কলসীয় 3 - Chakma Bible1 সালে তুমি যেক্কে খ্রীষ্ট সমারে মরণত্তুন্ জেদা ওইয়ো সেক্কে খ্রীষ্ট স্বর্গত যিয়েনত্ গোজেনর্ ডেন্ ডাগেদি বৈই আঘে সেই স্বর্গীয় বেপারানিত্যে আয়োজি অ। 2 সংসার পৌইদ্যেনে মনযোগ ন-দিইনে বরং স্বর্গীয় পৌইদ্যেনে মনযোগ দুয়ো। 3 তুমি দঅ মুরি যেয়ো আর তমার্ জিংকানিগানি খ্রীষ্ট সমারে গোজেন ইধু লুগেয়্যে আঘে। 4 যিবে তমার্ জিংকানি সেই খ্রীষ্ট যেক্কে ফগদাং অবঅ সেক্কে তুমিয়ো তা সমারে তার্ মহিমার ভাগী ওইনে ফগদাং পেবা। 5 সেনত্যে তমা পাপ-খাচ্চ্যদ ভিদিরে যিয়েনি আঘে সিয়েনি ভস্ত গুরি ফেলঅ। সিয়েনত্ আঘেদে নানান্ বাবোত্যে সিনেলী, অসিজি, কুবাসনা, ভান্ন্যেই আওজ্ আর লুভ্ যিয়েনরে এক বাবোত্যে মূত্তি পূজোয়ো কুয়ো অয়। 6 যিগুনে গোজেনর্ অবাধ্য তারা উগুরে ইয়েনি বেক্কানির্ কারনে গোজেনর্ সাজা লামি এজের্। 7 তুমিয়ো আগেদি সেবাবোত্যে গুরি চলিদা, 8 মাত্তর্ ইক্কিনে রাগ, মেজাজ দেগানা, ইংসে, গেইল্ দেদি আর ভান্ন্যেই কধাবাত্তা তমাত্তুন্ দূর্ গরঅ। 9-10 একজন আরেকজন ইধু মিজে কধা ন-কোইয়ো, কিয়া তমার পুরোণি “মুই” তার্ কাম সমত্ কাবড় ধোক্ক্যেন ঝারি ফেলেইনে তুমি দঅ নুয়ো “মুই” উজ্জ্য। এই নুয়ো “মুই” আরঅ নুয়ো অদে অদে তার্ সৃট্টিগুরিয়্যেবো ধোক্ক্যেন অর্, যেন সেই সৃট্টিগুরিয়্যেবোরে তুমি গমেডালে জানি পারঅ। 11 এ অবস্থায় অযিহূদী বা যিহূদী ভিদিরে, চুনু মাঢা কাপ্যে বা চুনু মাঢা-ন-কাপ্যে মান্জ্য ভিদিরে, ব-কলম, নিচুজাদ্, চাগর্ বা গিরোজ মোধ্যে কনঅ ফারগ্ নেই; সিয়েনত্ খ্রীষ্ট আজল্ আর তে পত্তিজন ভিদিরে আঘে। 12 ইয়েনত্যে গোজেনে যিগুনোরে বেঈ লোইনে নিজোত্যে জুদো গুরি থোইয়্যে তার্ সেই কোচ্পেইয়্যে মানুচ্ ইজেবে তুমি মনেদি মেয়্যে, দোয়্যে, নম্রতা, নরম-খাচ্চ্যত্ আর ধৈজ্জ্য দিইনে নিজোরে সাজঅ। 13 একজন আরেক জনরে সোজ্জ্য গরঅ আর যুনি কারঅ বিরুদ্ধে তমার কনঅ দুচ্ দিবার থায় সালে তারে ক্ষেমা গরঅ। প্রভু যেধোক্ক্যেন গুরি তমারে ক্ষেমা গোজ্জ্যে সেধোক্ক্যেন গুরি তুমিয়ো একজন আরেকজনরে খেমা গরানা উচিত। 14 আর ইয়েনি উগুরে কোচ্পানালোই নিজোরে সাজঅ। কোচ্পানাগানে সেই বেক্ গুণানিরে একলগে বানিনে পেলাং পেলাং গুরি দান গরে। 15 খ্রীষ্ট যে সুগ্-শান্দি দে সেই সুগ্-শান্দিগান তমা রিবেঙত্ থেইনে তমারে পরিচালনা গোরোক্। সুগে-শান্দিয়্যে থেবাত্যে দঅ তমারে বেক্কুনোরে এক্কান কিয়্যে ইজেবে ডাগা ওইয়্যে। তুমি কৃতজ্ঞ থাগঅ। 16 গোজেনর্ কধানিরে তুমি রিবেঙত্ গমেডালে বজত্তি গুরিবাত্যে দুয়ো। গোজেনর্ দিয়্যে জ্ঞানে একজন আরেকজনরে শিক্ষ্যে আর সল্লা দুয়ো আহ্ রিবেঙদি কৃতজ্ঞতার্ লগে গোজেন নাঙে গীতসংহিতার গীদ্ আর আত্মিক আহ্ বাঈনী গুরিবার গীদ্ গঅ। 17 তুমি যিয়েনি কঅ বা গুরিদা সাৎ সিয়েনি প্রভু যীশুর্ নাঙে গরঅ আর সিয়েনির মাধ্যমে বাবা গোজেনরে ভালেদি জানঅ। খ্রীষ্টীয় পরিবারত্যে উপদেচ্ 18 তুমি যিগুনে মোগ্, তুমি পত্তিজনে নেগর্ তলেদি থানাগান মানি লঅ, কিয়া প্রভুর মানুচ্ ইজেবে ইয়েনই উচিত। 19 তুমি যিগুনে নেক্, তুমি পত্তিজনে মোগরে কোচ্পেয়ো আর তা লগে কড়া বেবহার ন-গোজ্জ্য। 20 পুয়ো-ছা লগ্, তুমি বেক্কানি পৌইদ্যেনে মা-বাবর্ বাধ্য থেয়ো, কিয়া ইয়েনিলোই প্রভু হুজী অয়। 21 তুমি যিগুনে বাব্, তমার পুয়ো-ছাগুনোর্ মনানি যাগুলুগ্ গুরি ন-দুয়ো, যেন তারা মন্মরা ন-অন্। 22 তুমি যিগুনে চাগর্, তুমি বেক্কানি পৌইদ্যেনে তমার্ এ জগদর্ গিরোজ্চুনোর বাধ্য থেয়ো। যেক্কে তারা তমারে খিয়েল গরন্ বানা সেক্কে যে তারারে হুজী রাগেবাত্যে তারার্ বাধ্য থেবা সিয়েন নয়, বরং খাটি মনে প্রভু উগুরে ভোক্তি রাগেনে তারার্ বাধ্য থেয়ো। 23 তুমি যিয়েন গুরিদা সাৎ, সিয়েন মান্জ্যত্যে নয় বরং প্রভুত্যে গরর্ বিলিনে মন-পরাণ দিইনে গোজ্জ্য, 24 কিয়া তুমি দঅ কোই পারঅ, প্রভু তা মানুচ্চুনোত্যে যিয়েন থোইয়্যে সিয়েন তুমি বক্শিজ্ ইজেবে তাত্তুন্ পেবা। তুমি যিবের্ সেবা গরর্ তে প্রভু খ্রীষ্ট। 25 যে অন্যেয় গরে তে তার্ ফল পেবঅ। প্রভুর্ চোগেদি বেক্কুনে সং সং। |
Copyright © 2021 Bangladesh Bible Society
Bangladesh Bible Society