দ্বি’লম্বর বিররণ 24 - Chakma Bible1 মেলা গরানার পরেন্দি যুনি কনজনে মোক্কো ভিদিরে কনঅ দুজ্ দেগিনে তা উগুরে বেজার্ অয় আর ছুড়্ কাবোজ্ লিগিনে তা আদত্ দিইনে তারে ঘরত্তুন্ বিদেয় গুরি দে, 2-3 আর মিলেবো তার্ ঘরত্তুন যেইনে যুনি আর কাররে নেক্ লয় আর তার্ দ্বিলম্বর নেক্কোয়ো যুনি পরেন্দি তারে দোল্ ন-দেগিনে তা উগুরে সেধেক্ক্যেন্ গরে, বা সেই নেক্কো যুনি মুরি যায়, 4 মাত্তর্ তার্ পত্তম নেক্কো, যে তারে ছুড়্ কাবোজ্ দিয়্যে তে তারে আর লোয় ন-পারিবো, কিত্যে তে অসিজি ওই যেইয়্যে। এধোক্ক্যেন লো-লি অনা লগেপ্রভু ঘিনাই। সোম্বোত্তি ইজেবে যে দেজ্ছান তমারে গোজেন লগেপ্রভু তমারে দিবাত্তে যার্ তুমি ইঙিরিনে সিয়েন উগুরে পাপ ডাগি ন-আনিবা। 5 কয়েকদিন অলঅ মোক্ লোইয়্যে এবাবোত্যে কনঅ মান্জ্যরে যুদ্ধোত্ পাদানা ন-চলিবো আর তা উগুরে অন্য কনঅ কামর্ বুদি চাপি দেনা ন-চলিবো। তে যিবেরে মোক্ লোইয়্যে তা খুজিত্তে এক বজর সং এই কামানিত্তুন্ রেহাই দিইনে তারে ঘরত্ থেবাত্তে দিয়্যে পুরিবো। 6 কজ্জর্ বন্ধক ইজেবে কারঅ চড়্গা কল্ বা তা উগুরে পাত্তরানঅ নেযানা ন-চলিবো, কিত্যে সেক্কে মানুচ্চোর্ বাঁজি থেবার্ উপাইয়ান বন্ধক নেযা অবঅ। 7 যুনি দেগা যায়দে, কনঅ মানুচ্ কনঅ ইস্রায়েলীয় ভেইয়োরে চুর্ গুরি নেযেইনে চাগর্ ইজেবে বেবহার গোজ্যে বা বিজি দিয়্যে, তো সে চুর্বোত্তুন্ মরা পুরিবো। তমা ভিদিরেত্তুন্ তুমি এবাবোত্যে ভান্ন্যেইয়ানি শেজ্ গুরি ফেলেবা। 8 চামঅ পিড়ে দেগা দিলে তমাত্তুন্ উজিয়ার্ উয়া পুরিবো আর লেবীয় ধর্মগুরুগুনে যে উগুম দিবাক সিয়েনি দোলেডালে পালন গরা পুরিবো। মুই তারারে যে উগুম দুয়োং তমাত্তুন্ উজিয়ার্ ওইনে সেধোক্ক্যেনগুরি চলা পুরিবো। 9 মিসর দেজত্তুন্ নিগিলি এজানার্ পরেন্দি পদথ্ তমার গোজেন লগেপ্রভু মরিয়মর পৌইদ্যেনে যে সুুদোমানি দিয়্যে সিয়েনি পুরি ন-ফেলেয়ো। 10 কাররে কিজু উদোর্ দিইনে বন্ধক ইজেবে কনঅ জিনিজ্ নিবাত্তে তা ঘরর্ ভিদিরে ন-যেয়ো। 11 তুমি বারেন্দি থাক্কো আর যিবেরে তুমি উদোর্ দুয়োর্ তারে বন্ধক দিবার জিনিস্ছান বারেন্দি তমা ইদু লোই এবাত্তে দুয়ো। 12 মানুচ্চো যুনি নাঢা অয় সালে তার্ বন্ধক রাগেয়্যে কাবড়ান নিজো ইদু রাগেই দিইনে ঘুম ন-যেইয়ো। 13 সাজোন্যে অক্তত্ তারে সিয়েন ফিরেই দিয়্যে পুুরিবো যেনে তে সিয়েন্ কিয়্যেত্ দিইনে ঘুম্ যেই পারে। সেক্কে তে তমাত্তে ভালেদি চেবঅ, আর তমার গোজেন লগেপ্রভুর চোগোত্ সেই ফিরেই দিবার কামান্ অবদে তমা পক্ষে তার আওজ মজিম্ চলানা। 14 পাওনা পৌইদ্যেনে কনঅ নাঢা মানুচ্ আর দিন মজুরো উগুরে অন্যেয় ন-গুরিবা-তে তমার কনঅ ইস্রায়েলীয় ভেই ওক্ বা তমার দেজর্ অন্য জাদর্ কনঅ আদাম্মে ওক্। 15 বেলান ডুবোনার আগেন্দি তুমি তার্ বেতনুন্ দি দিবা, কিত্যে তে নাদা মানুচ্ আর তে বেতন উগুরেই তে নির্ভর গরের্। সেধোক্কেন্ ন-গুরিলে তমাত্তুন পাপ অবঅ, আর তে তমা বিরুদ্ধে লগেপ্রভু ইদু চিগোন্ ওইনে বিচের্ চেই পারে। 16 ঝি-পূঅগুনোর পাপর কারণে বাপ্পোত্তুন বা বাপ্পোর্ পাবত্তে ঝি-পূঅগুনোরে মারে ফেলেই ন-পারিবো। বেক্কুনোত্তুন্ তার নিজোর পাবত্তে মরা পুরিবো। 17 বিদেশী বাসিন্দা বা অসহায় উগুরে অন্যেয় বিচের অবাত্তে ন-দুয়ো। কনঅ রানিমিলেত্তুন বন্ধক ইজেবে তার্ কিয়্যের্ কাবড়ান্ ন-নেযেয়ো। 18 মনত্ রাগেয়ো, মিসর দেজত্ তুমিয়ো চাগর্ এলা আর তমার গোজেন লগেপ্রভু সিয়োত্তুন্ তমারে উদ্ধোর গুরি আন্যে। সেনত্যেই মুই তমারে ইয়েনি গুরিবার উগুম দুয়োঙর্। 19 তমার ভুইয়োর ফসলানি কাবিবার পরেন্দি যুনি শোজ্যর্ কনঅ বনা তুমি লগে লগে নিবাত্তে পুরি পেলঅ মাত্তর্ সিবে আর ফিরেই আনিবাত্তে ন-যেয়ো। বিদেশী বাসিন্দা, অসহায় আর রানিমিলেগুনোত্তে সিগুন থোই দুয়ো। সেক্কে তমার গোজেন লগেপ্রভু বেক্ কামানিত্ তমারে আশিদ্বাদ গুরিবো। 20 জলপাই পাড়িবার অক্তত্ তুমি এক্কো ডেলাত্তুন দ্বিবার ফল পাড়িবাত্তে ন-যেয়ো। যিবে থেই যেবঅ সিবে বিদেশী বাসিন্দা, অসহায় আর রানিমিলেগুনোত্তে থোই দুয়ো। 21 তমার আংগুর্ ক্ষেদর আংগুর্ তুলিবার অক্তত্ তুমি একই ডেলাত্তুন দ্বিবার্ আংগুর ন-তুল্য। যিগুন থেই যেবাক সিগুন বিদেশী বাসিন্দা, অসহায় আর রানিমিলেগুনোত্তে রাগেই দুয়ো। 22 পুরি ন-ফেলেয়ো তুমিয়ো মিসর দেজত্ চাগর্ এলা। সেনত্যে মুই তমারে এদক্কানি গুরিবাত্তে উগুম দুয়োঙর্। |
Copyright © 2021 Bangladesh Bible Society
Bangladesh Bible Society