দ্বি’লম্বর বিররণ 10 - Chakma Bibleপাত্তরর্ আরুগ্ 1 সে অক্তত্ লগেপ্রভু মরে কোইয়্যেদে, তুই দ্বিবে পাত্তর্ কাবিনে আগঅ পাত্তর্-আরুগ দ্বিবে ধোক্ক্যেন গুরি নেযা আর মুড়োবো উগুরে মইদু উদি আয়। সে লগে তক্তার্ এক্কো সুন্দুক্অ বানেই নেযেচ্। 2 আগর্ যে আরুগ্ দ্বিবে তুই ভাঙি ফেলেয়োচ্ সিবে উগুরে যে কধানি লেগা এলঅ মুই সিয়েনি এ আরুগ্ দ্বিবে উগুরে লিগি দিম্। সে পরেন্দি তুই সে দ্বিবে লোইনে সুন্দুক্কো ভিদিরে রাগেবে। 3 “সেনত্যে মুই বাবলা তক্তালোই এক্কো সুন্দুক্ বানেলুং আর দ্বিবে পাত্তর্ কাবিনে আগঅ আরুগ্ দ্বিবে ধোক্ক্যেন গুরি নেযেলুং। সে পরেন্দি সে দ্বিবে আদত্ গুরিনে মুড়োবো উগুরে উদিলুং। 4 লগেপ্রভু পত্তম দ্বিবে সীলপাদ উগুরে যে কধানি লেখ্যে এ দ্বিবে উগুরেয়ো সিয়েনি লিগিনে দ্বিবে সীলপাদ্ মরে দিলো। সে কধাগানি অলঅ তার্ সেই দশ্ছান উগুম্ যিয়েনি তে তমার বেক্কুনোরে একসমারে এগত্তর্ অবার্ দিন্নোত্ মুড়োবো উগুরে আগুনো ভিদিরেত্তুন্ তমা ইদু ফগদাং গোজ্যং। 5 সে পরেন্দি লগেপ্রভুর উগুম মজিম্ মুই মুড়োবোত্তুন্ তলেন্দি লামি এইনে মর্ বানেয়্যে সে সুন্দুক্কো ভিদিরে আরুগ্ দ্বিবে রাগেলুুং। সিগুন্ এজঅ সিয়েনত্ আগন্।” 6 ইস্রায়েলীয়গুনে পরেন্দি বেরোৎ-ঝারর্-যাকনত্তুন্ রওনা ওইনে মোষেরোদোত্ লুমিলাক্। সিয়োদোই হারোণে মুরি যেইয়্যে আর তারে গোর্ দিয়্যে ওইয়্যে। তার্ পূঅ ইলিয়াসরে তা জাগানত্ দাঙর্ ধর্মগুরু ওইয়্যে। 7 সে পরেন্দি ইস্রায়েলীয়গুনে গুধগোদাত্ যেইয়োন আর সিয়েনত্তুন্ যেইয়োন যট্বাথাত। যট্বাথাত্ ভালোক্কানি চিগোন গাঙ্ এলঅ। 8 সে অক্তত্ লগেপ্রভু তার বেবস্থা-সুন্দুক্কো বুয়োই নেযেবাত্তে আর সেবা কামর্ নাঙে তা মুজুঙোত্ থিয়্যেবাত্তে আর তা নাঙে আশিদ্বাদ্ ফগদাং গুরিবাত্তে লেবীয়গুনোরে বেঈ লোইয়্যে। এ বেক্ কামানি তারা এজঅ গত্তন্। 9 সেনত্যেই লেবীয়গুনে তারার্ ইস্রায়েলীয় ভেইয়ুনো ভিদিরে সোম্বোত্তির্ কনঅ ভাগ বা অধিকার্ ন-পান; তমা গোজেন লগেপ্রভুর কধা মজিম লগেপ্রভুই তারার্ সোম্বোত্তি। 10 আগঅ ধোক্ক্যেন সেক্কেয়ো মুই চোল্লিশ দিন আর চোল্লিশ রেত্ মুড়োবো উগুরে এলুং আর সে বারদ্অ লগেপ্রভু মঅ কধানি শুন্ন্যে। তমারে ভস্ত গুরি দিবার্ আওজ্ তার্ ন-এলঅ। 11 লগেপ্রভু মরে কোইয়্যেদে, তুই যেইনে তারারে চালেইনে নেযা, যেনে তারার্ পুরোণি মানুচ্চুনো ইদু মুই যে দেজ্ছান দিবার্ শমক্ গোজ্যং সিয়েনত্ যেইনে তারা সিয়েন্ অধিকার্ গুরিনে লোই পারন। উগুম পালেবার উপদেজ্ 12-13 ইস্রায়েলীয়গুন, তমা গোজেন লগেপ্রভু ইক্কিনে তমাত্তুন্ কি চায়? তে বানা চায়দে যেনে তুমি তমার্ গোজেন লগেপ্রভুরে ভোক্তি গরঅ, সিয়েনি পৌইদ্যেনে তার্ পধন্দি চল্লো, তারে কোচ্পেবা, তমার বেক মনান-পরাণান দিইনে তারে সেবা গরঅ আর তমার্ গম কামত্তে এচ্চ্যে মুই তমা ইদু লগেপ্রভুর্ যেদক্কানি উগুম্ আর সুদোম দুয়োঙর্ সিয়েনি পালন গরঅ। 14 আগাজ্ছান আর তা উগুরে বেক্কানি আর পিত্থিমীগান আহ্ তার্ ভিদিরে বেক্কানিই তমার গোজেন লগেপ্রভুর। 15 তো তমার্ পুরোণি মানুচ্চুনো উগুরে তার্ টান্ এলঅ বিলিনে তে তারারে কোচ্পেইয়্যে। তে পুরো জাদ ভিদিরেত্তুন্ তারার্ বংশধরুনোরে, অত্তাৎ তমারে বেঈ লোইয়্যে আর এচ্চ্যেয়ো তুমি সেই বেঈ লোইয়্যে জাদ ইজেবে আগঅ। 16 সেনত্যে তুমি তমার্ মনানরে তনা গরঅ; একগেঁয়েমি ওইনে আর ন-থেইয়ো। 17 তমা গোজেন লগেপ্রভু বেগ্ দেব-দেবেদাগুনো উগুরে আর তে প্রভুগুনোর্ প্রভু। তে দাঙর্, খেমতাবলা আর ভোক্তিপূর্ণ দর্ জাগেয়্যে গোজেন। তে কারঅ পক্ষ ন-নেযায় আর ঘুষঅ ন-খায়। 18 নাদা আর রানীমিলেগুনোর্ দাবীগানি তে রোক্ষ্যে গরে আর তমা ভিদিরে বজত্তি গুরিয়্যে বিদেশীগুনোরে খানা উরোনা দিইনে তার্ কোচ্পানাগান দেগায়। তে তারারে হেবাত্তে উরিবাত্তে দে। 19 তুমিয়ো বিদেশীগুনোরে কোচ্পেয়ো, কিত্যে মিসরত্ তুমিয়ো বিদেশী এলা। 20 তুমি তমার্ গোজেন লগেপ্রভুরে ভোক্তি গুরিবা আর তারে সেবা গুরিবা; তারেই আজাবোদে ধুরি থেবা আর তার্ নাঙেই শমক্ গুরিবা। 21 তেয়ই তমার্ বাঈনী, তেয়ই তমার্ গোজেন। তুমি নিজোর চোগেদি যেদক্কানি মহৎ আর দর্ জাগেয়্যে আমক্ কাম্ দেখ্য সিয়েনি তে তমাত্তে গোজ্যে। 22 তমার্ যে পুরোণি মানুচ্চুনে মিসরত্ যেইয়োন তারা সোংখ্যেন্দি এলাক্কে বানা সত্তুরজন আর ইক্কিনে তমার গোজেন লগেপ্রভু তমারে জনেদি গুরি দিয়্যে আগাজর্ তারাগুনো ধোক্ক্যেন গুণি ন-পুড়েইয়্যে। |
Copyright © 2021 Bangladesh Bible Society
Bangladesh Bible Society