দ্বি’লম্বর বিররণ 31 - Chakma Bibleমোশির পরেন্দি যিহোশূয় 1 পরেদি মোশি বেক্ ইস্রায়েলীয়গুনোরে কলদে, 2 “মর্ বয়স্ছান একশঅ কুড়ি বজর ওই যেইয়্যে। মর্ কামানি আর মুই গুরি ন-পারঙর্। লগেপ্রভুয়ো মরে কোইয়্যেদে, যর্দন গাঙান পার্ ওনা মর্ ন-অবঅ। 3 তমার গোজেন লগেপ্রভু নিজে গাঙান্ পার্ ওইনে তমার আগে আগে যেবঅ। তমা মুজুঙোত্তুন সেই বেক্ জাদ্তুনোরে তেয়ই ভস্ত গুরি দিবো আর তুমি তারার দেজ্ছান গজক্ গুরি নেযেবা। লগেপ্রভুর কধা মজিম যিহোশূয় গাঙান পার্ ওইনে তমার আগে আগে যেবঅ। 4 ইমোরীয়গুনোর রাজা সীহোন আর ওগ আর তারার দেজ্ছান যেধোক্ক্যেন লগেপ্রভু ভস্ত গুরি দিয়্যে সেধোক্ক্যেন গুরি তে সেই বেক্ জাদ্তুনোরে ভস্ত গুরি দিবো। 5 তারারে তে তমা আদত্ তুলি দিবো আর মুই তারা উগুরে যিয়েনি গুরিবার উগুম দুয়োং তুমিয়ো তারা উগুরে সেধোক্কেন্ গুরিবা। 6 তুমি দরঅ মরঅ অ আর মনত্ বুক্ বানঅ। তারারে দেগিনে তুমি ন-দোরেয়ো বা গির্ ন গিরেবা, কিত্যে তমার গোজেন লগেপ্রভু তমার লগে লগে যেবঅ। তে কনদিনঅ তমারে ছাড়িনে ন-যেবঅ বা বাদ ন-দিবো।” 7 ইয়েনর পরেন্দি মোশি যিহোশূয়রে ডাগিলো আর বেক্ ইস্রায়েলীয়গুনোর মুজুঙোত্ তারে কলদে, “তুই দরমর অ আর মনত্ বুক্ বান, কিত্যে তত্তুনোই এই মানুচ্চুনো সমারে সেই দেজত্ যাহ্ পুরিবো যে দেজ্ছান ইগুনোরে দিবার শমক্ লগেপ্রভু ইগুনোর পুরোণি মানুচ্চুনো ইদু গোজ্যে। তত্তুনোই সেই দেজ্ছান সোম্বোত্তি ইজেবে ইগুনো ভিদিরে ভাগ গুরি দিয়্যে পুরিবো। 8 লগেপ্রভু নিজে তমার আগে আগে যেবঅ আর তমা সমারে থেবঅ। তে কনদিনঅ তরে ছাড়িনে ন-যেবঅ বা বাদ ন-দিবো। তুই ন-দোরেচ্, মনবল ন-আরেচ্।” রীদি-সুদোম পড়ানা 9 লেবি-গুট্টির ধর্মগুরুগুনে, যিগুনে লগেপ্রভুর সাক্ষ্য-সুন্দুক্কো বুয়োই নেযেদাক, মোশি বেক্ রীদি-সুদোমানি লিগিনে তারার আদত আর ইস্রায়েলীয়গুনো বুড়ো নেতাগুনোর আদত দিলো। 10-11 তে তারারে উগুম গুরিলো, “পত্তি সাত বজরত, অত্তাৎ কজ্জ মাপ গুরিবার বজরত যেক্কে নাদা মান্জ্যর-ঘর পরবর্ অক্ত এবঅ আর বেক্ ইস্রায়েলীয়গুনে তমার গোজেন লগেপ্রভুর মুজুঙোত্ আঝিল্ অবাত্তে তার বেঈ লোইয়্যে জাগানত্ যেবাক সেক্কে তুমি এ রীদি-সুদোমানি তারারে পড়ে শুনেবাক্। 12 মরদ, মিলে, ঝি-পূঅ আর তমার নানান্ আদামর আহ্ শঅরর নানান্ জাদর্ মানুচ্চুনোরে ডাগিনে তুমি একলগে এগত্তর গুরিবা, যেনে তারা সিয়েনি শুনোন আর তমার গোজেন লগেপ্রভুরে ভোক্তি গুরিবাত্তে শিগোন্ আর এই রীদি-সুদোমর্ বেক্ কধানি দোলেডালে পালন গরন্। 13 এধোক্ক্যেনগুরি তারার ঝি-পূঅগুনে, যিগুনে এই রীদি-সুদোমর্ কধানি ন-জানন্, তারায়ো সিয়েনি শুনিবাক আর এ শিক্ষ্যেগান পেবাক, যর্দন গাঙান্ পার ওইনে যে দেজ্ছান তুমি গজক্ গুরিবাত্তে যর্ সিয়েনত্ গোদা জীংকানিবর্ তমার গোজেন লগেপ্রভুরে তারাত্তুন ভোক্তি গরা পুরিবো।” উল্লোমির্ আগাম্ কধা 14 ইয়েনর্ পরেন্দি লগেপ্রভু মোশিরে কলঅ, “তর্ মরণর দিন্নো ঘোনেই এস্যে। যিহোশূয়রে ডাগি নেযেইনে তুই মিলন-তাম্বুলোত যাহ্। সিয়েনত্ মুই তারে তার্ কামর্ ভারান্ দিম্।” সেনত্যেই মোশি আর যিহোশূয় মিলন-তাম্বুলোত্ লগেপ্রভুর মুজুঙোত্ আঝিল্ অলাক্। 15 সেক্কে লগেপ্রভু মেঘর চাগঅ ভিদিরেন্দি সেই তাম্বুলানত্ আঝিল্ অলঅ আর সেই চাগ্কান তাম্বুলোর দোরান ইদু যেইনে থিয়্যেল। 16 লগেপ্রভু মোশিরে কলঅ, তুই তর্ পুরোণি মানুচ্চুনো ইদু জিরেবাত্তে যর্, মাত্তর্ এই মানুচ্চুনে যে দেজত্ চোমেবাত্তে যাদন্ সিয়েনত্ খুব যাদিমাদি তারা মঅ উগুরে অবিশ্বেজ্ গুরিনে সিদুগোর্ দেবেদা পূজোত্ নিজোরে মিজেবাক্। তারা মরে ছাড়ি দিবাক আর মুই তারাত্যে যে সুদোমান থিদেবর্ গোজ্যং তারা সিয়েনরে ভাঙিবাক্। 17 যেদিন্যে তারা সিয়েন গুরিবাক সেদিন্যে রাগে মুই তারারে ছাড়ি দিম্। মুই তারাত্তুন মর্ মুয়োন ফিরেই নেযেম্ আর্ তারা ভস্ত ওই যেবাক। সেক্কে তারা উগুরে নানান্ দযা আর দুখ্-কট্টনি লামি এবঅ। সেদিন্যে তারা কবাক্কে, আমার গোজেন আমা সমারে নেই বিলিনেই আমা উগুরে এ বেক্ দজাগানি এস্যে। 18 তারা দেব-দেবেদাগুনো ইন্দি ফিরিনে যেদক্কানি ভান্ন্যেই কাম্ গুরিবাক সেনত্যে মুই হামাক্কায় সেদিন্যে মর্ মুয়োন ফিরেই নেযেম। 19 “তুমি ইক্কিনে এই গানান্ লিগি নেযঅ। ইয়েন ইস্রায়েলীয়গুনোরে শিগেবা আর তারারে গাহ্ বাজে দিবে, যেনে তারা বিরুদ্ধে ইয়েন মর্ পক্ষেন্দি এক্কান সাক্ষী ওই থায়। 20 তারার পুরোণি মানুচ্চুনো ইদু মর্ শমক্ গোজ্যে সেই দুধ আর মধুলোই ভরা দেজত্ যেক্কে মুই তারারে নেযেম্ আর যেক্কে তারা পেট ভরা খেইনে সুগেই থেবাক সেক্কে তারা মরে ঈচ্ গুরিনে মর্ সুদোমানি ভাঙিনে দেব-দেবেদাগুনোর্ পিজেন্দি যেইনে তারারে পূজো গুরিবাক। 21 আর তারা উগুরে যেক্কে নানান্ বাবোত্যে দযা আর দুখ্-কট্টনি লামি এবঅ সেক্কে এ গান্নো তারা বিরুদ্ধে সাক্ষী ওই থেবঅ, কিত্যে তারার বংশধরুনে গান্নো ভুলি ন-যেবাক। মর্ শমক্ খেইয়্যে এগেম্ গোজ্যে দেজত্ তারারে নেযানার আগেন্দি মুই হবর্ পাংগে, তারার্ মনত্ ইক্কিনে কি রোইয়্যে।” 22 মোশি সেদিন্যে গান্নো লিগিনে ইস্রায়েলীয়গুনোরে শিগেয়্যে। 23 নূনোর পূঅ যিহোশূয়রে লগেপ্রভু এ উগুমান দিলো, “তুই বোলী অ আর মনত্ বুক্ বান্। যে দেজ্ছান দিবার এগেম মুই শমক্ গুরিনে ইস্রায়েলীয়গুনো ইদু গোজ্যং সিয়েনত্ তুমি তারারে নেযেবা। মুই নিজে তঅ সমারে থেম্।” 24 মোশি এই রীদি-সুদোমানি আগাগোড়া এক্কো বোইয়োত লিগি নেযেল। 25 সে পরেন্দি লগেপ্রভুর সাক্ষ্য-সুন্দুক বোইয়্যে লেবীয়গুনোরে তে কলঅ, 26 “রীদি-সুদোমর্ এ বোইবো নেযেইনে তুমি তমার গোজেন লগেপ্রভুর সুদোম-সুন্দুগোর কায়কুরে রাগঅ। ইবে ইস্রায়েলীয়গুনোর বিরুদ্ধে সাক্ষী ওইনে সিয়েনত্ থেবঅ। 27 তুমি যে কেধোক্ক্যেন একবুস্যে আর উল্লোমি সিয়েন মর্ জানা আঘে। মুই তমা সমারে বাঁজি থাগদে যেক্কে তুমি লগেপ্রভুর বিরুদ্ধে উল্লোমি গোজ্য সেক্কে মুই মুরি যানার পরেন্দি আরঅ কত্তমান্ সিয়েন গুরিবা। 28 তুমি তমার গুট্টির বুড়ো নেতাগুনোরে আর কামগুরিয়ে বেক্কুনোরে মঅ মুজুঙোত্ এগত্তর্ গর্। মুই তারারে এই বেক্ কধানি কবাত্তে চাঙ্ আর দাঙর্ আগাজ্ আর পিত্থিমীগানরে তারার বিরুদ্ধে সাক্ষী রাগেইনে যেবাত্তে চাং। 29 মুই হবর্ পাংগে যে, মর্ মরাণার পরেন্দি তুমি এক্কুবারে ভান্ন্যেই ওই যেবা আর যে পদেন্দি মুই তমারে চলিবার উগুম দুয়োঙর্ তুমি সিয়েনত্তুন সোরেই যেবা। আগামিদি তমা উগুরে দযা লামি এবঅ, কিত্যে লগেপ্রভুর চোগোত্ যিয়েনি ভান্ন্যেই তুমি সিয়েনি গুরিবা আর তমার নিজোর আঢ্তোই বানেয়্যে মূত্তিলোই তুমি তারে অখুজি গুরিবা।” মোশির গান 30 সে পরেন্দি মোশি এই গানর কধানি পোইল্যেত্তুন ধুরি যেরেন্দি সং বেক্ ইস্রায়েলীয়গুনোরে শুনেল: |
Copyright © 2021 Bangladesh Bible Society
Bangladesh Bible Society