দানিয়েল 11 - Chakma Bible1 মুই নিজেয়ো মাদীয় দারিয়াবসর রাজাগিরির পত্তম বজরত্ মীখায়েলরে সাহায্য গুরিবাত্তে আর বল্ দিবাত্তে যেইয়োং। উত্তোরেদি আর দোগিণো রাজাগুনে 2 ইক্কিনে মুই তরে যিয়েনি কোম্ সিয়েনি ঘেচ্চেক্গুরি ঘুদিবো। পারস্যেত্ আরঅ তিন্নো রাজা রাজাগিরি গুরিবাক্। তারা পরেদি আর এক্কো রাজা অন্য রাজা গুনোত্তুন্ বোউত্ বেশ্ তাগোয়্যে অবাক্। তার ধনানিলোই দরমর অনার পরেদি তে গ্রীস রেজ্যর্ বিরুদ্ধে বেক্কুনোরে উত্তেজিত গুরিবো। 3 সেক্কে এক্কো খেমতাবলা রাজা উদিবো আর দাঙর্ খেমতালোই রাজাগিরি গুরিবো; তে যিয়েন হুজি সিয়েনই গুরিবো। 4 তে উদিবার পরেদি তা রেজ্যগান ভাঙিনে চেরোকিত্তেদি চের্ভাগ ওই যেবঅ। তা রেজ্যগান তা বংশধরুনো আঢত্ ন-যেবঅ; সেই রেজ্যগান যিগুনো আঢত্ যেবঅ আগ রাজাগুনো ধোক্ক্যেন তারার্ খেমতা ন-থেবঅ, কিত্যে তারার্ রেজ্যগান ভস্ত ওইনে অন্যগুনো আঢত্ যেবঅ। 5 দোগিণেদি রাজাগুনে খেমতাবলা অবাক্, মাত্তর্ তার এক্কো সেনাপতি তাত্তুন্ বেশ্ আরঅ খেমতাবলা ওইনে আরঅ দাঙর্ রেজ্য শাজন্ গুরিবো। 6 কয়েক বজর্ পরেদি তে উত্তোরেদি রাজাগুনোর লগে দাংগুত্ব গুরিবো। দাংগুত্বে দোগিণেদি রাজার ঝিবোরে উত্তোরেদি রাজার লগে বৌ দিয়্যে অবঅ, মাত্তর্ সেই ঝিবো সে দাংগুত্বগান রোক্ষ্যে গুরি ন-পারিবো আর সেই রাজা আর তার খেমতাগান্অ থিদেবর্ ন-অবঅ। সেই মিলেবোরে, তা রোক্ষীগুনোরে, তা বাবরে আর তার সাহায্যগুরিয়্যেগুনোরে মারে ফেলা অবঅ। 7 সে মিলেবোর গিরি ভিদিরেত্তুন্ একজনে তা বাবর্ রাজ পদত্ নিবাত্তে উদিবো। তে উত্তোরে রাজার সৈন্যদলরে আক্রমন গুরিনে তা তাম্বুলানত্ সোমেব আর তারা বিরুদ্ধে যুদ্ধো গুরিনে জিদিবো। 8 তে তারার্ দেব-দেবেদা, ধাতুলোই বানেয়্যে বেক্ মূত্তিগুন আর রূবো, সনার্ মংগা মংগা জিনিস্ গজক্ গুরিনে মিসরত্ নেযেব। কয়েক বজর্ তে উত্তোর রাজা উগুরে কিচ্চু ন-গুরিবো। 9 সে পরেদি উত্তোর রাজা দোগিণো রাজার রেজ্যগান আক্রমণ গুরিবো, মাত্তর্ পরেদি নিজো দেজত্ ফিরি যেবঅ। 10 তা পুয়োগুনে যুদ্ধোত্তে যুক্কোল্ ওইনে এক বিরেট্ সৈন্যদল তুবেবাক্ আর দর্গরেপারা বান পানি ধোক্ক্যেন উজেই যেইনে যুদ্ধো গত্তে গত্তে দোগিণো রাজার তাম্বুলান সং যেবাক্। 11 সেক্কে দোগিণো রাজা অমকদ রাগে নিগিলি এইনে উত্তর রাজার বিরুদ্ধে যুদ্ধো গুরিবো। উত্তর রাজা এক্কো বিরেট্ সৈন্যদল তুবেলেয়ো তারা উদিই যেবাক্। 12 দোগিণো রাজা সৈন্যগুনোরে বন্দী গুরিনে নেযেবার পরেদি অহংকারে ভরা অবঅ আর আজার্ আজার্ মান্জ্যরে মারে ফেলেব, তো তে শেজদি ন-জিদিবো। 13 পরেদি উত্তর রাজা পত্তম্ সৈন্যদলত্তুন্ আরঅ দাঙর্ একদল সৈন্য তুবেব; কয়েক বজর্ পরেদি তে এক্কো বিরেট্ সৈন্যদল আর বোউত্ পযাপিরা নিইনে উজেই যেবঅ। 14 সেই সময়োত্ ভালোক্কুনে দোগিণো রাজার বিরুদ্ধে উদিবাক্। এ দর্শনান্ যেনে পূরোণ অয় সেনত্তে তর্ নিজো জাদ ভিদিরেত্তুন্ দুদ্দান্ত মানুচ্চুনে উল্লোমী গুরিবাক্, মাত্তর্ ফোলেই ন-পারিবাক্। 15 সে পরেদি উত্তর রাজা এইনে এক্কান দেবাল-ঘিজ্যে শঅর্ ঘিরিনে সিয়েন গজক্ গুরিবো। দোগিণো সৈন্যদলর মানা গুরিবার খেমতা ন-থেবঅ; এন্ কি, তারার বেগত্তুন্ গম্ সৈন্যদলরঅ তারা বিরুদ্ধে থিয়্যেবার খেমতা ন-থেবঅ। 16 আক্রমন গুরিয়্যেবো যিয়েন হুজি সিয়েনই গুরিবো; তা বিরুদ্ধে কনজনে থিয়্যেই ন-পারিবাক্। দোল্ দেজ ভিদিরে তে নিজোরে থিদেবর্ গুরিবো আর সিয়েন ভস্ত গুরিবার খেমতা তার থেবঅ। 17 তে তার পুরো রেজ্যগানর্ খেমতা লগে নিইনে সিয়েনত্ এবঅ বিলিনে থির্ গুরিবো আর দোগিণো রাজার লগে দাংগুত্ব গুরিবো। সেই রেজ্যগান ভস্ত গুরিবাত্তে তে তার্ এক্কো ঝিরে দোগিণো রাজার লগে বৌ দিবো, মাত্তর্ সিয়েনর পরিকল্পানাগান ন-ফলিবো বা সিয়েনর কনঅ লাভ্অ ন-অবঅ। 18 সে পরেদি উত্তর রাজা দূরোর দেজ্চানি ইন্দি মনযোগ দিবো আর ভালোক্কানি দেজ্ গজক্ গুরি নিবো, মাত্তর্ এক্কো সেনাপতি তার সেই জিদেনার বাড়্বোগান্ শেজ্ গুরি দিবো আর তার্ ঈচ্ গরানাগান তা উগুরে ফিরেই দিবো। 19 ইয়েনর পরেদি তে তার্ নিজো দেজর্ তাম্বুলানিত্ ফিরি এবঅ, মাত্তর্ তার পতন অবঅ; তারে আর দেগা ন-যেবঅ। 20 তা জাগানত্ যে রাজা অবঅ তে রেজ্যর্ সয়-সাগোজ্যে ফিরেই আনিবাত্তে খাজানা আদায়গুরিয়্যেগুনোরে পাদেব। মাত্তর্ কয়েক বজর ভিদিরে তে ভস্ত ওই যেবঅ; এই ভস্ত অনাগান কনঅ রাগ বা যুদ্ধোর্ মাধ্যমে ন-এবঅ। 21 যিবেরে রাজা অবার্ অধিকার দিয়্যে ন-অয় এমন এক্কো ঈচ্ গরা হেইয়্যে মানুচ্ তা জাগানত্ রাজা অবঅ। মান্জ্যে যেক্কে নিচিদে থেবাক্ সেক্কে সে কুজুরোমীর মাধ্যমে রেজ্যগান গজক্ গুরিবো। 22 যে দরমর সৈন্যদল্লো তা বিরুদ্ধে থিয়্যেব তারা উদি যেইনে ভস্ত ওই যেবাক্ আর চুক্তির্ নেতাবোয়ো ভস্ত ওই যেবঅ। 23 চুক্তির্ পরেদিয়ো সেই রাজাবো ছলনা গুরিবো আর বানা কয়েক্কো মান্জ্যর বলে খেমতা পেবঅ। 24 তাগোয়্যে রেজ্যগানিয়ে যেক্কে নিজোরে নিরাপদ মনে গুরিবো সেক্কে তে তারারে আক্রমন গুরিবো আর তার পূরোণি মানুচ্চুনেয়ো সেই পূরোণি মানুচ্চুনোর পূরোণি মানুচ্চুনে যিয়েনি গুরি ন-পারন্ তে সিয়েনি গুরিবো। কাড়ি নেযেয়্যে আর লুদেয়্যে পযাপিরানি আর ধনানি তে তার্ মানুচ্চুনো ভিদিরে বিলেই দিবো। তে তাম্বুলানি সর্বনাশ গুরিবাত্তে কুজুরোমি গুরিবো, মাত্তর্ সিয়েনি বানা কয়েক দিনোত্তে। 25 এক্কো বিরেট্ সৈন্যদল নিইনে তে দোগিণো রাজার বিরুদ্ধে তা নিজোর্ বলান্ আর সাহস্চানরে উচ্চোমি গুরি তুলিবো। দোগিণো রাজা এক্কো বিরেট্ সৈন্যদল নিইনে যুদ্ধো গুরিবো, মাত্তর্ তা বিরুদ্ধে যে কুজুরোমি অবঅ সিয়েনত্তে তে থিয়্যেই ন-পারিবো। 26 যিগুনে রাজার হানা ভাগ পান্ তারা তারে ভস্ত গুরিবাক্। তা সৈন্যদল্লো বিরেট অলেয়ো ভালোক্কুনে মুরিবাক্। 27 এ দ্বিবে রাজার মন ভান্ন্যেয়দি বেশ্ অনায় তারা এক্কান টেবিলোত্ বুয়োইনে এক্কো আর এক্কোর বিরুদ্ধে মিজে কধা কবাক্, মাত্তর্ সিয়েনত্ কনঅ ফল ন-অবঅ, কিত্যে তারার্ বেক্কানির শেজ্ ঠিগ সময়োত্ এবঅ। 28 উত্তর রাজা বোউত্ ধন-সোম্বোত্তি নিইনে তার নিজো দেজ ইন্দি যেবঅ, মাত্তর্ তা মনান্ পবিত্র সুদোমর্ বিরুদ্ধে থেবঅ। তে তার্ নিজো আওজ্ মজিম কাম্ গুরিবো আর সে পরেদি নিজো দেজত্ ফিরি যেবঅ। 29 ঠিগ্ সময়োত্ তে আরঅ দোগিণো দেশ্চানি আক্রমন গুরিবো, মাত্তর্ এবার্ আগ ধোক্ক্যেন ন-ওইনে অন্য বাবোত্যে অবঅ। 30 সাইপ্রাস দ্বিপোর্ জাহাজ্চানিয়ে তারে মানা গুরিবো আর তা মনান্ ভাঙি যেবঅ। সেক্কে তে ফিরিনে রাগ গুরি পবিত্র সুদোমর্ বিরুদ্ধে নিজো আওজ্ মজিম কাম গুরিবো। তে ফিরি এইনে যিগুনে সেই পবিত্র সুদোমানি বাদ দিবাক্ তারা উগুরে মনযোগ দিবাক্। 31 তা সৈন্যগুনে উপোসনা-ঘর, অত্তাৎ ঘরানি অসিজি গুরিবাক্ আর পত্তিদিনোর উৎসর্বর অনুষ্ঠান বন্ধ গুরি দিবাক্। সে পরেদি তারা ভস্ত অবার্ ঈচ্ গরেদে জিনিস থিদেবর্ গুরিবাক্। 32 যিগুনে পবিত্র সুদোম অমান্য গুরিবাক্ বাজে কধা কন্ তে তারারে ভান্ন্যেই পধেদি নেযেব, মাত্তর্ যে মানুচ্চুনে তারার্ গোজেনরে হবর্ পান তারা খুব দরমর গুরি তারে মানা গুরিবাক্। 33 সে মানুচ্চুনো ভিদিরে যিগুনোর বুঝিবার খেমতা আঘে তারা ভালোক্ জনরে শিক্ষ্যে দিবাক্, তো কিজু সময় ধুরি তারা ভিদিরে ভালোক্কুনে যুদ্ধোত্ মুরি যেবাক্, বা তারারে পুড়িনে মারা অবঅ, বা তারারে বন্দী গরা বা লুদো অবঅ। 34 এ অক্তত্ তারা কম্ সাহায্য পেবাক্ আর ভালোক্কুনে কোজোলী গুরিনে তারা সমারে মিজেবাক্। 35 যিগুনোর বুঝিবার খেমতা আঘে তারা ভিদিরে কারর্ কারর্ পতন অবঅ। ইয়েনর কারনে শেজ্ সময় ন-এযানা সং গোজেনর মানুচ্চুনোরে খাটি, শুদ্ধো আর থুদো নেইয়্যে গরা অবঅ; আর সেই শেজ্ সময়ান ঠিগ্ গরা আঘে। 36 উত্তরেদি রাজাবো নিজো আওজ্ মজিম কাম্ গুরিবো। বেক্ দেবেদাগুনোত্তুন্ তে নিজোরে দাঙর্ গুরি দেগিবো আর যিবে দেবেদগুনোর গোজেন তা বিরুদ্ধেয়ো দাঙর্ দাঙর্ কধা কবঅ। গোজেনর রাগ্কান পুরোপুরিগুরি ঢালি ন-দেনা সং তে সফল অবঅ, কিত্যে যিয়েন থির্ গরা ওইয়্যে সিয়েন হামাক্কায় ঘুদিবো। 37 তার পূরোণি মানুচ্চুনোর দেবেদাগুন বা মিলেগুনে যিয়েনি চান্ সিয়েনি উগুরে তে কনঅ সর্মান ন-দেগেব; আজলে কনঅ দেবেদারে তে সর্মান ন-গুরিবো, মাত্তর্ বেক্কুনো উগুরে নিজোরে অজল্ গুরি দেগেব। 38 সিগুনোর্ বদলে তে যুদ্ধোর দেবেদাবোরে সর্মান গুরিবো; যে দেবেদাবো পূরোণি মানুচ্চুনোর হবর্ ন-পেইয়্যে তারেই তে সনা, রূবো, মংগা মংগা পাত্তর্ আর বক্শিজ দিইনে সর্মান দেগেব। 39 সেই হবর্ ন-পেইয়্যে দেবেদাবোলোই তে বেগত্তুন্ দরমর ঘরানি আক্রমণ গুরিবো আর যিগুনে তারে মানি নেযেবাক্ তারারে তে অমকদ সর্মান গুরিবো আর বক্শিজ ইজেবে ভূই ভাগ গুরি দিবো। 40 শেষ সময় এলে পরেদি দোগিণ দেজর্ রাজা তারে আক্রমণ গুরিবো আর সেই উত্তর রাজা রথ, ঘোড়াবলা সৈন্য আর ভালোক্কানি জাহাজ নিইনে তা বিরুদ্ধে ঝড় ধোক্ক্যেন এবঅ। তে ভালোক্কানি দেজ্ আক্রমণ গুরিবো আর বান পানি ধোক্ক্যেন গুরি তারারে ধোইনে-ফুজি ফেলেব। 41 তে দোল্ দেজ্চান আক্রমণ গুরিবো। ভালোক্কানি দেজ্ উদি যেবঅ, মাত্তর্ পুরো ইদোম্ আর মোয়াব আহ্ অম্মোনর বেগত্তুন্ গম মানুচ্চুনে তা আঢত্তুন্ উদ্ধোর পেবাক্। 42 ভালোক্কানি দেজ উগুরে তে তার খেমতা বাড়েব; মিসরঅ রেহাই ন-পেবঅ। 43 বেক্ সনা-রূবো আর মিসরর বেক্ ধনানি তা গজগত্ এবঅ আর লিবীয়গুন আহ্ কূশীয়গুন তা অধীনোত্ এবাক্। 44 মাত্তর্ পূগেদি আর উত্তরেদি হবর্ পেইনে তে দোরেব আর অমকদ রাগে ভস্ত গুরিবাত্তে আর ভালোক্ জনরে মারে ফেলেবাত্তে তে নিগিলিবো। 45 সাগর আর দোল্ সুদ্ধো-সাংগ মুড়োবোর্ সংমোধ্যে তে তার্ রাজ-তাম্বুলান্ টাঙেব। তো তার শেজ্ আজিলান্ অবঅ, কনজনে তারে বল্ ন-দিবাক্। |
Copyright © 2021 Bangladesh Bible Society
Bangladesh Bible Society