দ্বি’লম্বর বিররণ 25 - Chakma Bible

¹ যুনি মানুচ্চুনো ভিদিরে কোল্-কোজ্যে দেগা যায় আর সিয়েন আদালদত্‌ নেযা অয় সালে বিচারক্কুনে তার্‌ বিচের গুরিনে নিদ্দুজীবোরে নিদ্দুজী আর দুজীবোরে দুজী বিলিনে রায় দিবাক।

² সে রায়ত্‌ দুজীবোরে যুনি পিদিবার উগুম দিয়্যে অয় সালে বিচেরক্‌কো তারে মাদিত্‌ পোড়েইনে দুষ অনুসারে যে কইয়ান আঘাত্ তার্‌ পাওনা সিয়েনি তার নিজোর মুজুঙোত্ দিবো,

³ মাত্তর্‌ চোল্লিশচুয়োর্‌ বেশ্‌ আঘাত তারে দি ন-পারিবো। ইয়েনত্তুন বেশ্‌ দিলে এক্কো ইস্রায়েলীয় ভেইয়োরে বেক্কুনোর মুজুঙোত্‌ অসর্মান গরা অবঅ।

⁴ শোজ্য মাড়িবার সলাবোত্‌ বলদর মুয়োনত্‌ মোগোনী খাজা ন-বান্য।

⁵ ভেইয়ুনে এক্কো গিরি ওইনে বজত্তি গুরিবার সলাবোত্‌ যুনি এক্কো ভেই পূঅ ন পেইয়্যে গুরি মুরি যায়, সালে তার রানি মিলেবো গিরির্ বারেন্দি কাররে লোয় ন পারিবো। তা নেক্কোর ভেইয়ুনে তারে লোয় পারিবাক আর তা উগুরে নেক্কোর ভেইয়ুনোর যে কামান্ সিয়েন পালন গরা পুরিবো।

⁶ সালে তার্‌ যে পত্তম্ পূঅ অবঅ তে সেই মোজ্জ্যেদে ভেইবোর নাঙান্‌ রোক্ষে গুরিবো আর সে ভেইবোর নাঙান্‌ ইস্রায়েলীয়গুনো ভিদিরেত্তুন বাদ দিয়্যে ন যেবঅ।

⁷ মাত্তর্‌ তে যুনি ভেইবোর্‌ মোক্কোরে লবাত্তে ন-চায় সালে সে মিলেবো আদামত বা শঅরর্‌ গেদোত্‌ বুড়ো নেতাগুনো ইদু যেইনে কবদে, মর্‌ নেক্কোর ভেই ইস্রায়েলীয়গুনো ভিদিরে তার ভেইয়ুনোর নাঙানি রোক্ষে গুরিবাত্তে রাজী নয়। মঅ উগুরে তার্‌ যে ভারান্ সিয়েন তে পালন গুরিবাত্তে ন-চায়।

⁸ সেক্কে সিদুগোর্ বুড়ো নেতাগুনে সেই মানুচ্চোরে ডাগিনে বুঝেবাক। ইয়েনর পরেন্দিয়ো যুনি তে কবাত্তে চায়দে, তে তারে লবাত্তে রাজী নয়,

⁹ মাত্তর্‌ তার ভেইবোর মোক্কো বুড়ো নেতাগুনোর মুজুঙোত্‌ মানুচ্চো ইদু যেইনে তার্‌ টেঙত্তুন এক জড়া জদা খুলি নেযেব আর তার মুয়োনত্‌ সেফ্‌ ফেলেইনে কবদে, ভেইয়োর বংশবো যে রোক্ষে গুরিবাত্তে ন-চায় তা উগুরে ইয়েনোই গরা অয়।

¹⁰ ইস্রায়েলীয়গুনো ভিদিরে সে মানুচ্চোর বংশবোরে কুয়া অবঅ জদা আরেইয়্যে বংশ।

¹¹ দ্বিজন মানুচ্‌ পিদেপিদি গুরিবার সলাবোত্‌ যুনি তারার একজনর মোক্‌ তা নেক্কোরে অন্যজনর আদত্তুন রোক্ষে গুরিবার আজাই কায়কুরে যেইনে অন্য মানুচ্চোর চুনুগুলোবো চিবিনে ধরে,

¹² মাত্তর্‌ তুমি সে মিলেবোর্ আত্তান্‌ কাবি ফেলেবা। তারে তুমি কনঅ মেইয়্যে ন-দেগেবা।

¹³ তমার থৈইল্যেগুনোত্‌ যেন একই মাপ দেগেবাত্তে দ্বিবে গুরিনে সিল্‌ ন-থায়, এক্কো বেশ্‌ ওজনর্ আর এক্কো কম ওজনর্।

¹⁴ তমা ঘরত্‌ যেন এক্কুই মাপ দেগেবাত্তে দ্বিবে গুরি পিলে ন-থায়, এক্কো বেশ্‌ মাবর্‌ আর এক্কো কম মাবর্‌।

¹⁵ তমা গোজেন লগেপ্রভু তমারে যে দেজ্‌ছান দিবাত্তে যার্‌ সিয়েনত্‌ যেনে তুমি ভালোক্‌ দিন বাঁজি থেই পার সেনত্যে তমাত্তুন্‌ ঠিগ্ আর উজিত মাবর সীল্‌ আর পিলে রাগা পুরিবো।

¹⁶ ইয়েনর কারণান্ অলদে, যে ইয়েনি বেক্কানি গরে, অত্তাৎ যে মান্‌জ্যরে ঠোগেইনে বেড়ায় তমার গোজেন লগেপ্রভু তারে ঘিনাই।

¹⁷ তুমি মিসর দেজত্তুন নিগিলি এজানার পরেন্দি অমালেকীয়গুনে পদথ্‌ তমা লগে যিয়েনি গোজ্যন সিয়েনি পুরি ন-ফেলেয়ো।

¹⁸ তমার বল্‌পোজ্যে অবস্থায় যিগুনে পিজেন্দি পোজ্যন্‌ তারা সিগুনো উগুরে আক্রমণ চালেয়োন। তারা গোজেনরে ন-দরান্‌।

¹⁹ তমার গোজেন লগেপ্রভু যে দেজ্‌ছান সোম্বোত্তি ইজেবে গজক্ গুরিবাত্তে তমারে দিবাত্তে যার্‌ সিয়েনত্‌ তমার চেরোকিত্তে শত্রুগুনো সমারে লাড়ে বাজানাত্তুন তে যেক্কে তমারে জিরেবাত্তে দিবো সেক্কে পিত্‌থিমী উগুরেত্তুন্‌ অমালেকীয়গুনোর চিহ্নোগান তমাত্তুন এক্কুবারে পুঝি ফেলা পুরিবো। এ কধাগান তুমি পুরি ন-ফেলেয়ো।