দ্বি’লম্বর বিররণ 2 - Chakma Bibleধূল্যেচর-চাগালাত্ ইস্রায়েলীয়গুনে 1 লগেপ্রভু মরে যেধোক্ক্যেন গুরি উগুম্ দিয়্যে সেধোক্ক্যেন গুরি আমি সে পরেন্দি পিচ্ছো ফিরিনে আকাবা চিগোন্ সাগরর্ পথ্তান্ ধুরিনে ধূল্যেচর-চাগালান্দি রওনা অলং। সেয়ীরোর্ মুড়ো-মুড়ি চালাগাত্ ঘুরি যাদে আমার্ ভালোক্ দিন কাদি গেলঅ। 2 পরেন্দি লগেপ্রভু মরে কলদে, 3 তুমি ভালোক্ দিন ধুরিনে এই মুড়ো-মুড়ি চাগালাত্ ঘুরোর্; এবেরা উত্তোরেন্দি ফিরো। 4 সে পরেন্দি তে মরে তমারে কবাত্তে কলদে, তমা ভেই সেয়ীরর আদাম্মে এষৌর বংশধরুনোর রেজ্যর্ ভিদিরেন্দি ইক্কিনে তমাত্তুন্ যাহ্ পুরিবো। তমারে দেগিনে তারা দোরেবাক্ মাত্তর্ তুমি উঝিয়ারে থেবা। 5 তুমি এষৌর বংশধরুনোরে যুদ্ধোর্ উস্কানি ন-দিবা, কিত্যে মুই তারার্ দেজর্ কনঅ ভাগই তমারে ন-দিম্, এন্ কি, টেং রাগেবার্ জাগা পর্যন্ত ন-দিম্। মুই সেয়ীরর্ এই মুড়ো-মুড়ি চাগালাত্ এষৌরে তার্ নিজোর্ দেজ্ ইজেবে দুয়োং। 6 তারাত্তুন্ হানা আর পানি তমা টেঙালোই কিনি খা পুরিবো। 7 তমার গোজেন লগেপ্রভু বেক্ কামানিত্ তমারে আশিদ্বাদ গোজ্যে। এই দাঙর্ ধূল্যেচর-চাগালার্ ভিদিরেন্দি যেবার্ অক্তত্ তে তমারে দেগাশুনো গোজ্যে। এই চোল্লিশ্ছুয়ো বজর্ তমা গোজেন লগেপ্রভু তমা লগে লগে থেইয়্যে আর তমার্ কনঅ কিজুর্ অভাব ন-এলঅ। 8 “সেনত্যে আমি আমার ভেই সেয়ীরর আদাম্মে এষৌর বংশধরুনোরে ফেলেইনে এলং। অরাবার যে পথ্তান্ এলৎ আর ইৎসিয়োন-গেবরত্তুন্ নিগিলি এচ্ছ্যে সেই পথ্তান্ ফেলেইনে আমি মোয়াবর্ ধূল্যেচর-চাগালার্ পথ্তান্ ধুরিনে আঢা মারিলোং। 9 সে পরেন্দি লগেপ্রভু মরে কলদে, ‘তুমি মোয়াবীয়গুনোরে তোস্যে ন লাগেয়ো বা যুদ্ধোর্ উচ্চোমি ন দুয়ো, কিত্যে তারার্ দেজর্ কনঅ ভাগই মুই তমারে ন দিম্। মুই সোম্বোত্তি ইজেবে আর্ শঅরান্ লোটোর বংশধরুনোরে দুয়োং।’” 10 আগে এমীয়গুনে সেই চাগালাত্ বজত্তি গুরিদাক। এমীয় জাদর্ মানুচ্চুনে এলাক্কে বোলী, সোংখ্যেন্দি ভালোক্কুন্ আর অনাকীয়গুনো ধোক্ক্যেন লাম্বা। 11 অনাকীয়গুনো ধোক্ক্যেন এমীয়গুনোরেয়ো রফায়ীয় কুয়ো অদঅ মাত্তর্ মোয়াবীয়গুনে তারারে কদাক্ এমীয়। 12 সেয়ীরত্ হোরীয়গুনে বজত্তি গুরিদাক, মাত্তর্ পরেন্দি এষৌর বংশধরুনে তারারে সিয়োত্তুন্ ধাবেই দুয়োন। লগেপ্রভু সোম্বোত্তি ইজেবে ইস্রায়েলীয়গুনোরে যে দেজ্ছান্ দিয়্যে সিয়েনত্ তারা যিয়েনি গোজ্যন্ এষৌর্ বংশধরুনেয়ো ঠিগ্ সিয়েনোই গুরিলাক; তারা হোরীয়গুনোরে শেজ্ গুরি দিইনে তারার্ জাগানিত্ নিজে বজত্তি গরা ধুরিলাক্। 13 পরেদি লগেপ্রভু কলঅ, ইক্কিনে তুমি উদিনে সেরদ কিঝিঙান্ পার্ ওইনে যঅ। আর আমি সিয়েন্ পার্ ওইনে এলং। 14 কাদেশ-বর্ণেয় ছাড়িনে সেরদ কিঝিঙান্ পার্ ওই এত্তে আমার্ আটত্রিশ বজর্ কাদি যেইয়্যে। কাদেশ-বর্ণেয় ফেলেই এবার্ আগেন্দি তাম্বুলোত্ যিদুক্কুন্ সৈন্য এলাক তারা বেক্কুনে এ আটত্রিশ বজর ভিদিরে লগেপ্রভুর শমক্ গোজ্যে কধা মজিম মুরি যেইয়োন। 15 তাম্বুলোত্তুন্ তারারে এক্কুবারে শেজ্ গুরি ফেলেবাত্তে লগেপ্রভু তারার্ বিরুদ্ধে কামান্ গোজ্যে, যেদক্কন্ সং তারা শেজ্ ওই ন-যান। 16-18 “সেই বেক্ সৈন্যগুনে মুরি যানার্ পরেন্দি লগেপ্রভু মরে কোইয়্যেদে, ‘এচ্চ্যে তমার্ আর শঅরর্ এক কিত্তেন্দি মোয়াব দেজর্ দুঝি ছাড়িনে যাহ্ পুরিবো। 19 মাত্তর্ তুমি যেক্কে অম্মোনীয়গুনো ইদু যেইনে লুমিবা সেক্কে তারারে লবাদোস্যে ন গুরিবা বা যুদ্ধোর্ উচ্চোমি ন দিবা, কিত্যে অম্মোনীয়গুনোর্ দেজত্ কনঅ ভাগই মুই তমারে ন-দিম্। লোটোর বংশধরুনোরে মুই সিয়েন্ সোম্বোত্তি ইজেবে দিইনে রাগেয়োং।’” 20 সেই দেজ্ছানরে রফায়ীগুনোর্ দেজ্ বিলিনেয়ো মনে গরা অদঅ, কিত্যে সিদু তারা আগে বজত্তি গুরিদাক; অম্মোনীয়গুনে তারার্ সম্সুম্মীয় জাদর্ মানুচ্ কদাক্। 21 রফায়ীয়গুনে বোলী আর মান্জোন্দি ভালোক্কুন্ এলাক্। তারা এলাক অনাকীয়গুনো ধোক্ক্যেন লাম্বা। লগেপ্রভু অম্মোনীয়গুনোরে দিইনে তারারে শেজ্ গুরি ফেলেয়্যে; অম্মোনীয়গুনে রফায়ীয়গুনোরে ধাবেই দিইনে তারার্ জাগানিত্ বজত্তি গুরিলাক্। 22 লগেপ্রভু এষৌর বংশধরুনো পৌইদ্যেনেয়ো সেই এক্কুই কামান্ গোজ্যে। তে তারারে দিইনে হোরীয়গুনোরে শেজ্ গোজ্যে। তারা হোরীয়গুনোরে ধাবেই দিইনে তারার্ জাগানি সেয়ীরোত্ এজঅ বজত্তি গত্তন্। 23 ক্রীটত্তুন ক্রীটীয়গুনে এইনে অব্বীয়গুনোরে শেজ্ গুরি দিইনে তারার্ জাগানিত্ বজত্তি গোজ্যন। অব্বীয়গুনে সেক্কে গাজা সং বেক্ আদামানিত্ বজত্তি গুরিদাক্। 24 সে পরেন্দি লগেপ্রভু কোইয়্যেদে, তুমি নিগিলি যঅ আর অর্ণোন গাঙান্ পার্ ওইনে যঅ। চঅ, মুই হিষ্বোনোর ইমোরীয় রাজা সীহোন আর তার্ দেজ্ছান তমা আদত্ দি দুয়োং। তুমি তা দেজ্ছান গজক্ গরানা আরাম্ভ গুরিনে তারে যুদ্ধোত্ লামদে বাধ্য গরঅ। 25 এচ্চ্যেত্তুন্ ধুরি মুই পিত্থিমীর বেক্ জাদ ভিদিরে তমা পৌইদ্যেনে এক্কান দর্গরেদে ভাব আর গির্গিরেনি ধরানা আরাম্ভ গুরিম্। তারা তমার কধানি শুনিলে গির্গিরেবাক্ আর তমাত্যে তারার্ মনানিত্ অমকদ ভান্ন্যেই চিদে জাগিবো। হিষ্বোনর রাজা সীহোনর্ উদি যানা 26 ইয়েনের্ পরেদি মুই সুগ্-শান্দি ধুরি রাগেবার্ আজাই কদেমোৎ ধূল্যেচর-চাগালাত্তুন্ হিষ্বোনর রাজা সীহোন ইদু কোই পাদেলুং, 27 তর্ দেজর্ ভিদিরেন্দি আমারে যেবাত্তে দে। আমি ডেনে-বাঙে ন যেইনে দাঙর্ পথ্তান্ ধুরিনে যেবং। 28-29 তুই টেঙা লোইনে আমারে খানা আর পানি দে। আমা গোজেন লগেপ্রভু যে দেজ্ছান আমারে দিবাত্তে যার্ যর্দন গাঙান্ পার্ ওইনে সিদু ন লুমোনা সং তুই বানা আমারে টেংগোই আদিনে তর্ দেজ্ছান পার্ ওই যেবাত্তে দে। সেয়ীরর্ আদাম্মে এষৌর বংশধরুনে আর আর্ শঅরর আদাম্মে মোয়াবীয়গুনে আমারে পার্ ওই যেবাত্তে দুয়োন্। 30 মাত্তর্ হিষ্বোনর রাজা সীহোনে সিয়েন্দোই রাজী ন অলঅ। তমার গোজেন লগেপ্রভু তার্ মনান্ দরঅ গোজ্যে আর মনান্ একবুচ্চ্যেলোই ভোরেই দিয়্যে যেনে তে তমা আদত্ পড়ে, আর ইক্কিনে সিয়েনোই ঘদের্। 31 পরেন্দি লগেপ্রভু মরে কলদে, চঅ, সীহোন আর তার্ রেজ্যগান্ মুই তমা আদত্ তুলি দিবাত্তে আরাম্ভ গোজ্যং। তুমি ইক্কিনে যেইনে তা দেজ্ছান্ জিদিবার কামত্ আত্ দুয়ো আর সিদু বজত্তি গুরিবাত্তে আরাম্ভ গরঅ। 32-33 ইয়েনর্ পরেন্দি যেক্কে সীহোনে তা সৈন্যগুন লোইনে নিগিলিনে যহসত্ আমা সমারে যুদ্ধো গুরিবাত্তে এলঅ সেক্কে আমা গোজেন লগেপ্রভু তারে আমা আদত্ আনি দিলো। আমি তারে, তার্ বেক্ পূঅগুনোরে আর তার্ সৈন্যগুনোরে শেজ্ গুরিলোং। 34 সে অক্তত্ আমি তার্ বেক্ আদামান আর শঅরান্ গজক্ গুরি নেযেলং আর তারার্ মরদ, মিলে আর ঝি-পূঅগুনোরে এক্কুবারে শেজ্ গুরি ফেলেলং; তারার্ কনজনরে আমি বাঁজেই ন রাগেলং। 35 মাত্তর্ য়েমানপাল আর শঅরত্তুন্ লুদেয়্যে পযাপিরানি আমি নিজোত্তে আনিলোং। 36 অর্ণোন কিঝিঙোর্ দুঝিত্ অরোয়র্ শঅর আর সে কিঝিঙো ভিদিরে আদামত্তুন্ আরাম্ভ গুরিনে গিলিয়দ সং এন্ কনঅ বোলী আদাম বা শঅর ন-রলঅ যিয়েন্ আমি জিদি নেযেই ন পারিই। আমা গোজেন লগেপ্রভু সিয়েনি বেক্কানি আমা আদত্ তুলি দিয়্যে। 37 বানা অম্মোনীয়গুনোর্ জাগানি, যব্বোক গাঙর্ দুঝির্ জাগানি, মুড়োবো ভিদিরে জাগানি আর অন্য যেদক্কানি জাগাত্ যেবাত্তে তে মানা গোজ্যে, সে বেক্ জাগানিত্ তুমি ন-যঅ |
Copyright © 2021 Bangladesh Bible Society
Bangladesh Bible Society