কলসীয় 2 - Chakma Bible

¹ মুই তমারে জানেবার চাং, তমাত্যে আর লায়দিকেয়া শঅরর্ মন্ডলীর মানুচ্চুনোত্যে, আর যিগুনে মরে ন-দেগন্ তারার্ বেক্কুনোত্যে মুই মনে পরাণে কাম্ গরঙর্।

² মুই চাং যেন তারা রিবেঙত্ উচ্চোমি পান আর কোচ্‌পানালোই এক অন্, আর খ্রীষ্ট পৌইদ্যেনে বুঝোনার ফলে যে নিচ্চয়তা পা-যায় সেই পুরো নিচ্চয়তাগান বেশ্ গুরিনে পান্। সিয়েনর কারনে গোজেনর্ গুমুরো সত্যগানরে, অত্তাৎ খ্রীষ্টরে তারা জানি পারিবাক্।

³ খ্রীষ্ট ভিদিরে বেক্‌ জ্ঞানানি আর বুদ্ধিগানি লুগেইয়্যে আঘে।

⁴ মুই তমারে এ কধাগান্ কঙর্ যেনে কেঅ মন-ভুলেইয়্যে যুক্তি-তর্কলোই তমারে ভুল্ পধেদি নেযেই ন-পারন।

⁵ মুই কিয়্যেগানদি তমা ইধু ন-থেলেয়ো আত্মায় আঝির্ আঘং আর তমার্ গম চালচলন্ আর খ্রীষ্ট উগুরে তমার থির্ বিশ্বেজ্ দেগিনে গম্ পাঙর্।

খ্রীষ্ট ভিদিরে জিংকানির পরিপূরোণ

⁶ তুমি যেবাবোত্যেগুরি খ্রীষ্ট যীশুরে প্রভু ইজেবে মানি লোইয়ো ঠিগ সেবাবোত্যেগুরি তা সমারে মিজেইনে তমা জিংকানিগানি কাদঅ।

⁷ খ্রীষ্ট ভিদিরে মূরোত্ পুরিনে তা ভিদিরে তুমি বাড়ি উদোনাত্ থাগঅ। তুমি শিক্ষ্যে পেইনে যিয়েন বিশ্বেজ্ গোজ্জো সিয়েন্দোই থির্ থাগঅ আর গোজেনরে নিত্য ভালেদি জানেই থাগঅ।

⁸ তুমি উজিয়ার্ অ, যেন কেঅ মান্‌জ্যর পাম্‌দিয়্যে ছলনাবলা দর্শনর্ শিক্ষ্যেলোই তমারে বন্দী ইজেবে টানি নেযেই ন-পারে। খ্রীষ্ট লগে সেই শিক্ষ্যের্ কনঅ মিল্ নেই; মান্‌জ্যর্ বানেইয়্যে সুদোম আর জগদর্ নানান্ রীতিনীতি উগুরে সিয়েনি নির্ভর গরে।

⁹ গোজেনর্ বেক্‌ পরিপূরোনান্ খ্রীষ্ট ভিদিরে কিয়্যেলোই বজত্তি গরের্, আর খ্রীষ্ট লগে মিজেইনে তুমিয়ো সেই পরিপূরোণান্ পেইয়ো।

¹⁰ তে দাঙর্ আগাজর্ বেক্কানির্ শাসনগুরিয়্যে আর খেমতার্ অধিকারীগুনোর্ উগুরে।

¹¹ ইয়েন বাদে তুমি খ্রীষ্ট লগে এগত্তর্ ওইয়ো বিলিনে তমার্ চুনু মাঢায়ো কাবা ওইয়্যে। এ চুনু মাঢা কাবানাগান কনঅ মান্‌জ্যর্ আঢে কাবানা ন-অয়, খ্রীষ্ট নিজেই সিয়েন গোজ্জ্যে; অত্তাৎ কিয়্যে উগুরে পাপ খাচ্চ্যদর্ যে খেমতাগান এলঅ সেই খেমতাত্তুন্ তে তমারে উদ্ধোর্ গোজ্জ্যে।

¹² বাপ্তিস্মর্ মাধ্যমে খ্রীষ্টর্ লগে তমার কবর্ ওইয়্যে; বানা সিয়েন নয়, যিবে মরণত্তুন্ খ্রীষ্টরে জেদা গুরি তুল্ল্যে সেই গোজেনর্ খেমতা উগুরে বিশ্বেজর্ মাধ্যমে তমারে খ্রীষ্টর্ লগে জেদা গুরি তুলো ওইয়্যে।

¹³ তুমি দঅ পাপর ফলে আর চুনু মাঢা-ন-কাবানার ফলে মরা এলা, মাত্তর্ গোজেনে তমারে খ্রীষ্টর্ লগে জেদা গোজ্জ্যে।

¹⁴ আর আমা বিরুদ্ধে যে দলিলানি এলঅ সিয়েনির বেক দাবি-দাওয়া সুদ্ধো সিয়েনি বাতিল গুরি দিয়্যে। সেই দলিলানি তে ক্রুশোত্ পেরেগ্ মারিনে নাকচ্ গুরি ফেল্ল্যে।

¹⁵ তে আগাজর্ বেক ভান্ন্যেই শাসনগুরিয়্যে আর খেমতার্ অধিকারীগুনোর খেমতা বর্‌বাদ গোজ্জ্যে। আর এবাবোত্যেগুরি তে খ্রীষ্টর্ ক্রুশোর্ মাধ্যমে তারা উগুরে জিত্যে আর বেক্কুনো মুজুঙোত্ তারারে অসর্মান গোজ্জ্যে।

¹⁶ সেনত্যে হানা-দানা বা ধর্মীয় কনঅ পরব্ বা আঙোচ্চ্যা বা জিরেবার দিন্নোলোই তমারে দুষ্ দিবার্ অধিকার কারর্ নেই।

¹⁷ ইয়েনি দঅ এলঅ আগামিদি যিয়েনি অবঅ সিয়েনির ছাবা, মাত্তর্ যিয়েন আজল্ সিয়েন খ্রীষ্ট ভিদিরে আঘে।

¹⁸ নিজো কিয়্যেগানরে দুঘ্ দেনা আর স্বর্গদূত্‌তুনোরে উবোসনা গরানা যিগুনে দরকারী বিলিনে মনে গরন্ সিগুনে যেন তমার বক্‌শিজ্ পেবার পধত্ মানা ন-গরন্। এবাবোত্যে মান্‌জ্যে যিয়েন দেক্ক্যন বিলিনে ভান্ গুরিনে সে পৌইদ্যেনে বোউত্ দাঙর্ দাঙর্ কধা কন্ আর এনেবাদে অহংকারে ফুলি উদোন্, কিয়া তারার্ মনানি পাপ-খাচ্চ্যদে ভরা।

¹⁹ তারা দরমর গুরি মাঢাবোরে, অত্তাৎ যীশু খ্রীষ্টরে ধুরি ন-থান্, অদচ সেই মাঢাবোর্ চাল্লোই গোদা কিয়্যেগান আড়্-এড়ালোই মিজেইনে আর থির্ থেইনে গোজেনর্ আয়োজ মজিম দাঙর্ অ।

খ্রীষ্ট সমারে মিজেইনে জিংকানি কাদানা

²⁰ খ্রীষ্ট সমারে মুরিনে তুমি যেক্কে জগদর্ নানান্ সুদোমত্তুন্ দূরোত্ সুরি এচ্চ্য সেক্কে জগদর্ মানুচ্চুনো ধোক্ক্যেন তুমি কিত্ত্যে আরঅ জগদর্ নিয়মর্ অধীন অর্?

^21-22 যেদক্কানি জিনিচ্ বেবহার গত্তে গত্তে বর্‌বাদ ওই যায় সেই বেক্‌ জিনিচ্চানি পৌইদ্যেনে এবাবোত্যে সুদোম আঘে-ন ধোজ্জ্য, ন-হেয়ো, ন-বাচ্চ্য। এবাবোত্যে সুদোম দঅ বানা মান্‌জ্যর্ দিয়্যে উগুম আর শিক্ষ্যে।

²³ এ সুদোমানি চাহ্‌দে মনে অয় বেশ্ জ্ঞানে ভরা, কিয়া কেধোক্ক্যেন গুরি উবোসনা গরা যায়, কেধোক্ক্যেন গুরি নিজোরে নিজো গরা যায়, কেধোক্ক্যেন গুরি নিজোর্ কিয়্যেগানরে দুঘ্ দিয়্যে যায়, সিয়েনি এই সুদোমানি মানুচ্চুনোরে জানায়, মাত্তর্ পাপ-খাচ্চ্যদ্‌তানরে দঙানা পৌইদ্যেনে ইয়েনির্ কনঅ দাম্ নেই।