দ্বি’লম্বর বিররণ 26 - Chakma Bibleপত্তমে তুল্যে ফসল আর দশমাংশ 1 তমার গোজেন লগেপ্রভু যে দেজ্চান সোম্বোত্তি ইজেবে তমারে দিবাত্তে যার্ তুমি সিয়েন্ গজক্ গুরিনে যেক্কে সিয়েনত্ বজত্তি গরা ধুরিবা, 2 সেক্কে তমার গোজেন লগেপ্রভুর দিয়্যে সেই দেজর্ ভুইয়োত্ তুমি যেদক্কানি ফসল ফোলেবা তার্ পত্তমে তুল্যে কিজু ফসল লেইয়োত্ রাগেবা। তমার গোজেন লগেপ্রভু নিজোরে ফগদাং গুরিবাত্তে যে জাগাগান তার থেবারজাগা ইজেবে বেঈ নেযেব সে ফসলানি তুমি সিয়েনত নেযেবা। 3 সেক্কে যে ধর্মগুরুবো থেবঅ তুমি বেক্কুনে তারে কবাদে, তর্ গোজেন লগেপ্রভু ইদু এচ্চ্যে মুই স্বীগের গরঙর্, তে যে দেজ্ছান আমারে দিবো বিলিনে আমার পুরোণি মানুচ্চুনো ইদু শমত খেইয়্যে সেই দেজ্ছানত্ মুই এই যেইয়োং। 4 সেক্কে ধর্মগুরুবো তমার আদত্তুন সেই বেক্ লেইয়ুন নেযেইনে তমার গোজেন লগেপ্রভুর ডালিপূজোবো মুজুঙোত্ রাগেবা। 5 সে পরেন্দি তুমি বেক্কুনে তমার গোজেন লগেপ্রভুর মুজুঙোত্ কবাদে, আমার পুরোণি মানুচ্চো এলঅ এক্কো অরামীয় বেড়াজ্যে। তে বানা কয়েক্কো মানুচ্ নেযেইনে মিসর দেজত্ যেয়েগোই আর সিয়েনত্ বজত্তি গুরিবার অক্তত তা মাধ্যমে এক্কো দাঙর্ আর বোলী জাদর জর্ম ওইয়্যে যিবের মান্জ্যর সোংখ্যে এলাক ভালোক্কুন। 6 মাত্তর্ মিসরীয়গুনে আমা লগে গম্ বেবহার ন-গরন। তারা আমারে দুখ্ দুয়োন আর আমা উগুরে এক্কান যাগুলুক্কে কামর্ বুধি চাপি দুয়োন। 7 সেক্কে আামি আমার পুরোণি মানুচ্চুনোর গোজেন লগেপ্রভুর ইদু কানাকুদি গুরিলোং। তে আমার কানানিগান শুনিলো, আমার দুখ্ আর কামানি দেগিলো; আর দেগিলোদে আমা উগুরে কেধোক্ক্যেন অত্যেচার গরা ওইয়্যে। 8 সেনত্যে তে তার দরমড় আর বোলী আঢ্তান্ বাবেইনে দর্ জাগাইদে কাম্ আর আমক্ অইদে চিহ্নো আর আমক কাম্ দেগেইনে মিসর দেজত্তুন আমারে নিগিলেই আনিলো। 9 তে আমারে ইয়েনত্ আন্যে আর দুধ আর মধুলোই ভোজ্যে এ দেজ্ছান আমারে দিয়্যে। 10 সেনত্যে ও লগেপ্রভু, তর্ দিয়্যে ভুইয়োর্ পত্তমে তুল্যে ফসল মুই তইদু আন্যং। ইয়েন কোইনে তমার গোজেন লগেপ্রভুর মুজুঙোত্ তুমি তমার লেইয়ুন রাগেবা আর মাদা নিগিরিনে তারে ভোক্তি জানেবা। 11 তমার আর তমার গিরিবোরে তমার গোজেন লগেপ্রভু যেদক্কানি গম্ গম্ জিনিস দিইনে আশিদ্বাদ গোজ্যে সিয়েনি লোইনে তুমি, লেবীয়গুনে আর তমা ভিদিরে বিদেশী বাসিন্দাগুনে ফুত্তি গুরিবা। 12 পত্তি তিন বজরত তমার বেক্ ফসলানির দশ ভাগর এক ভাগ আদায় গরানা শেজ্ অলে সিগুন তুমি লেবীয়, বিদেশী আদাম্মেগুন, মা-বাপ নেইয়্যে আর রানি মিলেগুনোরে দিবা। সেক্কে সেই মানুচ্চুনোর তমার দেজ ভিদিরে খেই-দেই ঈল্ অবঅ। 13 সে পরেন্দি তুমি বেক্কুনে তমার গোজেন লগেপ্রভুরে কবাদে, মুই তর্ উগুম মজিম মর্ আয়ত্তুন্ তর্ নাঙে যুদো গুরি রাগেয়্যে ভাগ্কো ঘরত্তুন নিগিলেই আনিনে লেবীয়গুনোরে, বিদেশী বাসিন্দাগুনোরে, মা-বাব নেইয়্যে আর রানিমিলেগুনোরে দুয়োং। তর্ উগুম মুই অমান্য ন-গরং বা সিয়েনির এক্কানঅ মুই পুরি ন-পেলাং। 14 মরাগুনোত্যে আবিলেচ্ গরানা অবস্থায় মুই তর্ নাঙে যুদো গুরি রাগেয়্যে ভাগত্তুন কনঅ কিজু ন-খাং, বা অসিজি অবস্থায় সিগুন ঘরত্তুন ন-নিগিলাং, বা সিয়োত্তুন কনঅ ভাগ মরা মানুচ্চুনোর নাঙে দান ন-গরং। মুই মর্ গোজেন লগেপ্রভুর কধামজিম কাম্ গোজ্যং। তর্ উগুম গোজ্যেত্তুন বেক্কানিই মুই গোজ্যং। 15 ও লগেপ্রভু, তর্ পবিত্র থেবার জাগা স্বর্গত্তুন তুই তলেন্দি রিনি চাহ্ আর তঅ মানুচ্চুনোরে, অত্তাৎ ইস্রায়েলীয়গুনোরে তুই আশিদ্বাদ গর্। আমার পূরোণি মানুচ্চুনো ইদু তর্ শমক্ খেইয়্যে এগেম্ মজিম দুধ আর মধুলোই ভোজ্যে যে দেজ্ছান তুই আমারে দুয়োচ্ সে দেজ্ছানরেয়ো আশিদ্বাদ গর্। লগেপ্রভুর উগুম পালানা 16 “তমার গোজেন লগেপ্রভু এচ্চ্যে তমার এই বেক্ সুদোমানি আর উগুমানি মানি চলিবার উগুম দের্। তুমি উঝিয়ার ওইনে বেক্ মনান-পরাণান দিইনে সিয়েনি পালন গুরিবা। 17 এচ্চ্যে তুমি খাম্ খেলাদে, লগেপ্রভু তমার গোজেন আর তার পধন্দি তুমি চলিবা। তুমি খাম খেলাদে যে, তার সুদোমানি, উগুমানি আর হুকুমানি তুমি পালন গুরিবা আর তার কধামজিম্ চলিবা। 18 আর লগেপ্রভুয়ো এচ্চ্যে ফগদাং গোজ্যেদে, তার এগেম্ মজিম তুমি তারই মানুচ্ আর তার্ নিজোর সোম্বোত্তি ওইয়ো। তার বেক্ উগুমানি তমাত্তুন মানি চলা পড়িবো। 19 তে ফগদাং গুরিলোদে, নাঙ্ গিনেনা, সুনাং আর বাঈনী গরানার্ কিত্তেত্তুন তার সৃট্টির অন্য জাদ্তুনো উগুরে তে তমারে জাগা দিবো আর তমার গোজেন লগেপ্রভুর এগেম্ মজিম তুমি অবা তার নাঙে এক্কো যুদো গোজ্যে জাদ্।” |
Copyright © 2021 Bangladesh Bible Society
Bangladesh Bible Society