দ্বি’লম্বর বিররণ 33 - Chakma Bible

ইস্রায়েল উগুরে আশিদ্‌বাদর্ আরাম্ভ

¹ গোজেনর মানুচ্‌ মোশি মরাণার আগেন্দি ইস্রায়েলীয়গুনোরে ইয়েন কোইনে আশিদ্‌বাদ গুরিলো,

² লগেপ্রভু সিনাই মুড়োত্তুন এলঅ, তে সেয়ীরত্তুন তারা উগুরে পহ্‌র দিলো; তার পহ্‌রান পারণ মুড়োত্তুন ছিদি পুরিলো। তে লাখ্ লাখ্ পবিত্র স্বর্গদুদোর মধ্যেত্তুন্ এলঅ; তার ডেন আঢ্‌তান্ রোইয়্যেদে তারাত্যে আগুনে ভরা আইন।

³ “ঘেচ্চ্যেকগুরি তে তার নিজোর মানুচ্চুনোরে কোচ্‌পায়। পবিত্র দূত্তুনে তার অধীনোত্‌ আগন, তারা বেক্কুনে তা টেঙানিত্‌ মাদা নিগিরিনে আগন; তাত্তুনোই তারা উগুম পান্‌।

⁴ আমা ইদু মোশি যে রীদি-সুুদোমানি দিলো, সিয়েনিই অলঅ যাকোব-গুট্টির ধন।

⁵ যেক্কে ইস্রায়েলীয় চেলাগুনে এগত্তর্ অলাক, তারা সমারে ইস্রায়েলীয় বেক গুট্টিগুন এগত্তর্ অলাক, সেক্কে লগেপ্রভুয়ই এলঅ যিশুরূণর রাজা।”

বার গুট্টি উগুরে আশিদ্‌বাদ

⁶ রূবেণ পৌইদ্যেনে মোশি কোইয়্যেদে, “রূবেণরে বাঁজেই রাগঅ, মরণান তাত্তুন দূরোত রাগঅ; তা মানুচ্চুনোর্ সোংখ্যেগুন্ যেনে কম থান্‌।”

⁷ যিহূদা পৌইদ্যেনে তে কোইয়্যেদে, “ও লগেপ্রভু, তুই যিহূদার কধানি শুন; তা মানুচ্চুনো ভিদিরে তারে ফিরেই আন। তার নিজোর দ্বি-আঢ্‌তানি তে যুদ্ধোত্‌ লাগায়; শত্রুর বিরুদ্ধে তুই তার সহায় অ।”

⁸ লেবি পৌইদ্যেনে তে কোইয়্যেদে, “তর্‌ ভক্তগুনো ইদু তর তূম্মীম আর ঊরীম আঘে; মঃসাতদ তুই তার যগা চেইয়োচ্‌, মরীবার পানি ইদু তা সমারে কোল্-কোজ্যে গোজ্যস্‌।

⁹ নিজোর বাপ-মারে দাঙর্ গুরি ন-দেগানা, নিজোর ভেইয়োরে স্বীগের্ ন-গরানা, নিজোর পূঅ-ঝিগুনোরে অস্বীগের্ গরানা, তে তর্‌ কধানি চুগি দিয়্যে আর তর্‌ বেবস্থাগান্‌ রোক্ষে গোজ্যে।

¹⁰ তর্‌ উগুমানি তে যাকোবরে শিগায়, আর রীদি-সুদোমানি শিগায় ইস্রায়েলরে। তে তমা মুজুঙোত্‌ আগর্‌বাট্টি জ্বালায়, তর্‌ ডালি ঘর উগুরে পুজ্যে-উৎসর্ব গরে।

¹¹ ও লগেপ্রভু, তুই তার সোম্বোত্তিত্‌ আশিদ্‌বাদ গর্‌, তার বেক কামানিত্‌ তুই খুজি অ। তুই তার শত্রুর কমরুন ভাঙি দে; যিগুনে তারে ঘিনান্‌ তারার কমরুন ভাঙি দে, যেনে তারা আর থিয়্যেই ন-পারন।”

¹² বিন্যামীন পৌইদ্যেনে তে কোইয়্যেদে, “লগেপ্রভু যিবেরে কোচ্‌পায় তে গমেডালে তা ইদু থেবঅ; তে আমিঝে তারে আন্দলত্‌ রাগায়; তা পিঠ্‌তান উগুরে তার জাগায়ান।”

¹³ যোষেফ পৌইদ্যেনে তে কোইয়্যেদে, “লগেপ্রভু তার দেজ্‌চানরে যেনে আশিদ্‌বাদ গরে আগাজর মূল্যবান শির পানিলোই, মাদিগান তলেন্দি পানিলোই,

¹⁴ বেলানর সেরা দান দিইনে, ঋতুর সেরা ফসল দিইনে,

¹⁵ পুরোণা মুড়োবোর সম্পদ দিইনে, উমরর্ মুড়োবোর ধন দিইনে,

¹⁶ দুনিয়ার ভোজ্যে গম গম জিনিস দিইনে, আর জোল্‌জোল্যে ঝুপোত্‌ যিবে এলঅ তার দোয়্যেলোই। যোষেফর মাদাত্‌ এ বেক্‌ আশিদ্‌বাদতানি ঝুড়ি পোড়োক্‌; ভেইয়ুনো ভিদিরে যে গম্‌ তারই মাদাত্‌ ঝুরি পোরোক্‌ এই বেক আশিদ্‌বাদতানি।

¹⁷ তার মহিমাগান পত্তমে জর্মেয়্যে বলদ গোরু ধোক্ক্যেন, তা মাদাত্‌ আঘেদে ঝার্‌বো বলদ গোরুর শিং। সিগুন্‌দোই তে গুদেব দুনিয়ের বেক জাদরে, এন্‌ কি, ইয়েনর শেজ্‌ দুযিগানর্ জাদ্‌তুনোরেয়ো। এবাবোত্যে অবঅ ইফ্রয়িমর লাখ্ লাখ্ আর মনঃশির আজার আজার মানুচ্‌।”

¹⁸ সবূলূন পৌইদ্যেনে তে কোইয়্যেদে, “সবূলূন বারেন্দি কামত্‌ খুজি ওক্‌, আর ইষাখর খুজি ওক্‌ ঘরর কাম্বোই।

¹⁹ মানুচ্চুনোরে তারা মুড়োবোর দুযিত্‌ ডাগিবাক্; সিয়েনত্‌ যগাজ্যে মনভাব নিইনে তারা য়েমান-উৎসর্ব গুরিবাক্। সাগরত্তুন তারা তুলিবাক সাগরর ধন, আর ধূল্যেচরত্তুন তুলি আনিবাক্ কোরোলির তলার্ ধন।”

²⁰ গাদ পৌইদ্যেনে তে কোইয়্যেদে, “বর্ পেইয়্যে তে, যিবে গাদ রেজ্যর দুযিগান বাড়েব। তে সিংহ ধোক্ক্যেন বুঝিবো আর শত্রুগুনোর মাদা আর আঢ্‌তানি ছিনিবো।

²¹ বেক জাগানিত্তুন্ সেরা জাগা তে বেঈ নেযেয়ে; নেতার যগাজ্যে পাওনা তাত্যে রাগেয়্যে আঘে। যুদ্ধোত্‌ এগত্তর ওইয়্যে সর্দারুনো ভিদিরে তেয়ই লগেপ্রভুর ন্যায়ে-ভোজ্যে উগুম পালেয়্যে, পালেয়্যে ইস্রায়েলরে দিয়্যে লগেপ্রভুর সুদোমানি।”

²² দান পৌইদ্যেনে তে কোইয়্যেদে, “তে যেন বাশনত্তুন জাম্‌ দি এস্যে সিংহর ছঅ।”

²³ নপ্তালি পৌইদ্যেনে তে কোইয়্যেদে, “নপ্তালি লগেপ্রভুর দোয়্যেলোই ভরপুনোং; তারই আশিদ্‌বাদে তে ভরপুনোং ওই উঠ্যে। তুই তর্‌ দুযি ভিদিরে লোই আয় গালীল সাগর আর তার দোগিণোর দেজ্‌ছান।”

²⁴ আশের পৌইদ্যেনে তে কোইয়্যেদে, “আশের অন্যগুনোত্তুন বেশ্‌ আশিদ্‌বাদ পেবঅ; তে যেন ভেইয়ুনোর কোচ্‌পেইয়্যে অয়, তার টেং দ্বিয়েন যেন জলপাই তেলর ভিদিরে ভুরি থায়।

²⁵ লুয়ো আর পিদোল ডাল্লোই তার কায়কুরে দোরান্‌ বান্যে থেবঅ। যেদকদিন তে বাঁজি থেবঅ সেদকদিন তার কিয়্যেত বল্‌ থেবঅ।”

ইস্রায়েল উগুরে আশিদ্‌বাদর শেজ্‌

²⁶ তে কোইয়্যেদে, “যিশুরূণর গোজেন ধোক্ক্যেন আর কনজন নেই। তর্‌ সাহায্যকারী অবাত্তে মেঘঅ উগুরে চড়িনে নিজোর মহিমায় তে আগাজ-পদেন্দি যায়।

²⁷ যিবে আগকালর গোজেন তেয়ই তর্‌ আশ্রয়; তার উমরর্ আদত্‌ তেয়ই তরে ধুরি আঘে। তর্‌ মুজুঙোত্‌ যিদুক্কুন শত্রু আগন্‌ তে তারারে ধাবেই দিবো; তে কবঅ, ‘ইগুনোরে ভস্ত গরঅ।’

²⁸ ইস্রায়েলে সিয়েনত্যেই গমেডালে থেবঅ। যাকোবর থান্‌জাঙান্‌ থেবঅ দজাগানর্-দুযির্‌ বারেন্দি; সিয়েনত্‌ থেবঅ ভালোক্কুন্‌ শোজ্য আর নুয়ো আংগুরো-রস, তা উগুরে আগাজর শিরোপানি ঝুরি পুরিবো।

²⁹ ও ইস্রায়েল, তুই বর্ পেইয়্যে! তুয়ই লগেপ্রভুর উদ্বোর-গোজ্যে জাদ্, তঅ ধোক্ক্যেন আর কনঅ জাদ্ নেই। তেয়ই তর্‌ সাহায্যর ঢাল, তর্ বাঈনী গুরিবার্ তলোয়ার। শত্রুগুনে তঅ মুজুঙোত্‌ গির্‌‌গিরে উদিবাক, আর তুই তারার পিঠ্‌থানন্দি উদিনে যেবেগোই।”