দ্বি’লম্বর বিররণ 21 - Chakma Bibleহবর্ ন পেইয়্যে খুনোর পৌইদ্যেনে যিয়েনি গরা পুরিবো 1 তমার গোজেন লগেপ্রভু যে দেজ্ছান গজক্ গুরিবাত্তে তমারে দিবাত্তে যার্ সিদুগোর্ কনঅ মাদত্ অয়ত কাররে খুন্ ওইনে পড়ি থাগদে দেগা যায়, মাত্তর্ কন্না তারে খুন গোজ্যে সিয়েন্ জানা নেই। 2 এ অবস্থায় তমার বুড়ো নেতাগুনে আর বিচেরক্কুনে বারেন্দি যেইনে সে মরাকিয়্যেগানত্তুন্ আদামান আর শঅরানি কুদ্দুর দূরোত্ সিয়েন মাবি চেবাক্। 3 মরাকিয়্যেগানত্তুন্ যে জাগাগান বেগত্তুন্ কায়-কুরে অবঅ সে জাগানর্ বুড়ো নেতাগুনোত্তুন্ এমন্ এক্কো গোরু ছঅ নেযা পুরিবো যিবেরে কনদিনঅ কামত্ ন লাগান্ আর যিবের কাঁনাদ কনদিনঅ জুঙোল্ দিয়্যে ন অয়। 4 যিয়েনত্ কনদিনঅ চাষ গরানা আহ্ বীজ্ ফেলানা ন অয় আর যিয়েনত্ এক্কান গাঙ্ বেঈ যার্, গোরু ছবোরে সেধোক্ক্যেন এক্কান কিঝিঙোত্ তারাত্তুন্ নেযা পুরিবো। সে কিঝিঙোত্ তারা গোরু ছবোরে গত্তনা ভাঙি দিবাক। 5 সে পরেন্দি ধর্মগুরুগুনে, অত্তাৎ লেবি-গুট্টির মানুচ্চুনে মুজুঙেন্দি উজেই যেবাক, কিত্যে সেবা-কাম গুরিবাত্তে, লগেপ্রভুর নাঙে আশিদ্বাদ ফগদাং গুরিবাত্তে আর কোল্-কোজ্জে আর মার্পিদোর বিচের্ গুরিবাত্তে তমার গোজেন লগেপ্রভু তারারেয়ো বেঈ লোইয়্যে। 6 সে পরেন্দি বেগত্তুন্ কায়কুরে আদামান আর শঅরর্ বুড়ো নেতাগুনে গত্তনা ভাঙা গোরু ছবো উগুরে তারার্ আঢ্তানি ধোয়্ ফেলেবাক। 7 ইয়েনর্ পরেন্দি তারা কবাক্কে, এ লো ঝরানা আমি নিজে ন গুরিই আর অদেয়ো ন দেগিই। 8 ও লগেপ্রভু, তর্ উদ্ধোর গোজ্যে ইস্রায়েলীয়গুনোরে তুই ক্ষেমা গর্। এ মানুচ্চোর্ লো-ঝড়ানাত্তে তুই তর্ মানুচ্চুনোরে দায়ী ন গুরিচ্। ইয়েনত্ সে লো-ঝড়ানার্ দুষছানি ক্ষেমা গরা অবঅ। 9 এবাবোত্যেগুরি তুমি নিজো ভিদিরেত্তুন নিদ্দুজী মানুচ্চুনোর লো-ঝড়ানার্ দুষ্চানি ফুঝি ফেলেই পারিবা, কিত্যে সেক্কে লগেপ্রভুর চোগেদি যিয়েনি গম্ সিয়েনিই গরা অবঅ। বন্দি গোজ্যে মিলেবোরে মোক্ লনা 10 শত্রুগুনো সমারে যুদ্ধো গুরিবাত্তে যেইনে যেক্কে তমা গোজেন লগেপ্রভু তমা আদত্ তারারে তুলি দিবো আর তুমি তারারে বানি রাগেবা, 11 সেক্কে যুনি তারা ভিদিরেত্তুন্ কনঅ দোল্ মিলেরে দেগিনে তমার কারত্তুন্ তারে গম্ লাগে সালে তে তারে মোক্ ইজেবে লোই পারিবো। 12 মিলেবোরে তে তার্ ঘরত্ নেযেব। সে পরেন্দি মিলেবো তার্ চুলানি কাবি ফেলেব আর নক্কুন্ কাবি ফেলেব, 13 আর বোন্দি অবার্ অত্তত্ তার্ কিয়্যেত যেদক্কানি কাবড়-চুগোর এল সিয়েনি খুলি ফেলেব। ইয়েনর্ পরেন্দি তা ঘরত্ থেইনে সে মিলেবো পুরো এক মাস তা মা-বাবত্তে আবিলেচ্ গুরিবো। পরেন্দি সে মানুচ্চো তারে মোক্ লোইনে তার নেক্ অবঅ আর মিলেবোয়ো তার্ মোক্ অবঅ। 14 সে পরেন্দি যুনি মিলেবো উগুরে তে বেজার্ অয় সালে তারে যিয়েনত্ আওজ্ যেবাত্তে দিয়্যে পুরিবো। তে তারে বিজি দি ন-পারিবো বা চাগরানী ইজেবে রাগেই ন-পারিবো, কিত্যে তে তারে অসর্মান গোজ্যে। পত্তম পূঅবোর্ পাইদে অধিকারান্ 15 এবাবোত্যে ওই পারে, এক্কো মান্জ্যর দ্বিবে মোক্ আঘে, আর তারার্ একজনরে তে কোচ্পায় অন্যজনরে কোচ্ ন-পায়। তারার দ্বিজনর যুনি পূঅ অয় আর পত্তম পূঅবোর জর্ম অয় সে মোক্কো পেদত্ যিবেরে তে কোচ্ ন-পায়, 16 মাত্তর্ সোম্বোত্তি ভাগ গুরি দিবার অক্তত্ যে মোক্কোরে তে কোচ্ ন-পায় তা পূঅবোরে বাদ দিইনে অন্য মোক্কোর পূঅবোরে পত্তম পূঅবোর পাইদে অধিকারান দেনা ন-চলিবো, কিত্যে যে মোক্কোরে তে কোচ্ ন-পায় তা পূঅবোই আজলে তার্ পত্তম পূঅ। 17 যে মোক্কোরে তে কোচ্ ন-পায় তা পূঅবোরে তা সোম্বোত্তিত্তুন অন্য যে কনঅ পূঅত্তুন দ্বিগুণ ভাগ দিইনে সেই পূঅবো যে পত্তম পূঅ সিয়েন তাত্তুন স্বীগের্ গরা পুরিবো। সেই পূঅবোই তা বাবর্ মরদ পুঅ-বলর্ পত্তম ফল। পত্তম পূঅবোর অধিকারান তাত্তুনোই পাওনা। উল্লোমী পূঅ 18 যুনি কারঅ পূঅ একবুস্যে আর শাজন্ ন-মানিয়ে অয়, যুনি তে কনমতে মা-বাবর্ কধানি ন-শুনে আর তারার্ শাজন ন-মানে, 19 তো তার্ বাপ-মায় তারে তারার আদামত্ আর শঅরর্ গেদোত্ বুড়ো নেতাগুনো ইদু নেযেব। 20 তারা সে বুড়ো নেতাগুনোরে কবাক্কে, আমার এ পূঅবো অমকদ একবুস্যে আর শাজন ন-মানিয়ে; তে আমারে অগ্রাজ্য গুরি চলে। তে মাত্তল্ আর টেঙা-পৌইজ্যে উড়েই দে। 21 সেক্কে সিদুগোর্ বেক্ মরত্তুনে তারে পাত্তর্ মেলা দিইনে মারে ফেলেবাক। ইঙিরিনে তমা ভিদিরেত্তুন সে ভান্ন্যেইয়ানি শেজ্ গুরি দিয়্যে পুরিবো। সেক্কে ইস্রায়েলীয়গুনে বেক্কুনে এ কধাগান শুনিনে দোরেবাক্। অন্য সুদোমানি 22 যুনি কনঅ মানুচ্ মরণর সাজা পাইদ্যে ধোক্ক্যেন কনঅ দুজ্ গরে আর তারে মারে ফেলেইনে গাজত্ টাঙেনে রাগা অয়, 23 মাত্তর্ বেন্যেমাদান্ সং তার্ কিয়্যেগান গাজত্ টাঙেই রাগে ন-পারিবো। সেদিন্যে তারে গোর্ দিয়্যে পুরিবো, কিত্যে গাজত্ টাঙেই রাগাইদে মানুচ্চো গোজেনর অভিশাব পেইয়্যে। সোম্বোত্তি ইজেবে যে দেজ্ছান তমারে গোজেন লগেপ্রভু তমারে দিবাত্তে যার্ সিয়েন তুমি অসিজি ন-গুরিবা। |
Copyright © 2021 Bangladesh Bible Society
Bangladesh Bible Society