দ্বি’লম্বর বিররণ 13 - Chakma Bible

দেব-দেবেদাগুনোর পূজো

^1-2 ধোজ্য, তমা ভিদিরে কনঅ ভাববাদী বা স্ববন দেগিনে আগাম কধা কোই পারন্‌ এধোক্ক্যেন কনজন দেগা দিলো আর তমা ইদু কনঅ আমক্‌ অবার চিহ্নো বা কামর্‌ কধা কলঅ আর সিয়েনি ঘেচ্চেকগুরি ঘুদিলো। সে মানুচ্চোয়ো যুনি তমা ইদু নূয়ো এমন্‌ দেব-দেবেদাগুনো পৌইদ্যেনে কয়্‌, আদঅ, আমি দেব-দেবেদাগুনো ইদু যেইনে তারারে পুজো গুরিই,

³ মাত্তর্‌ তুমি সে ভাববাদী বা স্ববনে-দেক্কে মানুচ্চোর কধানি ন-শুন্ন্য। তুমি তমার গোজেন লগেপ্রভুরে তমার বেগ্‌ মনান্‌-পরাণান্দোই কোচ্‌পঅ নাহি সিয়েনি তে তমারে পোরোক্ষেত্‌ ফেলেইনে দেগেই দের্‌।

⁴ তমার গোজেন লগেপ্রভুর কধা মজিম্ তমাত্তুন্‌ চলা পুরিবো আর তারে ভোক্তি গরা পুরিবো। তুমি তার উগুমানি পালেবা আর তার বাধ্য ওইনে চলিবা; তুমি তারে সেবা গুরিবা আর তারে আজাবোদে ধুরি থেবা।

⁵ সেই ভাববাদী বা সেই স্ববনে-দেখ্যে মানুচ্চোরে মারে ফেলা পুরিবো, কিত্যে তমার গোজেন লগেপ্রভু, যিবে মিসরত্তুন্‌ তমারে নিগিলেই আন্যে আর সেই চাগর্‌ খাদানার দেজত্তুন্‌ তমারে উদ্ধোর গোজ্যে, তে তা বিরুদ্ধে উল্লোমির উচ্চোমি দিয়্যে আর তমার গোজেন লগেপ্রভু যে পদেন্দি চলিবাত্তে তমারে উগুম্‌ দিয়্যে সে পধত্তুন্‌ তমারে ফিরেবাত্তে চেট্টা গোজ্যে। তমা ভিদিরেত্তুন্‌ সেই ভান্ন্যেইয়ানি তুমি শেজ্ গুরি দিবা।

^6-7 পিত্‌থিমীর এক দুঝিত্তুন অন্য দুঝি সং তমার চেরোকিত্তে কায়কুরে বা দূরোর মানুচ্চুনে যে দেব-দেবেদাগুনোরে পূজো গুরিদাক, যিগুনে তমার আর তমার পুরোণিমানুচ্চুনোর অজানা সেই দেব-দেবেদাগুনোন্দি যুনি তমার নিজোর ভেই বা তমার পূঅ বা ঝি অথবা আদরর্‌ মোক্‌ বা তমার পরাণর সমাজ্যে তরে গায় গায় পেইনে ভান্ন্যেই পদেন্দি নেযেবাত্তে কন্‌, আদিচ্‌, আমি যেইনে দেব-দেবেদাগুনোর পূজো গুরিই,

⁸ মাত্তর্‌ তার্‌ ডাগানালোই ন-শুন্ন্য বা তার্‌ কধালোই কান ন-দুয়ো। তারে কনঅ দোয়্যে ন-দেগেবা; তারে রেহাই ন-দিবা, বা তারে রোক্ষেয়ো ন-গুরিবা।

⁹ তারে মারেই ফেলা পুরিবো। তারে মারে ফেলেবার কামান তুমি নিজো আঢে আরাম্ভ গুরিবা, সে পরেন্দি অন্য বেক্কুনে মিজেবাক।

¹⁰ যিবে তরে মিসর দেজর চাগর্‌ খাদানাত্তুন্‌ নিগিলেই আন্যে তমার সেই গোজেন লগেপ্রভুর ইন্দিত্তুন্‌ তে তরে ফিরেবার চেট্টা গোজ্যে বিলিনে তারে তুই পাত্তর্‌ মারিনে মারে ফেলেবে।

¹¹ সেক্কে ইস্রায়েলীয়গুনে বেক্কুনে সেই কধাগান শুনিনে দোরেবাক্‌ আর তমা ভিদিরে কনজনে আর এ ধোক্ক্যেন ভান্ন্যেই কাম্‌ ন-গুরিবাক।

¹² তমার গোজেন লগেপ্রভু যেদক্কানি আদাম বা শঅর তমারে বজত্তি গুরিবাত্তে দিবাত্তে যার্‌ তার্‌ কনগান পৌইদ্যেনে অয়ত তুমি শুনিবা,

¹³ সিদুগোর্ ইস্রায়েলীয়গুনো ভিদিরে কিজু পাজি মানুচ্‌ দেগা দুয়োন যিগুনে সিদুগোর্ মানুচ্চুনোরে ইয়েন কোইনে ভান্ন্যেই পধেদি টানি নেযেয়োন, আদঅ, আমি দেব-দেবেদাগুনোরে পূজো গুরিই, যে দেব-দেবেদাগুনে তমা ইদু নূয়ো।

¹⁴ সিয়েনোই যুনি অয় সালে বেপারান তমাত্তুন্‌ খুব গমে ডালে উদো লোইনে পোরোক্ষে আর তদন্ত গুরি চাহ্ পুরিবো। আর সিয়েন যুনি সত্য বিলি প্রমাণ অয়, এ জঘন্য কামান তমা ভিদিরে গরা ওইয়্যে,

¹⁵ মাত্তর্‌ সিদুগোর্‌ বেক্‌ আদাম্মেগুনোরে হামাক্কায় মারে ফেলা পুরিবো। সে আদামান বা শঅরান্ আর সিয়েনর মানুচ্চুন আর য়েমানপালুন তুমি বেক্কানি শেজ্ গুরি দিবা।

¹⁶ সিদুগোর্ বেক্‌ লুদেয়্যে পযাপিরানি তুমি শঅরর-সংমোধ্যে নেযেইনে বেক্‌ পযাপিরানি আর সেই আদাম বা শঅরানি তুমি তমার লগেপ্রভুর নাঙে পুজ্যে-উৎসর্ব ধোক্ক্যেন গুরি বেক্কানি পুড়ি দিবা। সে জাগায়ান উমরত্তে যেনে এক্কান ভস্তর কুড়্ ওইনে পড়ি থায়; আর কনদিনঅ যেনে সিয়েনি বানানা ন-অয়।

¹⁷ লগেপ্রভু যেনে তার দর্‌গরেপারা রাগত্তুন্‌ ফিরি এজে সেনত্যে তমা আদত্‌ যেনে এই বেক্‌ পযাপিরানির এক্কানঅ দেগা ন-যায়, কিত্যে সিয়েনি উগুরে আঘেদে ভস্ত অনার্ অবিশাব। সালে তে তমারে দোয়্যে আর মেইয়্যে গুরিবো আর তমার পুরোণি মানুচ্চুনো ইদু শমক্‌ খেইয়্যে এগেম্ মঝিম তমার বংশগুন বাড়েই দিবো,

¹⁸ কিত্যে এচ্চ্যে মুই তমারে যেদক্কানি উগুম দুয়োঙর্‌ সিয়েনি পালন গরঅ আর তার চোগেদি যিয়েনি গম্‌ সিয়েনি গরঅ তুমি তমার গোজেন লগেপ্রভুর বাধ্য ওইয়ো।