আমোষ 6 - Chakma Bible

আরামে থেইয়্যে মানুচ্চুন

¹ অভিশাব্ পোড়োক তমার্! তুমি দঅ সিয়োনত্ আরামে বজত্তি গরর্ আর শমরিয়ার মুড়োবোত্ নিজোরে নিরাপদ মনে গরর্। তুমি বেগত্তুন্ আজল্ জাদ্ ইস্রায়েলর নাঙ্-গোজ্যে মানুচ্ আর তমা ইধু ইস্রায়েলর্ মানুচ্চুনে এজন্।

² তুমি কল্‌নীত যেইনে চঅ; সিয়েনত্তুন্ দাঙর্ হমাত যঅ, সে পরেদি পলেষ্টীয়গুনোর গাৎ শঅরত্ যঅ। সেই রেজ্যগানিত্তুন্ কি তমা রেজ্য দিয়্যেন গম্? তারা দেজ্‌চানিত্তুন কি তমা দেজ্‌চান দাঙর্?

³ তুমি মনে গরত্তে যে, তুমি দযার্ দিন্নোরে দূরোত্ সোরেই দুয়োর্, মাত্তর্ আজলে তুমি সন্ত্রাজর্ রাজাগিরি চালর্।

⁴ তুমি এ্যদো দাদর্ কাম গোজ্যে খাদত্ ঘুম যঅ আর তমা বিচ্ছোনত্ আল্‌‌সি গুরিনে কিয়্যেগান টানঅ। তমা পালত্তুন্ তুমি বেঈ লোইয়্যে ভেড়া ছঅ আর গোরু ছর্ য়েরা খঅ।

⁵ তুমি বীণা বাজেইনে গান গঅ আর দায়ূদো ধোক্ক্যেন নানান্ বাবোত্যে বাজনা বানেই থাগঅ।

⁶ তুমি কদরা ভুরিনে আংগুর-রস খঅ আর বেগত্তুন্ গম্ তুম্বাজ্ তেল কিয়্যেত্ মাজঅ, মাত্তর্ তুমি যোষেফর্, অত্তাৎ ইস্রায়েলর ভস্ত অনাত্তে দুঘ্ ন-পেয়ো।

⁷ সেনত্তে যিগুনে বন্দী ওইনে অন্য দেজত্ যেবাক্ তারা ভিদিরে তুমিই অবা পত্তম; সেক্কে তমার্ বলান্যে হানা আর কিয়্যে টানানা শেজ্ অবঅ।

ইস্রায়েলর অহংকার উগুরে লগেপ্রভুর ঈচ্ গরানা

⁸ বেগত্তুন্ খেমতাবলা গোজেন প্রভু লগেপ্রভু নিজো নাঙে শমক্ হেইনে কোইয়্যেদে, “মুই যাকোবর অহংকার আর তার ঘরানি অমকদ ঘিনাং; সেনত্তে মুই তমা শঅরানিত্ আর সিয়েন ভিদিরে বেক্কানি অন্য মান্‌জ্য আঢত্ দি দিম।”

⁹ এক্কান ঘরত্ দশজন মানুচ্ বাঁজি থেলেয়ো তারা মুরিবাক্।

¹⁰ সে পরেদি কনঅ কুদুম্মোর্ মরাকিয়্যেনি পুড়িবাত্তে সিয়েনি ঘরত্তুন্ নিগিলিনে নিবাত্তে এবাক্। ঘর ভিদিরে আর কনজন আগন্ কিনা সিয়েনি হবর্ পেবাত্তে তে পুযোর্ গুরিবো, “তুই বাদে আর কনজন আগন্ কি?” সেক্কে সেই ঘর মানুচ্চো কবঅ, “না, নেই।” ইয়োত্ সেই কুদুম্মোবো কবঅ, “জুরো গুরি থাগ্। এন্ কি, লগেপ্রভুর নাঙান্‌অ ন-নিচ্।”

¹¹ যেক্কে লগেপ্রভু উগুম দিবো সেক্কে দাঙর্ দাঙর্ ঘরানি আর চিগোন্ চিগোন ঘরানি কট্টা কট্টা গরা অবঅ।

¹² খামা মুড়োত্ কি ঘোড়াগুন দাবা দুয়োন্? কনজনে কি সিদু বলদ গোরুলোই চাষ গরন্? মাত্তর্ তুমি ন্যায়বিচেরানরে বিষ ধোক্ক্যেন গোজ্য আর তিদে ধোক্ক্যেন গোজ্য সততার ফলানরে।

¹³ তুমি লো-দবার (যিয়েনর্ ভেদ্‌তান্ কিচ্ছু নয়) জয় গোজ্য বিলিনে ফুত্তি গুরি থাগঅ, আরঅ কোই থাগঅ, “আমি কি নিজো বল্লোই কর্ণয়িম (যিয়েনর্ ভেদ্‌তান্ ‘বোলী শিং’) অধিকার ন-গুরিই?”

¹⁴ বেগত্তুন্ খেমতাবলা গোজেন লগেপ্রভু কোইয়্যেদে, “ ইস্রায়েলর মানুচ্চুন, মুই তমা বিরুদ্ধে এক্কো জাদরে পাদেম। সে জাদ্‌তো‌‌ হমাৎ চাগালাত্তুন ধুরি দোগিণেদি অরাবা কলগ সং বেক্ জাগানিত্ তমা উগুরে অত্যেচার গুরিবো।”