দানিয়েল 8 - Chakma Bibleভেড়া আর ছাগল পৌইদ্যেনে দর্শন 1 রাজা বেল্শৎসরর রাজাগিরির তিন বজরত্ মুই দানিয়েল আর এক্কান দর্শন পেলুং। 2 সেই দর্শনানত্ মুই নিজোরে এলম রেজ্যর্ শূশন তাম্বুলোত্ দেগিলুং। সেই দর্শনান ভিদিরে মুই ঊলয় গাঙ পারত্ এলুং। 3 মুই রিনি চেইনে এক্কো পাদা ভেড়ারে ছড়া পারত্ থিয়্যেই থাগদে দেগিলুং। তার দ্বিবে লাম্বা শিং এলঅ। এক্কো শিং আর এক্কোত্তুন্ লাম্বা আর সিবে যেরেদি উঠ্যে। 4 মুই দেগিলুং ভেড়াবো পোজিমেদি, উত্তোরেদি আর দোগিণেদি গুদো মারিলো। তা মুজুঙোত্ কনঅ য়েমানে ঠিগি ন-পারিলো আর তা আঢত্তুন্ উদ্ধোর গুরি পারন্ এমন কনজন ন-এলাক্। তে যিয়েন হুজি সিয়েনই গুরিদো আর তে খেমতাবলা ওই উদিলো। 5 মুই যেক্কেনে এ পৌইদ্যেনে ভাবঙর্ সেক্কে অদাদৎ পোজিমেত্তুন্ এক্কো ছাগল মাদিত্ ন-বাস্যে গুরি সিয়েনত্ এলঅ; তার দ্বিবে চোগো সংমোধ্যে চোগোত্ পড়েদে ধোক্ক্যেন এক্কো শিং এলঅ। 6 দ্বিবে শিঙোত্ যে ভেড়াবোরে মুই ছড়া পারত্ থিয়্যেই থাগদে দেখ্যং ছাগল্লো দর্গরেপারা যেইনে তাইন্দি দাবা গেলঅ। 7 মুই দেগিলুং ছাগল্লো সেই ভেড়াবোরে অমকদ আঘাত্ গুরিনে তার শিং দ্বিবে ভাঙি ফেলেল। তা মুজুঙোত্ ভেড়াবোর থিয়্যেবার কনঅ খেমতা ন-রলঅ; ছাগল্লো তারে মাদিত্ ফেলেইনে টেঙোই উরো ধুরিলো। তা আঢত্তুন্ ভেড়াবোরে উদ্ধোর্ গুরি পারে এবাবোত্যে কনজন ন-এলঅ। 8 ছাগল্লো অমকদ বোলী ওই উদিলো, মাত্তর্ তে যেক্কেনে বোলী ওই উদিলো সেক্কেনে তার দাঙর্ শিঙো ভাঙি গেলঅ আর তা জাগানত্ চের্ কিত্তেদি চের্বো চোগোত্ পড়েদে ধোক্ক্যেন শিং উদিলাক্। 9 সেই শিঙুনোত্ এক্কোত্তুন্ আর এক্কো শিং উদিলাক্; সিগুন পৌইল্যাদি চিগোন এলাক্ মাত্তর্ পরেদি দোগিণ, পূগ আর দোল্ দেজ ইন্দি দাঙর্ উয়ো ধুরিলাক্। 10 সিবে দাঙর্ অদে অদে স্বর্গর্ তারাগুনো সং যেইনে লুমিলো আর কয়েক্কো তারা মাদিত্ ফেলেইনে সিগুনোরে টেঙোই উরিলো। 11 তে নিজোরে সেই তারাগুনোর নেতার সংসং দাবি গুরিলো। তা নাঙে গোজ্যে পত্তিদিনোর উৎসর্বর অনুষ্ঠান তে বন্ধ গুরি দিলো আর উবোসনা-ঘরান্অ অসিজি গরা অলঅ। 12 তা পাপত্যে সেই তারাগুন আর পত্তিদিনোর উৎসর্বর অনুষ্ঠান তা আঢত্ যেইনে পড়িলো। তে সত্যগানরে মাদিত্ ফেলেল আর যিয়েনি গুরিলো সিয়েনিত্ ফোলেল। 13 সে পরেদি মুই এক্কো পবিত্র স্বর্গদুতোরে কধা কদে শুনিলুং আর এক্কো পবিত্র স্বর্গদূতে তারে পুযোর্ গুরিলো, “এই দর্শনানত্ যিয়েন দেগা অলঅ সিয়েন কয়দিন ধুরি চলিবো? কয়দিন ধুরি পত্তিদিনোর্ উৎসর্বর অনুষ্ঠানর বদলে সর্বনাশ পাপর জিনিস থেবঅ? কয়দিন ধুরি উবোসনা-ঘর আর তারাগুনোরে টেঙোই উরো অবঅ?” 14 তে কোইয়্যেদে, “দ্বিআজার তিনশঅ সাজোন্যে আর বেন্যেমাদান ধুরি ইয়েনি চলিবো। সে পরেদি উবোসনা-ঘরান আরঅ সিজি গরা অবঅ।” দর্শনানর্ ভেদ্তান্ 15 মুই দানিয়েল যেক্কে দর্শনর্ ভেদ্তান্ বুঝিবার চেট্ট্যা গুরিলুং সেক্কে মান্জ্য ধোক্ক্যেন চাদে এক্কো মঅ মুজুঙোত্ এইনে থিয়্যেল। 16 মুই এক্কো মান্জ্য রঅ শুনিলুং; সেই রবো ঊলয় ছড়া ভিদিরেত্তুন্ ডাগিনে কলঅ, “গাব্রিয়েল, এ দর্শনানর ভেদ্তান্ এ মানুচ্চোরে বুঝেই দে।” 17 মুই যিয়েনত্ থিয়্যেই এলুং তে সেই জাগান ইধু এজানার পরেদি মুই দোরেইনে মাদিত্ পড়ি গেলুং। তে মরে কলঅ, “ও মান্জ্যর পুয়োবো, এ দর্শনান যে শেজ্কালর পৌইদ্যেনে সিয়েন তুই বুঝি লঅ।” 18 তে যেক্কেনে মঅ লগে কধা কর্ সেক্কে মুই মাঢা নিগিজ্যে অবস্থায় অজ্ঞান ওই পড়ি গেলুং। তে মরে ধুরিনে টেঙোই ভর্ দিইনে থিয়্যেবাত্তে দিলো। 19 তে কলদে, রাগর্ সময় শেজদি যিয়েনি ঘুদিবো সিয়েনি মুই তরে কঙর্, কারন দর্শনান্ অলঅ শেজকালর্ ঠিগ্ গোজ্যে সময়ো পৌইদ্যেনে। 20 তুই দ্বিশিঙোর্ যে ভেড়াবো দেখ্যচ্ সিগুন অলাক্ মাদীয় আর পারসীক রাজাগুন। 21 সেই লোমশ ছাগল্লো অলঅ গ্রীস রেজ্যগান আর তা দ্বিচোগো সংমোধ্যে দাঙর্ শিঙো অলঅ রেজ্যর্ পত্তম রাজাবো। 22 ভাঙি ফেল্যে শিঙুনো জাগানত্ সেই চের্বো শিং অলঅ চেরান রেজ্য যিয়েনি সেই জাদ ভিদিরেত্তুন্ নিগিলিবো মাত্তর্ সেই রেজ্যগানির্ রাজাগুনোর পত্তম রাজা ধোক্ক্যেন খেমতা ন-থেবঅ। 23 তারার্ রাজাগিরির শেজদি যেক্কে পাপ এত বেশ্ অবঅ সেক্কে এক্কো অমকদ চিৎনপুজ্যে আর চালাক্ রাজা উদিবো। 24 তে অমকদ বোলী অবঅ, মাত্তর্ নিজো বল্লোই নয়। তে জদবদে ভস্ত গুরিবো আর তে যিয়েনি গুরিবো সিয়েনিত্ ফোলেব। তে খেমতাবলা মানুচ্চুনোরে আর গোজেনর মানুচ্চুনোরে ভস্ত গুরিবো। 25 তার চালাগিত্তে তে ছলনা গুরিনে সফলতা লাভ গুরিবো আর নিজোরে বেগত্তুন্ দাঙর্ মনে গুরিবো। মান্জ্যে যেক্কে নিজোরে নিরাপদ মনে গুরিবাক্ সেক্কে তে ভালোক্কুনোরে ভস্ত গুরিবো আর শাজন্গুরিয়্যেগুনোর আজল্লো বিরুদ্ধে থিয়্যেব। যেরেদি তে ভস্ত অবঅ, মাত্তর্ মান্জ্যর বল্লোই নয়। 26 “তরে সাজোন্যে আর বেন্যেমাদান্ উৎসর্বর পৌইদ্যেনে যে দর্শনান্ দেগা ওইয়্যে সিয়েন সত্য, মাত্তর্ এ দর্শনান্ সীলমহ্র গুরি রাগা, কিত্যে সিয়েন ভবিচ্চদে বোউত্ পরেদি অবঅ।” 27 মুই দানিয়েল বল্পোজ্যে ওই পড়িলুং আর অসুগ্ ওইনে কয়েকদিন পড়ি থেলুং। সে পরেদি মুই উদিনে রাজার কাম গুরিবাত্তে গেলুং। মুই সেই দর্শনান্ দেগিনে অমকদ চিন্তেত্ পোজ্যং, কিয়া সেই দর্শনানর্ ভেদ্তান্ মুই বুঝি ন-পারিলুং। |
Copyright © 2021 Bangladesh Bible Society
Bangladesh Bible Society