দ্বি’লম্বর বিররণ 1 - Chakma Bibleহোরেব মুড়োবো ছাড়ি যেবার্ উগুম 1 মোশি যর্দন গাঙর্ পূগেন্দি ধূল্যেচর-চাগালাত্, অত্তাৎ অরাবাতত্ বেক্ ইস্রায়েলীয়গুনো ইদু বালক্কানি কধা কোইয়্যে। তে যিয়েনত্ সেদক্কানি কধা কোইয়্যে সেই জাগায়ান এলদে সূফর মুজুঙোন্দি। সিয়েনর্ এক কিত্তেন্দি এলদে পারণ আর আরেক কিত্তেন্দি এলদে তোফল, লাবন, হৎসেরোৎ আহ্ দীষাহব। 2 হোরেবত্তুন্ সেয়ীর মুড়োবোর পথ্তান্ ধুরিনে কাদেশ-বর্ণেয় সং যাদে এগার দিন লাগে। 3 লগেপ্রভু ইস্রায়েলীয়গুনোর পৌইদ্যেনে মোশিরে যেদক্কানি উগুম্ দিয়্যে সিয়েনি তে তারার্ যানার্ চোল্লিশ বজরে এগার মাজর্ পত্তম তারিগোত্ তারার ইদু ফগদাং গুরিলো। 4 ইমোরীয়গুনোর রাজা সীহোনরে আর ইদ্রিয়ী শঅরত্ বাশন দেজর রাজা ওগকরে অদেই দেনার পরেন্দি তে সিয়েন ফগদাং গুরিলো। সীহোনে রাজাগিরি গুরিদো হিষ্বোনোত্ আর ওগ রাজাগিরি গুরিদো অষ্টারোতত্। 5 রীদি-সুদোমর্ এই বেক্ কধানি মোশি যর্দন গাঙর্ পূগেন্দি মোয়াব দেজত্ ইস্রায়েলীয়গুনোরে বুঝেইনে কুয়া ধুরিলো। তে কলদে, 6 আমা গোজেন লগেপ্রভু হোরেব মুড়োবোত্ আমারে কোইয়্যেদে, এই মুড়োবোত্ তমার্ ভালোক্ দিন কাদি যেইয়্যে। 7 ইক্কিনে তুমি তাম্বুলানি তুলি নেযেইনে ইমোরীয়গুনোর মুড়োমুড়ি চাগালাত্ আর তার্ কায়-কুরে জাগায়ানির্ মানুচ্চুনো ইদু যঅ। তারা অরাবাতত্, উজু মুড়ো চাগালাত্, তলে মুড়োমুড়ি চাগালাত্, নেগেভ আর সাগরর্ পারত্ বজত্তি গরন। এই জাগায়ানি অলদে কনানীয়গুনোর্ দেজ্ছানি সুদ্দো লেবানন ওইনে বড়্গাঙ্ ইউফ্রেটিস সং বেক্ জাগাগান। 8 চঅ, মুই সেই জাগায়ানি তমারে দি ফেল্যং। মুই লগেপ্রভু তমার্ পুরোণিমানুচ্ অব্রাহাম, ইসহাক, যাকোব আর তারার্ পরেন্দি তারার্ বংশধরুনোরে যে দেজ্ছান দিবাত্তে শমক্ খেইয়োং তুমি সিয়েনত্ যেইনে সেই দেজ্ছান গজক্ গরঅ। নেতা নেযানা 9 সে অক্তত্ মুই তমারে কোইয়োং, মর্ গায়্ গায়্ তমারে বুয়োই নেযানা সম্ভব নয়। 10 তমার গোজেন লগেপ্রভু তমা মানুচ্চুনোরে এদক বাড়েই দিয়্যেদে যে, এইচ্ছ্যে তুমি আগাজ তারা ধোক্ক্যেন গুণি ন পুড়েইয়্যে ওই উঠ্য। 11 তমার পূরোণি মানুচ্চুনোর গোজেন লগেপ্রভু তমা মানুচ্চুনোরে আরঅ আজার্ গুণ বাড়েই দুয়োক্ আর তার্ এগেম্ মজিম তে তমারে আশিদবাদ্ গোরোক্। 12 মাত্তর্ মুই গায়্ গায়্ কেধোক্ক্যেন গুরি তমার্ বেক্ কোল্-কোজ্যেগানি সামেলেবার ভারান্ আর কামানি গুঝি লোম্? 13 তুমি তমার্ পত্তি গুট্টিত্তুন্ কয়েকজন গুরি জ্ঞানীবলা, বুদ্ধিবলা আর অভিজ্ঞতাবলা মানুচ্ বেঈ নেযঅ; মুই তারা উগুরে তমারে দেগাশুনোর ভারান্ দিম্। 14 তুমি তার্ জোবত্ কোইয়োদে, তুই যিয়েন্ কোইয়োচ্ সিয়েনোই গরানা উজিত্। 15 সেনত্যেই মুই তমা গুট্টিত্তুন্ জ্ঞানীবলা আর অভিজ্ঞতাবলা সর্দারুনোরে নেযেইনে তমা উগুরে আজার উগুরে নেতা, শত উগুরে নেতা, পঞ্চাশ উগুরে নেতা, দশজন উগুরে নেতা আর অন্য কাম্গুরিয়্যে মানুচ্ নেযেয়োং। 16 এই বেক্ বিচের গুরিয়্যেগুনোরে সেক্কে মুই কোইয়োং, তুমি কোল্-কোজ্যে বাজেবার্ সলাবোত্ দ্বিতপ্পের্ কধানি শুনিনে গমেডালে বিচের্ গুরিবা-সেই কোল্-কোজ্যেনি ইস্রায়েলীয় ভেইয়ুনো ভিদিরে ওক্ বা ইস্রায়েলীয় আর অন্য জাদর্ মানুচ্চুনো ভিদিরে ওক্। 17 বিচেরর্ পৌইদ্যেনে তুমি কারঅ পক্ষ ন নিবা আর চিগোন্-দাগর্ বেক্কুনোর্ কধা শুনিবা। বিচেরর্ কামান্ আজলে গোজেনর্; সেনত্তে কনঅ মান্জ্যরে তুমি ন দোরেবা। যুনি কনঅ বিচের্ তমা ইদু আগাত্যে বিলিনে মনে গরঅ সালে তুমি সিয়েন্ মইদু আনিবা, মুই সেই বিচেরান গুরিম্। 18 তমার্ যিয়েনি গরা পুরিবো সিয়েনিয়ো মুই সেক্কে তমারে কোই দুয়োং। চড়্ পাদানা 19 ইয়েনর্ পরেদি আমা গোজেন লগেপ্রভুর উগুমে আমি হোরেব মুড়োবো ছাড়িনে ইমোরীয়গুনোর্ মুড়োমুড়ি চাগালান্দি আদা মারিলোং। কেধোক্ক্যেন দাঙর্ আর কেধোক্ক্যেন দর্গরেপারা ধূল্যেচর-চাগালার ভিদিরেন্দি আমার্ যাহ্ পোজ্যে সিয়েন্ তুমি দেখ্য। এধোক্ক্যেনগুরি আমি কাদেশ-বর্ণেয়ত যেইনে লুমিলোং। 20 সে পরেন্দি মুই তমারে কলুং, তুমি ইমোরীয়গুনোর্ মুড়ো-মুড়ি চাগালাত্ এচ্ছো; ইয়েন্ আমা গোজেন লগেপ্রভু আমারে দিবাত্তে যার্। 21 চঅ, তমার গোজেন লগেপ্রভুর দিয়্যে পুরো দেজ্ছানই তমা মুজুঙোত্ আঘে। তমার পুরোণি মানুচ্চুনোর গোজেন লগেপ্রভুর কধা মজিম্ তুমি যেইনে দেজ্ছান গজক্ গরঅ। তুমি ন দোরেয়ো, নিরাশঅ ন ওইয়ো। 22 সেক্কে তুমি বেক্কুনে এইনে মরে কলাদে, কয়েকজন মান্জ্যরে আগে আগে পাধেই দিয়্যে ওক্, যেনে তারা দেজ্ছান চেই এইনে আমারে কোই পারন্ কন্ পধন্দি আমাত্তুন্ সিদু যাহ্ পুরিবো আর কন্ কন্ শঅর্ আমা মুজুঙোত্ পুরিবো। 23 তমার্ কধাগানি মইদু গম্ বিলিনে মনে অলঅ। সেনত্তেই মুই তমার্ পত্তি গুট্টিত্তুন্ একজন গুরিনে বেক্কুনে বারজন মানুচ্ বেঈ লোলুং। 24 তারা তমারে ছাড়িনে সেই মুড়ো-মুড়ি চাগালাত্ উদিলাক আর ইষ্কোল কিঝিঙোত্ যেইনে গমেডালে বেক্কানি চেইনে এলাক। 25 তারা সেই দেজর্ কিজু গুলোগুলি লগে গুরি নেযেইনে আমারে কলাক্, আমার গোজেন লগেপ্রভু যে দেজ্ছান আমারে দিবাত্তে যার্ সিয়েন্ জদবদে দোল্। 26 মাত্তর্ তুমি সেই দেজত্ যেবাত্তে ন চেলা। তুমি তমার্ গোজেন লগেপ্রভুর উগুমোর্ বিরুদ্ধে থিয়্যেলা। 27 তুমি নিজোর্ তাম্বুলো ভিদিরে বেশ্ কধা কনা আরাম্ভ গুরিলে আর কলাদে, লগেপ্রভু আমারে ঘিনেই। সেনত্তেই ইমোরীয়গুনো আদত্ তুলি দিইনে ভস্ত গুরিবাত্তেই তে আমারে মিসর দেজত্তুন্ নিগিলেই আন্যে। 28 আমি কেধোক্ক্যেনগুরি সিদু যেবং? আমা ভেইয়ুনে আমা মনানি ভাঙি দুয়োন। তারা কদন্দে, সিদুগোর্ মানুচ্চুনে তারাত্তুন্ বেশ্ বোলী আর লাম্বা; তারার্ শঅরানিয়ো দাঙর্ দাঙর্ আর তারার্ চেরোকিত্তে রোইয়্যেদে আগাজত্-দুস্যে দেবাল্। সিয়েনত্ তারা অনাকীয়গুনোরেয়ো দেখ্যন। 29 সিয়েন্ শুনিনে মুই তারারে কলুং, তুমি ন দোরেয়ো, সেই মানুচ্চুনোরে ন দোরেয়ো। 30-31 তমার গোজেন লগেপ্রভু তমা আগে আগে যার্। তে তমার্ চোগো মুজুঙোত্ মিসর্ দেজত্ আর ধূল্যেচর-চাগালাত্ যেধোক্ক্যেন তমার্ ওইনে যুদ্ধো গোজ্যন্ ইক্কিনেয়ো সেধোক্ক্যেন গুরিবাক্। তুমি দঅ দেখ্য, বাপ্পো যেধোক্ক্যেন পূঅবোরে করত্ গুরি নেযায় সেধোক্ক্যেন গুরি এই জাগানত্ ন লুমোনা সং তমার গোজেন লগেপ্রভুয়ো গোদা পথতান্ তমারে বুয়োই আন্যে। 32 তো তুমি তমা গোজেন লগেপ্রভু উগুরে বিশ্বেজ্ ন গরঅ। 33 তেয়ই দঅ তাম্বুলান ফেলেবার্ জাগায়ান ঠিগ্ গুরিবাত্তে আর পথ দেগেইনে তমারে নেযেবাত্তে রেদোত্ আগুনো ভিদিরেন্দি আর দিনোত্ মেঘ ভিদিরেন্দি যেবার পদথ্ তমার্ আগে আগে যেইয়্যে। 34-36 তমার কধানি শুনিনে লগেপ্রভু অমকদ বেজার্ ওইনে শমক্ গুরিনে কোইয়্যেদে, যে দোল্ দেজ্ছান তমার্ পূরোণি মানুচ্চুনোরে দিবার্ শমক্ মুই গোজ্যং বানা যিফুন্নির্ পূঅ কালেব বাদে ইক্কিনে সেই বজং মানুচ্চুনো ভিদিরে একজনেয়ো সিয়েনি চেই ন পেবাক্। বানা কালেবে সিয়েনি দিগিবো। তে পুরোপুরি ভাবে লগেপ্রভুর কধা মজিম চোল্যে বিলিনে তে সিয়েনি দিগিবো আর যিয়েনত্ তে টেং দিইনে এচ্ছ্যে সিয়েনোই মুই তারে আর তার্ বংশধরুনোরে দিম্। 37 তমার্ কারনে লগেপ্রভু মঅ উগুরে অমকদ বেজার্ ওইনে কোইয়্যেদে, সেই দেজত্ তমারঅ সমানা ন অবঅ, 38 মাত্তর্ তর্ এজাল্ দিয়্যে নূনোর পূঅ যিহোশূয় সুমিবো। তুই যিহোশূয়রে উচ্ছোমি তুলি দে, কিত্যে তেয়ই দেজ্ছান গজক্ গুরিনে ইস্রায়েলীয়গুনোর্ অধিকার্ ইজেবে দিবো। 39 যিদুক্কুন্ ঝি-পূঅরে বানিনে নেযা অবঅ বিলিনে তুমি কোইয়ো তমার্ সেই বেক্ ঝি-পূঅগুনে, যিগুনোর গম্-বজঙর্ জ্ঞান এজঅ ন অয়, সিগুনেই সেই দেজত্ সুমিবাক। মুই দেজ্ছান তারারে দিম্ আর তারা সিয়েন্ গজক্ গুরিবাক। 40 ইক্কিনে তুমি পিজেন্দি ফিরিনে আকাবা চিগোন্ সাগরর্ পথ্তান্ ধুরিনে ধূল্যেচর-চাগালান্দি রওনা ওইনে যঅ। 41 এই কধাগান শুনিনে তুমি কোইয়ো, আমি লগেপ্রভুর বিরুদ্ধে পাপ গোজ্যেই। ইক্কিনে আমার গোজেন লগেপ্রভুর উগুম্ মজিম্ আমি যেইনে যুদ্ধো গুরিবোং। ইয়েন্ কোইনে তুমি বেক্কুনে আত্যেরানি নেযেলা। তুমি মনে গোজ্য মুড়ো-মুড়ি চাগালাত্ উদি যানা খুব সহজ। 42 মাত্তর্ লগেপ্রভু মরে কোইয়্যেদে, তুই তারারে কোইদে যেনে তারা যুদ্ধো গুরিবাত্তে সিদু ন-উদোন্ কিত্যে মুই তারা সমারে ন-থেম্; সেনত্তেই তারা শত্রুগুনো ইদু উদি যেবাক্। 43 মুই তমারে সেই কধাগান জানেলুং মাত্তর্ তুমি সিয়েন্দোই কান্ ন-পাদিলা। তুমি লগেপ্রভুর উগুমোর্ বিরুদ্ধে যেইনে বুক্ ফুলেইনে মুড়ো-মুড়ি চাগালাত্ উদি গেলা। 44 সিয়েন্ দিগিনে যিদুক্কুন ইমোরীয় সেই মুড়ো-মুড়ি চাগালাত্ বজত্তি গুরিদাক তারা তমার বিরুদ্ধে নিগিলি এলাক্। এক ঝাক্ মু পুগো ধোক্ক্যেন তারা তমারে লোড়েলাক্ আর সেয়ীর ভিদিরে হর্মা সং তমারে মাত্যে মাত্যে নেযেলাক্। 45 তুমি ফিরি এইনে লগেপ্রভু ইদু কানিলা, মাত্তর্ তে তমার্ কাঁনানিগানি ন শুনিলো; তে কানান্ ঢিবেই দি রাগেল। 46 এধোক্ক্যেনগুরি তুমি কাদেজত্ ভালোক দিন রোইয়ো আর সিয়োদোই তমার্ ভালোক দিন কাদা গেলঅ। |
Copyright © 2021 Bangladesh Bible Society
Bangladesh Bible Society