আমোষ 9 - Chakma Bible

ইস্রায়েলান্ ভস্ত অবঅ

¹ মুই প্রভুরে পূজোবো কায়-কুরে থিয়্যেই থাগদে দেগিলুং। তে কলদে, “খুদোগুনো মাঢাত্ আঘাত্ গরঅ যেনে সিগুন গির্‌‌‌গিরে উদিনে সিদুগো বেক মানুচ্চুনোর মাঢা উগুরে ভাঙি পড়ন্। যিগুনে বাঁজি থেবাক্ যুদ্ধোত্ মুই তারারে মারে ফেলেম। কনজনে যেই বা ধেই ন-পারিবাক্।

² তারা মরণ জাগানর্ গভীন সং খুড়িনে সিদু গেলেয়ো মঅ আঢ্‌‌‌তানিয়ে সিত্তুন্ তারারে আনিবো। তারা আগাজ সং উদিলেয়ো সিত্তুন্ তারারে লামেই আনিম।

³ তারা কর্মিল মুড়োবো মাঢাত্ নিজোরে লুগেলেয়ো সিত্তুন্ মুই তারারে তোগেইনে ধুরিম। তারা মত্তুন্ সাগর তলাত্ লুগেলেয়ো সিদু তারারে কামেড়েবাত্তে মুই সাপ্‌‌‌পোরে উগুম দিম।

⁴ শত্রুলোই বন্দী ওইনে তারা অন্য দেজত্ গেলেয়ো সিদু তারারে মারে ফেলেবাত্তে মুই লাম্বা ছুরিগানরে উগুম দিম। ভালেদিত্তে নয় মাত্তর্ অমংগলত্তেই মুই তারা উগুরে মঅ চোগ্‌‌‌কুন থির্ রাগেম।”

⁵ বেগত্তুন্ খেমতাবলা প্রভু লগেপ্রভু দেজ্‌চানরে ধুরিলে গুলি যায় আর সিয়েন ভিদিরে বজত্তি গুরিয়্যে বেক্কুনে আবিলেচ্ হান। তা ধরানাগান্দোই পুরো দেজ্‌‌‌‌‌চান মিসর য়্যেল্ গাঙ ধোক্ক্যেন ফুলি উদে, সে পরেদি লামি যায়।‌‌

⁶ তে আগাজত্ তা অজল্ ঘরান বানেয়্যে আর পিত্‌থিমীগান উগুরে চানান ধোক্ক্যেন আগাজ্‌চানরে থিদেবর্ গোজ্যে; তে সাগর পানিগানরে ডাগিনে ভূইয়ো উগুরে ঢালি দে। যিবে ইয়েনি গরে তা নাঙান্ লগেপ্রভু।

⁷ লগেপ্রভু কত্তে, “ও ইস্রায়েলর মানুচ্চুন, তুমি কি মইদু কূশীয়গুনো ধোক্ক্যেন নয়? মুই কি মিসরত্তুন্ ইস্রায়েলীয়গুনোরে, ক্রীটত্তুন্ পলেষ্টীয়গুনোরে আর কীরত্তুন্ অরামীয়গুনোরে ন-আনং?

⁸ মঅ চোগ্‌‌কুন ঘেচ্চেকগুরি এই পাপে ভরা রেজ্যগান উগুরে রোইয়োন। পিত্‌‌থিমীর বুগোত্তুন্ মুই সিয়েন ভস্ত গুরি দিম; তো মুই যাকোবর বংশবোরে পুরোপুরি গুরিনে ভস্ত ন-গুরিম।

⁹ মুই উগুম দিম, আর চালোনত্ যেবাবোত্যেগুরি শোজ্য ঝারন্ সেবাবোত্যেগুরি বেক্ জাদ ভিদিরে মুই ইস্রায়েলর বংশবোরে ঝারিম, মাত্তর্ বিজিও মাদিত্ ন-পড়িবাক্।

¹⁰ মর্ বেক পাপী মানুচ্চুনো ভিদিরে যিগুনে কন্, ‘অমংগলে আমারে লাগত্ ন-পেবঅ বা আমা ইধু ন-এবঅ,’ তারা বেক্কুনে যুদ্ধোত্ মুরিবাক্।”

ইস্রায়েলর উদ্ধোর্

¹¹ লগেপ্রভু কত্তে, “সেদিন্যে মুই দায়ূদোর পুড়ি যেইয়্যে ঘরান আরঅ তুলিম। মুই তার্ ভাঙা জাগানি তুনিম্, ভস্ত ওইয়্যে জাগানি ঠিগ্ গুরিম আর আগে যেবাবোত্যে এলঅ সেবাবোত্যে গুরি সিয়েনি বানেম্,

¹² যেনে ইস্রায়েলীয়গুনে ইদোমর্ বাদবাগী ভাগ্‌‌‌কান আর মর্ অন্য বেক জাদ্‌‌‌তুনোর্ দেজ্‌‌‌চানি গজক্ গুরি পারন।‌‌‌‌‌‌‌‌‌‌‌” লগেপ্রভু, যিবে এই বেক্ কামানি গরে, তে এ কধানি কোইয়্যেদে।

¹³ লগেপ্রভু আর কত্তে, “সে দিনুন্ এজের্ যেক্কে এদক্ শোজ্য জোর্মেবাক্ যে, সিগুন বেক্কুন কাবিবার আগে আরঅ চাষ গুরিবার সময় এবঅ আর এদক্ আংগুর অবাক্ যে, সিগুন বেক্কুন মাড়িবার আগেদি আরঅ ফসল লাগেবার সময় এবঅ। দাঙর্ দাঙর্ মুড়োগুনোত্তুন্ বোউত্ নূয়ো আংগুর-রস পাহ্ যেবঅ আর সিগুনে বেক চিগোন্ চিগোন্ মুড়োগুনোরে যেন ধোইনে নেযেব।

¹⁴ বন্দীদজাত্ থেইয়্যে মঅ মানুচ্ ইস্রায়েলীয়গুনোরে মুই ফিরেই আনিম; তারা ভস্ত ওই যেইয়্যে শঅরানি আরঅ বানেবাক্ আর সিয়েনিত্ বজত্তি গুরিবাক্। তারা আংগুর খেত্ গুরিনে আংগুর-রস হেবাক্; তারা বাগান গুরিনে সিয়েনর্ ফলুন হেবাক্।

¹⁵ মুই ইস্রায়েলীয়গুনোরে তারার্ নিজো দেজত্ গাজ ধোক্ক্যেন লাগেই দিম; যে দেজ্‌‌‌‌চান মুই তারারে দুয়োং সিয়েনত্তুন্ আর তারারে কনদিন্‌অ উগুড়েই ফেলা ন-অবঅ।” এ কধাগান তমা গোজেন লগেপ্রভু কত্তে।