দ্বি’লম্বর বিররণ 28 - Chakma Bibleবাধ্যথানার ফল 1 তমার গোজেন লগেপ্রভু উগুরে যুনি তমার পূরোপুরি বাধ্যতা থায় আর এচ্চ্যে মুই তার যেদক্কানি উগুম তমারে দুয়োঙর্ সিয়েনি যুনি তুমি দোলেডালে পালন গরঅ, সালে তে পিত্থিমীর অন্য বেক্ জাদ্তুনো উগুরে তমারে জাগা দিবো। 2 তুমি যুনি তমার গোজেন লগেপ্রভুর বাধ্য অ সালে এই বেক্ আশিদ্বাদতানি তুমি পেবা আর সিয়েনি তমার লগে থেবঅ: 3 তমার থেবারজাগানিত্ আর ক্ষেত-ক্ষেত্তি বেক্কানিত তুমি আশিদ্বাদ পেবা। 4 তুমি আশিদ্বাদ পেবা যার কারনে তমার গিরির্ বোউত ঝি-পূঅ, ক্ষেদত বোউত ফসল আর গোরু-ছাগল-ভেড়া পালর ভালোক্কুন ছঅ অবাক্। 5 তমার ফসলর কাল্লোঙুন্ আর ময়দা রাগেবার পিলেগুন আশিদ্বাদ পেবাক। 6 পত্তিদিনোর ঝিংকানিত্ তুমি আশিদ্বাদ পেবা। 7 যিগুনে শত্রু ওইনে তমার বিরুদ্ধে থিয়্যেবাক লগেপ্রভু এমন্ গুরিবো যেনে তারা তমা ইদু উদিই যান। তারা এক কিত্তেন্দি তমারে আক্রমন গুরিবাত্তে এইনে সাত কিত্তেন্দি ধেই যেবাক। 8 তমার গোলাঘর উগুরে লগেপ্রভুর আশিদ্বাদ থেবঅ আর যে কামানিত্ তুমি আত্ দিবা সিয়োদোই তে আশিদ্বাদ গুরিবো। তমার গোজেন লগেপ্রভু তার দিয়্যে দেজত্ তমারে আশিদ্বাদ গুরিবো। 9 যুনি তুমি তমার গোজেন লগেপ্রভুর উগুমানি পালন গরঅ আর তার পদেন্দি আদঅ সালে তে তার শমক্ গোজ্যে এগেম্ মজিম, তার যুদো গোজ্যে জাদ ইজেবে তমারে থিয়্যেবাত্তে দিবো। 10 সেক্কে পিত্থিমীর বেক্ জাদ্তুনে দেগিবাক্কে, লগেপ্রভুর নাঙে তমার পরিচয়, আর সেক্কে তারা তমারে দোরেইনে চলিবাক। 11 যে দেজছান তমারে দিবো বিলিনে লগেপ্রভু তমার পুরোণি মানুচ্চুনো ইদু শমক্ গোজ্যে সেই দেজত্ তে তমারে বোউত দান গুরিবো, অত্তাৎ তে তমার গিরির্ বোউত ঝি-পূঅরে, য়েমান পালত্ ভালোক্কুন্ ছঅ আর ক্ষেদত্ ভালোক্কুন ফসল দিবো। 12 তমা দেজত্ অক্ত মজিম ঝড়্ দিইনে তমার আঢর্ বেক্ কামানিত্ আশিদ্বাদ গুরিবাত্তে লগেপ্রভু তার দানর ভান্ডাল্, অত্তাৎ আগাজ্ছান খুলি দিবো। তুমি নানান্ জাদরে কজ্জ দি পারিবা, মাত্তর্ কারত্তুন্ তমার কজ্জ নেযা ন পুরিবো। 13 লগেপ্রভু এমন গুরিবো যেনে তুমি বেক্কুনো মাদা উগুরে থাগঅ, টেঙর্ তলে নয়। তমার গোজেন লগেপ্রভুর যেদক্কানি উগুম এচ্চ্যে মুই তমারে দুয়োঙর্ সিয়েনত্ যুনি তুমি শুনো আর দোলেডালে সিয়েনি পালঅ, সালে আমিঝে তমার জাগায়ান্ থেবঅ উগুরে, তলেন্দি নয়। 14 এচ্চ্যে মুই তমারে যেদক্কানি উগুম দুয়োঙর, দেব-দেবেদার পিজেন্দি যেইনে আর তারারে পূজো গুরিনে তুমি সিয়েনত্তুন ইন্দি উন্দি সুরি ন-যেবা। অবাধ্য অনাত্তে অভিশাব 15 মাত্তর্ তুমি যুনি তমার গোজেন লগেপ্রভুর কধালোই কান্ ন-পাদঅ আর এচ্চ্যে দিয়্যে মর্ এদক্কানি উগুম আর সুদোম গমেডালে ন-পালঅ, সালে এই বেক্ অভিশাব্পানি তমা উগুরে লামি এবঅ আর তমা লগে থেবঅ: 16 তমার থেবার জাগা আর ক্ষেত-খামারর্ বেক্কানিত তুমি অভিশাব্ পেবা। 17 তমা ফসলর কাল্লোঙুন্ আর ময়দে থবার পিলেগুনে অভিশাব্ পেবাক। 18 তুমি অভিশাব্ পেবা যিয়েনর্ কারনে তমার গিরিত্ ঝি-পূঅ, ক্ষেদত্ কম ফসল আর পালর গোরু, ছাগল আর ভেড়াগুনোর কম ছঅ অবাক্। 19 পত্তিদিনোর জীংকানিত্ তুমি অভিশাব্ পেবা। 20 ভান্ন্যেই কামানি গুরিনে লগেপ্রভুরে ফেলে যেবার অপরাধে তমার বেক্ কামানিত্ তে তমারে অভিশাব্ দিবো, যাগুলুগোত্ ফেলেব আর ঘিনেব, যিয়েনর কারনে তুমি ক্ষয় যাদে যাদে কম্ সময়ো ভিদিরে শেজ্ ওই যেবা। 21 তুমি যে দেজ্ছান গজক্ গুরিবাত্তে যর্ লগেপ্রভু সিয়েনত্ এমন্ গুরিবো যেনে তমা ভিদিরে সাজুরেদে পিড়ে লাগি থায় আর যেরেন্দি তুমি দেজত্তুন এক্কুবারে শেজ্ ওই যঅ। 22 ক্ষয় যাইদে পিড়ে, তিন বাবোত্যে জদবদে জ্বর, যুদ্ধো, গরম শুগুনো বোইয়্যের্ আর হরান্যেগান্-এই বেক্কানি লগেপ্রভু তমা উগুরে আনিবো আর তমারে দুখ্ দিবো যেদক্কন সং তুমি ভস্ত ওই ন-যঅ। 23 তমার মাদাগুনো উগুরে আগাজ্ছান অবদে পিদোল ধোক্ক্যেন দরঅ, আর টেঙর্ তলেন্দি মাদিগান অবদে লুয়ো ধোক্ক্যেন দরঅ। 24 লগেপ্রভু এধোক্ক্যেন গুরিবো যেনে তমার দেজছানত্ ঝড়র বদলে আগাজত্তুন ধূল্যে আর বালু পড়ে। সিয়েনি তমা উগুরে পুরিবো যেদক্কন সং তুমি ভস্ত ওই ন-যঅ। 25 লগেপ্রভু এধোক্ক্যেন গুরিবো যেনে তুমি তমার শত্রুগুনোর মুজুঙোত্ উদিই যঅ। তুমি এককিত্তেন্দি তারারে আক্রমণ গুরিবা মাত্তর্ তারা মুজুঙোত্তুন ধেই যেবাক সাত কিত্তেত্তুন। পিত্থিমীর অন্য বেক্ রেজ্যর্ মানুচ্চুনে তমা অবস্থা দেগিনে দরে গির্গিরেবাক। 26 তমার মরাকিয়্যেনি অবদে আগাজর পেখ্ আর পিত্থিমীর য়েমানুনোর হানা, আর তারারে ধাবেই দিবাত্তে কনজনে উজেই ন এবাক্। 27 লগেপ্রভু মিসরীয়গুনোরে সেই ফোড়া, আবাং, কাচ্ছোনি আর খস্ পিড়েলোই তমারে দুখ্ দিবো যিয়েনত্তুন কনজনে তমারে গম্ গুরি ন-পারিবো। 28 তে পাগলামি আর চোখ্ কান্দোই আর চিদে-চজ্জানি বর্বাদ্ গুরি দিইনে তমারে আরঅ দুখ্ দিবো। 29 কান্ মান্জ্যে যেধোক্ক্যেনগুরি আন্ধারত্ বিজিরে বিজিরে বেড়ায় সেধোক্ক্যেন গুরিনে তুমি দিনোত্ বিজিরে বিজিরে বেড়েবা; তমার্ কনঅ কামত্ গম্ ন-অবঅ। তমা উগুরে আমিঝে অত্যেচার আর লুট চলিবো; সিয়েনত্তুন তমারে উদ্ধোর গুরিবাত্তে কনজনে উজেই ন-এবাক্। 30 যে মিলেবো সমারে তর্ মেলা ঠিগ্ অবঅ অন্য মান্জ্যে তার্ ইজ্জত বরবাদ্ গুরিবাক। তুমি ঘর বানেবা মাত্তর্ সেক্কে থেই ন-পারিবা। তুমি আংগুর ক্ষেত গুরিবা মাত্তর্ তার্ ফলুন মুয়োত দি ন-পারিবা। 31 তমার চোগো মুজুঙোত্ তমা গোরুগুন কাবা অবঅ, মাত্তর্ তার্ এক ভাগ য়েরায়ো তমার পেদত্ ন-যেবঅ। তমার গাধাবোরে জোর্ গুরিনে তমা ইত্তুন নেযা অবঅ, মাত্তর্ সিয়েনত্তুন আর ফিরেই দিয়্যে ন-অবঅ। তমার ভেড়াগুন তমার শত্রুগুনোর আদত্ যেইনে পড়িবাক; আর এই বিপদত্ তমারে উদ্ধোর গুরিবাত্তে কনজনে উজেই ন-এবাক। 32 তমার ঝি-পূঅগুনে অন্য জাদর্ আদত্ পড়িবাক। দিনকে দিন তারার এবার্ পথতান্ চেইনে তমার চোক্কুন কান্ ওই যেবাক, মাত্তর্ কিজু গুরিবার বল্ তমা আদত্ ন-থেবঅ। 33 তমার ন-চিন্ন্যে জাদর্ মানুচ্চুনে তমার ভুইয়োর্ ফসলানি আর কাম্গোজ্যে ফলুন ভোগ গুরিবাক আর তমার পুরো জীংকানিবর্ তুমি বানা অত্যেচার আর ভান্ন্যেই বেবহারানি ভোগ গুরিবা। 34 তুমি যিয়েনি দেগিবা সিয়েনি তমারে পাগল বানেব। 35 লগেপ্রভু তমার আদুগুনোত্ আর টেঙত্ এধোক্ক্যেন বিষফোড়া দিইনে দুখ্ দিবো যিবে কনদিনঅ গম্ ন-অবঅ। সে ফোড়াগুন্ তমার টেঙর্ তলেত্তুন্ ধুরি মাদাবোর্ তাল্লো সং বেক্ জাগানিত্ অবঅ। 36 যিবেরে তুমি রাজা বানেইনে তমা উগুরে বোজেবা লগেপ্রভু তারে আর তমারে বোন্দী গুরি নেযেবাত্তে এমন্ এক্কো জাদর্ আদত্ ফেলেব যিবেরে তুমিয়ো ন-জান আর তমার পুরোণি মানুচ্চুনেয়ো ন-জানন্। সিয়েনত্ তুমি তক্তা আর পাত্তরর্ দেবেদামূত্তির পূজো গুরিবা। 37 লগেপ্রভু তমারে যিদুক্কুন জাদ ভিদিরে ধাবেই দিবো তারা তমার অবস্থা দেগিনে দরে গির্গিরে উদিবাক, আর তারা তমারে ঈস্ গুরিবাক আর ভান্ন্যেই কধান্দি গুবিবাক। 38 তুমি বোউত্ লাগেবা মাত্তর্ কাবিবাদে কম, কিত্যে পুগ্-যুগ্কুনে ফলুন খেই ফেলেবাক। 39 তুমি আংগুর ক্ষেত গুরিবা আর সিগুনোর যত্তনঅ নেযেবা তো পুগ্কুনে তার ফল্লো হেই ফেলেবাক বিলিনে তুমি সিবে তুলিয়ো ন-পারিবা আর তার্ রসছানঅ হেই ন-পারিবা। 40 তমার পুরো দেজছানত্ জলপাই গাজ্ থেবাক মাত্তর্ তার ফলুন পড়িবাক বিলিনে জলপাইর তেল মাজানা তমার ন-অবঅ। 41 যিদুক্কুন ঝি-পূঅ তমার অবাক তারা তমার কায়কুরে ন-থেবাক, কিত্যে তারারে বোন্দী গুরিনে নেযা অবঅ। 42 ঝাঁগে ঝাঁগে পুগ্-যুগ্ এইনে তমার দেজর গাজ-বাজ আর ফলুন হেই ফেলেবাক্। 43 তমা ভিদিরে বজত্তি গোজ্যে অন্য জাদর মানুচ্চুনে তমা উগুরে উদিবাক আর তুমি লামিবা তারার তলেন্দি। 44 তারা তমারে কজ্জ দিবাক মাত্তর্ তুমি তারারে কজ্জ দিই ন-পারিবা। তারা থেবাক্কে তমা মাদা উগুরে আর তুমি থেবা তারার টেঙর্ তলেন্দি। 45 এদক্কানি অভিশাব্ তমা উগুরে লামি এবঅ। তুমি তমার গোজেন লগেপ্রভুর বাধ্য ন-অনার কারনে আর তে যেদক্কানি উগুম আর সুদোম দিয়্যে সিয়েনি ন-পালানার কারনে এদক্কানি অভিশাব তমার পিজেন্দি লোড়ে লোড়েই এবঅ আর তমারে ধুরি ফেলেব আহ্ যেরেন্দি তুমি শেজ্ ওই যেবা। 46 এই অভিশাপ্পানি আমক্ অইদে চিহ্নো আর আমক্ কাম্ ইজেবে তমার আর তমার বংশধরুনো উগুরে জিংকানিবর্ থেবঅ। 47-48 সুদিনোত্ খুজি মনে আর খুজি সমারে তমার গোজেন লগেপ্রভুরে সেবা ন-গরানার কারনে হানা-উরোনার অভাব, পানি খাস্ আর অমকদ অভাব ভিদিরে তুমি সে বেক্ শত্রুগুনোরে সেবা গুরিবা যিগুনোরে লগেপ্রভু তমার বিরুদ্ধে পাধেই দিবো। তে তমার গত্তনাত্ লুয়োর জুঙোল্ চাপি রাগেব যেদক্কন সং তুমি শেজ্ ওই ন-যঅ। 49 লগেপ্রভু দূরোত্তুন, পিত্থিমীর শেজ্ দুঝিত্তুন এমন্ এক্কো জাদরে তমার বিরুদ্ধে লোই আনিবো যিগুনোর কধানি তুমি ন-বুঝিবা। ঈগল পেগো ধোক্ক্যেন গুরি সে জাত্তো ছোঁ মারিনে তমা উগুরে লামি এবঅ। 50 তারা অবাক্কে সে এক বাবোত্যে চেহারার মানুচ্। তারা বুড়োগুনোরে সর্মান ন-গুরিবাক আর ঝি-পূঅগুনোরে দোয়েমেয়্যে ন-গুরিবাক। 51 তারা তমার য়েমান ছঅ্গুন আর ক্ষেদর ফলুন হেই ফেলেবাক আর যেরেন্দি তুমি শেজ্ ওই যেবা। তারা তমাত্তে কনঅ ফল, নুয়ো আংগুরো-রস বা তেল বা গোরুর ছঅ বা ভেড়ার ছঅ বাগি ন-রাগেবাক, আর যেরেন্দি তুমি শেজ্ ওই যেবা। 52 তারা তমার আদামানি আর শঅরানি ঘিরিনে রাগেবাক, আর যেরেন্দি তমার উজু আর দর দেবালানি ভাঙি পুরিবো যিয়েন উগুরে তুমি এদক আজা গরর্। তমা গোজেন লগেপ্রভু যে দেজ্ছান তমারে দিবাত্তে যার্ সে দেজর্ বেক্ আদামানি আর শঅরানি তারা ঘিরিবাক। 53 সিয়েনি ঘিরি রাগেবার অক্তত্ শত্রুগুনে তমারে এমন্ দুগোত্ ফেলেবাক, তুমি তমার নিজোর পূঅগুনোরে হেবা, অত্তাৎ তুমি তমার গোজেন লগেপ্রভুর দিয়্যে ঝি-পূঅগুনোর য়েরানি হেবা। 54 সেক্কে তমা ভিদিরে যে মানুচ্চো নরম খাচ্চ্যদর্ আর গম্ অবস্থায় মানুচ্ ওইয়্যে, তার্ মনান এধোক্ক্যেন অবদে, নিজো ভেইয়ো উগুরে, বা কোচ্পেইয়্যে মোগো উগুরে, বা জেদা ঝি-পূঅগুনো উগুরে তার্ কনঅ দোয়্যেমেয়্যে ন-থেবঅ। 55 যে পূঅবোর য়েরানি তে হেবঅ তার্ এক্কেনায়ো তে তারারে ন-দিবো, কিত্যে শত্রুগুনে যেক্কে তমার আদামানি আর শঅরানি ঘিরি রাগেইনে তমারে দুগোত্ ফেলেবাক সেক্কে ইয়েনি বাদে আর কনঅ হানা তা ইদু ন-থেবঅ। 56 তমা ভিদিরে যে মিলেবো নরম খাচ্চ্যদর্ আর এমন্ গম্ অবস্থায় মানুচ্ ওইয়্যে যে তাত্তুন্ কনদিন মাদিত্ টেং ফেলা ন অয়, তার্ আর তার কোচ্পেইয়্যে নেক্কো আর ঝি-পূঅগুনো উগুরে কনঅ দোয়েমেয়্যে ন থেবঅ। 57 পূঅ জোর্মেবার পরেন্দি সেই পূঅবো আর তার পরেন্দি কিয়্যেগানত্তুন নিগিলি এচ্চ্যে ফুল্লো, ইয়েনর্ কনগানই তে তারারে হেবাত্তে ন-দিবো। তমারে ঘিরি রাগেবার অক্তত্ তমার শত্রুগুনে যেক্কে তমারে দুগোত্ ফেলেবাক সেক্কে তে নিজেই সে ফুল্লো আর পূঅবো জুরো গুরি হেবঅ। 58 এ বোইবোত্ যেদক্কানি রীদি-সুুদোম লেগা আঘে সিয়েনি যুনি তুমি গমেডালে মানি ন-চলঅ, অত্তাৎ তমার গোজেন লগেপ্রভু বিলিনে ইয়েন যে বাঈনী গুরিবার আর দর্ জাগেয়্যে নাঙান্ রোইয়্যে যুনি তুমি সে নাঙানরে সর্মান ন-গরঅ, 59 তো লগেপ্রভু তমার আর তমার বংশধরুনো উগুরে এধোক্ক্যেন জদবদে আর দর্গরেপারা ধোক্ক্যেন আঘাত আর দুখ্ দিয়্যে পিড়েলোই এজে যিয়েনি ভালোক্ দিন ধুরিনে চলিবো। 60 মিসর দেজত্ যেদক্কানি পিড়ে দেগিনে তুমি দোরেদা, তে সেই বেক্কানি তমা উগুরে আনিবো আর সিয়েনি তমারে ন-ছাড়িবো। 61 ইয়েনি বাদে লগেপ্রভু এদক্কানি পিড়ে আর আঘাত তমা উগুরে আনিবো যিয়েনির কধা এ রীদি-সুদোমর্ বোইবো ভিদিরে লেগা নেই, আর যেরেন্দি তুমি শেজ্ ওই যেবা। 62 তমা মান্জ্যর সোংখ্যে আগাজর্ তারা ধোক্ক্যেন অলেয়ো তমার গোজেন লগেপ্রভু উগুরে অবাধ্য অনার কারনে তুমি সেক্কে বানা থরা কয়েকজনই বাঁজি থেবা। 63 যে খুজিলোই লগেপ্রভু তমারে ভালেদি গোজ্যে আর তমার মান্জ্যর সোংখ্যে বাড়েই দিয়্যে সেই খুজিলোই সেক্কে তে তমারে ভস্ত গুরিনে শেজ্ গুরি দিবো। যে দেজ্ছান তুমি গজক্ গুরিবাত্তে যর্ সে দেজ্ছানত্তুন শিঙোর্ সুদ্ধো তমারে তুলি ফেলা অবঅ। 64 “সে পরেন্দি লগেপ্রভু পিত্থিমীর এক দুঝিত্তুন অন্য দুঝি সং বেক্ জাদর্ ভিদিরে তমারে ছিদি দিবো। তুমি সিয়েনত্ তমার আর তমার পুরোণিমানুচ্চুনোর হবর্ ন-পেইয়্যে গাজর আর পাত্তরর্ দেবেদামূত্তির পূজো গুরিবা। 65 সেই বেক্ জাদ্তুনো ভিদিরে তুমি শান্তি ন-পেবা, আর তমার জিরেবাত্তে কনঅ জাগা ন-থেবঅ। সিয়েনত্ লগেপ্রভু তমার মনানি ভান্ন্যেই চিদেলোই ভোরেই তুলিবো আর আজা গুরি চেই রোইয়্যে চোখ্কুন্ তমার চুলেই উদিবাক, আর তমার মনানি নিরাজাই ভোরেই দিবো। 66 কি অবঅ ন-অবঅ এই চিদেগান তমার অবঅ; আর দিন-রেত্ দর্দর্ মনভাব্পোই তুমি বাঁজি থানা পৌইদ্যেনে কনদিনঅ নিশ্চিত ওই ন-পারিবা। 67 তুমি বেন্যেমাদান্ কবা, ‘সাজোন্যে ওক্,’ আর সাজোন্যেমাদান্ কবা, বেন্যে ওক্, কিত্যে তমার মনানি দরে ভরা থেবঅ আর চোক্কুনে বোউত্ কিজু দেগিবো। 68 মিসরত যানা পৌইদ্যেনে মুই তারারে কোইয়োং, সেই পথতানন্দি আর কনদিনঅ তমাত্তুন টেং দিয়্যে ন-পুরিবো; মাত্তর্ লগেপ্রভু সেক্কে জাহাজত্ ভোরেইনে তমারে মিসরত ফেরৎ পাদেব। সিয়েনত্ তুমি চাগর আর চাগরানি ইজেবে শত্রুগুনো ইদু নিজোরে বিজি দিবাত্তে চেবা মাত্তর্ কনজনে তমারে ন-কিনিবাক্।” |
Copyright © 2021 Bangladesh Bible Society
Bangladesh Bible Society