দ্বি’লম্বর বিররণ 14 - Chakma Bibleসিজি আর অসিজি খানা 1 তুমি তমার গোজেন লগেপ্রভুর পূঅ। সেনত্যে মরা মান্জ্যত্যে আবিলেচ্ গুরিবাত্তে যেইনে কিয়্যেগানর্ কনঅ জাগাত তমাত্তুন্ ঘা গুরি ন-পারিবা, বা কুল্লো মুজুঙেন্দি চুলান কাবি ন-পারিবো। 2 তুমি তমার গোজেন লগেপ্রভুর নাঙে এক্কো ফারক্ গোজ্যে জাদ। পিত্থিমীর বেক্ জাদ্তুনো ভিদিরেত্তুন্ লগেপ্রভু তমারে বেঈ লোইয়্যে যেনে তুমি তার নিজোর বিশেজ্ সোম্বোত্তি অ। 3 তুমি কনঅ ঘিনাইদে জিনিস ন-হেবা। 4 যেদক্কানি য়েমানর য়েরা তুমি হেই পারিবা সিয়েনি অলঅ গোরু, ভেড়া, ছাগল, 5 উরিং, কৃষ্ণসার, চিতি-উরিং, ঝার্বো ছাগল, পিজেন্দি-ধুব্ বাবোত্যে উরিং, ধুব্ উরিং আর মুড়োত্ থেইয়্যে ভেড়া। 6 যিদুক্কুন য়েমানর থুক্ পুরোপুরি দ্বিভাগ চিজ্যে আর যিগুনে ঘাস উল্ল্যেন্ সেই বেক্ য়েমানুনোর য়েরানি তুমি হেই পারিবা। 7 মাত্তর্ বানা ঘাস উল্ল্যেলে বা বানা টেঙর্ টুক্বলা য়েমানর য়েরা তুমি ন হেবা। তুমি উট, খরগোস আর শাফন ন হেবা, কিত্যে সিগুনে ঘাস উল্ল্যেলেয়ো তারার টেঙর টুক্ চিজ্যে নয়। সেনত্যে সিগুন্ তমার পক্ষে অসিজি। 8 শূগরঅ অসিজি; টেঙর টুক্ চিজ্যে অলেয়ো তে ঘাস ন-উল্ল্যেই। তুমি ইগুনোর য়েরানি ন হেবা বা তারার মরাকিয়্যেগানিয়ো ন ধুরিবা। 9 পানিত্ থেইয়্যে পরাণবলাগুনো ভিদিরে যিগুনোর ডুয়ো আর আঁশ আঘে সিগুন তুমি হেই পারিবা, 10 মাত্তর্ যিগুনোর ডুয়ো আর আঁশ নেই সিগুনোরে তুমি হেই ন পারিবা, সিগুন তমার পক্ষে অসিজি। 11-18 যে কনঅ সিজি পেখ্ তুমি হেই পাবিরা; মাত্তর্ ঈগল, শকুন আর কালা শকুন, শিগেরী-বাজ আর যে কনঅ বাবোত্যে চিল, যে কনঅ বাবোত্যে কবা, উটপেখ্, লক্ষ্মীপেঁজা, গাংচিল, যে কনঅ বাবোত্যে বাজ পেখ্, কাল্পেঁজা, হুতুম পেঁজা, ধুব্ পেঁজা, মুরোল্যে-পেঁজা, সিন্দুবাজ, হাড়গিলা, সারস, যে কনঅ বাবোত্যে বগা, হুপ্পু পেখ্ আর বাদোল তুমি হেই ন পারিবা। 19 পাল্ পাল্ গুরি উড়ি বেড়ান্দে এধোক্ক্যেন বেক্ পুক্কুন্ তমার পক্ষে অসিজি। সিগুন্ তুমি ন হেবা; 20 মাত্তর্ যিদুক্কুন্ প্রাণীর ডুয়ো আঘে আর সিজি সিগুন্ তুমি হেই পারিবা। 21 মুরিনে পড়ি থেইয়্যে কনঅ প্রাণী তুমি ন হেবা, কিত্যে তুমি তমার লগেপ্রভুর নাঙে এক্কো ফারক গোজ্যে জাদ। তমার আদাম বা শঅরত্ বজত্তি গোজ্যে অন্য জাদর্ কনঅ মান্জ্যরে তুমি সিবে দি পারিবা আর সিবে তে হেই পারিবো, বা তুমি কনঅ বিদেশী ইদু সিবে বিজি দি পারিবা। 22 পত্তি বজর তমা ভুইয়োত্ যেদক্কানি ফসল অবঅ তার দশ ভাগর এক ভাগ তুমি হামাক্কায় যুদো গুরি রাগেবা। 23 তমা গোজেন লগেপ্রভুরে যেনে তুমি ভোক্তি গুরিবাত্তে শিগো সেনত্যে তমার শোজ্য, নুয়ো আংগুরো-রস আর তেলর দশ ভাগর এক ভাগ আর তমা পালর গোরু-ভেড়া-ছাগলর পত্তম ছঅবোর্ য়েরাগান তমার গোজেন লগেপ্রভুর মুজুঙোত্ তমাত্তুন্ এনজান্ জাগাত খা পুরিবো যে জাগাগানত তে নিজোরে ফগদাং গুরিবাত্তে তার থেবার জাগা ইজেবে বেঈ নেযেব। 24 মাত্তর্ যুনি সে জাগাগান অমকদ দূরোত্ অয় আর তমা গোজেন লগেপ্রভু তমারে এদক্ আশিদবাদ গুরি থায়, সে দশ ভাগর এক ভাগ লগেপ্রভুর সে জাগায়ান ভালোদ্ দূরোত্ বিলিনে তমার পক্ষে বুয়োই নেযানা সম্ভব নয়, 25 মাত্তর্ সিয়েনি বিজিনে সে টেঙাগুন্দোই তুমি তমার গোজেন লগেপ্রভুর সে বেঈ লোইয়্যে জাগানত্ যেবা। 26 সে টেঙাগুন্দোই তুমি তমার আওজ্ মজিম জিনিস কিনিবা, যেন গোরু-ছাগল-ভেড়া, আংগুরো-রস, অন্য বাবোত্যে মদ বা তমার আওজ্ মজিম আর কিজু। সে পরেন্দি তুমি তমার পরিবারুন লোইনে তমার গোজেন লগেপ্রভুর মুজুঙোত্ হানা-দানা গুরিনে ফুত্তি গুরিবা। 27 যে লেবীয়গুনে তমার আদাম বা শঅরত্ বজত্তি গত্তন্ তারার কধানি তুমি ভুলি ন যেয়ো, কিত্যে নিজোর বিলিনে তারার কনঅ জাগা-জোবিন্ বা সোম্বোত্তি নেই। 28 পত্তি তিন বজরর্ শেজত্ তমার সে বজরর ক্ষেত-ক্ষেত্তির দশ ভাগর এক ভাগ শঅরত্ আনিনে তুমি জমা রাগেবা। 29 সেক্কে লেবীয়গুনে, যিগুনোর নিজোর বিলিনে কনঅ জাগা-জোবিন্ বা সোম্বোত্তি নেই আর সে জাগার বিদেশীগুনে, রানীমিলেগুনে আর মা-বাপ নেইয়্যে ঝি-পূঅগুনে ঈল্ অয় সং হেই পেবাক। সেক্কে তমার বেক্ কামানিত্ তমার গোজেন লগেপ্রভু তমারে আশিদবাদ গুরিবো। |
Copyright © 2021 Bangladesh Bible Society
Bangladesh Bible Society