দ্বি’লম্বর বিররণ 11 - Chakma Bibleলগেপ্রভুরে কোচ্পানা আর তার্ উগুম পালানার্ কধা 1 তমার গোজেন লগেপ্রভুরে কোচ্পেবা আর তে যিয়েন্ চায় সিয়েন্ গুরিবা আর তার্ সুদোমানি, হুকুমানি আর উগুমানি আমিঝে পালন গুরিবা। 2 এচ্চ্যে তুমি মনত্ রাগেয়ো, মুই এদক্কানি কধা তমারে কঙর্, তমা ঝি-পূঅগুনো ইদু ন-কঙর্, কিত্যে তারা তমার্ গোজেন লগেপ্রভুর সাজা দেনার্ কামান ন-জানন্ ন-য়ো দেগন্। তারা তার্ মহিমাগান্ আর তার্ বাড়েই দিয়্যে দরমর্ আর বোলী আঢ্তান্ ন-দেগন্। 3 মিসর দেজ ভিদিরে মিসরর রাজাবো ফরৌণ আর তার বেক্ দেজছান উগুরে তে যেদক্কানি চিহ্নো আর অন্য কামানি গোজ্যে সিয়েনিয়ো তারা ন-দেগন্। 4 মিসরীয় সৈন্যদলুন, তারার্ ঘোড়া আর রথ্তুনো উগুরে তে যিয়েনি গোজ্যে আর তারা যেক্কে তমা পিজেন্দি লোড়েইনে এত্তন্ সেক্কে কেধোক্ক্যেনগুরি তে লোহিত সাগরর্ পানিগানত্ তারারে ডুবেই দিয়্যে আর কেধোক্ক্যেনগুরি তারারে বেক্কুনোরে ভস্ত গুরি দিয়্যে সিয়েনিয়ো তারা ন-দেগন্। 5 তুমি ইদু এইনে ন-লুমোনা সং তে ধূল্যেচর-চাগালাত্ তমাত্যে যিয়েনি গোজ্যে সিয়েনি তমা ঝি-পূঅগুনেয়ো ন-দেগন্। 6 তে রূবেণ-গুট্টির ইলীয়াবর পূঅ দাথন আর অবীরাম উগুরে যিয়েনি গোজ্যে, অত্তাৎ যেধোক্ক্যেন গুরিনে বেক্ ইস্রায়েলীয়গুনোর্ সংমোধ্যে পিত্থিমীগানর্ মুয়োন্ খুলিনে তারার্ আর তারার্ পরিবারর্ মানুচ্চুনে, তারার্ তাম্বুলান আর তারার্ বেক্ জেদা পরাণবলাগুনোরে গিলি ফেলেয়্যে সিয়েনি তারা ন-দেগন্। 7 মাত্তর্ লগেপ্রভুর এ বেক্ দাঙর্ দাঙর্ কামানি তুমিই নিজের্ চোগেদি দেক্কো। 8-9 সেনত্যে যে দেজ্ছান গজক্ গুরিবাত্তে যর্দন গাঙান্ পার ওইনে যর্ সিদু যেইনে যেন সিয়েন গজক্ গুরিবার্ বলান পঅ আর লগেপ্রভু তমার পুরোণি মানুচ্ আর তারার্ বংশধরুনো ইদু দুধ আর মধুলোই ভোজ্যে যে দেজ্ছান দিবাত্তে এগেম্ গোজ্যে সিয়েনত্ ভালোক্ দিন বাঁজি থেই পার সেনত্যে এচ্চ্যে মুই তমারে যেদক্কানি উগুম্ দুয়োঙর্ সিয়েনি পালন গুরিবা। 10 তুমি যে দেজ্ছান গজক্ গুরিবাত্তে যর্ সিয়েন্ মিসর দেজঅ ধোক্ক্যেন নয় যিয়েনত্তুন তুমি এচ্ছো। তুমি সিদু বীজ ফেলেদা, আর শাক্ পাদঅ ক্ষেদত্ যেধোক্ক্যেন গরা অয় সেধোক্ক্যেন গুরি সিয়েনত্ টেংগোই পানি নেযেবার কাম্ গুরিদা। 11 মাত্তর্ যর্দন গাঙান পার ওইনে যে দেজ্ছান তুমি গজক্ গুরিবাত্তে যর্ সিয়েন্ মুড়ো-মুড়ি আর কিঝিঙোই ভোজ্যে; সে দেজ্ছানে পানি পাইদ্যে আগাজত্তুন্। 12 সে দেজছানর্ দেগাশুনো তমার গোজেন লগেপ্রভুই গরে। বজরর্ আরাম্ভত্তুন্ ধুরি যেরেন্দি সং আমিঝে তার্ চোখ্কুন্ সে দেজ উগুরে রোইয়্যে। 13 সেনত্যে তমার গোজেন লগেপ্রভুরে কোচ্পানা আর বেক্ মনান-পরাণানদোই তারে সেবা গুরিবার যে উগুমান এচ্চ্যে মুই তমারে দিলুং সিয়েনি তুমি বিশ্বেজ্ গুরিনে পালেবা। 14 সিয়েন গুরিলে লগেপ্রভু ঠিগ্ সময়োত্, অত্তাৎ শরৎ আর বসন্তকালত্ তমার দেজ উগুরে ঝড়্ দিবো যেনে তুমি ভালোক্কুন শোজ্য, নুয়ো আংগুরো-রস আর তেল পেবা। 15 লগেপ্রভু তমার য়েমানপালুনোত্তে মাদত্ ঘাস অবাত্তে দিবো। সিয়েন বাদে তুমিয়ো পেট ভরে সং হেই পেবা। 16 মাত্তর্ তুমি উঝিয়ার্ থেবা, সিয়েন ন-গুরিলে তুমি ছলনাত্ পুরিনে লগেপ্রভুত্তুন্ সুরি যেবা আর দেব-দেবেদার্ সেবা আর পূজো গুরিবা। 17 সেক্কে তমা উগুরে লগেপ্রভুর রাগর্ আগুনান জুলি উদিবো আর তে আগাজর্ দোরান বন্ধ গুরি দিবো, যিয়েনর্ কারনে ঝড়্অ ন-অবঅ আর ভূইয়োত্ ক্ষেত ক্ষেত্তিয়ো ন-অবঅ। যে দোল্ দেজ্ছান লগেপ্রভু তমারে দের্ সিয়েনত্তুন্ তুমি কম্ সময়োর্ ভিদিরে শেজ্ ওই যেবা। 18 তমার রিবেঙত্ আর মনত্ মর্ এ কধানি গাদেই রাগেবা, সিয়েনি মনত্ রাগেবার্ চিহ্নো ইজেবে আদত্ বানি রাগেবা আর কবালত্ লিবি রাগেবা। 19 তমা ঝি-পূঅগুনোরে সিয়েনি শিগেবা। ঘরত্ বোই থেবার অক্তত্, পদেন্দি আদিবার্ অক্তত্, ঘুম্ যেবার অক্তত্ আর বিচ্ছোনত্তুন্ উদিবার্ অক্তত্ তুমি ইয়ানি পৌইদ্যেনে কধাবাত্তা কবা। 20 তমা ঘর দুঅরর্ দোরো চের্কোণাত্ আর গেদোত্ তুমি সিয়েনি লিগি রাগেবা। 21 যুনি তুমি ইয়েনি গরঅ সালে যে দেজ্ছান দিবাত্তে লগেপ্রভু তমার পুরোণি মানুচ্চুনো ইদু শমক্ গোজ্যে সে দেজত্ তুমি আর তমার ঝি-পূঅগুনে যেদকদিন বাঁজি থেবাক্ সেদকদিন এ পিত্থিমীগান উগুরে দাঙর্ আগাজ্ছান থেবঅ। 22 তমার গোজেন লগেপ্রভুরে কোচ্পেবার, তার্ পদেন্দি চলিবার আর তারে আজাবোদে ধুরি রাগেবার্ যেদক্কানি উগুম্ মুই তমারে দিলুং সিয়েনি তুমি গমেডালে পালেবা। 23 সিয়েনি গুরিলে লগেপ্রভু তমা মুজুঙেত্তুন্ সে বেক্ জাদ্তুনোরে নিগিলেই দিবো, আর তুমি তমাত্তুন্ বেশ্ দাঙর্ দাঙর্ আর বোলী জাদ্তুনোরে গজক্ গুরিবা। 24 দোগিণেদি ধূল্যেচর চাগালাত্তুন্ লেবানন সং আর ইউফ্রেটিস গাঙত্তুন্ ভুমধ্য সাগর সং তুমি যিয়েনত্ টেং ফেলেবা সে জাগায়ান্ তমার্ অবঅ। 25 কনঅ মান্জ্যে তমা মুজুঙোত্ থিয়্যেই ন-পারিবাক্। তুমি সে দেজর্ যিয়েনত্ যেবা তমা গোজেন লগেপ্রভু তার্ এগেম্ মজিম সে জাগানর্ মানুচ্চুনোর মনত্ তমা পৌইদ্যেনে এক্কান দর্ গরেদে মনভাব আর গির্গিরেনি ধোরেই দিবো। 26 চঅ্, এচ্চ্যে মুই তমা মুজুঙোত্ এক্কান আশিদ্বাদ আর এক্কান অভিশাব্ তুলি ধরঙর্। 27 এচ্চ্যে মুই তমা ইদু তমার গোজেন লগেপ্রভুর যে উগুমানি দিলুং সিয়েনি যুনি তুমি পালন গরঅ, সালে এ আশিদ্বাদতান্ তমার অবঅ। 28 মাত্তর্ যুনি তুমি তমার গোজেন লগেপ্রভুর উগুমানি অমান্য গরঅ আর যে পদেন্দি চলিবার উগুম্ মুই এচ্চ্যে দুয়োং সিয়েনত্তুন্ সুরি যেইনে তমা ইদু নূয়ো এমন্ দেব-দেবেদার্ পিজেদি যঅ, সালে তমা উগুরে অভিশাব পুরিবো। 29 গজক্ গুরিবাত্তে তুমি যে দেজত্ সোমেবাত্তে যর্ তমা গোজেন লগেপ্রভু যেক্কে সে দেজত্ তমারে নেযেব সেক্কে গরিষীম মুড়োবো উগুরেত্তুন্ সে আশিদ্বাদর্ কধানি তুমি ফগদাং গুরিবা আর অভিশাবর কধানি ফগদাং গুরিবাদে এবল মুড়োবো উগুরেত্তুন। 30 তুমি দঅ হবর্ পঅ, যর্দন গাঙর্ পোজিমেন্দি পথ্তানর্ পোজিমে গিল্গলর কায়-কুরে অরাবার আদাম্মে কনানীয়গুনোর দেজর্ ভিদিরেন্দি মোরির এলোন গাচ্ছুনোর্ ইদু সে মুড়ো দ্বিবে আগন্। 31-32 তমার গোজেন লগেপ্রভু যে দেজ্ছান তমারে দিবাত্তে যার্ সে দেজ্ছান গজক্ গুরিবাত্তে তুমি যর্দন গাঙান পার্ অবাত্তে যর্। তুমি যেক্কে সিয়েন্ গজক্ গুরিনে সিদু বজত্তি গুরিবাত্তে থেবা সেক্কে মুই তমারে এচ্চ্যে যেদক্কানি সুদোম আর উগুম্ দিলুং সিয়েনি হামাক্কাই পালন গুরিনে চলিবা। |
Copyright © 2021 Bangladesh Bible Society
Bangladesh Bible Society