আমোষ 5 - Chakma Bible

ইস্রায়েলত্তে আবিলেচ্ গরানা

¹ ও ইস্রায়েলর মানুচ্চুন, তমা বিষয়ানিলোই মুই ইয়েনি যে আবিলেচ্ গরঙর্ সিয়েনি শুনো।

² “গাবুরী ইস্রায়েলে পড়ি যেইয়্যে, তে আর কনদিন্‌অ ন-উদিবো; তারে তা নিজো মাদিত্ ফেলেই রাগা ওইয়্যে, তারে তুলিবার কনজন নেই।”

³ প্রভু লগেপ্রভু কত্তে, “ইস্রায়েলর যে শঅরত্তুন্ এক আজার্ বোলী মানুচ্ নিগিলি যান্ সিগুনোত্তুন বানা একশ জন বাঁজি থেবাক্, আরঅ যে শঅরত্তুন্ একশ জন বোলী মানুচ্ নিগিলি যান্ সিগুনোত্তুন্ বানা দশজন বাঁজি থেবাক্।”

লগেপ্রভু ইধু যেইনে বাঁজি থাক্

⁴ ইস্রায়েল মানুচ্চুনোরে লগেপ্রভু কোইয়্যেদে, “তুমি মইদু এজঅ, সেক্কে বাঁজিবা।

⁵ তুমি বৈথেলত্ বা গিল্‌‌গলত্ বা বের্-শেবাত্ ন-যেয়ো, কিত্যে গিল্‌‌গল মানুচ্চুনে হামাক্কায় বন্দী ওইনে অন্য দেজত্ যেবাক্ আর বৈথেলর্ সর্বনাশ অবঅ।”

⁶ তুমি লগেপ্রভু ইধু যঅ সেক্কে বাঁজিবা; সিয়েন ন-অলে তে আগুনো ধোক্ক্যেন গুরি যোষেফর, অত্তাৎ ইস্রায়েল মানুচ্চুনো ভিদিরে জুলি উদিবো। সে আগুনানে গিলি ফেলেব আর বৈথেলর কনজনে সিয়েন মারেই ন-পারিবো।

⁷ তুমি দঅ ন্যায়বিচেরানরে তিদে গুরি তুল্য আর সততাগানরে মাদিত্ ফেলেয়ো।

⁸ যিবে কৃত্তিকা আর মৃগশীর্ষ নাঙে তারাগুন বানেয়্যে, যিবে আন্ধারানরে পহ্‌‌‌র গরে আর দিন্নোরে রেদোর্ আন্ধার্ গরে, যিবে সাগর পানিগানরে ডাগিনে ভূইয়ো উগুরে ঢালি দে, তা নাঙান্ লগেপ্রভু।

⁹ তে খেমতাবলাগুনো উগুরে আর তারা ঘরানি উগুরে আদিক্ক্যেগুরি সর্বনাশ আনিনে ভস্ত গুরি দে।

¹⁰ যে মানুচ্চো শঅর গেদোত্ অন্যেয়র্ বিরুদ্ধে থিয়্যেই তুমি দঅ তারে ঈচ্ গরঅ আর যে সত্য কধা কয় তারে তুচ্ছো গরঅ।

¹¹ তুমি নাঢাগুনোরে অত্যেচার গরঅ আর জোর্ গুরিনে তাত্তুন শোজ্য আদায় গরঅ। সেনত্তে তুমি যুনিয়ো পাত্তরর্ দাঙর্ দাঙর্ ঘর বানেই থাগ তো তুমি সিয়েনিত্ বজত্তি গুরি ন-পারিবা। যুনিয়ো তুমি দোল্ দোল্ আংগুর খেত্ গুরি থাগ তো তুমি সিয়েনর্ আংগুর রস হেই ন-পারিবা।

¹² মুই হবর্ পাং তমা অন্যেয়ানি কত্তমান বেশ্ আর তমা পাপ্‌‌‌পানি কি জঘন্য! তুমি দঅ গম্ মানুচ্চুনো উগুরে অত্যেচার গরঅ আর ঘুষ হঅ; শঅর গেদোত্ তুমি নাঢা মানুচ্চুনোরে ন্যায়বিচের্ পেবাত্তে ন-দুয়ো।

¹³ সেনত্তে এবাবোত্যে সময়োত্ বুদ্ধিবলা মানুচ্ জুরো গুরি থায়, কিত্যেই সময়ান ভান্ন্যেই।

¹⁴ তুমি যেনে বাঁজি থেই পারঅ সেনত্তে গম্ পধেদি যঅ, ভান্ন্যেয় পধেদি নয়; সালে যেবাবোত্যে তুমি কোই থাগঅ সেবাবোত্যে বেগত্তুন্ খেমতাবলা গোজেন লগেপ্রভু ঘেচ্চেকগুরি তমা লগে লগে থেবঅ।

¹⁵ ভান্ন্যেয়ানরে ঈচ্ গরঅ, গমানরে কোচ্‌পঅ; শঅর গেদোত্ ন্যায়বিচের্ রোক্ষ্যে গরঅ। অয়ত ইস্রয়েলর বাঁজি থেইয়্যে মানুচ্চুনো উগুরে বেগত্তুন্ খেমতাবলা গোজেন লগেপ্রভু দোয়্যে গুরিবো।

¹⁶ বেগত্তুন্ খেমতাবলা গোজেন প্রভু লগেপ্রভু কোইয়্যেদে, “শঅরর্ পত্তি খুলো জাগাত্ মানুচ্চুনে আবিলেচ্ গুরিবাক্ আর পত্তি পধে পধে হায় হায় গুরিবাক্। এন্ কি, শোক্ ফগদাংগুরিয়্যেগুনো লগে আবিলেচ্ গুরিবাত্তে চাষ্ গুরিয়্যেগুনোরে ডাগা অবঅ।

¹⁷ বেক্ আংগুর খেত্‌‌তানিত্ আবিলেচ্ গুরিবাক, কিত্যে মুই তমা ভিদিরেদি যেইম। মুই লগেপ্রভু এ কধাগান কঙর্।”

লগেপ্রভুর্ দিন

¹⁸ অভিশাব্ পোড়োক্ তমার! তুমি দঅ নরম ওইনে লগেপ্রভুর দিন দেগিবাত্তে চর্! কিত্তে তুমি সেদিন্নোর্ আজা গরর্? তমা ইধু সেদিন্নো পহ্‌‌‌র নয় মাত্তর্ আন্ধার অবঅ।

¹⁹ সিবে অবঅ যেন কনঅ মানুচ্ সিংহ আঢত্তুন্ ধেইনে ভালুগো মুজুঙোত্ পড়িলো, যেন নিজো ঘরত্ সোমেইনে দেবাল আঢত্তুন্ সাপ কামড় হেলঅ।

²⁰ লগেপ্রভুর দিন্নো পহ্‌‌‌র ন-ওইনে কি আন্ধার অবঅ? জ্বোল্‌‌‌জ্বোল্যে এক্কানা গুরি ন-থেইনে সিয়েন কি ঘুর্‌‌‌গুজ্যে আন্ধার ন-অবঅ?

²¹ লগেপ্রভু কত্তে, মুই তমা পরব্‌‌‌‌পুন ঘিনাং, এলাফেলা গরং; তমা তেম্মাঙানি মুই সোজ্য গুরি ন-পারং।

²² তুমি মঅ নাঙে পুজ্যে-উৎসর্ব আর শোজ্য-উৎসর্ব গুরিলেয়ো মুই সিগুন গুজি ন-লোম্। যুনিয়ো তুমি পক্তামক্তা য়েমান্দোই উদোলোলি-উৎসর্বর অনুষ্ঠান গরঅ তো সিয়েন ইন্দি মুই রিনিয়ো ন-চেইম্।

²³ তমা গান রবো দূর্ গরঅ। তমা বীণার বাজানা মুই ন-শুনিম।

²⁴ তাত্তুন্ বরং ন্যায়বিচের্ গাঙ ধোক্ক্যেন আর সততা উমরর্ বেঈ যেইয়্যে গঙার্ পানি ধোক্ক্যেন বেঈ যোক্।

²⁵ “ও ইস্রায়েলর মানুচ্চুন, ধূল্যেচর-চাগালাত্ সেই চল্লিশ বজর্ তুমি কি মঅ নাঙে কনঅ য়েমান বা অন্য জিনিস উৎসর্ব গোজ্য?

²⁶ না, বরং তুমি তমার্ নিজোর্ বানেয়্যে রাজা-দেবেদা সিক্কুতর মূত্তি আর তারা-দেবেদা কীয়ূনোর মূত্তি বুয়োই নেযেয়োন।

²⁷ সেনত্তে মুই দামেস্কর উই পারত্ বন্দী ইজেবে তমারে পাধেই দিম। মুই বেগত্তুন্ খেমতাবলা গোজেন লগেপ্রভু এ কধাগান কঙর্।”