দ্বি’লম্বর বিররণ 20 - Chakma Bibleযুদ্ধোত্ যানা 1 যুদ্ধো গুরিবাত্তে যেইনে শত্রুগুনোর্ পক্ষে তমাত্তুন্ ঘোড়া, রথ আর সৈন্যদল বেশ্ দেগিনে তুমি ন দোরেবা, কিত্যে তমার গোজেন লগেপ্রভু, যিবে মিসর দেজত্তুন তমারে নিগিলেই আন্যে তে তমা সমারে থেবঅ। 2-3 তুমি যুদ্ধোত্ নিগিলি যেবার আগেন্দি ধর্মগুরুবো উজেই এইনে সৈন্যদলুনোরে কবদে, ইস্রায়েলীয়গুন শুনো, এচ্চ্যে তুমি তমার শত্রুগুনো সমারে যুদ্ধো গুরিবাত্তে যর্। তুমি সাহস ন আরেয়ো; তুমি ন দোরেয়ো বা দরে ভাঙি ন পোজ্য; শত্রুগুন দেগিনে যেন তমার গির্গিরেনি ন ধরে। 4 শত্রুগুনো সমারে যুদ্ধো গুরিনে তমারে ঝিদেই দিবাত্তে তমার গোজেন লগেপ্রভুই তমা লগে লগে যার্। 5 সে পরেন্দি তারার নেতাগুনে সৈন্যদলুনোরে কবাক্, তমা ভিদিরে যুনি কনজনে নুয়ো ঘর্ বানেইনে সিয়েন্ ফাং ন গুরিনে থায় সালে তে ঘরত্ যোক্; সিয়েন্ ন অলে তে যুদ্ধোত মুরি গেলে অন্য কনজনে সে ঘরান ফাং গুরিবো। 6 কনজনে যুনি আংগুর ক্ষেত গুরিনে তার্ ফলুন ন হেইনে থায় সালে তেয়ো ঘরত্ যোক; সিয়েন ন অলে তে যুদ্ধোত্ মুরি গেলে অন্যজনে সে ক্ষেত্তান ভোগ গুরিবো। 7 মেলা ঠিগ্ অনার পরেন্দিয়ো যুনি কনজনে মোক্ ন লোইনে থায় সালে তেয়ো ঘরত্ যোক্; সিয়েন ন অলে তে যুদ্ধোত মুরি গেলে অন্যজনে সে মিলেবোরে লোয় পারিবো। 8 সে নেতাগুনে আরঅ কবাক্কে, তমা ভিদিরে যুনি কনজনে দোরেইনে থান্ বা সাহস আরেইনে থান্, মাত্তর্ সিয়েন দেগিনে যেনে অন্য ইস্রায়েলীয় ভেইয়ুনোর মনবল ভাঙি ন যায় সেনত্যে তে ঘরত্ ফিরি যোক্। 9 সৈন্যগুনো ইদু কধা কনা শেজ্ গুরিনে নেতাগুনে সৈন্যগুনোর ভালোক দল উগুরে তারার্ সেনাপতি বানেবাক্। 10 তুমি কনঅ আদাম বা শঅর আক্রমণ গুরিবাত্তে যেবার আগেন্দি সিদুগোর্ মানুচ্চুনো ইদু যুদ্ধো ছাড়া অধীনতা মানি নিবার প্রস্তাব গুরিবা। 11 যুনি সেক্কে তারা রাজী ওইনে তারার্ গেট্টো খুলি দুয়োন সালে সিদুগোর্ বেক্ মানুচ্চুনে তমার অধীনোত্ অবাক্ আর তমাত্তে কাম্ গুরিবার বাধ্য থেবাক। 12 মাত্তর্ তারা যুনি সে প্রস্তাবত রাজী ন ওইনে তমা বিরুদ্ধে যুদ্ধোত্ লামন সালে সে জাগাগান তুমি আক্রমণ গুরিবা। 13 তমার গোজেন লগেপ্রভু যেক্কে সে জাগাগান তমা আদত্ তুলি দিবো সেক্কে সিদুগোর্ বেক্ মরদ্তুনোরে তুমি মারে ফেলেবা। 14 মাত্তর্ মিলেমানুচ্, ঝি-পূঅ, য়েমানপাল আর সিদুগোর্ অন্য বেক্কানি তুমি লুদেয়্যে জিনিস ইজেবে নিজোত্তে নেযেই পারিবা। শত্রুগুনোর দেজত্তুন লুদেয়্যে যেদক্কানি জিনিস তমার গোজেন লগেপ্রভু তমারে দিবো সিয়েনি তুমি ভোগ গুরি পারিবা। 15 যেদক্কানি শঅর তমা দেজত্তুন দূরোত আঘে, যিয়েনি তমার কায়কুরে জাদ্তুনোর্ শঅর নয়, সিগুনো উগুরে তুমি এবাবোত্যে গুরিবা। 16 মাত্তর্ তমার গোজেন লগেপ্রভু সোম্বোত্তি ইজেবে যিদুক্কুন জাদরে আদাম বা শঅর তমারে দিবাত্তে যার্ সিদুগোর্ কাররে তুমি বাঁজেই ন রাগেবা। 17 তমার গোজেন লগেপ্রভুর উগুম মজিম তুমি হিত্তীয়, ইমোরীয়, কনানীয়, পরিষীয়, হিব্বীয় আর যিবূষীয়গুনোরে পুরোপুরি গুরিনে ভস্ত গুরি ফেলেবা। 18 সিয়েন ন গুরিলে তারা তারার দেব-দেবেদার পূজো গুরিবার অক্তত্ যেদক্কানি জঘন্য কাম্ গরন্ সিয়েনি তুমিয়ো শিগিবা আর সেক্কে তুমি গোজেন লগেপ্রভুর বিরুদ্ধে পাপ গুরিবা। 19 তুমি ভালোক্ দিন ধুরিনে যেক্কে কনঅ আদাম বা শঅর ঘিরি রাগেইনে সিয়েন গজক্ গুরিবাত্তে যুদ্ধো গরা ধুরিবা সেক্কে কুড়োল্লোই সে জাগানর কন গাজ্ বরবাদ্ ন-গুরিবা, কিত্যে সিগুনোর গুলোগুন তুমি হেই পারিবা। সিগুন তুমি কাবি ন ফেলেবা। মাদর্ সে গাচ্চুন্ দঅ আর্ মানুচ্ নয়, সিগুনোরে তমাত্তুন আক্রমণ গরা পুরিবো। 20 মাত্তর্ যিগুন্ গুলোগুলির্ গাজ্ নয় বিলিনে তমাত্তুন জানা থেবঅ সিগুন্ তুমি কাবি ফেলেই পারিবা আর যে জাগার মানুচ্চুনে তমা লগে যুদ্ধো গত্তন্ তারা উদিই ন-যানা সং সে গাচ্চুন তুমি আক্রমণ গুরিবার কামত্ বেবহার গুরি পারিবা। |
Copyright © 2021 Bangladesh Bible Society
Bangladesh Bible Society