দানিয়েল 1 - Chakma Bible

বাবিলোত্ দানিয়েলে আর তার্ তিন্নো সমাজ্যে

¹ যিহূদার রাজা যিহোয়াকীমর রাজাগিরির্ তিন বজরত্ বাবিল রাজা নবূখদ্‌নিৎসরে যিরূশালেমত্ এইনে শঅরান্ ঘিরি ফেলেল।

² প্রভু তা আঢত্ যিহূদার রাজা যিহোয়াকীমরে তুলি দিলো আর তা লগে গোজেন ঘরর্ কয়েক্কো লদায়ো তুলি দিলো। তে সেই লদাগুন বাবিলোত্ তা দেবেদাগুনো মন্দিরোত্ নেযেইনে সিদুগোর্ ধনভান্ডালত্ থোই দিলো।

³ পরেদি রাজা তার্ আজল্ রাজার্ কামগুরিয়্যে অসপনসরে উগুম দিলো যেনে তে ইস্রায়েলীয় রাজাপরিবার আর মানী গোর্‌বোগুনো ভিদিরেত্তুন্ কয়েক্কো গাবুজ্যেরে আনে।

⁴ সে গাবুজ্যেগুনোত্তুন্ উয়ো পড়িবো থুদো নেইয়্যে, দোল্, জ্ঞানী আর বুদ্ধিবলা, বেক্ শিক্ষ্যেনি শিগিবাত্তে চোট্‌পোট্যে আর রাজদরবারত্ কাম গুরিবার যগাজ্যে। অসপনস্‌‌‌রে উগুম দিয়্যে অলঅ যেনে তে এ গাবুজ্যেগুনোরে বাবিলীয়গুনোর কধা আর পুদি পৌইদ্যেনে শিক্ষ্যে দুয়োন্।

⁵ রাজা তা হানাত্তুন্ তারারে পত্তিদিনোর্ যগাজ্যে হানা অার আংগুর-রস দিবার উগুম দিলো। এবাবোত্যেগুরি তারারে তিন বজর্ শিক্ষ্যে দেনার পরেদি তারা রাজার্ কামত্ লাগিবাক্।

⁶ ইগুনো ভিদিরে এলদে যিহূদা-গুট্টির্ দানিয়েল, হনানিয়, মীশায়েল আর অসরিয়।

⁷ সেই রাজার আজল্ কামগুরিয়্যেবো তারার নূয়ো নাঙ্ রাগেল; তে দানিয়েলরে বেল্টশৎসর, হনানিয়রে শদ্রক, মীশায়েলরে মৈশক আর অসরিয়রে অবেদ্-নগো নাঙ্ দিলো।

⁸ মাত্তর্ দানিয়েলে মনে মনে ঠিগ্ গুরিলো, তে রাজার হানা আর আংগুর-রস দিইনে নিজোরে অসিজি ন-গুরিবো। এবাবোত্যেগুরি যেনে নিজোরে অসিজি গরা ন-পড়ে সেনত্তে তে রাজার কামগুরিয়্যে আজল্লো ইধু অনুমতি চেলঅ।

⁹ গোজেনে সেই রাজার কামগুরিয়্যেবো মনত্ দানিয়েলত্তে দোয়্যে আর মেয়্যে দেগেল।

¹⁰ মাত্তর্ সেই কামগুরিয়্যেবো দানিয়েলরে কোইয়্যেদে, “যিবে তমার হানা আর আংগুর-রসর বেবস্থা গোজ্যে মুই মর্ সেই প্রভু মহারাজরে দরাং। তে তমা বয়স্যে অন্য গাবুজ্যেগুনোত্তুন্ কিত্তে তমারে কেঙেদা দেগিবো? ইয়েন্দোই রাজা তমাত্তে মঅ মাঢাবো কাবি ফেলেই পারে।”

¹¹ সেই রাজার কামগুরিয়্যেবো দানিয়েল, মীশায়েল আর অসরিয়রে যত্তন্ গুরিবাত্তে যে মানুচ্চোরে নেযা ওইয়্যে দানিয়েলে তারে কলঅ,

¹² “তুই দোয়্যে গুরিনে দশ দিন সং তর্ এ চাগরুনোরে পোরোক্ক্যে গুরি চাহ্; তুই আমারে বানা শাক-পাত্ আর পানি হেবাত্তে দিবে।

¹³ সে পরেদি রাজার হানা হেইয়্যে সেই গাবুজ্যেগুনো সমারে আমা চেঙারানি রিনি চেবে আর তুই যেবাবোত্যে দেগিবে সে ধগে তর্ এ চাগরুনো সমারে বেবহার গুরিবে।”

¹⁴ তে ইয়েন্দোই রাজী অলঅ আর দশ দিন তারারে পোরোক্ষ্যে গুরিলো।

¹⁵ দশ দিনোর শেজদি দেগা গেলঅ রাজার হানা হেইয়্যে গাবুজ্যে বেক্কুনোত্তুন্ তারা আরঅ দোল্ আর পক্তামক্তা ওইয়োন্।

¹⁶ সেক্কে সে মানুচ্চো রাজার হানা আর আংগুর-রস সোরেই দিইনে সিয়েনির বদলে তারারে শাক-পাত্ দিয়্যে ধুরিলো।

¹⁷ এ চের্‌জন গাবুজ্যেরে নানান্ বাবোত্যে সাহিত্য আর বিদ্যেদি জ্ঞানবান গুরিবার আর বুঝিবার খেমতা দিলো; আর দানিয়েলে নানান্ বাবোত্যে দর্শন আর স্ববন পৌইদ্যেনে বুঝি পারিদো।

¹⁸ রাজা মুজুঙোত্ সেই গাবুজ্যেগুনোরে নেযেবাত্তে রাজা যে সময়ান ঠিগ্ গুরি দিয়্যে সে সময়ান শেজত্ সেই আজল্ রাজার চাগর্‌বো তারারে নবূখদ্‌নিৎসর মুজুঙোত্ নেযেল।

¹⁹ রাজা তারা লগে কধা কোইনে বুঝিলোদে, আর কনজন দানিয়েল, হনানিয়, মীশায়েল আর অসরিয়র্ সং সং নয়; সেনত্তে এ চেরজনরে রাজা কামত্ নেযা অলঅ।

²⁰ জ্ঞান আর বুদ্ধির পৌইদ্যেনে পত্তি পৌইদ্যেনে রাজা তারারে পুযোর্ গুরিনে বুঝি পারিলো যে, তারা তা গদা রেজ্যগানি ভিদিরে বেক্ যাদুগুরিয়্যে আর ভূতোর্ ওঝাগুনোত্তুন্ দশগুন গম্।

²¹ রাজা কোরসর রাজাগিরির পত্তম বজর্ সং দানিয়েলে রাজা কামত্ অদে অদে রলঅ।