কলসীয় 4 - Chakma Bible

¹ গিরোজ্‌চুন্, স্বর্গত্ তমার্‌অ এক্কো গিরোজ্ আঘে জানিনে তুমি তমার চাগরুনো লগে গম্ আর ন্যায় বেবহার গরঅ।

শেচ্‌ উপদেচ্‌

² তুমি কৃতজ্ঞ আর সজাগ্ ওইনে তবনা গুরিনে নিজোরে কামত্ রাগেয়ো;

³ আর সে লগে আমাত্যেয়ো তবনা গোজ্জ্য যেন খ্রীষ্ট পৌইদ্যেনে গুমুরো সত্যগানর্ কধা ফগদাং গুরিবাত্যে গোজেনে আমারে জু গুরি দে। সেই গুমুরো সত্যগানত্যে দঅ মরে বন্দী গরা ওইয়্যে।

⁴ যেবাবোত্যে গুরি গমেডালে মর্ এ পৌইদ্যেনে বুঝেইনে কনা উচিত্, তবনা গরঅ মুই যেন সেবাবোত্যে গুরি কোই পারং।

⁵ যিগুনে গোজেনর্ মানুচ্‌ নয় সিগুনো সমারে বুদ্ধি খাদেইনে চোল্ল্য আর খ্রীষ্ট পৌইদ্যেনে সাক্ষি দিবার পত্তি সুযোগ্ কামত্ লাগেইয়ো।

⁶ তমার্ কধাবাত্তানি নিত্য মধু আর নুন্-দিয়্যে হানা ধোক্ক্যেন যগাজ্জ্যে ওক্, যেন কারে কেধোক্ক্যেন গুরি জোব্ দিবা সিয়েন তুমি বুঝি পারঅ।

পাত্তুরু তুরু

⁷ আমা কোচ্‌পেইয়্যে ভেই আর বিশ্বেজি সেবাগুরিয়্যে আহ্ প্রভুর কামত্ আমার সমাজ্যে তুখিকে মর্ বেক্‌ হবরানি তমারে দিবো।

⁸ তুমি যেন আমা পৌইদ্যেনে জানি পারঅ আর তে যেন তমারে উচ্চোমি তুলি দি পারে সেনত্যে মুই তারে তমা ইধু পাধেলুং।

⁹ তুখিক সমারে মুই আমার বিশ্বেজি আর পরাণর্ ভেই ওনীষিমরেয়ো পাধেলুং। তে তমার একজন। তারা ইধুগোর্ বেক্কানি তমারে জানেবাক্।

¹⁰ মঅ সমারে বন্দী ভেই আরিষ্টার্খ আর বার্ণবার কুদুম্মো মার্কয়ো তমারে পাত্তুরু তুরু জানার্। মার্কর পৌইদ্যেনে তুমি দঅ আগেদি উগুম পেয়ো, তে যুনি তমা ইধু এজে সালে তারে আদর্ গুরিনে মানি লোইয়ো।

¹¹ যিবেরে যুষ্ট বিলিনে ডাগা অয় সেই যীশুয়ো তমারে পাত্তুরু তুরু জানার্। যিহূদীগুনো ভিদিরেত্তুন্ বানা এ তিনজনে গোজেন রেজ্যত্যে মঅ লগে কাম গরন্। তারা মরে বোউত্ উচ্চোমি দুয়োন।

¹² ইপাফ্রায়ো তমারে পাত্তুরু তুরু জানার্। তে তমার নিজো মানুচ্চুনোত্তুন্ এক্কো আর তে খ্রীষ্ট যীশুর্ চাগর্। তে নিত্য তমাত্যে তবনার্ যুদ্ধ চালার্ যেন তুমি পূর্ণতাগান্ লাভ গরঅ আর বেক্কানিত গোজেনর্ আওজ্‌চান ঘেচ্চেকগুরি হবর্ পেইনে দরমর গুরি থিয়্যেই পারঅ।

¹³ ইপাফ্রা পৌইদ্যেনে মুই ইয়েন কোই পারংগে, তমাত্যে আর যিগুনে লায়দিকেয়া আর হিয়রাপলি শঅরত্ আঘন তারাত্যে তে অমকদ কাম্ গরে।

¹⁴ কোচ্‌পেইয়্যে ডাক্তর্ লূক আর দীমা তমারে পাত্তুরু তুরু জানাদন্।

¹⁵ লায়দিকেয়ার বিশ্বেজি ভেইয়ুনোরে আর নুম্ফা আর তা ঘরত্ যে মানুচ্চুনে মন্ডলী ইজেবে এগত্তর অন্, তারারেয়ো পাত্তুরু তুরু জানেয়ো।

¹⁶ তমা ভিদিরে এ চিধিয়ান পড়ানা থুম্ অলে পরেদি লায়দিকেয়ার মন্ডলীবোরেয়ো এ চিধিয়ান পড়িবাত্যে দুয়ো, আর লায়দিকেয়া মন্ডলীবোরে যে চিধিগান পাধা অবঅ সিয়েন-অ তুমি পোজ্জ্য।

¹⁷ আর্খিপ্পরে এ কধাগান কঅ, “প্রভুর সেবা গুরিবাত্যে তরে যে কামান্ দিয়্যে ওইয়্যে সিয়েন থুম্ গরানা ইন্দি বিশেষ গুরি মনযোগ দুয়ো।”

¹⁸ মুই পৌল নিজো আঢে এ পাত্তুরু তুরু জানানার্ কধাগান লেগঙর্। ইদোত্ রাগেয়ো, মুই বন্দী আঘং। গোজেনে তমারে দোয়্যে গোরোক্।