আমোষ 3 - Chakma Bible

ইস্রায়েল বিরুদ্ধে লগেপ্রভুর কধা

¹ ও ইস্রায়েলর মানুচ্চুন, তমা বিরুদ্ধে, অত্তাৎ লগেপ্রভু যিগুনোরে মিসরত্তুন্ নিগিলেই আন্যে সেই পুরো জাদ বিরুদ্ধে তে যিয়েনি কোইয়্যে সিয়েনি শুনো:

² “পিত্‌থিমীর্ বেক জাদ্‌‌‌‌‌‌‌‌‌তুনো ভিদিরেত্তুন্ মুই বানা তমারে বেঈ লোইয়োং; সেনত্তে তমার্ বেক পাপ্‌‌‌‌‌পানিত্তে মুই তমারে সাজা দিম।”

³ আগেত্তুন্ ধুরি ঠিগ্ ন-গুরিলে কি দ্বিজনে এক সমারে কুদু যায়?

⁴ শিগের্ গোজ্যে য়েমান্ ন-থেলে কি সিংহ ঝুব্-ঝাড় ভিদিরে গুজুরে? কিজু ধুরি ন-পারিলে কি বোল্যে সিংহবো তা গাঢ ভিদিরে গো গো গরে?

⁵ ফাল ভিদিরে গিরে ন-থেলে কি পেগ্‌‌‌‌‌কুনে ফাল ইধু এজন্? ধুরিবাত্তে কিজু ন-পেলে কি ফাল্লো ফাল্যে উদে?

⁶ শঅরত্ শিংগার রঅ শুনিলে কি মানুচ্চুনে ন-গির্‌গিরান? লগেপ্রভু ন-ঘোদেলে কি শঅরত্ দযা ঘদে?

⁷ আজলে প্রভু লগেপ্রভু তা চাগর্ ভাববাদীগুনো ইধু তার্ পরিকল্পানগান ফগদাং ন-গুরিনে কিচ্ছু ন-গরে।

⁸ সিংহবো গুজুরিলে কন্না ন-দোরেব? প্রভু লগেপ্রভু কবাত্তে কলে কন্না ভাববাদী ইজেবে কধা ন-কোই পারিবো?

⁹ তুমি অস্‌দোদ আর মিসরর বেক ঘরানির্ মানুচ্চুনো ইধু কঅ, “তুমি শমরিয়ার মুড়োগুনো উগুরে এগত্তর্ অ; চঅ, সিয়েন ভিদিরে কদক্ যাগুলুক্! তা মানুচ্চুনো ভিদিরে কদক্ অত্যেচার!”

^10-11 প্রভু লগেপ্রভু কত্তে, “তারা ঠিগ্ কাম গুরিবাত্তে ন-জানন্; তারা ঘরানি ভিদিরে তারা অত্যেচারর্ আর লুদেয়্যে মাল থুবেই রাগেয়োন। সেনত্তে একজন শত্রু তারার্ দেজ্‌‌চান ঘিরিবো; তে তারার্ দরমর রোক্ষ্যে গরেদে পথ্‌‌তানি ভস্ত গুরিবো আর ঘরানি লুদেব।”

¹² লগেপ্রভু কত্তে, “গরগ্‌কুনে‌‌‌‌‌‌ সিংহ মুয়োত্তুন্ যেবাবোত্যে বানা টেঙর্ দ্বিবে আড়্ বা কানর্ এক্কো কট্টা উদ্ধোর্ গুরি পারন সেবাবোত্যে ইস্রয়েলর্ যে মানুচ্চুনে শমরিয়াত্ বজত্তি গরন্ তারা বানা তারা খাদর্ খুদো আর কাবড় পাদালোই উদ্ধোর্ পেবাক্।”

¹³ বেগত্তুন্ খেমতাবলা গোজেন প্রভু লগেপ্রভু কত্তে, “তুমি শুনো আর যাকোব বংশবোরে উজিয়ার্ গরঅ।

¹⁴ মুই পাপত্তে ইস্রায়েলরে যেদিন্যে সাজা দিম্ সেদিন্যে বৈথেলর্ পূজোগুন ভাঙি ফেলেম; সেক্কে পূজোর্ শিঙুন্ ভাঙিনে মাদিত্ পড়িবাক্।

¹⁵ মুই যার্‌‌‌‌‌কাল কাদেবার ঘরানি আর গরমকাল কাদেবার্ ঘরানি ভাঙি ফেলেম; এ্যদো দাদর্ কাম গোজ্যে ঘরানি বর্‌‌‌‌‌বাত গরা অবঅ আর দাঙর্ দাঙর্ ঘরানি ভস্ত গরা অবঅ। মুই লগেপ্রভু এ কধাগান কঙর্।”