গোজেন্ লগেপ্রভু তমারে যে দেজ্ছান দিবার্ কধা শমক্ খেইনে কোইয়্যে সিদু তে তমারে নেযেব। সিদু আগেদে এন্ দোল্ আর দাঙর্ দাঙর্ শঅর্ যিয়েনি তুমি নিজেই ন-বানঅ, 11-12 এধোক্ক্যেন বেক্ গম্ গম্ জিনিস্ছোই ভোজ্যে ঘর-বাড়ী যে বেক্ পযাপিরানি তুমি নিজে এগত্তর্ ন-গরঅ, এধোক্ক্যেন পানি রাগেবার্ জাগা যিয়েনি তুমি নিজে কাবিনে ন-বানঅ আর এধোক্ক্যেন আংগুর ক্ষেত্ আর জলপাই বাগান যিবের্ গাজপালা তুমি নিজেয়ো ন-লাগঅ। মাত্তর্ সিদু খেই-দেই ঈল্ অবার্ পরেন্দিয়ো উঝিয়ার্ থেয়ো যেনে তুমি লগেপ্রভুরে ভুলি ন-যঅ, যিবে মিসর দেজর্ চাগর কাদানাত্তুন্ তমারে নিগিলেই আন্যে। 13 তমার গোজেন লগেপ্রভুরে তুমি ভোক্তি গুরিবা, বানা তারেই সেবা গুরিবা আর তার্ নাঙেই শমক্ গুরিবা। 14 তমার চেরোকিত্তে যিদুক্কুন্ জাদ থেবাক তুমি তারার্ দেব-দেবেদাগুনোর্ পিজেন্দি ন-যেবা, 15 কিত্যে তমা ভিদিরে তমার্ যে গোজেন লগেপ্রভু আঘে তে তার্ পাওনা ভোক্তি পৌইদ্যেনে অমকদ খুজি; দেব-দেবেদাগুনোর্ পিজেন্দি গেলে তমার বিরুদ্ধে তার্ রাগর্ আগুনান্ জুলি উদিবো, আর তে পিত্থিমীগান উগুরেত্তুন্ তমারে ভস্ত গুরি ফেলেব। 16 তুমি তমার্ গোজেন লগেপ্রভুরে জগা চেবাত্তে ন-যেয়ো, যেধোক্ক্যেন তুমি মঃসাতত্ গোজ্য। 17 তমা গোজেন লগেপ্রভু যেদক্কানি উগুম্, উজিয়ারর্ কধা আর সুদোমানি দিয়্যে সিয়েনি হামাক্কায় তমাত্তুন্ পালন গরা পুরিবো। 18-19 তমার্ যেনে ভালেদি অয় সেনত্যে লগেপ্রভুর চোগোত্ যিয়েনি ঠিগ্ আর গম্ তুমি সিয়েনোই গোজ্য। সেক্কে লগেপ্রভু তমার্ পুরোণি মানুচ্চুনো ইদু শমক্ গুরিনে যে দোল্ দেজ্ছান দিবার কধা এগেম্ গোজ্য, সে দেজত্ যেইনে তুমি সিয়েনি গজক্ গুরিবা আর লগেপ্রভু যেধোক্ক্যেন কোইয়্যে সেধোক্ক্যেন গুরি তমা মুজুঙোত্তুন্ তমার্ শত্রুগুনোরে তুমি ধাবেই দি পারিবা। 20 আগামিদি যেক্কে তমা পূঅগুনে তমারে পুযোর্ গুরিবাক্, আমার গোজেন লগেপ্রভু যেদক্কানি উঝিয়ারর্ কধা, সুদোম আর উগুম্ তমারে দিয়্যে সিয়েনির্ ভেদ্তান্ কি? 21 সেক্কে তুমি তারারে কবা, মিসর দেজত্ আমি ফরৌণর চাগর্ এলং, মাত্তর্ লগেপ্রভু বোলী আত্তান্ বেবহার্ গুরিনে সিয়েনত্তুন্ আমারে নিগিলেই আন্যে। 22 লগেপ্রভু আমার্ চোগো মুজুঙোত্ ফরৌণ আর তা ঘরর্ বেক্কুনো উগুরে আর মিসর দেজঅ উগুরে দাঙর্ দাঙর্ আর দর্গরেপারা চিহ্নো আর আমক্ অবার্ কাম্ গোজ্যে। 23 মাত্তর্ সিয়েনত্তুন্ তে আমারে নিগিলেই আন্যে যেনে আমার্ পুরোণি মানুচ্চুনো ইদু যে দেজ্ছান দিবার্ শমক্কান্ তে গোজ্যে সে দেজত্ নেযেইনে আমারে সিয়েনি দি পারে। 24 এচ্চ্যে ধোক্ক্যেন যেন আমিঝে আমার্ ভালেদি অয় আর আমি বাঁঝি থেই পারিই সেনত্যে লগেপ্রভু আমারে এ বেক্ সুদোমানি পালন গুরিবাত্তে আর আমা গোজেন লগেপ্রভুরে ভোক্তি গুরিবাত্তে উগুম্ দিয়্যে। 25 আমি যুনি আমা গোজেন লগেপ্রভুর মুজুঙোত্ তার্ উগুম মঝিম এ রীদি-সুদোমানি মানি চলিবাত্তে মনান্ দিই সালে সিয়েনোই অবঅ আমা পক্ষেন্দি তার্ আওজ্ মজিম্ চলানা। |
Copyright © 2021 Bangladesh Bible Society
Bangladesh Bible Society