দ্বি’লম্বর বিররণ 18 - Chakma Bibleধর্মগুরু আর লেবীয়গুনোত্তে দান 1 লেবীয় ধর্মগুরুগুনে আর লেবি-গুট্টির অন্য মানুচ্চুনে বাদবাগি ইস্রায়েলীয়গুনো ধোক্ক্যেন কনঅ জাগা-জোবিন্ বা সোম্বোত্তি ন পেবাক্। লগেপ্রভুর নাঙে আগুন্দোই গোজ্যে উৎসর্বত্তে যেদক্কানি জিনিস আনা অবঅ আর লগেপ্রভুরে আর যিয়েনি দিয়্যে অবঅ সিয়েনিই তারা হেবাক্। 2 ইস্রায়েলীয় ভেইয়ুনো ভিদিরে তারার সোম্বোত্তি বিলি কিচ্ছু ন থেবঅ। লগেপ্রভুর এগেম্ মজিম লগেপ্রভুই অবঅ তারার সোম্বোত্তি। 3 মানুচ্চুনে যিদুক্কুন গোরু-ছাগল-ভেড়া উৎসর্ব গুরিবাক্ সিগুনোর কানাগানি, দাদ মাড়ির য়েরানি আর গিলে-কলিজেগানি তারা ধর্মগুরুগুনোরে দিবাক্; ইয়েনি অবঅ ধর্মগুরুগুনোর পাওনা। 4 তমার পত্তমে তুল্যে ফসল, নুয়ো আংগুরো-রস আর তেল আহ্ ছাগল-ভেড়ার কিয়্যেত্তুন পত্তমে কাবি নেযেয়্যে কেশ্ছানি তুমি ধর্মগুরুগুনোরে দিবা, 5 কিত্যে তমার গোজেন লগেপ্রভু তমার বেক্ গুট্টিগুনো ভিদিরেত্তুন লেবীয়গুনোরে আর তারার বংশধরুনোরে বেঈ লোইয়্যে, যেনে তারা আমিঝে লগেপ্রভুর নাঙে সেবার কামানি গুরি পারন। 6 ইস্রায়েলীয়গুনো দেজর কনঅ লেবীয় যুনি তার থেবার জাগা ছাড়িনে ঘেচ্চেকগুরি আওজে লগেপ্রভুর বেঈ লোইয়্যে জাগানত যায়, 7 মাত্তর্ অন্য লেবীয় ভেইয়ুনো ধোক্ক্যেন তেয়ো সিয়েনত্ তার গোজেন লগেপ্রভুর নাঙে সেবার কামানি গুরি পারিবো। 8 তা বাপ্পোর্ ফেলে যেইয়্যে পযাপিরানি বিঝিনে টেঙা পেলেয়ো সিদুগোর্ লেবীয়গুনো সমারে তে সং সং ভাগর অধিকারী অবঅ। লগেপ্রভুর চোগেদি যেদক্কানি কাম্ জঘন্য 9 তমার গোজেন লগেপ্রভু তমারে যে দেজ্চান দিবাত্তে যার্ সিয়েনত্ যেইনে সিদুগোর্ জাদ্তুনে যেদক্কানি জঘন্য কাম গোজ্যন তুমি সিয়েনি গুরিবাত্তে ন শিক্ষ্য। 10 তমা ভিদিরে যেন এধোক্ক্যেন কনঅ মানুচ্ ন থান্ যে তার নিজোর পূঅবোরে আগুন্দোই পুড়িনে উৎসর্বর অনুষ্ঠানান্ গরে, যে গোণাপড়া গুরিনে বা যাদুবিদ্যে খাদেইনে বা লক্ষণ চেইনে আগাম্ কধা কয়, যে যাদু গরে, 11 যে মন্ত্রতন্ত্র খাদায়, যে ভুত্তুনোর্ মাধ্যম অয়, যে ভান্ন্যেই আত্মা সমারে মিজেই আর যে মরা মান্জ্য সমারে উদোলোলি গরে। 12 এদক্কানি কাম্ যে গরে লগেপ্রভু তারে জঘন্য বিলিনে মনে গরে। এই বেক্ জঘন্য কামানিত্তে তমার গোজেন লগেপ্রভু সেই বেক্ জাদ্তুনোরে তমা মুজুঙোত্তুন ধাবেই দিবো। 13 তমার গোজেন লগেপ্রভুর মুজুঙোত্ তমাত্তুন নিদ্দুষী থাহ্ পুরিবো। সেই ভাববাদী 14 তুমি যিদুক্কুন জাদরে গজক্ গুরিবা তারা যাদুবিদ্যে বেবহার গুরিয়ে আর গোণোক্কেগুনোর কধানি কান পাদন্, মাত্তর্ তমার বেলায় ইয়েনি পৌইদ্যেনে তমার গোজেন লগেপ্রভু মানা গোজ্যে। 15 তমার গোজেন লগেপ্রভু তমার ইস্রায়েলীয় ভেইয়ুনো ভিদিরেত্তুন তমাত্তে মঅ ধোক্ক্যেন এক্কো ভাববাদী যুক্কোল্ গুরিবো। তার কধামঝিম তমাত্তুন চলা পুরিবো। 16 হোরেব মুড়েবো ইদু যেদিন্যে তুমি বেক্কুনে লগেপ্রভুর মুজুঙোত্ এগত্তর ওইয়ো সেদিন্যে তুমি তমার গোজেন লগেপ্রভু ইদু সিয়েনোই চেইয়ো। তুমি কোইয়োদে, আর আমি আমার গোজেন লগেপ্রভুর কধানি শুনিবাত্তে বা এই দাঙর্ আগুনান দেগিবাত্তে ন চেই; সালে আমি মারা পুড়িবোং। 17 লগেপ্রভু মরে কোইয়্যেদে, তারা ঠিগই কোইয়োন। 18 মুই তারার্ ইস্রায়েলীয় ভেইয়ুনো ভিদিরেত্তুন তারাত্যে তঅ ধোক্ক্যেন এক্কো ভাববাদী যুক্কোল্ গুরিম। তা মুয়ন্দি মুই মর্ কধানি কোম্, আর মুই যিয়েনি কবাত্তে তারে উগুম দিম্ সিয়েনি তারারে কবঅ। 19 সেই ভাববাদীবো মর্ নাঙান্ দিইনে যে কধানি কবঅ কনজনে যুনি মর্ সেই কধানি ন শুনোন, সালে মুই নিজে সে মানুচ্চোরে দায়ী গুরিম। 20 মাত্তর্ মুই উগুম ন দুয়োং এধোক্ক্যেন কনঅ কধা যুনি কনঅ ভাববাদী মর্ নাঙান্ দিইনে কবাত্তে সাহস গরে বা তে যুনি দেব-দেবেদার নাঙে কধা কয়, সালে তারে মারে ফেলা পুরিবো। 21 কনঅ এক্কান কধা পৌইদ্যেনে তুমি মনে মনে কোই পার, লগেপ্রভু এ কধাগান কোইয়্যে নাহি সিয়েন আমি কিঙিরিনে জানিবোং? 22 কনঅ ভাববাদী যুনি লগেপ্রভুর নাঙান্ দিইনে কনঅ কধা কয় আর সিয়েন যুনি মিজে অয় বা ন অয়, সালে বুঝো পুরিবো সে কধাগান লগেপ্রভু ন কয়। সে ভাববাদীবো দুঘ্ সাহস গুরিনে সে কধাগান কোইয়্যে। তারে তুমি ন দোরেবা। |
Copyright © 2021 Bangladesh Bible Society
Bangladesh Bible Society