দ্বি’লম্বর বিররণ 16 - Chakma Bibleউদ্ধোর-পরব্ 1 চৈত্ (আবীব) মাজত্ তমার গোজেন লগেপ্রভুর নাঙে তুমি উদ্ধোর-পরব্ পালন গুরিবা। এ আবীব মাজত্ একদিন্যে রেদোত্ তে মিসর দেজত্তুন্ তমারে নিগিলেই আন্যে। 2 নিজোরে ফগদাং গুরিবাত্তে লগেপ্রভু তার থেবার জাগা ইজেবে যে জাগায়ান বেঈ নেযেব, সিয়েনত তুমি তমার গোরু বা ছাগল-ভেড়ার পালত্তুন য়েমান নেযেইনে তমার গোজেন লগেপ্রভুর নাঙে উদ্ধোর-পরবর্ উৎসর্ব গুরিবা। 3 সে য়েমানর য়েরাগান তুমি সদা দিয়্যে পিদেলোই ন হেবা। সাত দিন সং তমাত্তুন্ দুখ্-কট্টগানি ইদোত্ তুলিনে সদাছাড়া পিদে হা পুরিবো, কিত্যে দরে যাদিমাদি গুরিনে তুমি মিসর দেজ্ছান ছাড়িনে এই যেয়োগোই। ইয়েন্দোই মিসর দেজত্তুন নিগিলি এজানার কধাগান তমাত্তুন সারা জীংকানিবর্ মনত্ থেবঅ। 4 এ সাত দিন সং গোদা দেজছানত্ তমা ভিদিরে যেন সদা দিয়্যে কনঅ কিজু পাহ্ ন যায়। পরবর্ পত্তম দিন্নোত্ বেন্যে মাদান্ তুমি যে য়েরাগান উৎসর্ব গুরিবা সিয়েন যেনে বেন্যে মাদান্ সং পড়ি ন থায়। 5 তমা গোজেন লগেপ্রভুর দিয়্যে আর কনঅ শঅরত্ তুমি উদ্ধোর-পরবর্ য়েমানুন উৎসর্ব ন গুরিবা; 6 যে জাগায়ান তে নিজোরে ফগদাং গুরিবাত্তে তার থেবার ঘর ইজেবে বেঈ নেযেব বানা সিয়োদোই সিগুন উৎসর্ব গুরিবো। যেদিন্যে তুমি মিসর দেজত্তুন্ নিগিলি এচ্চ্য পত্তি বজরর্ সেদিন্যে বেলান ডুবিবার অক্তত্ সাজোন্যে সলাবোত্ উদ্ধোর-পরবর্ য়েমানুন উৎসর্ব গুরিবা। 7 তমার গোজেন লগেপ্রভু যে জাগায়ান বেঈ নেযেব সিয়োদোই তুমি সে য়েরাগান রানিনে হেবা। তার কেল্যে বেন্যে মাদান্ তুমি তমার ঘরত্ ফিরি যেবা। 8 ছয়দিন সং তুমি সদাছাড়া পিদে হেবা আর সাত দিনোত্ তুমি তমার গোজেন লগেপ্রভুর নাঙে শেজ দিন্নোত্ মিলিবার-তেম্মাং গুরিবা আর সেদিন্যে কনঅ কাম্ ন গুরিবা। সাত সাপ্তার্ পরব্ 9 ভূইয়োর্ খেত্-খেত্তি কাবানা আরাম্ভত্তুন ধুরি তুমি গুণি গুণি সাত সাপ্তাহ্ বাদ দিবা। 10 সে পরেন্দি তমার নিজোর আওজে গোজ্যে উৎসর্বলোই তুমি তমার গোজেন লগেপ্রভুর নাঙে সাত সাপ্তার্ পরব্ পালন গুরিবা। তমার গোজেন লগেপ্রভু তমারে যে পরিমাণে আশিদ্বাদ গোজ্যে সিয়েন বুঝিনে তুমি এ উৎসর্বর জিনিস্ছানি দিবা। 11 তমার গোজেন লগেপ্রভু নিজোরে ফগদাং গুরিবাত্তে তার থেবার জাগা ইজেবে যে জাগায়ান বেঈ নেযেব সিয়েনত তা মুজুঙোত্ তুমি, তমার ঝি-পূঅগুনে, তমার চাগর আর চাগরানীগুনে আর তমা ভিদিরে বজত্তি গোজ্যে লেবীয়গুনে, বিদেশী বাসিন্দাগুনে, নাঢা মান্জ্যর ঝি-পূঅগুনে আর রানিমিলেগুনে-তুমি বেক্কুনে ফুত্তি গুরিবা। 12 মিসর দেজত্ তুমিয়ো যে চাগর্ এলা সে কধাগান মনত্ রাগেয়ো তুমি এই বেক্ সুদোমানি দোলেডালে পালেবা। নাঢা মান্জ্যর্-ঘরর পরব্ 13 তমার খামার আর আংগুর মারিবার জাগানত্তুন্ বেক্কানি তুলি রাগেবার পরেন্দি সাত দিন সং তুমি নাঢা মান্জ্যর-ঘরর পরব্ পালন গুরিবা। 14 তুমি, তমার ঝি-পূঅগুনে, তমা চাগর আর চাগরানীগুনে আর তমা ভিদিরে বজত্তি গোজ্যে লেবীয়গুনে, বিদেশী বাসিন্দাগুনে, মা-বাব্ নেইয়্যে ঝি-পূঅগুনে আর রানিমিলেগুনে-তুমি বেক্কুনে এ পরপ্পোত্ ফুত্তি গুরিবা। 15 তমার গোজেন লগেপ্রভু যে জাগায়ান বেঈ নেযেব সিয়োদোই তুমি তার নাঙে সাত দিন সং এই পরপ্পো পালন গুরিবা, কিত্যে তমার তুল্যে বেক্ খেদ্তানি আর বেক্ কামানিত্ তমার গোজেন লগেপ্রভু তমারে আশিদ্বাদ গুরিবো আর তমার ফুত্তিগানি পূরেব। 16 তমার গোজেন লগেপ্রভুর বেঈ লোইয়্যে জাগানত বজরে তিনপল্লা, অত্তাৎ সদাছাড়া পিদের পরবর্ সলাবোত্, সাত সাপ্তার্ পরবর্ সলাবোত্ আর নাদা মান্জ্যর-ঘরর পরবর্ সলাবোত্ তমার বেক্ মরদ্তুনে লগেপ্রভুর মুজুঙোত্ আঝিল্ উয়ো পুরিবো। কনজনে যেনে খালি আঢ্তোই লগেপ্রভুর মুজুঙোত্ আঝিল্ ন অয়। 17 তমা গোজেন লগেপ্রভু তমারে যে পরিমাণে আশিদ্বাদ গোজ্যে সিয়েন বুঝিনে তমাত্তুন বেক্কুনে যেন কিজু না কিজু লোই আনন্। বিচেরক্ নেযানা 18 তমার গোজেন লগেপ্রভু তমারে যেদক্কানি আদাম আর শঅর দিবাত্তে যার্ তার পত্তিগানিত্ পত্তি গুট্টিত্তে তুমি বিচেরক আর কামগুরিয়্যে নেযেবা। তারা দোলেডালে মানুচ্চুনোর বিচের গুরিবাক্। 19 তুমি অন্যেয়গুরিনে বিচের ন গুরিবা বা কারঅ পক্ষ ন নেযেবা। তুমি ঘুষ ন নেযেবা, কিত্যে ঘুষ জ্ঞানী মানুচ্চুনোর চোক্কুন কান্ গুরি দে আর নিদ্দুষী মানুচ্চুনোর কধাত্ প্যাঁচ লাগেই দে। 20 যে দেজ্ছান তমার গোজেন লগেপ্রভু তমারে দের্, তুমি যেনে বাঁজি থেইনে সিয়েন ভোগ-গজক্ গুরি পার সেনত্যে তুমি বানা ন্যায়ানরে মানি চলিবা। দেব-দেবেদা পূজোনার বিরুদ্ধে সুদোম 21-22 তমা গোজেন লগেপ্রভুর নাঙে তুমি যে পূজো বানেবা তা ইদু পূজো গুরিবাত্তে তক্তার আশেরা-খুঁদো ন গারেবা বা কনঅ পাত্তর্অ ন গারেবা, কিত্যে তমার গোজেন লগেপ্রভু ইয়েনি ঘিনাই। |
Copyright © 2021 Bangladesh Bible Society
Bangladesh Bible Society