দ্বি’লম্বর বিররণ 12 - Chakma Bibleতবনা গুরিবার জাগা 1 তমা পুরোণি মানুচ্চুনোর গোজেন লগেপ্রভু যে দেজ্ছান তমারে গজক্ গুরিবাত্তে দিয়্যে সিয়েনত্ জিংকানিবর্ এ বেক্ সুদোমানি আর উগুমানি যত্তনগুরি তমাত্তুন্ পালন গরা পুরিবো। 2 তুমি যে জাদ্তুনোরে গজক্ গুরিবাত্তে যর্ তারা যিদুক্কুন চিগোন-দাঙর্ মুড়ো-মুড়ি উগুরে আর ডেলা ছিদি পোজ্যে য়েল্ গাজর্ তলে তারার্ দেব-দেবেদার পূজো গরন্ সে জাগানি তুমি বেক্কানি ভস্ত গুরি দিবা। 3 তারার্ ডালিপূজোগুন ভাঙি দিবা, পূজোর পাত্তরুন কট্টা কট্টা গুরি দিবা, পূজোর আশেরা খুঁদোগুন পুড়ি ফেলেই দিবা, দেব-দেবীর মূত্তিগুন ভাঙি ফেলেই দিবা আর ইঙিরিনে সে বেক্ জাগানিত্তুন্ তারার্ দেব-দেবেদাগুনোর নাঙানি পুঝি ফেলেবা। 4 তুমি তমার গোজেন লগেপ্রভুর উবোসনা তারার্ পূজোগুনো ধোক্ক্যেন গুরি ন-গুরিবা। 5 মাত্তর্ তমার গোজেন লগেপ্রভু নিজোরে ফগদাং গুরিবাত্তে তমার বেক্ গুট্টিগুনোরে দিয়্যে জাগাত্তুন্ যে জাগাগান তার থেবার জাগা ইজেবে বেঈ নেযেবা তুমি সিয়োদোই তার উবোসনাত্তে যেবা। 6 তুমি তমার পুজ্যে-উৎসর্গ আর অন্য য়েমান-উৎসর্ব, তমার আয়র্ দশ ভাগর এক ভাগ, তমার বিশেষ দান আর মান্যা ছিড়েবার উৎসর্ব, তমার নিজোর আওজে গোজ্যে উৎসর্ব আর তমার গোরু-ছাগল-ভেড়ার পত্তম্ ছঅবুয়ো সিয়োদোই নেযেবা। 7 সিয়োদোই তমার গোজেন লগেপ্রভুর মুজুঙোত্ তুমি আর তমার পরিবারর মানুচ্চুনে হানা-দানা গুরিবাক্ আর তার আশিদ্বাদ মজিম পাওনা তমার কামর্ খেতখেত্তিলেই তুমি ফুত্তি গুরিবা। 8-9 তমার গোজেন লগেপ্রভু গমেডালে বজত্তি গুরিবাত্তে যে সোম্বোত্তিগানি তমারে দিবাত্তে যার্ তুমি এজঅ সিদু ন-লুমোগোই। তুমি সে দেজছানত্ যানার পরেন্দি আমি যেন্ এচ্চ্যে ইয়েনত্ যার্ চোগেদি যিয়েনি গম্ সিয়েনোই গুরির্ তুমি সিদু সিয়েনি ন-গুরিবা। 10 তমার গোজেন লগেপ্রভু সোম্বোত্তি ইজেবে যে দেজ্ছান তমারে দের্ তুমি যর্দন গাঙান্ পার্ ওই যেইনে যেক্কে সে দেজত্ বজত্তি গরা ধুরিবা সেক্কে তে তমার চেরোকিত্তে শত্রুগুনো সমারে যুদ্ধোত্তুন্ তমারে জিরেবাত্তে দিবো, আর তুমি দোলেডালে সিদু বজত্তি গুরি পারিবা। 11 সেক্কে তে নিজোরে ফগদাং গুরিবাত্তে যে জাগায়ান তার থেবারজাগা ইজেবে বেঈ লবঅ সিয়েনত্ তুমি মর্ উগুম্ গোজ্যে বেক্ জিনিস্ছানি আনিবা-তমার পুজ্যে-উৎসর্ব আর অন্য য়েমান-উৎসর্ব, তমা আয়র্ দশ ভাগর এক ভাগ, বিশেষ দান আর তমার বেঈ নেযেয়্যে জিনিস্ছানি যিয়েনি তুমি লগেপ্রভু ইদু মানত্ গোজ্য। 12 সিয়েনত্ তমার গোজেন লগেপ্রভুর মুজুঙোত্ তুমি, তমার ঝি-পূঅগুনে, তমার চাগর আর চাগরানীগুনে আর তমার আদাম্মে আর শঅরর লেবীয়গুনে যিগুনোর নিজোর বিলিনে কনঅ জাগা-জোমিন বা সোম্বোত্তি নেই তুমি বেক্কুনে ফুুত্তি গুরিবা। 13 চঅ, যেন তমার আওজ্ মজিম যে কনঅ জাগাত্ তুমি পুজ্যে-উৎসর্বর অনুষ্ঠান ন-গরঅ। 14 তমা গুট্টিগুনোরে দিয়্যে জাগাত্তুন্ যে জাগায়ান লগেপ্রভু বেঈ লবঅ সিয়োদোই তুমি সেই বেক্ পুজ্যে-উৎসর্বগুন গুরিবা আর সিয়োদোই তুমি মর্ উগুম্ গোজ্যে বেক্কানি গুরিবা। 15 মাত্তর্ তমার গোজেন লগেপ্রভু তমারে আশিদ্বাদ গুরিনে যিদুক্কুন য়েমান দিবো সিগুন্ যে কনঅ আদামত্ বা শঅরত্ কাবিনে তমা আওজ্ মজিম্ য়েরা হেই পারিবা, যেধোক্ক্যেন গুরিনে তমার্ সিজি-অসিজি বেক্ মানুচ্চুনে চঙড়া বা উরিঙ্ য়েরা খান। 16 মাত্তর্ তুমি লো হেই ন-পারিবা; সিয়েন পানি ধোক্ক্যেন গুরি মাদিত্ ঢালি দিয়্যে পুরিবো। 17 ইয়েন বাদে তমার শোজ্য, নূয়ো আংগুর-রস আর তেলর দশ ভাগর এক ভাগ, গোরু-ছাগল-ভেড়ার পত্তম ছঅবুয়ো, তমার্ মান্যা জিনিসছানি, তমার্ নিজোর আওজে গোজ্যে কনঅ উৎসর্ব আর বিশেষ দান তমার নিজোর আদাম্মে বা শঅর ভিদিরে হেই ন-পারিবা। 18 তমার গোজেন লগেপ্রভুর বেঈ লোইয়্যে জাগানত্ তা মুজুঙোত্ ইয়েনি তমাত্তুন্ খা পুরিবো। তুমি, তমার ঝি-পূঅগুন, তমার চাগর-চাগরানীগুন আর তমার আদাম্মে আর শঅরর লেবীয়গুনে সিয়েনি হেই পারিবাক্ আর তমার কামর ফলুন নেযেইনে তমার গোজেন লগেপ্রভুর মুজুঙোত্ ফুত্তি গুরিবা। 19 তমা দেজত্ তুমি যেদকদিন সং বজত্তি গুরিবা সেদকদিন লেবীয়গুনো উগুরে তমাত্তুন্ খিয়েল রাগা পুরিবো। 20 তমার গোজেন লগেপ্রভু তার এগেম্ মজিম তমার দেজর্ দুঝিগান বাড়েই দেনার পরেন্দি যেক্কে তুমি য়েরা হেবার আওজে কবা, য়েরা হেবং, সেক্কে তুমি আওজ্ মজিম্ য়েরা হেই পারিবা। 21 তমার গোজেন লগেপ্রভু নিজোরে ফগদাং গুরিবাত্তে যে জাগায়ান বেঈ নেযেব সিয়েন্ যুনি তমাত্তুন্ বোউত্ দূরোত্ অয়, সালে মর্ দিয়্যে উগুম মজিম তুমি লগেপ্রভুর দিয়্যে গোরু-ভেড়ার পালত্তুন্ য়েমান নেযেইনে কাবি পারিবা আর যার যার আদাম আর শঅরত্ আওজ্ মজিম য়েরা হেই পারিবা। 22 কৃষ্ণসার বা উরিঙোর্ য়েরা ধোক্ক্যেন তুমি সিয়েনি হেবা। সিজি-অসিজি বেক্কানি তুমি হেই পারিবা। 23 মাত্তর্ উঝিয়ার! লো ন-হেবা, কিত্যে লো-গান্ অলদে পরাণ, আর তুমি য়েরাগান সমারে সে পরাণান ন-হেবা। 24 তুমি লো-ন-হেবা, সিয়েন পানি ধোক্ক্যেন গুরি মাদিথ্ ঢালি দিবা। 25 তমার আর তমার পরেদি তমার পূঅগুনোর যেনে ভালেদি অয় সেনত্যে তুমি লো-গানি ন-হেবা; সালে লগেপ্রভুর চোগোত্ যিয়েনি গম্ সিয়েনোই গরা অবঅ। 26 লগেপ্রভুর বেঈ নেযেয়্যে জাগানত্ তমার সুদ্ধো-সাংগ জিনিস্ছানি আর মান্যা জিনিস্ছানি নেযা পুরিবো। 27 তমার গোজেন লগেপ্রভুর ডালিপূজোবো উগুরে তুমি তমার পুজ্যে-উৎসর্বর য়েরা আর লো-গানি উৎসর্ব গুরিবা। তমার গোজেন লগেপ্রভুর পূজোবোর কিয়্যেগানত্ তমার উৎসর্ব গোজ্যে য়েমানর লো-গানি উৎসর্ব গরা পুরিবো, মাত্তর্ সিয়েনর্ য়েরাগান তুমি হেই পারিবা। 28 তমার আর তমার পরেদি তমার ঝি-পূঅগুনোরে যেনে আমিঝে ভালেদি অয় সেনত্যে মর্ দিয়্যে এ বেক্ উগুমানি তুমি যত্তন্ গুরিনে পালন গুরিবা, কিত্যে সিয়েনি গুরিলে তমার গোজেন লগেপ্রভুর চোগোত্ যিয়েনি ন্যায় আর গম্ সিয়েনোই গরা অবঅ। 29-30 যিদুক্কুন জাদরে তুমি গজক্ গুরিবাত্তে যর্ তমা গোজেন লগেপ্রভু তমা মুজুঙোত্তুন্ তারারে এক্কুবারে ভস্ত গুরি দিবো। মাত্তর্ তারারে গজক্ গরানার পরেন্দি যেক্কে তুমি তারার দেজত্ বজত্তি গুরিবা সেক্কে উঝিয়ার অবা যেনে তমা মুজুঙোত্তুন্ তারা ভস্ত ওই যানার পরেন্দি তারার্ দেব-দেবেদাগুনোর পৌইদ্যেনে তোগেবাত্তে যেইনে তুমি কেরাবত্ ন-পড় আর পুজোর্ ন-গরঅ, এ বেক্ জাদ্তুনে কেধোক্ক্যেনগুরি তারার্ দেব-দেবেদাগুনোরে পূজো গুরিদাক্? আর যেরেন্দি কঅ, আমিয়ো সিয়েন্ গুরিবোং। 31 তুমি তমার গোজেন লগেপ্রভুর উবোসনা তারার্ পূজো ধোক্কেন্ গুরিনে ন-গুরিবা, কিত্যে তারার্ দেব-দেবেদা পূজোলোই তারা এধোক্ক্যেন জঘন্য কাম্ গোজ্যন্ যিয়েনি লগেপ্রভু ঘিনেই। এন্ কি, তারা তারার দেব-দেবেদাগুনো ইদু তারার ঝি-পূঅগুনোরে আগুনোত্ পুরিনে উৎসর্ব গোজ্যন্। 32 মুই তমারে যেদক্কানি উগুম্ দিলুং সিয়েনি বেক্কানি তুমি পালন গুরিবা; ইয়েন সমারে কিজু ন-মিজেবা, আরঅ ইয়েনত্তুন্ কিজু বাদঅ ন-দিবা। |
Copyright © 2021 Bangladesh Bible Society
Bangladesh Bible Society