দ্বি’লম্বর বিররণ 32 - Chakma Bible1 ও দাঙর্ আগাজ্, মর্ কধানি শুনিজ্; ও পিত্থিমীগান, মর্ মুয়োর কধানি শুন্। 2 মর্ শিখ্যে পেইয়্যেগানি ঝড় ধোক্ক্যেন গুরি ঝুড়ি পোড়োক্, মর্ কধানি শিরোপানি ধোক্ক্যেন গুরি লামি এজোক্। আল্গা এক ফুদো ঝড় ধোক্ক্যেন গুরি সিয়েন নুয়ো ঘাস উগুরে ঝুড়ি পোড়োক্, আর গাজ-বাজঅ উগুরে জদবদে ঝড় ওইনে সিয়েন পোড়োক্। 3 মুই লগেপ্রভুর নাঙান্ ফগদাং গুরিম্। তুমি আমার গোজেনর মহিমা-গান গরঅ। 4 তেয়ই জিরেবার-মুড়ো, তার কামানি তেল্তেল্যে; তার বেক পথ্তানি ন্যায়র পথ। তে নির্ভরযোগ্য গোজেন, তে কনঅ অন্যায় ন-গরে; তে ন্যায়বলা আর গম্। 5 তা উগুরে তার মানুচ্চুনে ভান্ন্যেই বেবহার গোজ্যন্। তারার মনর্ কুজুরোমিত্যেই সিগুনে আর তার পূঅ নয়। 6 ও অবুঝ, বুদ্ধিনেইয়্যে জাদ! এবাবোত্যেগুরি কি তুমি লগেপ্রভুরে হেনা উগুরেবা? তে কি তমার বাপ্ তে কি সৃট্টি গুরিয়েবো নয়? তেয়ই দঅ তমারে সৃট্টি গোজ্যে; তেয়ই জাদ ইজেবে তমারে থিদেবর্ গোজ্যে। 7 সেই পুরোণি দিনুনোর কধানি মনত্ গর্; তমার ভালোক্ দিন আগর্ পুরোণি মানুচ্চুনোর কধানি ভাবি চঅ। সেই বেক্ দিনুনোর কধানি তমার বাপ্পোনোত্তুন পুজোর গরঅ, তারা তমারে কবাক্; বুড়ো মানুচ্চুনোরে পুযোর্ গরঅ, তারা তমারে বুঝেইনে কবাক্। 8 দাঙর্ গোজেনে যেক্কে নানান্ জাদরে সোম্বোত্তি ভাগ গুরি দিলো, আর মানুচ্চুনোরে নানান্ জাদত্ ভাগ গুরিলো, সেক্কে ইস্রায়েল জাদর মান্জ্যর্ সোংখ্যে মনত্ রাগেইনে তে অন্য জাদ্তুনোর্ দুযি ঠিগ্ গুরি দিলো। 9 লগেপ্রভুর পাওনা ভাগই অলঅ তার মানুচ্চুন; যাকোব, অয়, ইস্রায়েল জাদ্তো অলঅ তার পাওনা সোম্বোত্তি। 10 তে তারে এক ধূল্যেচর-চাগালাত্ পেলঅ, পেলঅ গুজুরোনিলোই ভরা এক মানুচ্ নেইয়্যে জাগাত্। তে তারে ঘিরি রাগেল, যত্তন্ গুরিলো; তারে চোগো মানেগ ধোক্ক্যেন গুরি চুগি দিইনে রাগেল, 11 যেধোক্ক্যেন গুরি ঈগল পেগে তা বাবোত্ ছঅগুনোরে জাগেই তুলোন্, যেধোক্ক্যেন গুরি তারা উগুরে তে লারে লারে উড়ি পারে, যেধোক্ক্যেন গুরি তারারে তুলি নেযেবাত্যে তার ডুয়োনি মিলি দে, আর যেধোক্ক্যেন গুরি তার্ ডুয়োগানি উগুরে তারারে বুয়োই নেযায়। 12 লগেপ্রভু গায় গায় তারে চালেইনে লোই এলঅ, তার সমারে ন-এলাক্ কনঅ দেব-দেবেদা। 13 জিত্যে ইজেবে তারে তে চালেইনে নেযেল দেজর্ এক মুড়োত্তুন অন্য মুড়োত্; তারে খেদর্ ফসল হেবাত্তে দিলো। তে তারে হাবেল সেই মধু যিয়েন মুড়োবোর ফাদানত্ পাহ্ যায়, আর তারে দরঅ পাত্তরর্ ভুইয়োত্ জলপাইয়র তেল হাবেল। 14 তে তারে হাবেল গোরুর দুধোর্ দই ছাগল আর ভেড়ার দুধ, আর হাবেল পক্তা-মক্তা ভেড়া ছাগলর্ য়েরা, ছাগলর য়েরা আর বাশন দেজর পাদা ভেড়া ছাগলর্ য়েরা। তে তারে হাবেল পক্তা-মক্তা গম। ও ইস্রায়েল, তুই গেজে উঠ্ আংগুর-রস হেইয়োচ্। 15 মাত্তর্ পক্তা ওই যিশুরূণে লাদি মারিলো। ও যিশুরূণ, তুই অমকদ হেইনে গুয়োর্ আর পক্তা ওইয়োচ্। সে পরেন্দি তে তার সৃট্টিগুরিয়্যে গোজেনরে ফেলেই গেলঅ, আর চিগোন গুরি দেগিলো তার জিরেবার-মুড়োবোরে। 16 দেবেদা পূজোলোই তার মানুচ্চুনে তার পাওনা ভোক্তির আওজর্ আগুনান্ লাগেলাক্, ভান্ন্যেই মূত্তি পূজোলোই তার রাগ্কান জাগেলাক্। 17 তারা ডালি দিলাক্ বজং আত্মাগুনোর নাঙে যিগুনে গোজেন নয়, তারা উৎসর্বর অনুষ্ঠানান্ গুরিলাক নুয়ো দেব-দেবেদাগুনোর নাঙে, যিগুনে বানা কয়েকদিন আগে দেগা দুয়োন, যিগুনোরে তমার পুরোণি মানুচ্চুনে ন-দোরেদাক্। 18 সে জিরেবার-মুড়োবো তুমি এলাফেলা গোজ্য যে তমার বাপ; সেই গোজেনরে তুমি ভুলি যেয়োগোই যিবে মা-ধোক্ক্যেন দুঘ্ পেইনে তমারে পিত্থিমীত্ আন্যে। 19 সিয়েন দেগিনে লগেপ্রভু তার পূঅ-ঝিগুনোর্ ইন্দিত্তুন মুয়োন-ফিরেই নিলো, কিত্যে তারা তার রাগ্কান জাগেই তুল্যন্। 20 তে কলঅ, মুই তারাত্তুন্ মুয়োন ফিরেই নেযেম, যেরেন্দি তারার দজা কি অয় দেগিবোং; কিত্যে ইগুন উগুদো পদেন্দি যেইয়্যে জাদ্, অবিশ্বেজী পুঅ। 21 গোজেন নয় এধোক্ক্যেন দেবেদারে পূজো গরন তারা মর্ পাওনা ভোক্তির আওজ্চোই আগুন লাগেয়োন; দাঙর্ মূত্তি পূজো গরন্ তারা মর্ রাগ্কান জাগেই তুল্যন্। জাদঅ নয় এধোক্ক্যেন জাদর্ আদত্ ফেলেইনে মুইয়ো তারার মনর্ আগুনান্ জ্বালেম; এক্কো অবুঝুনো জাদর্ আদত্ ফেলেইনে তারার রাগ্কান জাগেবং। 22 মর্ রাগর আগুনান জুলি উঠ্যে; সেই আগুনান জ্বলের গোরর্ বেগত্তুন তলেন্দি জাগান সং। সেই আগুনান পিত্থিমী আর তার বেক ফসলানি হেই ফেলেব আর আগুনান্ লাগেব বেক মুড়োবোর গড়াত্। 23 “মুই বেক্ দযাগানি আনিনে তারা উগুরে এগত্তর গুরিম; মর্ বেক্ সেলুন মুই তারা উগুরেই শেজ্ গুরিম্। 24 মুই তারা উগুরে কিয়্যেগান্ ক্ষয় গরেদে ভানা ধোক্ক্যেন, ভস্ত গুরিয়্যে ভানা আর দুঘে ভরা পিড়ে পাধেই দিম্। তারা উগুরে মুই ঝাড়্বো দাত্বলা য়েমান আর বুক্কোই ভর্ দিইনে যান্দে বিষবলা সাপ পাধেই দিম্। 25 শঅরর্ বারেন্দি লাম্বা ছুড়ির আঘাতে তারার পূঅ-ঝিগুনে মুরি যেবাক্, আর ঘর ভিদিরে দর্ দর্ ভাব লাগিবো। তারার বেক গাবুজ্যে-গাবুরী, চিগোন পূঅ-ঝি আর বুড়োগুনে ভস্ত ওই যেবাক্। 26 মুই কোইয়োং, মুই তারারে কট্টা কট্টা গুরি ফেলেম, তারার কধানি মান্জ্যর মনত্তুন পুঝি ফেলেম্। 27 মাত্তর্ মুই হবর্ পেদুং ইয়েনত্ শত্রুগুনে বাড়্বো দেগেবাক্ আর ন-বুঝিনে কবাক্কে, তারা জিত্তোন্; লগেপ্রভু ইয়েনি কিচ্চু ন-গরে।” 28 ইস্রায়েল জাদ ভিদিরে গম্ বুদ্ধি দিবার মানুচ্ নেই, তারার বিবেকবুদ্ধি বিলিনে কিচ্চু নেই। 29 বুদ্ধি থেলে এই কধাগান তারা বুঝিদাক, বুঝিদাক তারার শেজ্ দজাগান কি অবঅ। 30 কেন্জান্ গুরি একজনে আজার জনরে ধাবেই-দে, কেন্জান্ গুরি দ্বিজনরে দেগিনে দশ আজার মানজ্যে ধেই যান, যুনি তারার জিরেবার-মুড়োবো শত্রুগুনোর আদত্ তারারে বেজা দিইনে থান, যুনি লগেপ্রভু শত্রুগুনোর আদত্ তারারে তুলি দিইনে থায়? 31 শত্রুগুনোর জিরেবার-মুড়োবো আমার জিরেবার-মুড়োবো ধোক্ক্যেন নয়, ইয়েন আমার শত্রুগুনোরঅ রায়। 32 লগেপ্রভু কলঅ, “তারার আংগুর গাছ সদোমর আংগুর গাজত্তুন্ আর ঘমোরার ক্ষেদত্তুন এস্যে। তারার আংগুরুনোত্ আগন্দে বিষ, তারার আংগুর থুপ্পুন্ তিদে। 33 তারার আংগুর-রসসানি অলঅ সাপ বিষ, কালা যামুরো সাপর দর্গরেপারা বিষ। 34 মইদু সিয়েনি দঅ তুল্যে আঘে, মর্ জমেয়্যে ঘরত্ সীলমহর্ গরা আঘে। 35 অন্যেয়র সাজা দিবার অধিকার মর্; যার যিয়েন পাওনা মুই তারে সিয়েনই দিম্। অক্ত অলেই শত্রুগুনোর টেঙানি বিঝিদি যেবঅ; তারার ভস্তর্ দিনুন্ তারা ইদু এই যেইয়্যে। তারাত্তে যিয়েনি ঠিগ্ গুরি রাগা ওইয়্যে, সিয়েনি যাদিগুরি তারা উগুরে এই যেবঅ।” 36 লগেপ্রভু সেক্কে কবঅ, তার মানুচ্চুনোর বল্ ফুরেইয়্যে, চাগর বা গিরোজ্ কারর্ আর বল্ নেই, সেক্কে তে তার মানুচ্চুনোর পক্ষ নেযেব, তার চাগরুনো উগুরে দোয়্যে গুরিবো। 37 তে সেক্কে কবঅ, “কুদু ইক্কিনে তারার দেব-দেবেদাগুন? কুদু তারার সে মুড়োবো যিবে ইদু তারা জিরেয়োন? 38 কুদু সেই দেব-দেবেদাগুন যিগুনে তারার ডালি দিয়্যে য়েমানর তেলানি হেইয়োন, হেইয়োন তারার ঢালন-উৎসর্বর আংগুর-রস? ইক্কিনে তারা এইনে তমারে সাহায্য গুরিবাক, আর তমারে আশ্রয় দিবাক্। 39 এবেরা তুমি চিদে গুরি চঅ, মুয়ই সিবে; মুই বাদে আর কনঅ গোজেন নেই। মরানা-বাজানা মরই আদত্, মুই আঘাত গোজ্যং, মুয়ই গম্ গুরিম; মঅ আদত্তুন বাঁজেই পারন্ এধোক্ক্যেন কনঅ জন নেই। 40 মুই আত্ তুলিনে শমক্ হেইনে কঙর্, মর্ জীংকানির্ এগেম, 41 যেক্কে মর্ তেল্তেল্যে তলোয়ারানত্ মুই পাত্তর দিম্, মর্ বিচেরর রায়ানরে কামত্ লাগেবাত্তে সিয়েন আদত্ নেযেম্, সেক্কে মর্ শত্রুগুনোরে মুই সাজা দিম্, আর যিগুনে মরে ঘিনান্ তারার যিয়েনি পাওনা সিয়েনি তারারে দিম্। 42 মারে ফেলেইয়্যে আর বন্দী মানুচ্চুনোর লো হেইয়্যে মর্ সেলুনোরে মুই মাত্তল্ গুরি তুলিম্; মর্ তলোয়ারানে য়েরা হেবঅ, লাম্বা-চুলবলাবো শত্রুর মাদাবোর যেরা হেবঅ।” 43 ও বেক জাদর্ মানুচ্চুন, তুমি লগেপ্রভুর মানুচ্চুনো সমারে তার বাঈনী গরঅ, কিত্যে তে তার চাগরুনোর লো-গানর্ হেনা শুজিবো, তার শত্রুগুনোরে সাজা দিবো আর তার দেজ্চান আহ তা মানুচ্চুনোর পাপ ঢাগিবার বেবস্থা গুরিবো। 44 মোশি আর নূনর পূঅ যিহোশূয় এই গানর বেক কধানি মানুচ্চুনোরে শুনেলাক্। 45-46 বেক ইস্রায়েলীয়গুনো ইদু মোশি সিয়েনি কুয়া শেজ্ গুরিনে তারারে কলঅ, “যে কধানি তমার বিরুদ্ধে সাক্ষী ওই থেবাত্তে এচ্চ্যে মুই তমারে কলুং সিয়েনি তুমি মনত্ রাগঅ যেনে এই রীদি-সুদোমর্ বেক কধানি গমেডালে পালেবাত্তে তমার পূঅ-ঝিগুনোরে উগুম দি পারঅ। 47 তমাত্যে ইয়েনি বাজে কধা নয়, ইয়েনি তমার জীংকানি। যর্দন গাঙান্ পার ওইনে তুমি যে দেজ্ছান গজক্ গুরিবাত্তে যর্ সিয়েনত্ এ কধানি পালেইনে তুমি ভালোক্ দিন বাঁজি থেই পারিবা।” মোশির মরণর কধা 48 সেদিন্যে লগেপ্রভু মোশিরে কলঅ, 49 “তুই যিরীহোর উগুদোন্দি মোয়াব দেজর অবারীম মুড়োমুড়ি ভিদিরে নবো মুড়োবোত্ উঠ্যই আর সোম্বোত্তি ইজেবে যে কনান দেজ্চান মুই ইস্রায়েলীয়গুনোরে দুয়োঙর্ সিয়েন একবার চেই নেযা। 50 তর্ ভেই হারোণে যেধোক্ক্যেন হোর মুড়োবোত মুরি যেইনে তার পুরোণি মানুচ্চুনো ইদু যেইয়্যেগোই সেধোক্ক্যেন গুরি তুমিয়ো নবো মুড়োবোত্ উদিনে মুরি যেবা আর তমার পুরোণি মানুচ্চুনোর ইদু যেবাগোই। 51 ইয়েনর্ কারণান অলঅ, সীন ধূল্যেচর-চাগালাত্ কাদেজর মরীবার পানি ইদু ইস্রায়েলীয়গুনো মুজুঙোত্ তুমি মঅ উগুরে অবিশ্বেজর কামানি গোজ্য আর ইস্রায়েলীয়গুনো মুজুঙোত্ মরে সুদ্ধো-সাংগ বিলিনে মান্য ন-গরঅ। 52 সেনত্যেই যে দেজ্চান মুই ইস্রায়েলীয়গুনোরে দিবাত্তে যাঙর্ সিয়েন তুমি দূরোত্তুন দেগিবা মাত্তর সিয়েনত্ তুমি চোমেই ন-পারিবা।” |
Copyright © 2021 Bangladesh Bible Society
Bangladesh Bible Society