দানিয়েল 2 - Chakma Bibleনবূখদ্নিৎসরর স্ববন্ 1 নবূখদ্নিৎসরর্ রাজাগিরির্ দ্বিবজরত্ তে স্ববন দেগিলো; সেক্কে তা মনান্ থিদেনেইয়্যে অলঅ, তে ঘুম যেই ন-পারিলো। 2 তা স্ববনান্ বুঝেই দিবাত্তে তে যাদুগুরিয়্যে, ভূদো ওঝা, গোণেয়্যে আর জ্যেতিষীগুনোরে ডাগিলো। তারা এইনে রাজার্ মুজুঙোত্ থিয়্যেলাক্। 3 রাজা তারারে কলঅ, “মুই এক্কান স্ববন দেখ্যং; সিয়েনর্ ভেদ্তান্ বুঝিবাত্তে মঅ মনান্ ওলোজোলো ওইয়্যে।” 4 সেক্কে গোণোক্ক্যেগুনে অরামীয় কধাদি রাজারে কলাক্, “ও মহারাজ, তুই জিংকানিবর্ বাঁজি থাক্। তুই স্ববনান্ তঅ চাগরুনোরে কঅ, আমি সিয়েনর ভেদ্তান্ কোই দিবোং।” 5 জোবত্ রাজা তারারে কলঅ, “মুই ঠিগ্ গোজ্যংগে, মঅ স্ববনান্ কি আর সিয়েনর্ ভেদ্তান্ কি সিয়েন যুনি তুমি কোই ন-পার সালে তমারে কট্টা কট্টা গুরিনে কাবি ফেলা অবঅ আর তমা ঘরানি কাজর কুড়্ গরা অবঅ। 6 মাত্তর্ যুনি তুমি মঅ স্ববনান্ আর সিয়েনর্ ভেদ্তান্ কোই পার সালে মত্তুন্ তুমি বক্শিজ, পুরস্কার আর দাঙর্ সর্মান পেবা। সেনত্তে তুমি সেই স্ববনান্ আর সিয়েনর্ ভেদ্তান্ মরে কঅ।” 7 জোবত্ তারা আরঅ কলাক্, “মহারাজে যেন তা চাগরুনো ইধু স্ববনান্ কয়, আমি সিয়েনর ভেদ্তান্ কবং।” 8 সেক্কে রাজা কলঅ, “মুই ঘেচ্চেকগুরি হবর্ পাং, তুমি দেরি গুরিবাত্তে চেট্ট্যা গরর, কিত্যে তুমি বুঝি পাজ্য যে, এ পৌইদ্যেনে মঅ মনান্ থির্ আঘে। 9 তুমি যুনি স্ববনান্ মরে কোই ন-পার সালে বানা এক্কান সাজা তমাত্তেই আঘে। তুমি আজা গরত্তে অবস্থাগান বুদুলিবো, আর সিয়েনত্তে মরে মিজে কধা কোইনে ঠোগেবার সল্লা গোজ্য। তুমি ইক্কিনে মরে স্ববনান্ কঅ; সালে মুই হবর্ পেইম্বে যে, তুমি সিয়েনর্ ভেদ্তান্অ মরে কোইদি পারিবে।” 10 সল্লাদিয়্যেগুনে জোবত্ রাজারে কলাক্, “মহারাজ আমা ইধু যিয়েন জানিবাত্তে চাজ্ সিয়েন জানেই পারে এবাবোত্যে কনঅ মানুচ্ এ পিত্থিমীত্ নেই। কনঅ দাঙর্ রাজা কনদিন্অ এবাবোত্যে বেপারে কনঅ জাদুগুরিয়্যে বা ভূদো ওঝা বা সল্লাদিয়্যে ইধু জানিবাত্তে ন-চান্। 11 মহারাজে যিয়েন চার্ সিয়েন গরানা অমকদ আগাত্যে। দেবেদাগুনে বাদে আর কনজনে ইয়েন মহারাজ ইধু ফগদাং গুরি ন-পারিবাক্, আর তারা দঅ মান্জ্য ভিদিরে বজত্তি ন-গরন।” 12 ইয়েন্দোই রাজা এদক্ রাগ তুলিলোদে যে, তে বাবিলোত্ তার বেক্ সল্লাদিয়্যেগুনোরে মারে ফেলেবাত্তে উগুম দিলো। 13 সেনত্তে রাজার সল্লাদিয়্যেগুনোরে মারে ফেলেবার উগুম জারি গরা অলঅ। সেক্কে দানিয়েল আর তা সমাজ্যেগুনোরে মারে ফেলেবাত্তে তারারে তোগেবাত্তে মানুচ্ পাদা অলঅ। 14 রাজার বডিগাত্তুনোর্ সেনাপতি অরিয়োকে যেক্কে সেই সল্লাদিয়্যেগুনোরে মারে ফেলেবাত্তে নিগিলিলো সেক্কে দানিয়েলে বুদ্ধি গুরি উজিয়ারে তা লগে কধা কলঅ। 15 তে সেই সেনাপতিবোরে পুযোর্ গুরিলো, “মহারাজে এ দর্গরেপারা উগুমান কিত্তে দিয়্যে?” সেক্কে অরিয়োকে বেপারান দানিয়েল ইধু বুঝেইনে কলঅ। 16 সিয়েন শুনিনে দানিয়েলে রাজা ইধু যেইনে সময় চেলঅ যেনে তে রাজারে স্ববনানর্ ভেদ্তান্ কোই দি পারে। 17 সে পরেদি দানিয়েলে ঘরত্ ফিরি যেইনে তা সমাজ্যে হনানিয়, মীশায়েল আর অসরিয়রে বেপারান কলঅ। 18 তে তারারে কোজোলী গুরিলো যেন তারা সেই হবর্ ন-পেইয়্যে বেপারান্ জানিবাত্তে স্বর্গর গোজেন ইধু দোয়্যে ভিক্ষ্যে চেলঅ, যেনে তে আর তা সমাজ্যেগুন বাবিলোর অন্য সল্লাদিয়্যেগুনো লগে মারা ন-পড়ন্। 19 রেদোত্ এক্কান দর্শনর্ মাধ্যমে সেই হবর্ ন-পেইয়্যে বেপারান্ দানিয়েল ইধু ফগদাং অলঅ। সেক্কে দানিয়েলে স্বর্গর গোজেনরে ভালেদি জানেল। 20 তে কলঅ, “গোজেনে উমরত্যে সাধুবাদ্ পোক্; জ্ঞান আর খেমতা তার। 21 তেয়ই সময় আর ঋতু তা অধীনোত্ রাগায়; তে রাজাগুনোরে সিংহাসনত্ বজায় আর লামেই দে। তে জ্ঞানীগুনোরে জ্ঞান দান গরে আর বুদ্ধিমানুনোরে বুদ্ধি দান গরে। 22 তে গভীন্ আর লুগেয়্যে বেপারানি ফগদাং গরে; তে হবর্ পায় আন্ধার ভিদিরে কি আঘে; তা সমারে পহ্রানে বজত্তি গরে। 23 ও মর্ পূরোণি মানুচ্চুনোর গোজেন, মুই তরে ভালেদি জানাং, তরে বাঈনী গরং, কিত্যে তুই মরে জ্ঞান আর খেমতা দুয়োচ্; আমি তইদু যিয়েনি জানিবাত্তে চেইয়্যেই সিয়েনি তুই মরে জানেয়োচ্; রাজার স্ববন বিষয়ে তুই আমারে জানেয়োচ্।” রাজার স্ববন ভেদ্তান্ 24 যেরেদি দানিয়েলে অরিয়োক ইধু গেলঅ। রাজা অরিয়োকরে তার সল্লাদিয়্যেগুনোরে মারে ফেলেবাত্তে বেঈ লোইয়্যে। দানিয়েলে অরিয়োকরে কলঅ, “রাজার সল্লাদিয়্যেগুনোরে মারে ন-ফেলেবে। মরে রাজা ইধু নেযা; মুই রাজার্ স্ববনর্ ভেদ্তান্ কোম।” 25 অরিয়োকে সেক্কে দানিয়েলরে রাজা ইধু নেযেইনে কলঅ, “যিহূদার বন্দীগুনো ভিদিরে মুই এমন এক্কোরে পেইয়োং যে মহারাজর্ স্ববনর্ ভেদ্তান্ কোই দি পারিবো।” 26 দানিয়েল, যিবেরে বেল্টশৎসর নাঙে ডাগা অদঅ তারে রাজা পুযোর্ গুরিলো, “তুই কি মর্ স্ববনান্ আর সিয়েনর ভেদ্তান্ মরে কোই দি পারিবে?” 27 জোবত্ দানিয়েলে কলঅ, মহারাজ যে হবর্ ন-পেইয়্যে বেপারান কধা পুযোর্ গোজ্যস্ সিয়েন কনঅ জ্ঞানিবলা, ভুদো ওঝা, যাদুগরে বা গোণোক্ক্যে কোই ন-পারিবাক্। 28 মাত্তর্ স্বর্গত্ এক্কো গোজেন আঘে যিবে গুমুরো বিষয়ে ফগদাং গরে। ভবিচ্চদে যিয়েনি ঘুদিবো সিয়েনি তে রাজা নবূখদ্নিৎসররে জানেয়্যে। তর্ স্ববনান্, অত্তাৎ বিচ্ছোনত্ পড়িনে যে দর্শনান্ তুই দেখ্যচ্ সিয়েন মুই ইক্কিনে কোম্। 29 ও মহারাজ, তুই যেক্কে বিচ্চোনত্ পড়ি এলে সেক্কে ভবিচ্চদে কি অবঅ সে কধাগান চিন্তে গোজ্যস্। যিবে গুমুরো বিষয়ে ফগদাং গরে তে তরে দেগেই দিয়্যে কি ঘুদিবো। 30 অন্য মানুচ্চুনোত্তুন্ মর্ বেশ্ জ্ঞান আঘে বিলি যে মইদু এ হবর্ ন-পেইয়্যে বিষয়ান ফগদাং ওইয়্যে সিয়েন নয়, মাত্তর্ ও মহারাজ, মরে ইয়েন কুয়ো ওইয়্যে যেনে তুই ইয়েনর অত্তগান হবর্ পাজ্ আর তঅ মনর্ চিন্তেগান বুঝি পারজ্। 31 ও মহারাজ, তুই রিনি চেইয়োচ্, আর তঅ মুজুঙোত্ এক্কো দাঙর্ মূত্তি থিয়্যেই এলঅ; মূত্তিবো দাঙর্, অমকদ জোল্জোল্যে আর তা চেঙারাগান দর্গরেপারা। 32 সেই মূত্তির্ মাঢাবো আজল্ সোনার, বুগ্ আর আঢ্তানি রূবোর্ আহ্ পেট আর দামানানি পিদোলর্ বানেয়্যে; 33 তা টেঙানি লুয়োর্ আর টেঙ পাদানি কিজু লুয়ো আর কিজু মাদিলোই বানেয়্যে এলঅ। 34 তুই যেক্কে রিনি চেইয়োচ্ সেক্কে এক্কো পাত্তর্ কাবিনে নেযা অলঅ, মাত্তর্ সিবে মান্জ্য আঢে কাবা ন-অয়। সেই পাত্তর্বো লুয়ো আর মাদি মিজেয়্যে টেঙত্ আঘাত্ গুরিনে সিয়েনিরে কট্টা কট্টা গুরি ফেলেল। 35 সেক্কে লুয়ো, মাদি, পিদোল আর রূবো আহ্ সোনা কট্টা কট্টা ওইনে ভাঙি পড়িলো আর হরান্যেত্ খামারত্ পড়ি থেইয়্যে তূষো ধোক্ক্যেন ওই গেলঅ। বোইয়্যেরানে সিয়েন এমন গুরি উড়েই নেযেল, সিয়েনর আর কনঅ চিহ্নো ন-থেলঅ। মাত্তর্ যে পাত্তর্বো মূত্তিবোরে আঘাত্ গোজ্যে সিবে এক্কো দাঙর্ মুড়ো ওই যেইনে বেক পিত্থিমীগান গজক্ গুরি ফেলেল। 36 ইয়েনই এলদে সেই স্ববনান্। ইক্কিনে আমি সিয়েনর ভেদ্তান্ মহারাজ ইধু কবং। 37 ও মহারাজ, তুই রাজাগুনোর রাজা। স্বর্গর গোজেনে তরে রেজ্য, খেমতা, বল্ আর সর্মান দান গোজ্যে। 38 তঅ আঢত্ তে মানুচ্, য়েমান আর পেগ্কুনোরে দিয়্যে। তারা যিদু বজত্তি গুরিদাক্ সাৎ তে তারারে বেক্কুনোরে তঅ অধীনোত্ গোজ্যে। তুয়ই সেই সোনার মাঢাবো। 39 তঅ রেজ্যগান পরেদি যে রেজ্যগান উদিবো সিয়েন তঅ রেজ্যগান ধোক্ক্যেন দাঙর্ ন-অবঅ। সিয়েন পরেদি তিন লম্বর আর এক্কান রেজ্য উদিবো, সিয়েন সেই পিদোল পেট আর দামানাগান; আর গোদা পিত্থিমীগান সেই রেজ্যগান অধীনোত্ অবঅ। 40 যেরদি লুয়ো ধোক্ক্যেন দরমর চের্ লম্বর এক্কান রেজ্য উদিবো। লুয়ো যেবাবোত্যেগুরি বেক্কানি ভাঙি ফেলেইনে কট্টা কট্টা গরে সেবাবোত্যেগুরি সেই রেজ্যগান অন্য বেক্ রেজ্যগানিরে ভাঙিনে কট্টা কট্টা গুরিবো। 41 তুই স্ববনত্ যে টেঙ পাদা আর টেঙ আঙুলোর কিজু মাদি আর কিজু লুয়ো দিইনে বানেয়্যে দেখ্যচ্ সিয়েন অলঅ এক্কান ভাগ গোজ্যে রেজ্য। মাত্তর্ তুই যেবাবোত্যেগুরি মাদি সমারে লুয়ো মিজেয়্যে দেখ্যচ্ সেবাবোত্যে সেই রেজ্যগান লুয়ো ধোক্ক্যেন কিজু দরমর থেবঅ। 42 টেঙ পাদা আর আঙুলুন্ যেবাবোত্যেগুরি ইয়েনি মিজেয়্যে এলঅ সেবাবোত্যেগুরি সেই রেজ্যর্ কিজু ভাগ অবঅ খেমতাবলা আর কিজু খেমতা নেইয়্যে। 43 লুয়ো সমারে মাদি মিজেনার্ অত্ত রেজ্যর্ মানুচ্চুন অবাক্ মিজেয়্যে আর লুয়ো যেবাবোত্যে মাদি সমারে ন-মিজেই সেবাবোত্যে তারায়ো এক ওইনে ন-থেবাক্। 44 “সেই বেক রাজাগুনোর অক্তত্ স্বর্গর্ গোজেনে এমন এক্কান রেজ্য থিদেবর্ গুরিবো যিয়েন কনদিন্অ ভস্ত ন-অবঅ বা অন্য মান্জ্য আঢত্ ন-যেবঅ। সেই রেজ্যগানিয়ে উই বেক্ রেজ্যগানিরে ভস্ত গুরি শেজ্ গুরি দিবো মাত্তর্ সেই রেজ্যগান নিজে উমরত্যে থেবঅ। 45 ইয়েন অলঅ সেই মুড়োবোত্তুন্ কাবি নেযেয়্যে পাত্তর্ যিবে মান্জ্য আঢে কাবা ন-অয়। সেই পাত্তর্বো লুয়ো, পিদোল, মাদি, রূবো আর সোনাগানরে কট্টা কট্টা ভাঙি ফেলেয়্যে। ভবিচ্চদে যিয়েন ঘুদিবো সিয়েন এবাবোত্যেগুরি দাঙর্ গোজেনে মহারাজরে দেগেই দিয়্যে। স্ববনান্ সত্য আর সিয়েনর্ ভাঙিদেনায়ো বিশ্বেজ্ গুরিবার।” 46 সেক্কে রাজা নবূখদ্নিৎসরে দানিয়েল মুজুঙোত্ মাঢা নিগিরি পড়িনে তারে জু জু জানেল আর তা মুজুঙোত্ শোজ্য উৎসর্ব গুরিবাত্তে আর আগর্বাট্টি জ্বালেবাত্তে উগুম দিলো। 47 রাজা দানিয়েলরে কলঅ, “তমা গোজেনে ঘেচ্চেকগুরি দেবেদাগুনোর্ গোজেন আর রাজাগুনোর গিরোজ্। মুই বুঝিলুং তে গুমুরো বিষয়ে ফগদাং গরে, কিত্যেই তুই এ গুমুরো বিষয়ান ফগদাং গুরি পাজ্যস্।” 48 সে পরেদি দানিয়েলরে রাজা এক্কান দাঙর্ পোজিশন্ দিলো আর বোউত্ গম্ গম্ বক্শিজ্ দিলো। তে তারে গোদা বাবিল রেজ্যর্ আজল্ পরিচালক ইজেবে নেযেল আর তার্ বেক সল্লাদিয়্যেগুনোর্ ভারান্ তা উগুরে দিলো। 49 ইয়েনিবাদেয়ো দানিয়েলর্ কোজোলীয়ে শদ্রক, মৈশক আর অবেদ্-নগোরে রাজা বাবিল রেজ্যর্ রাজার চাগর্ ইজেবে নেযেল। দানিয়েলে নিজে রাজদরবারত্ রলঅ। |
Copyright © 2021 Bangladesh Bible Society
Bangladesh Bible Society