দ্বি’লম্বর বিররণ 23 - Chakma Bibleকদক্কানি মানা 1 যিবের্ বিজেবো বাঢি দিয়্যে ওইয়্যে বা চুনুগুলোবো কাবি ফেলা ওইয়্যে তে লগেপ্রভুর মানুচ্চুনো সমাজত্ মিজেই ন-পারিবো। 2 কনঅ জার্গো পূঅ লগেপ্রভুর মানুচ্চুনো সমাজত্ মিজেই ন-পারিবো; তার্ চৌদ্দো গুট্টিয়েও কনজনে সিয়েন গুরি ন-পারিবাক্। 3 কনঅ অম্মোনীয় বা মোয়াবীয় লগেপ্রভুর মানুচ্চুনো সমাজত্ মিজেই ন-পারিবাক্; তার্ চৌদ্দো গুট্টিয়েও কনজনে সিয়েন কনদিনঅ গুরি ন-পারিবাক্। 4 মিসর দেজত্তুন্ নিগিলি এজানার্ পরেন্দি তমার যেবার্ পদথ্ তারা হানা আর পানি লোইনে তমা ইদু উজেই ন-এজন, মাত্তর্ তমারে অভিশাব দিবাত্তে তারা অরাম-নহরয়িম দেজর্ পথোর শঅরত্তুন্ বিয়োরর পূঅ বিলিয়মরে টেঙা দিইনে লোই এচ্চ্যন। 5 মাত্তর্ তমার গোজেন লগেপ্রভু বিলিয়মর কধালোই ন-শুনে; তমারে কোচ্পায় বিলিনে তে এধোক্ক্যেন্ গোজ্যে যেনে সেই অভিশাপ্পান তমার আশিদ্বাদ ওই উদে। 6 তুমি যেদকদিন বাঁজিবা সেদকদিন ইগুনোরে কনঅ উপকার বা ভালেদির্ চেট্টা ন-গুরিবা। 7 মাত্তর্ ইদোমীয়গুনোরে তুমি ন-ঘিনেবা, কিত্যে তারা তমার ভেই। মিসরীয়গুনোরেয়ো ন-ঘিনেবা, কিত্যে তারার্ দেজত্ তুমি বিদেশী ইজেবে বজত্তি গোজ্য। 8 তমা ভিদিরে বজত্তি গরানার পরেন্দি তিন আজুত্তুন ধুরিনে ইগুনে লগেপ্রভুর মানুচ্চুনোর সমাজত্ মিজেই পারিবাক্। সৈন্য-তাম্বুলানির্ সিজিগানি রোক্ষ্যে গরানা 9 শত্রুগুনোর বিরুদ্ধে যুদ্দো গুরিবাত্তে যেইনে তাম্বুল ফেলেবার পরেন্দি বেক্ অসিজিগানিত্তুন্ তুমি দূরোত্ থেবা। 10 রেদোত্ বীর্যপাদর্ কারনে যুনি তমাত্তুন কনজনে অসিজি অয়, সালে তাত্তুন তাম্বুলোর বারেন্দি যেইনে থাহ্ পুরিবো। 11 বেল্যেমাদান্ অলে তাত্তুন্ গাদিনে উদো পুরিবো। বেলান্ ডুবোনার পরেন্দি তে তাম্বুলোত্ ফিরি যেই পারিবো। 12 আগিবাত্তে তাম্বুলোর্ বারেন্দি তমার এক্কান জাগা ঠিগ্ গুরি নেযা পুরিবো। 13 তমা আত্যেরানি ভিদিরে মাদি খুঁড়িবাত্তে এক্কান কিজু রাগা পুরিবো। আগিবার্ আগেন্দি তুমি সিয়েন্দোই গাদ্ খুড়িনে ঘুগান্ মাদি জাবেই দিবা। 14 তমারে রোক্ষে গুরিবাত্তে আর তমা শত্রুগুনোরে তমা আদত্ তুলি দিবাত্তে তমার গোজেন লগেপ্রভু তমার তাম্বুলো ভিদিরে ঘুরি বেড়ায়। সেনত্যে তমার তাম্বুলান পবিত্র অবস্থায় রাগা পুরিবো যেনে তমা ভিদিরে জঘন্য কিজু দেগিনে তে তমা ইন্দিত্তুন্ মুয়োন্ ফিরেইনে ন-নেযায়। ভালোক্ বাবোত্যে সুদোম 15 কারঅ চাগর্ যুনি তমা ইদু এইনে আশ্রয় নেযায় সালে তার্ গিরোজর্ আদত্ তারে ফিরেই ন-দুয়ো। 16 সে চাগর্বো তমা ভিদিরে যিয়েনত্ বজত্তি গুরিবাত্তে চায়্ তারে সিয়োদোই বজত্তি গুরিবাত্তে দুয়ো; তারে দুখ্ ন-দুয়ো। 17 কনঅ ইস্রায়েলীয় মিলে যেনে মন্দির-বেশ্যে ন-অয়; কনঅ ইস্রায়েলীয় মরদঅ যেনে মন্দির-বেশ্যে জীংকানি ন-কাদায়। 18 মরদ্ ওক্ বা মিলে ওক্ যে বেশ্যের জীংকানি কাদায় তার্ আয়র্ টেঙাগুন্ মান্যা চিড়েবাত্তে তমার গোজেন লগেপ্রভুর ঘরত্ আনানা ন-চলিবো, কিত্যে এবাবোত্যে মরদ্ আর মিলেরে লগেপ্রভু ঘিনাই। 19 তুমি কনঅ ইস্রায়েলীয় ভেইয়োত্তুন্ সুদ ন-নেযেবা-সেই সুদ্তুন্ টেঙা-পোইজে উগুরে ওক্ বা খাইদে জিনিজো উগুরে ওক্ বা অন্য যে কনঅ জিনিজো উগুরে ওক্। 20 অন্য জাদর্ মানুচ্চুনোত্তুন্ তুমি সুদ নেযেই পার মাত্তর্ কনঅ ইস্রায়েলীয় ভেইয়োত্তুন নয়। এধোক্ক্যেন গুরি আদিলে তুমি যে দেজ্ছান্ গজক্ গুরিবাত্তে যর্ সিয়েনত্ তুমি যিয়েনত্ আঢ্ দিবা সিয়োদোই তমার গোজেন লগেপ্রভু তমারে আশিদ্বাদ গুরিবো। 21 তমার গোজেন লগেপ্রভু ইদু যুনি তুমি কনঅ মানত্ গরঅ সালে সিয়েন্ ছিরেদে দেরী ন-গোজ্য, কিত্যে তমা গোজেন লগেপ্রভু কনদিনঅ সিয়েন্ ইরি ন-দিবো। সিয়েন্ ন-ছিড়েলে তমার্ পাপ্ অবঅ; 22 মাত্তর্ মানত্ ন-গুরিলে পাপ ন-অবঅ। 23 তমার মুয়োন্দি যে মান্যার্ কধানি কবা সিয়েনি তমাত্তুন্ ছিরে পুরিবো, কিত্যে তুমি নিজোর্ আওজে নিজোর্ মুয়োন্দি তমার গোজেন লগেপ্রভু ইদু সেই মান্যাগান্ গোজ্য। 24 অন্য কারর্ আংগুর্ ক্ষেদত্ যেইনে তুমি আওজ মজিম আংগুর্ হেই পারিবা, মাত্তর্ সিগুন্ লোই যেবাত্তে কনঅ কিজুত্ তুলি রাগেই ন-পারিবো। 25 কারঅ শোজ্য ক্ষেদত্ যেইনে তুমি আঢ্তোই শীজেগুন ছিনি পারিবা, মাত্তর্ ফসলর গাজ্ছুনোত্ চারি বাজেই ন-পারিবা। |
Copyright © 2021 Bangladesh Bible Society
Bangladesh Bible Society