দ্বি’লম্বর বিররণ 30 - Chakma Bibleলগেপ্রভু ইদু ফিরি এজানার ফল 1 মুই তমা মুজুঙোত্ যে আশিদ্বাদ আর অভিশাব্পানি তুলি ধুরিলুং সিয়েনি বেক্কানি তমা উগুরে এবঅ। সে পরেন্দি তমার গোজেন লগেপ্রভু যিদুক্কুন জাদ ভিদিরে তমারে ছিদি দিবো তারা ভিদিরে বজত্তি গুরিবার সলাবোত্ এই বেক্ কধানিত্ তুমি মন দিবা। 2 সেই সলাবোত্ যেক্কে তুমি আর তমার ঝি-পূঅগুনে তমার গোজেন লগেপ্রভু ইদু ফিরি এবাক আর এচ্চ্যে মুই তমারে যেদক্কানি উগুম দুয়োঙর্ সিয়েনি পালেইনে মনে-পরাণে তার আওজ্ মজিম্ চলিবা, 3 সেক্কে লগেপ্রভু বোন্দীদজাত্তুন উদ্ধোর্ গুরিনে তমারে ফিরেই আনিবো। তে তমা উগুরে দোয়্যে গুরিবো আর যিদুক্কুন জাদ ভিদিরে তমারে ছিদি দিবো তারা ভিদিরেত্তুন তে আরঅ তমারে তোগেই আনিবো। 4 আগাজর্ শেজ্ দুঝিতঅ যুনি তমারে ফেলেই দিয়্যে অয় সিয়েনত্তুনঅ তমারে গোজেন লগেপ্রভু তমারে তোগেই আনিবো। 5 তমার পুরোণি মানুচ্চুনোর দেজত্ তে তমারে ফিরেই আনিবো আর তুমি সিয়েন আরঅ গজক্ গুরিবা। তে তমারে বোউত্ ভালেদি গুরিবো আর তমার পুরোণি মানেইয়ুনোত্তুনঅ তমার মান্জ্যর সোংখ্যেগুন বাড়েই দিবো। 6 তুমি যেনে তমার বেক্ মনান-পরাণান দিইনে তারে কোচ্পেইনে বাঁজি থাগঅ সেনত্যে তে তমারে আর তমার বংশধরুনোর মনত্ তনা গুরিবো। 7 এই বেক্ অভিশাব্পানি তমার গোজেন লগেপ্রভু তমার শত্রুগুনো উগুরে আনিবো যিগুনে তমারে ঘিনান্ আর দুখ্ দুয়োন্। 8 সেক্কে তুমি আরঅ লগেপ্রভুর বাধ্য ওইনে চলিবা আর তার যেদক্কানি উগুম এচ্চ্যে মুই তমারে দুয়োঙর্ সিয়েনি মানি চলিবা। 9 সেক্কে তমার গোজেন লগেপ্রভু বেক্কানিত্তুন তমারে ভালেদি গুরিবো। তে তমার কামত্ আশিদ্বাদ গুরিবো আর তমার পূঅগুনোর সোংখ্যে, য়েমানুনোর ছঅগুন আর ভুইয়োর ফলুন বাড়েই দিবো। তমার পুরোণি মানুচ্চুনো উগুরে তার যে ফুত্তি এলঅ তমা উগুরে আরঅ সেই ফুত্তিলোই তে তমারে ভালেদি গুরিবো- 10 হামাক্কায় যুনি তুমি তমার গোজেন লগেপ্রভুর বাধ্য ওইনে এ রীদি-সুদোমর্ বোইবোত্ লেখ্যে তার বেক্ উগুমানি আর সুুদোমানি পালঅ আর মনে-পরাণে তমার গোজেন লগেপ্রভুর ইন্দি ফিরো। জীংকানি বা মরণ 11 এচ্চ্যে মুই তমারে যে উগুমানি দুয়োঙর্ সিয়েনি পালানা তমার পক্ষে তেমন দরমর নয় বা এই উগুমানি তমার মুুজুুঙোত্তুন দুরোদঅ নয়। 12 এ উগুমান স্বর্গত্ তুলি রাগানা কনঅ জিনিস নয়, তুমি কবাদে, কন্না স্বর্গত যেইনে সিয়েন আনিনে আমারে শুনেব যেনে আমি সিয়েন পালন গুরি পারিই? 13 ইয়েন সাগর উপারর্ কনঅ জিনিসঅ নয় যে, তুমি কবাদে, কন্না বড়গাঙান পার ওই যেইনে সিয়েন আনিনে আমারে শুনেব যেনে আমি সিয়েন পালন গুরি পারিই? 14 লগেপ্রভুর কধানি তমা সমারে আঘে; আগেদে তমার মুয়োত্ আর মনেপরাণে যেনে তুমি সিয়েনি পালন গুরি পারঅ। 15 চঅ্, এচ্চ্যে মুই তমা মুজুঙোত্ যিয়েনি তুলি ধরঙর্ সিয়েনি অলঅ জীংকানি বা মংগল বা মরণ আর অমংগল। 16 এচ্চ্যে তমা ইদু মর্ উগুম ইয়েন, তুমি তমার গোজেন লগেপ্রভুরে কোচ্পেবা, তার পদেন্দি চলিবা আর তার উগুমানি, সুদোমানি আর হুকুমানি মানি চলিবা। সালে তুমি বাঁজিবা আর সোংখ্যেন্দি বাড়িই উদিবা, আর যে দেজ্ছান তুমি গজক্ গুরিবাত্তে যর্ সিয়েনত্ তমার গোজেন লগেপ্রভু তমারে আশিদ্বাদ গুরিবো। 17 মাত্তর্ যুনি তমার মনান তার কায়-কুরেত্তুন সুরি যায় আর তুমি তার অবাধ্য অ আর যুনি তুমি দেব-দেবেদা পূজোর টানে তারা ইদু মাদা নিগিরো, 18 মাত্তর্ এচ্চ্যে মুই তমারে কোই দুয়োঙর্, তুমি হামাক্কায় ভস্ত ওই যেবা। যর্দন গাঙান্ পার ওইনে যে দেজ্ছান তুমি গজক্ গুরিবাত্তে যর্ সিয়েনত্ তুমি ভালোক্ দিন বাঁজি ন-থেবা। 19-20 “তমা বিরুদ্ধে দাঙর্ আগাজ্ আর পিত্থিমীগানরে সাক্ষী রাগেইনে মুই কঙত্তে, এচ্চ্যে মুই তমা মুজুঙোত্ জীংকানি বা মরণর আর আশিদ্বাদর বা অভিশাব্পানি তুলি ধুরিলুং। তুমি জীংকানিগানরে বেঈ নেযঅ, যেনে তুমি আর তমার ঝি-পূঅগুনে বাঁজি থান্ আর তমার গোজেন লগেপ্রভুরে কোচ্পঅ, তার কধানি শুনো আর তারে আজাবোদে ধুরি রাগঅ, কিত্যে ইগুনো ভিদিরে আগে তমার জীংকানিগান। যে দেজ্ছান দিবার শমক্ তে তমার পুরোণি মানুচ্ অব্রাহাম, ইসহাক আর যাকোব ইদু গোজ্যে সিয়েনত্ ইয়েন ভিদিরে আঘে তমার আয়ুগান।” |
Copyright © 2021 Bangladesh Bible Society
Bangladesh Bible Society