দ্বি’লম্বর বিররণ 17 - Chakma Bible1 তমার গোজেন লগেপ্রভুর্ নাঙে তুমি এমন্ কনঅ গোরু বা ছাগল বা ভেড়া উৎসর্ব ন গুরিবা যিবের কনঅ দাগ্ বা দুষ আঘে, কিত্যে তে সিয়েনি ঘিনাই। 2 তমার গোজেন লগেপ্রভুর দিয়্যে আদাম বা শঅরানির্ কনজাগাত্ অয়ত দেগা যেবঅ, তমা ভিদিরে কনঅ মরদ বা মিলে তমার গোজেন লগেপ্রভুর দিয়্যে সুদোম অমান্য গুরিনে তা চোগেদি যিয়েনি ভান্ন্যেই সিয়েনি গোজ্যে। 3 তে অয়ত মর্ উগুমোর বিরুদ্ধে যেইনে দেব-দেবেদাগুনোরে সেবা গরের্ আর সেই বেক্ দেব-দেবেদা বা বেল্লো, চাঁনান্ বা আগাজ্ তারাগুনোরে পূজো গরের্। 4 যুনি এই বেক্কানি তমারে জানা অয়, সালে তুমি সিয়েনি গমে ডালে বিঝিরে চেবা। যুনি সিয়েনি সত্য অয় আর ইয়েন ধোক্ক্যেন ঘিনাইদে কাম্ ইস্রায়েলীয়গুনো ভিদিরে গরা ওইয়্যে বিলিনে প্রমাণ অয়, 5 মাত্তর্ যে মরত্তো বা মিলেবো এধোক্ক্যেন জঘন্য কাম্ গোজ্যে তুমি তারে আদামত্ বা শঅরর্ গেদোর্ কায়কুরে নেযেইনে পাত্তর্ মেলা দিইনে মারে ফেলেবা। 6 কনঅ মান্জ্যরে মারে ফেলাদে দ্বিজন বা তিনজন সাক্ষীর কধা উগুরে নির্ভর গুরিনে সিয়েনি গরা পুরিবো; বানা একজন সাক্ষীর কধা উগুরে নির্ভর গুরিনে সিয়েনি গুরি ন-পারিবো। 7 সে মানুচ্চোরে মারে ফেলেবাত্তে সাক্ষীগুনে পত্তমে পাত্তর্ মারিবাক, সে পরেন্দি মারিবাক্ অন্য বেক্ মানুচ্চুনে। এধোক্ক্যেনগুরি তুমি তমা ভিদিরেত্তুন্ সেই ভান্ন্যেইয়ানরে শেজ্ গুরি দিবা। যাগুলুক্ক্যে বিচের পৌইদ্যেনে উগুম্ 8 যুনি এধোক্ক্যেন বেক্ মগদ্দমাগানি তমার আদালদত্ এজে যিগুনোর বিচের গরানা তমার পক্ষে আগাত্যে ওই উদে-সিয়েন লো ঝোরেবাত্তে ওক্ বা কোল্-কোজ্জ্যে বাজেবাত্যেই ওক্ বা আঘাত গুরিবাত্তে ওক্-তো সে মগদ্দমাগানি লগেপ্রভুর বেঈ লোইয়্যে জাগানত তমাত্তুন যাহ্ পুরিবো। 9 তুমি সেক্কে সে সময়র্ বিচেরক আর লেবীয়গুনো ভিদিরে যিগুনে ধর্মগুরু তারা ইদু যেবা। তুমি বিষয়ান তারারে বুঝেইনে কবা আর তারাই তমারে সে বিচেরর্ রায়য়ান্ দিবাক। 10 লগেপ্রভুর বেঈ লোইয়্যে জাগানত্ তারা তমা ইদু যে রায়য়ান জানেবাক তুমি সিয়েন কামত্ লাগেবা। মাত্তর্ উঝিয়ার, তারা তমারে যিয়েনি যিয়েনি গুরিবাত্তে কবাক তার কনগান তুমি বাদ ন দিবা। 11 তারা রীদি-সুদোম পৌইদ্যেনে তমারে যিয়েনি শিক্ষ্যে দিবাক আর যে রায়য়ান দিবাক সে ধোক্ক্যেন তুমি কাম্ গুরিবা। তারা তমারে যিয়েনি গুরিবাত্তে কবাক্ তুমি ঠিগ্ সিয়েনিই গুরিবা, ইন্দি উন্দি ন গুরিবা। 12 যুনি কনঅ মান্জ্যে বাড়্ গরানার্ কারনে সেই বিচেরক্কোর কধানি বা তমা গোজেন লগেপ্রভুর সেবাগুরিয়্যে সেই ধর্মগুরুবোর কধানি শুনিবাত্তে রাজী ন অন্ সালে তারে হামাক্কায় মারে ফেলা পুরিবো। তুমি ইস্রায়েলীয়গুনো ভিদিরেত্তুন্ এ ধোক্ক্যেন ভান্ন্যেইয়ানি শেজ্ গুরি ফেলেবা। 13 সালে বেক্ মানুচ্চুনে সে কধাগানি শুনিনে দোরেবাক্ আর এ ধোক্ক্যেন বাড়্বো মনভাব আর ন দেগেবাক্। রাজা বানানা 14 তমার গোজেন লগেপ্রভু যে দেজ্ছান তমারে দিবাত্তে যার্ সিয়েনত্ যেইনে সিয়েন গজক্ গুরিনে যেক্কে তুমি সিয়েনত্ বজত্তি গুরিবা আর কবা, আমা কায়-কুরে জাদ্তুনো ধোক্ক্যেন এজঅ, আমি আমাত্তে একজনরে রাজা ইজেবে বেঈ লোই, 15 সেক্কে তমার গোজেন লগেপ্রভু যিবেরে ঠিগ্ গুরি দিবো তারেই তুমি তমার রাজা বানেবা। তে যেনে তমার ইস্রায়েলীয় ভেইয়ুনো ভিদিরে এক্কো অয়। যে তমার ইস্রায়েলীয় ভেই নয় এধোক্ক্যেন অন্য জাদর্ কনঅ মান্জ্যরে তুমি তমার রাজা ন বানেবা। 16 সে রাজাবো যেনে নিজোত্তে ভালোক্কুন ঘোড়া যুগুলোনার ইন্দি মন্ ন-দে আর যেরেন্দি আরঅ ঘোড়া যুগুলেবাত্তে ইস্রায়েলীয়গুনোরে মিসর দেজত্ ন পাদায়, কিত্যে লগেপ্রভু তমারে কোইয়্যেদে, তুমি সেই পথ্তানন্দি আর্ ফিরি ন যেবা। 17 তে যেনে ভালোক্কুন মোক্ ন-লয়; সেক্কে তার্ মনান ভান্ন্যেই পদেদি যেবঅ। তে যেনে নিজোত্তে বেশ্ সনা আর রূবো ন-থুবোই। 18 লেবীয়গুনো ভিদিরে যিগুনে ধর্মগুরু তারা ইদু রীদি-সুদোমর্ যে বোইয়ুন আগন্ সিংহাসনত্ বঝিবার অক্তত্ তাত্তুন্ সেই বোইয়ুনোত্তুন তার নিজোত্তে বেক্ রীদি-সুদোমানি এক্কো বোইয়োত্ নকল গুরি নেযা পুরিবো। 19 সিবে তাইদু থেবঅ আর সারা জীংকানিবর্ তাত্তুন্ সিবে পড়া পুরিবো যেনে তে তার্ গোজেন লগেপ্রভুরে ভোক্তিবলা গুরি দরাদে শিগে আর এ রীদি-সুদোমানি আর সুদোমর কধানি মানি চলে। 20 ইয়েনত্যে অন্য ইস্রায়েলীয় ভেইয়ুনোত্তুন্ নিজোরে দাঙর্ গুরি চেবার মনভাব তার্ মনত্ ন এবঅ আর রীদি-সুদোমত্তুন্ তে ইন্দি উন্দি সুরি ন যায়। ইয়েন্দোই তে আর তার বংশধরুনে ইস্রায়েলীয়গুনো উগুরে ভালোকদিন সং রাজাগিরি গুরি পারিবাক্। |
Copyright © 2021 Bangladesh Bible Society
Bangladesh Bible Society