দানিয়েল 4 - Chakma Bibleগাজ পৌইদ্যেনে স্ববন্ 1 পরেদি রাজা নবূখদ্সরে জগদর্ বেক জাদ ইধু, দেজর্ আর ভাষার মানুচ্চুনো ইধু এ হবরান্ পাদেল: তমার ভালেদি ওক্। 2 দাঙর্ গোজেনে মত্তে যেদক্কানি চিহ্নো-কাম আর আমক্ কাম গোজ্যে সিয়েনি মুই হুজি ওইনে তমারে জানাঙর্। 3 তার চিহ্নোর্-কামানি কদক্ দাঙর্, তার্ আমক্ কামানি কদক্ খেমতাবলা! তার রেজ্যগান উমরর্ রেজ্য, আর তার রাজাগিরিগান্ যুগোর পর যুগ থিদেবর্ গোজ্যে। 4 মুই নবূখদ্নিৎসর আরাম আর বেক্কানিন্দি ফোলেইনে মর্ রাজঘরানত্ এলুং। 5 মুই যেক্কে বিচ্চোনত্ পোজ্যে এলুং সেক্কে এক্কান স্ববন্ দেগিনে দোরেলুং; সে স্ববনত্ মুই যিয়েনি যিয়েনি দেগিলুং সিয়েনি মঅ মনত্ দর্বুক্ সোমেল। 6 সেনত্তে মঅ স্ববনর্ ভেদ্তান্ ভাঙি দিবাত্তে মুই বাবিলোর বেক্ রাজ-সল্লা দিয়্যেগুনোরে মঅ মুজুঙোত্ আনিবাত্তে উগুম দিলুং। 7 যাদুকর, ভূদো ওঝা, জ্যোতিষী আর গোণোক্ক্যেগুনে মইদু এজানার পরেদি মুই তারা ইধু স্ববনান্ কলুং, মাত্তর্ তারা সিয়েনর ভেদ্তান্ কোই ন-পারিলাক্। 8 যেরেদি দানিয়েলে মঅ মুজুঙোত্ এজানার পরেদি মুই তারে স্ববনান্ কলুং। মঅ দেবেদাবোর নাঙানি অনুসারে তারে বেল্টশৎসর নাঙ্ দিয়্যে অলঅ। তা ভিদিরে সুদ্ধো-সাংগ এমন কিজু আঘে যিয়েনি এ পিত্থিমীর নয়। 9 মুই কলুং, ও যাদুকরর্ আজল্লো বেল্টশৎসর, মুই হবর্ পাং তঅ ভিদিরে সুদ্ধো-সাংগ এমন কিজু আঘে যিয়েনি এ পিত্থিমীর নয় আর কনঅ গুমুরো বিষয় হবর্ পানা তইদু অমকদ আঘাত্যে নয়। মর্ এ স্ববনানর্ ভেদ্তান্ তুই কোই দে। 10 বিচ্ছোনত্ পড়িনে মুই এ দর্শনান্ দেখ্যং। মুই রিনি চেলুং এক্কো গাজ্ পিত্থিমীর সংমোধ্যে থিয়্যেই আঘে; সিবে অমকদ অজল্। 11 গাজ্চো বাড়ি উদিনে দাঙর্ আর দরমর অলঅ আর তা মাঢাবো যেইনে আগাজত্ লুমিলো; পিত্থিমীর শেজ্ দুযিত্তুন্অ গাজ্চোরে দেগা যার্। 12 তা পাদানি দোল্ এলঅ আর গুলোগুলি এলাক্ বোউত্ আর সিগুনোত্তুন্ বেক্কুনে হানা পেদাক্। সিবে তলেদি মাদ য়েমানুনে আশ্রয় নেযেদাক্ আর আগাজর্ পেগ্কুনে তা ডেলাগুনোত্ বজত্তি গুরিদাক্; বেক্ প্রাণিগুনে সিবেত্তুন হানা পেদাক্। 13 বিচ্ছোনত্ পড়িনে সেই দর্শনর্ মাধ্যমে রিনি চেইনে দেগিলুং যে, এক্কো পবিত্র চুগিদার স্বর্গত্তুন্ লামি এলঅ। 14 তে রঅ ছাড়িনে কলদে, গাজ্চো কাবি ফেলা আর তার বাগলানি ছাজি ফেলেই দে; তার পাদানি ঝারি ফেলা আর গুলোগুলিগুন্ ঝোড়েই দে, তার তলানত্তুন্ য়েমানুনে আর ডেলাগুনোত্তুন্ পেগ্কুনে ধেই যাদোক্, 15 মাত্তর্ তার গোড়া আর শিঙোরানি লুয়ো আর পিদোল্লোই বান্যে অবস্থায় মাদিত্ মাদ ঘাস ভিদিরে থোক্। আগাজ শিরোপানিয়ে তে ভিজোক্ আর পিত্থিমীর গাজ্-বাজ ভিদিরে য়েমান লগে তে বজত্তি গোরোক্। 16 তার আর মান্জ্য ধোক্ক্যেন খাচ্চ্যত্ ন-থোক্ আর সাত বজর্ সং তারে য়েমান খাচ্চ্যত্ দিয়্যে ওক্। 17 যে রায়য়ান দিয়্যে অলঅ সিয়েন চুগিদারুনে, অত্তাৎ পবিত্র দূত্তুনে ফগদাং গত্তন্, যেনে জেদা মানুচ্চুনে হবর্ পান যে, মান্জ্য রেজ্যনি উগুরে দাঙর্ গোজেনে সদ্দারি গরে আর তে যিবেরে হুজি তারে রেজ্য দান গরে আর মান্জ্য ভিদিরে বেগত্তুন্ যে তলে তারে তে উগুরে বজায়। 18 “ইয়েন সেই স্ববনান্ যিয়েন মুই রাজা নবূখদ্নিৎসর দেখ্যং। ইক্কিনে ও বেল্টশৎসর, তুই ইয়েনর ভেদ্তান্ কি কঅ? মঅ রেজ্যর্ কনঅ সল্লাদিয়্যে ইয়েনর্ ভেদ্তান্ মরে কোই দি ন-পারন; মাত্তর্ তুই পারিবে, কিত্যে তঅ ভিদিরে পবিত্র এমন কিজু আঘে যিয়েনি এ পিত্থিমীত্ নয়।” স্ববনর্ ভেদ্তান্ 19 সেক্কে দানিয়েল, অত্তাৎ বেল্টশৎসরে স্ববনান কধা চিদে গুরিনে দোরেল আর কিজু সময়োত্তে আমক্ ওই রলঅ। সেক্কে রাজা কলঅ, “ও বেল্টশৎসর, স্ববনান্ বা সিয়েনর্ ভেদ্তানে তরে চিন্তিত ন-গোরোক্।” বেল্টশৎসরে জোব্ দিলো ও মর্ প্রভু, এ স্ববনান্ আর সিয়েনর ভেদ্তান্ তঅ শত্রুগুনে উগুরে ঘোদোক্। 20 তুই যে গাজ্চো দেখ্যচ্, যিবে দাঙর্ আর দরমর ওই উঠ্যে, যিবের মাঢাবো আগাজত্ লুম্মেগোই আর যিবে পিত্থিমীর বেক্ মানুচ্চুনে দেখ্যন্, 21 যিবের্ দোল্ পাদা আর বোউত্ ফল এলাক্, যিবে বেক্কুনোরে হানা যোগেদ, যিবে মাদ য়েমানুনোরে আশ্রয় আর যিবে ডেলাগুনোত্ আগাজ পেগ্কুনে থেবার জাগা পেদাক্- 22 তুই, ও মহারাজ, তুয়ই সেই গাজ্। তুই দাঙর্ আর খেমতাবলা ওইয়োচ্; তঅ খেমতাগান্ বাড়িনে আগাজ সং লুম্মেগোই আর তঅ রেজ্যগান পিত্থিমীর শেজ্ দুযি সং ছিদি যেইয়্যে। 23 তুই, ও মহারাজ, এক্কো পবিত্র চুগিদাররে স্বর্গত্তুন্ লামি এত্তে দেখ্যচ্। তে কোইয়্যেদে, গাজ্চো কাবিনে ভস্ত গুরি ফেলা, মাত্তর্ সিবের্ গোড়া আর শিঙোরান লুয়ো আর পিদোল্লোই বানিনে মাদিত্ মাদ ঘাস ভিদিরে ফেলেইনে থোই দে। তে আগাজ শিরোপানিলোই ভিজোক্; সাত্ বজর্ সং তে য়েমানুনো সমারে বজত্তি গোরোক্। 24 “ও মহারাজ, মুই ইক্কিনে যিয়েন কঙর্ সিয়েন অলঅ মর্ প্রভু মহারাজর্ স্ববনর ভেদ্তান্ আর তা বিরুদ্ধে দাঙর্ গোজেনর রায়। 25 তরে মানুচ্চুনো ইত্তুন্ ধাবেই দিয়্যে অবঅ আর তুই য়েমানুনো সমারে বজত্তি গুরিবে; তুই দামাড়া গোরু ধোক্ক্যেন ঘাস হেবে আর আগাজ শিরোপানিয়ে ভিজিবে। এবাবোত্যেগুরি সাত বজর্ যেবগোই, যেদক ভিলোন্ সং তুই মানি ন-নেযেব, মান্জ্য রেজ্যনি উগুরে দাঙর্ গোজেনে কাবিদ্যঙি গরে আর তেয়ই সিদুগোর্ বেক রেজ্যগানি সেই বেক্ রেজ্যগানি যিবেরে আওজ্ তারে দে। 26 শিঙোর্ সুদ্ধো গাজ্চো গোড়াগান থুয়োই দেনার উগুমানর ভেদ্তান্ অলঅ, তুই যেক্কে মানি নিবে, স্বর্গর গোজেনে কাবিদ্যঙ্গিরি গরে সেক্কে তঅ রেজ্যগান তরে ফিরেই দিয়্যে অবঅ। 27 সেনত্তে ও মহারাজ, তুই মঅ সল্লাগান ধর্। তুই ন্যায় কাম্ গুরিনে আর নাঢাগুনো উগুরে দোয়্যেলু ওইনে তর্ পাপ আর অন্যেয়ানি ছাড়ি দে। সালে অয়ত তর্ গম্ অবস্থা থির্ থেবঅ।” 28-30 ইয়েনি রাজা নবূখদ্নিৎসর উগুরে ঘুদিলো। বার মাস পরেদি তে যেক্কে বাবিলর রাজঘর ছাদ উগুরে বেড়ার্ সেক্কে কোইয়্যেদে, “মর্ খেমতালোই আর মর্ সয়-সাগোজ্যে বাঈনী গুরিবাত্তে রাজধানী ইজেবে যিয়েন মুই বানেয়োং ইয়েন কি সেই মহান বাবিল নয়?” 31 কধানি তা মুয়োত্ থাগদে থাগদে স্বর্গত্তুন্ কনঅ একজনে কলঅ, “ও রাজা নবূখদ্নিৎসর, তরে কুয়ো অত্তে যে, তঅ রেজ্যগানি তত্তুন্ নেযা ওইয়্যে। 32 তরে মান্জ্য কায় কুরেত্তুন্ ধাবেই দিয়্যে অবঅ আর তুই য়েমানুনো সমারে বজত্তি গুরিবে; গোরু ধোক্ক্যেন তুই ঘাস হেবে। যেদক্ বিলোন সং তুই মানি ন নেযেবে, দাঙর্ গোজেনে মান্জ্য রেজ্যগানি উগুরে কাবিদ্যঙ্গিরি গরে আর সেই বেক্ রেজ্যগানি যিবেরে আওজ্ তারে দে সেদক্ বিলোন সং সাত বজর্ যেবঅ।” 33 নবূখদ্নিৎসর পৌইদ্যেনে যিয়েনি কুয়ো ওইয়্যে সেক্কে তে সিয়েনি পূরোণ অলঅ। মান্জ্য কায় কুরেত্তুন্ তারে ধাবেই দিয়্যে অলঅ আর তে গোরু ধোক্ক্যেন ঘাস হাঃ ধুরিলো। তা কিয়্যেগান আগাজ শিরো পানিয়ে ভিজে ধুরিলো; তা চুলানি সাড়াল্যে চিল ডুয়ো ধোক্ক্যেন ওই উদিলো আর তা নখ্কুন পেগো টেঙ নগ ধোক্ক্যেন ওই গেলঅ। 34 সে সময়ান শেজ্ ওই গেলে পরেদি মুই নবূখদ্নিৎসর স্বর্গ ইন্দি রিনি চেলুং আর মর্ মনান্ গম্ পেলুং। সেক্কে মুই মহান গোজেনরে বাঈনী গুরিলুং; যিবে উমরত্যে বাঁজি আঘে মুই তারে সর্মান দেগেলুং আর তারে নাঙ্ গিনিলুং। মুই কলুং, “গোজেনর রেজ্যগান উমরর্ রেজ্য; তাঁর রাজাগিরি যুগে যুগে থিদেবর্ গোজ্যে। 35 পিত্থিমীর বেক্ মানুচ্চুন তাইদু কিচ্চু নয়। তে স্বর্গদূত্তুনোরে আর পিত্থিমীর মানুচ্চুনোরে নিইনে তা আওজ্ মজিম কাম গরে। এমন কনজন নেই যে, তার আঢ্তানি থামেই দি পারে বা তারে কোই পারে, ‘তুই কি গরর্?’ ” 36 যেক্কে মর্ মনান্ ফিরি এলঅ সেক্কে মর্ রেজ্যর সর্মানত্তে মর্ সয়-সাগোজ্যে আর বাঈনী গরানা মরে ফিরেই দিয়্যে অলঅ। মর্ মন্ত্রীগুনে আর আজল্ মানুচ্চুনে মরে তোগেইনে নিগিলেলাক্ আর মরে আরঅ সিংহাসনত্ বজা অলঅ আর মুই আগত্তুন্অ বেশ্ মহান ওলুং। 37 ইক্কিনে মুই নবূখদ্নিৎসর সেই স্বর্গ রাজারে নাঙ্ গিনোং, সর্মান গরং আর বাঈনী গরং, কিত্যে তে যিয়েনি গরে সিয়েনি ঠিগ্, আর তার বেক্ পথ্তানি ন্যায়ে ভর্পুনং। যিগুনে বাড়্বো গুরিনে চলন তারারে তে তলেদি ফেলেই পারে। |
Copyright © 2021 Bangladesh Bible Society
Bangladesh Bible Society