দ্বি’লম্বর বিররণ 29 - Chakma Bible1 লগেপ্রভু হোরেব মুড়োবোত্ মোশির মাধ্যমে ইস্রায়েলীয়গুনোত্তে এক্কান সুদোম থিদেবর্ গোজ্যে, আর ইয়েনি অলঅ তার দ্বিলম্বর সুদোমর্ শর্ত যিয়েনি তে মোশিরে মোয়াব দেজত্ ইস্রায়েলীয়গুনোত্তে থিদেবর্ গুরিবাত্তে কোইয়্যে। 2 মোশি বেক্ ইস্রায়েলীয়গুনোরে ডাগিনে কলদে, লগেপ্রভু মিসর দেজর ফরৌণ আর তা চাগরুনো উগুরে আহ্ তার গোদা দেজ্ছান উগুরে যিয়েনি গোজ্যে সিয়েনি তুমি নিজেই দেক্কো। 3 তারার সেই দাঙর পোরোক্কেগান্ আর লগেপ্রভুর দেগেয়্যে আমক অবার চিহ্নোগানি আর তার দাঙর্ দাঙর্ আমক অবার্ কামানি তুমি নিজোর্ চোগেদি দেক্কো। 4 মাত্তর্ তুমি লগেপ্রভুত্তুন্ এচ্চ্যে সং সিয়েনি বুঝিবার মনান্, দেগিবার চোক্কুন আর শুনিবার কানানি ন-পঅ। 5 চোল্লিশ বজর ধূল্যেচর-চাগালার ভিদিরেন্দি লগেপ্রভু তমারে চালেইনে আন্যে। ইয়েন ভিদিরে তমার কিয়্যের কাবড়ানি আর জদানি বর্বাদ্ ওই ন-যায়। 6 পিদে, আংগুরো-রস বা অন্য কনঅ মদ তুমি হেই ন-পঅ। লগেপ্রভুই সিয়েনি গোজ্যে যেনে তুমি বুঝি পার দে, তেয়ই তমার গোজেন লগেপ্রভু। 7 তুমি এ জাগানত্ লুমোনার পরেন্দি হিষ্বোনোর রাজাবো সীহোনে আর বাশনর রাজাবো ওগ আমা সমারে যুদ্ধো গুরিবাত্তে নিগিলি এচ্চ্যে, মাত্তর্ আমি তারারে অদেই দিয়্যেই। 8 আমি তারার দেজ্ছান নেযেইনে সোম্বোত্তি ইজেবে সিয়েন রূবেণীয়, গাদীয় আর মনঃশি-গুট্টির অদ্দেক মান্জ্যরে দিয়্যেই। 9 সেনত্যে তুমি এ সুদোমর বেক্ উগুমানি গমেডালে মানি চলিবা যেনে বেক্ কামানিদই তমার ভালেদি অয়। 10 তমার গোজেন লগেপ্রভুর মুজুঙোত্ এচ্চ্যে তুমি বেক্কুনে এইনে থিয়েইয়্য-থিয়্যেইয়োন্ তমার সদ্দারুনে আর নেতাগুনে, তমার বুড়ো নেতাগুনে আর চাগর-বাগরুনে আহ্ অন্য বেক্ ইস্রায়েলীয়গুনে। 11 তমা সমারে আগন্ তমার ঝি-পূঅগুনে আর মিলেগুনে; আর আগন্ তমার তাম্বুলোত্ বজত্তি গোজ্যে অন্য জাদর মানুচ্চুনে যিগুনে তমার গাজ্ছুন কাবন্ আর পানিগানি তুলোন্। 12 তমার গোজেন লগেপ্রভু তমাত্যে এচ্চ্যে ঘেচ্চ্যেকগুরি অবদে শমক্ গুরিনে যে সুদোমান থিদেবর্ গোজ্যে সেই শমক্ আর সুদোমানি মানি নিবাত্তে তুমি ইয়েনত্ এইনে থিয়্যেইয়ো। 13 লগেপ্রভু এচ্চ্যে সিয়েন থিদেবর্ গোজ্যে যেনে তমার পুরোণি মানুচ্ অব্রাহাম, ইস্হাক আর যাকোবর্ ইদু গোজ্যে শমক্ আর তমা ইদু গোজ্যে এগেম্ মজিম তে তমার গোজেন ওই পারে আর এচ্চ্যে দিনোত্ যদবদে গুরিনে তমারে তার নিজোর মানুচ্ বিলিনে নেযেই পারে। 14-15 আমার গোজেন লগেপ্রভুর মুজুঙোত্ এইনে এচ্চ্যে যিগুনে থিয়্যেইয়োন্ বানা তারাত্যেই যে মুই ঘেচ্চ্যেকগুরি শমক্ গোজ্যং এ সুদোমর্ কধাগান ফগদাং গরঙর্ সিয়েন নয়, মাত্তর্ যিগুনোর্ এজঅ জর্ম ন-অয় তারাত্তেয়ো গরঙর্। 16 তুমি নিজেই হবর্ পঅ, মিসর দেজত্ আমি কেধোক্ক্যেন জীংকানি কাদেয়্যেই আর কিঙিরিনে নানান্ দেজর্ ভিদিরেন্দি ইয়েনত্ এইনে লুম্মেয়ি। 17 তক্তা, পাত্তর, সনা আর রূবোর বানেয়্যে জঘন্য মূত্তি আর আরুগ্ তুমি উই বেক্ মানুচ্চুনো ভিদিরে দেক্কো। 18 তুমি চেই নেযঅ যেনে তমা ভিদিরে এচ্চ্যে এমন্ কনঅ মরদ বা মিলে বা কনঅ বংশ বা গুট্টি ন-থান্ যিবের্ মনান তমার গোজেন লগেপ্রভুরে ফেলেইনে সেই বেক্ জাদর দেব-দেবেদাগুনোরে পূজো গুরিবাত্তে আওজী। যুনি সেধোক্ক্যেন কনজন থান্ সালে তমা ভিদিরে তে অবদে এমন্ এক্কো শিঙর ধোক্ক্যেন যিবে পরেন্দি বিষ ধোক্ক্যেন তিদে গাজ্ ওই উদিবো। 19 এধোক্ক্যেন মানুচ্ এ শমক্ গোজ্যে কধানি শুনোনার সলাবোত্ যুনি নিজোরে ভাগ্যত্যে বিলিনে মনে গরন্ আর মনে মনে ভাবে, নিজোর আওজ্ মজিম চুলিলেয়ো তে গমেডালে থেবঅ, সালে তমার বেক্কুনো উগুরে তে দজা ডাগি আনিবো। 20 লগেপ্রভু কনদিনঅ তারে ক্ষেমা গুরিবাত্তে রাজী ন-অবঅ। সে মানুচ্চো বিরুদ্ধে তার রাগ্কান জুলি উদিবো আর তার্ মনত্ তার পাওনা ভোক্তির আওজ্ জাগিই উদিবো। এই বোইবোত্ যেদক্কানি অভিশাবর কধা লেগা আঘে সিয়েনি বেক্কানি তা উগুরে পুরিবো। লগেপ্রভু পিত্থিমীত্তুন তার নাঙান্ পুঝি ফেলেব। 21 তে ইস্রায়েলীয়গুনোর বেক্ গুট্টির ভিদিরেত্তুন অমংগলত্তে তারেই বেঈ নেযেব, আর তে এই রীদি-সুদোমর্ বোইবোত্ লেখ্যে সুদোম ভিদিরে যেদক্কানি অভিশাবর কধা কুয়ো ওইয়্যে সে কধা মজিম সিয়েনি গুরিবো। 22 এধোক্ক্যেনগুরি এই দেজ উগুরে যেদক্কানি আঘাত লামি এবঅ আর লগেপ্রভু যেদক্কানি পিড়ে দেজ উগুরে পাধেই দিবো সে পৌইদ্যেনে তমার বংশধরুনে আর দূর দেজত্তুন এচ্চ্যে বিদেশীগুনে তমারে পিযের্ গুরিবাক। 23 পুরো দেজ্ছান নুন্দোই আর গন্ধরক্কোই পড়ি থেবঅ। সেক্কে কিচ্চু লাগা ন-অবঅ, কিচ্ছু ন-উদিবো আর কনঅ ঘাস বা ঝুপ্-ঝাড় সিয়েন উগুরে ন-থেবঅ। এ দেজর অবস্থা অবঅ সদোম, ঘমোরা, অদ্মা আর সবোয়িমো ধোক্ক্যেন, যিয়েন লগেপ্রভু তার অমকদ রাগে জুলি উদিনে ভস্ত গুরি দিয়্যে। 24 সিয়েন দেগিনে অন্য বেক্ জাদ্তুনে পুযোর্ গুরিবাক, লগেপ্রভু কিত্তে এ দেজ্ছানরে এ দজা গুরিলো? কিত্তে তাঁর এই জোল্জোল্যে রাগ? 25 ইয়েনর জোবপান্ অবঅ, কিত্যে এ জাদ্তো তারার পুরোণি মানুচ্চুনোর গোজেন লগেপ্রভুর সুদোমানি বাদ্ দুয়োন, যে সুদোমান মিসর দেজত্তুন্ তারারে নিগিলেই আনিবার পরেন্দি তে তারাত্তে থিদেবর্ গোজ্যে। 26 তারা তারে ফেলেইনে তারার ইদু নূয়ো দেব-দেবেদার পূজো গোজ্যন আর তারা মুজুঙোত্ মাদা নিগিরিনে রোইয়োন, যিগুনোরে পূজো গুরিবার উগুম লগেপ্রভু ন-দে। 27 সেনত্যেই লগেপ্রভুর রাগ্কান এ দেজর্ উগুরে জুলি উঠ্যে আর তে এই বোইবোত্ লেখ্যে বেক্ অভিশাপ্পানি এই দেজর উগুরে ঢালি দিয়্যে। 28 জদবদে রাগ্কোই, অমকদ জ্বলেদে রাগ্কোই, তে দেজত্তুন্ তারারে তুলি নেযেইনে অন্য দেজত্ ছিদিনে ফেলেই দিয়্যে, আর্ এজঅ তারা সিয়োদোই আগন্। 29 ভিদিরে ভিদিরে বেক্কানি আমার গোজেন লগেপ্রভুর বেপার, মাত্তর্ ফগদাং পেইয়্যে বেক্কানি উমরত্যে আমার আর আমা ঝি-পূঅগুনোর, যেনে এ রীদি-সুদোমর্ বেক্ কধানি আমি পালন গুরি পারিই। |
Copyright © 2021 Bangladesh Bible Society
Bangladesh Bible Society