দ্বি’লম্বর বিররণ 5 - Chakma Bibleদশছান্ উগুম্ 1 মোশি বেক্ ইস্রায়েলীয়গুনোরে ডাগিনে কলঅ, ইস্রায়েলীয়গুন, এচ্ছ্যে মুই তমা ইদু যেদক্কানি সুদোম আর উগুম ফগদাং গরঙর্ তুমি সিয়েনি শুনো। তুমি সিয়েনি শিগি রাগেবা আর সিয়েনি যত্তন্ গুরিনে পালেবা। 2 আমা গোজেন লগেপ্রভু হোরেব মুড়োবোত্ আমাত্তে এক্কান সুদোম থিদেবর্ গোজ্যে। 3 সে সুদোমান্ তে আমা পুরোণি মানুচ্চুনো ইদু ন-দে, দিয়্যেদে আমা ইদু, এচ্ছ্যে আমি যিগুনে ইয়েনত্ বাঁজি আগিই আমা বেক্কুনো ইদু। 4 লগেপ্রভু সে মুড়োবো উগুরে আগুনো ভিদিরেত্তুন্ তমা মুজুঙোত্ কধা কোইয়্যে। 5 সে অক্তত্ আগুনো দরে তুমি মুড়োবো উগুরে ন-উদো বিলি মুই তমার্ আর লগেপ্রভুর সংমোধ্যে থিয়্যেইনে তার্ কধানি তমা ইদু ফগদাং গোজ্যং। সেক্কে লগেপ্রভু কোইয়্যেদে, 6 মুই লগেপ্রভু তমার গোজেন। মিসর দেজর্ চাগর্ কাদানাত্তুন্ মুয়োই তমারে নিগিলেই আন্যং। 7 মর্ জাগানত্ কনঅ দেব-দেবেদা মুজুঙোত্ ন-আনিবা। 8 পূজোর্ নাঙে তুমি কনঅ মূত্তি ন-বানেবা, সিবে আগাজর্ কনঅ কিজু ধোক্ক্যেন ওক্ বা মাদি উগুরে কনঅ কিজু ধোক্ক্যেন ওক্ বা পানি উগুরে কনঅ কিজু ধোক্ক্যেন ওক্। 9 তুমি তারারে পূজোয়ো ন-গুরিবা, তারারে সেবায়ো ন-গুরিবা, কিত্যে বানা মুয়ই লগেপ্রভু তমার গোজেন। মর্ পেবার্ ভোক্তিগান মুই চাং। যিগুনে মরে ঘিনান্ তারার্ পাপর্ সাজা মুই তারার্ তিন আর চের্ বংশ সং দি থাং। 10 মাত্তর্ যিগুনে মরে কোচ্পান আর মর্ উগুমানি পালান্ আজার্ আজার্ বংশ সং তারা উগুরে মর্ অমকদ কোচ্পানাগান্ থেবঅ। 11 কনঅ ভান্ন্যেই আজালোই তুমি তমার গোজেন লগেপ্রভুর নাঙান ন-নেযেবা। যে সেধোক্ক্যেন গুরিবো তারে লগেপ্রভু সাজা দিবো। 12 তমা গোজেন লগেপ্রভু তরে যেধোক্ক্যেন উগুম্ গোজ্যে সেধোক্ক্যেন গুরি তুমি জিরেবার্ দিন্নোরে মর্ নাঙে যুদো গুরি রাগেবা আর সিবে পালন গুরিবা। 13 সাপ্তার্ ছয় দিন তুমি কাম্ গুরিবা আর তমার্ বেক্ কামানি গুরিবা, 14 মাত্তর্ সাত দিন্নো অলদে তমা গোজেন লগেপ্রভুর নাঙে জিরেবার্ দিন। সেদিন্যে তুমি, তমা ঝি-পূঅগুন, তমা চাগর আর চাগরানীগুন, তমা গোরু আর গাধাগুন বা অন্য কনঅ য়েমান বা তমা আদামত্ বা শঅরত্ বজত্তি গোজ্যে অন্য জাদর্ মানুচ্-কনজনে কনঅ কাম্ গরানা ন-চলিবো। সেক্কে তমা চাগর্ আর চাগরানীগুনেয়ো তমা ধোক্ক্যেন জিরেই পারিবাক্। 15 মনত্ রাগেয়ো, তুমিয়ো মিসর দেজত্ চাগর্ এলা আর তমা গোজেন লগেপ্রভু তার্ দরমর আর বোলী আত্তান বাবেইনে সিয়েনত্তুন্ তমারে নিগিলেই আন্যে। সেনত্তে তে জিরেবার্ দিন্নোরে পালন গুরিবাত্তে তমারে উগুম দিয়্যে। 16 তমা গোজেন লগেপ্রভুর্ উগুমানি মানিনে তুমি তমার্ মা-বাবরে সর্মান গুরি চলিবা। সেক্কে তমা গোজেন লগেপ্রভুর দিয়্যে দেজত্ তুমি ভালোক্ দিন বাঁজি থেবা আর তমার্ ভালেদি অবঅ। 17 খুন্ ন-গোজ্য। 18 সিনেলী ন-গোজ্য। 19 চুর্ ন-গোজ্য। 20 কারঅ বিরুদ্ধে মিজে সাক্ষি ন-দুয়ো। 21 মান্জ্যর মোক্কুনো উগুরে লুভ্ ন-গোজ্য। মান্জ্য ঘর-দুয়োর, ভূই-জোবিন্, চাগর-চাগরানি, গোরু-গাদা বা আর কনঅ কিজু উগুরে লুভ্ ন-গোজ্য। 22 সে মুড়োবো উগুরে আগুন, মেঘ আর ঘুর্গুজ্যে আন্ধার ভিদিরেত্তুন্ লগেপ্রভু এ উগুমানি তমা বেক্কুনো ইদু রঅ ছাড়িনে ফগদাং গোজ্যে। ইয়েনি বাদে তে তমা ইদু আর কিজু ন-কয়। পরেদি তে সিয়েনি দ্বিবে পাত্তর আরুগো উগুরে লিগিনে মইদু দিলো। 23 সেদিন্যে যেক্কে মুড়োবো জ্বলের্ আর আন্ধার ভিদিরেত্তুন্ তুমি তার্ রঅবো শুন্য সেক্কে তমার্ বেক্ গুট্টির-সর্দারুনে আর বুড়ো নেতাগুনে মইদু উদি এচ্চ্যন্। 24 তুমি সেক্কে কোইয়ো, আমা গোজেন লগেপ্রভু যে কত্তমান বাঈনী গরেপারা আর দাঙর্ সিয়েন্ তে আমারে দেগেয়্যে আর আগুনো ভিদিরেত্তুন্ আমি তার্ রঅবো শুন্যেই। এচ্ছ্যে আমি বুঝি পারিলোং, গোজেনে কারঅ ইদু কধা কনার্ পরেন্দিয়ো সিবে বাঁজি থেই পারে। 25 মাত্তর্ ইয়েনর পরেন্দি আমি মারা পড়িবাত্তে কিত্তে যেবং? এই দাঙর্ আগুনানে দঅ আমারে পুড়ি ফেলেব; আর ভালক্কন্ সং যুনি আমা গোজেন্ লগেপ্রভুর্ রঅবো শুনিই সালে আমি মুরি যেবংগোই। 26 মান্জ্য ভিদিরে এধোক্ক্যেন কন্না আঘে, আমা ধোক্ক্যেন্ গুরি আগুনো ভিদিরেত্তুন্ জেদা গোজেনর্ রঅবো শুনোনার্ পরেন্দিয়ো বাঁজিই আঘে? 27 আমা গোজেন লগেপ্রভু যিয়েনি কোইয়্যে, তুইয়ো কায়-কুরে যেইনে সিয়েনি শুনি আয়। তে তরে যিয়েনি কবঅ সিয়েনি আমারে জানেই দিবে; আমি সিয়েনি শুনিনে সেধোক্ক্যেন চলিবোং। 28 মঅ সমারে যেক্কে তুমি কধা কোইয়ো সেক্কে লগেপ্রভু তমা কধানি শুন্যে আর মরে কোইয়্যেদে, এই মানুচ্চুনে তরে যিয়েনি কোইয়োন সিয়েনি মুই শুন্যং। তারা যিয়েনি কোইয়োন্ সিয়েনি দোল্ কধা। 29 মরে ভোক্তি গুরিবার্ আর মর্ উগুমানি পালেইনে চলিবার্ এই মনান্ যেনে তারার্ আমিঝে থায়। সেক্কে তারার্ আর তারার্ পূঅগুনোর্ উমরত্তে ভালেদি অবঅ। 30 তুই তারারে তাম্বুলোত্ ফিরি যেবাত্তে কঅ, 31 মাত্তর্ তুই ইয়োত্ মইদু থাক। মুই তরে সে বেক্ উগুমানি, আইন আর সুদোমানি দিম্ যিয়েনি তত্তুন্ তারারে শিগা পুরিবো, যেনে গজক্ গুরিবাত্তে যে দেজ্ছান মুই তারারে দিবাত্তে যাঙর্ সিদু তারা সিয়েনি পালন গুরিনে চলন্। 32 সেনত্যেই তমার গোজেন লগেপ্রভু তমারে যিয়েনি গুরিবাত্তে উগুম দিয়্যে সিয়েনি তমাত্তুন্ য্ত্তন্ গুরিনে পালন গরা পুরিবো; সিয়োত্তুন্ এক্কানায়ো ইন্দি-উন্দি ওই ন-পারিবো। 33 যেনে তুমি বাঁজি থেই পার আর তমার্ ভালেদি অয় আর যে দেজ্ছান তুমি গজক্ গুরিবা সিদু ভালোক্ দিন বাঁজি থেই পার সেনত্যে তমার গোজেন লগেপ্রভু যে পথ্তানন্দি তমারে চলিবাত্তে উগুম্ দিয়্যে তুমি সে পথ্তান ইন্দি চুলিবা। |
Copyright © 2021 Bangladesh Bible Society
Bangladesh Bible Society