কলসীয় 1 - Chakma Bible1-2 মুই পৌল গোজেনর্ আয়োজে খ্রীষ্ট যীশুর্ এক্কো প্রচারক ওইয়োং। কলসী শঅরত্ যিগুনে গোজেনর্ মানুচ্ আর খ্রীষ্ট লগে মিজেয়্যে বিশ্বেজি ভেই, সিগুনো ইধু মুই আর ভেই তীমথিয় এ চিধিগান লেগঙর্। আমা বাবা গোজেনে তমারে বর্ দুয়োক আর শান্তি দান গোরোক্। পৌলে গোজেনরে ভালেদি জানেল 3-4 খ্রীষ্ট যীশু উগুরে তমার বিশ্বেজ্ আর গোজেনর্ বেক্ মানুচ্চুনো উগুরে তমার্ কোচ্পানার কধা আমি শুন্ন্যেই, আর সেনত্যে যেদকবার্ আমি তমাত্যে তবনা গুরিই সেদকবার আমা প্রভু যীশু খ্রীষ্টর্ বাব্পো গোজেনরে আমি ভালেদি জানেই। 5 স্বর্গত্ তমাত্যে যিয়েনি থুবেয়্যে আঘে সিয়েনি পেবার আজা তমা ইধু এ বিশ্বেজ্ আর কোচ্পানাগান জোর্মেয়্যে। যে গম্ হবরান, অত্তাৎ সত্যর্ কধাগান তমা ইধু লুম্মেগি সিয়েনি ভিদিরে তুমি এ আজাগানর্ কধা শুন্ন্য। 6 এ গম্ হবরান গোদা পিত্থিমীত ছিদি পড়িনে ফল ধরের্ আর দিন দিন উজেই যার্। যেদিন্ন্যে তুমি এ গম্ হবরান শুন্ন্য আর গোজেনর্ দোয়্যের কধা ঘেচ্চ্যেক্ গুরি কোই পাজ্জ্য সে দিন্নোত্তুন্ ধুরি সিয়েন তমা ভিদিরেয়ো ঠিগ্ সেবাবোত্যেগুরি কাম গরের্। 7 সেই গম হবরানর্ কধা তুমি আমার কোচ্পেইয়্যে সমাজ্জ্যে ইপাফ্রাত্তুন্ শুন্ন্য। তে তমা পক্ষত্তুন্ খ্রীষ্টর এক্কো বিশ্বেজি সেবাগুরিয়্যে। 8 পবিত্র আত্মায় তমারে যে কোচ্পানার মনভাব দান গোজ্জ্যে তা পৌইদ্যেনে ইপাফ্রা আমারে জানেয়্যে। খ্রীষ্টই আজল্ 9 ইয়েনত্যে তমা পৌইদ্যেনে শুনোনার্ পরেত্তুন ধুরি আমি নিত্য তমাত্যে তবনা গুরির্। আত্মিক জ্ঞান আর বুদ্ধিলোই যেন তুমি গোজেনর্ আওজ্চান পুরোপুরি বুঝি পারঅ আমি সিয়েনই গোজেন ইধু মাগির্। 10 ইয়েন্দোই যেন তুমি গম কাম্ গুরিনে ফলবান অ আর গোজেনরে আরঅ গমেডালে জানি পারঅ; আর এবাবোত্যেগুরি যেন বেক্কানিত্ প্রভুরে হুজী গুরিবাত্যে তার যগাজ্জ্যে ওইনে চলি পারঅ। 11-12 ইয়েন সম্ভব, কিয়া গোজেনে তার্ দাঙর্ খেমতা মজিম বেক্ খেমতাগান্দোই তমারে খেমতাবলা গোজ্জ্যে যেনে তুমি নিত্য হুজিয়ে ধৈজ্জ্য ধুরিনে বেক্কানি সোজ্জ্য গরঅ আর বাবা গোজেনরে ভালেদি জানঅ। পহ্র রেজ্যত্ গোজেন মানুচ্চুনে যে অধিকারান পেবাক্ সিয়েনর্ ভাগী অবাত্যে তে তমারে যগাজ্জ্যে গুরি তুল্ল্যে, 13 কিয়া তে আন্ধার রেজ্যত্তুন্ আমারে উদ্ধোর্ গুরিনে তার কোচ্পেইয়্যে পুয়োবোর্ রেজ্যত্ আন্ন্যে। 14 এ পুয়োবো সমারে মিজেইনে আমি উদ্ধোর্ ওইয়্যেই, অত্তাৎ আমি পাপর্ ক্ষেমা পেইয়্যেই। 15 এ পুয়োবো অলদে দেগা ন-যেইয়্যে গোজেনর্ অদে অদে ফগদাং। বেক্ সৃট্টির আগেদি তেয়ই এলঅ আর বেক্ সৃট্টির উগুরে তেয়ই আজল্লো, 16 কিত্যেই আগাজত্ আর পিত্থিমীত, যিয়েনি দেগা যায় আর যিয়েনি দেগা ন-যায়, বেক্কানি তা মাধ্যমে সৃট্টি ওইয়্যে। দাঙর্ অাগাজত্ যিগুনো আঢত্ রাজাগিরি, দোঙেবার, শাসন আর খেমতা আঘে তারারে বেক্কুনোরে তাঁরে দিইনে তাত্যেই সৃট্টি গরা ওইয়্যে। 17 তেয়ই বেক্কানির্ আগে এলঅ আর তার্ মাধ্যমে বেক্কানি আঘে। 18 ইয়েনবাদে তেয়ই তার্ কিয়্যেগানর্, অত্তাৎ মন্ডলীর মাঢাবো। তেয়ই পত্তম্ আর তেয়ই মরণত্তুন্ পৌইল্যা জেদা ওইয়্যে, যেন বেক্কানিত্ তেয়ই আজল্লো ওই পারে। 19 গোজেনে চেইয়্যেদে যেন তার্ বেক্ ভর্পুনোঙান্ খ্রীষ্ট ভিদিরে থায়। 20 সিয়েনবাদে পিত্থিমীত ওক্ বা স্বর্গত ওক্, খ্রীষ্টর্ মাধ্যমে তার্ নিজো লগে বেক্কানির্ মিজেনাগান-অ তে চেইয়্যে। খ্রীষ্ট ক্রুশো উগুরে তার্ লো-গান দান গুরিনে শান্তি আন্ন্যে বিলিনে এই মিজেনাগান্ ওই পাজ্জ্যে। 21 এক সময়োত্ তুমি গোজেনত্তুন্ দূরোত্ এলা আর তার্ বিরুদ্ধে তমা মনত্ শত্রুভাব এলঅ। তমার বজং কামর্ মাধ্যমে সিয়েন ফগদাং পেইয়্যে। 22 মাত্তর্ খ্রীষ্টর মরণর মাধ্যমে তা কিয়্যেগান্দোই গোজেনে নিজো লগে ইক্কিনে তমারে এগত্তর্ গোজ্জ্যে, যেন তে তমারে পবিত্র, থুদো নেইয়্যে আর নিদ্দুজি অবস্থায় নিজো মুজুঙোত্ আঝির্ গুরি পারে। 23 খালিক্ ইয়েনত্যে খ্রীষ্ট পৌইদ্যেনে গম হবরানত্তুন্ যে ঘেচ্চ্যেকগুরি আজাগান তুমি পেয়ো সিয়েনত্তুন্ দূরোত্ সুরি ন-যেইনে তমার বিশ্বেজে থির্ থা পড়িবো। সেই গম হবরান সারা জগদত্ প্রচার গরা ওইয়্যে আর তুমি সিয়েন শুন্ন্য। মুই পৌল এ গম হবরানর্ প্রচারক ওইয়োং। মন্ডলীত্যে পৌলর্ কাম 24 মুই তমাত্যে যে দুঘ্ ভুগোঙর্ সিয়েনত্যে মুই হুজি। খ্রীষ্টর্ কিয়্যেগানর্, অত্তাৎ মন্ডলীত্যে তার্ যে দুঘোত্ ভুগোনা এজঅ বাগী আঘে সিয়েন মুই মঅ কিয়্যেগান্দোই পূরেই দুয়োং। 25 গোজেনে তা কধানি তমা ইধু পুরোপুরি প্রচার গুরিবার ভারান্ মঅ উগুরে দিয়্যে বিলিনে মুই মন্ডলীর এক্কো সেবাগুরিয়্যে ওইয়োং। 26 গোজেনর্ কধানি ভিদিরে যে গুমুরো সত্যগান পুরোণি মানুচ্চুনো ইধু যুগ যুগ ধুরি লুগেয়্যে এলঅ, ইক্কিনে তা মানুচ্চুনো ইধু সিয়েন ফগদাং ওইয়্যে। 27 গোজেনে চেলদে, অযিহূদীগুনো ভিদিরেয়ো তার্ এ গুমুরো সত্যগানর্ বাঈনী গরানাগান যে কি, সিয়েন যেন তার্ বেক মানুচ্চুনে জানি পারন। সেই সত্যগান ইয়েন-খ্রীষ্ট তমা রিবেঙত্ আঘে বিলিনে তুমি মহিমা পেবার আজা পেইয়ো। 28 আর সেই খ্রীষ্ট পৌইদ্যেনে আমি প্রচার গুরিই, অত্তাৎ গোজেনর্ দিয়্যে ন-ফুরেইয়্য জ্ঞান লগে আমি পত্তিজনরে উজিয়ার্ গুরিই আর শিক্ষ্যে দিই, যেন পত্তিজনরে আমি খ্রীষ্টর্ মাধ্যমে যগাজ্জ্যে গুরি তুলিই পারি। 29 এই উদ্দেচ্চ্যগান্দোই গোজেনে যে দাঙর্ খেমতাগানে মঅ ভিদিরে কাম গোজ্জ্যে সেই খেমতা মজিম মুই জদবদে কাম্ গরঙর্। |
Copyright © 2021 Bangladesh Bible Society
Bangladesh Bible Society