আমোষ 2 - Chakma Bible

¹ লগেপ্রভু কত্তে, “মোয়াবর তিনেন্ পাপ, এমন কি, চেরান পাপর কারনে মুই হামাক্কায় তারে সাজা দিম, কিত্যে তে ইদোমর্ রাজার আড়ুন্ পুড়িনে ছেই গুরি দিয়্যে।

² সেনত্তে মুই মোয়াব উগুরে আগুন পাধেই দিম; সিয়েনে করিয়োতর্ ঘরানিরে পুড়ি ফেলেব। যুদ্ধোর্ ডাগ্ আর শিংগার রবো সমারে অমকদ যাগুলুক্ বাঁজিনে মোয়াবর অদপতন্ অবঅ।

³ তার রাজারে মুই ভস্ত গুরিম আর তা সমারে তার্ বেক্ শাজন্‌গুরিয়্যেগুনোরে মারে ফেলেম।”

⁴ লগেপ্রভু কত্তে, “যিহূদার তিনেন্ পাপ, এন্ কি, চেরান পাপর্ কারনে মুই হামাক্কায় তারে সাজা দিম, কিত্যে তা মানুচ্চুনে লগেপ্রভুর্ রীদি-সুদোমানি এলাফেলা গোজ্যন্, আর তার্ সুদোমানি ন-পালান। তারার্ পুরোণি মানুচ্চুনে যে মিজে দেব-দেবেদার্ পিজেদি যেইয়োন তারায়ো সে পধেদি যেইয়োন্।

⁵ সেনত্তে যিহূদা উগুরে মুই আগুন পাধেই দিম; সিয়েনে যিরূশালেমর্ ঘরানিরে পুড়ি ফেলেব।”

ইস্রায়েলর্ বিচের্

⁶ লগেপ্রভু কত্তে, ইস্রায়েলর তিনেন্ পাপ, এন্ কি, চেরান পাপর্ কারনে মুই হামাক্কায় তারে সাজা দিম। তা মানুচ্চুনে টেঙা-পোজেত্যে গম্ মানুচ্চুনোরে আর টেঙর্ এক জড়া জদাত্তে নাঢাগুনোরে বেজন্।

⁷ ধূল্যে ঝারেদে ধোক্ক্যেন গুরি তারা নাঢাগুনোরে ঝারন্ আর পদত্তুন্ অভাবীগুনোরে ঠিলিনে সোরেই দোন্। বাবে আর পুয়োই এক্কো মিলে সমারে বেভিচের্ গরন আর এবাবোত্যেগুরি মঅ সুদ্ধো-সাংগ নাঙান্ অসর্মান গরন্।

⁸ তারা পত্তি পূজো ইধু বন্ধক নেযেয়্যে পোজাগ উগুরে ঘুম যান। তারার্ উবোসনা-ঘরত্ তারা জরিমানার টেঙালোই কিন্যে আংগুর-রস হান্।

⁹ ও ইস্রায়েলর মানুচ্চুন, ইমোরীয়গুনে যুনিয়ো এরস গাজ ধোক্ক্যেন লাম্বা আর এলোন গাজ ধোক্ক্যেন দরমর এলাক্ তো তমা মুজুঙোত্ সেই ইমোরীয়গুনোরে মুয়ই ভস্ত গোজ্যং। মুই তারার্ ফল আর শিঙোরানি ভস্ত গোজ্যং।

¹⁰ ইমোরীয়গুনোর দেজ্ তমারে দিবাত্তে মুই মিসরত্তুন্ তমারে নিগিলেই আনিনে ধূল্যেচর-চাগালাত্ চল্লিশ বজর্ পরিচালনা গোজ্যং।

¹¹ ও ইস্রায়েলর্ মানুচ্চুন, এ কধাগান কি সত্য নয় যে, মুই তমা পুয়োগুনো ভিদিরেত্তুন্ কয়েক জনরে ভাববাদী আর কয়েক জনরে নাসরীয় ইজেবে বেঈ লোইয়োং?

¹² মাত্তর্ তুমি সেই নাসরীয়গুনোরে আংগুর-রস হাবেইয়ো আর ভাববাদী ইজেবে কধা ন-কবাত্তে ভাববাদিগুনোরে উগুম দুয়ো।

¹³ “শোজ্য বুয়োইয়্যে গাড়িত্ তলে কিজু পড়িলে যেবাবোত্যে গুড়ি ওই যায় সেবাবোত্যে গুরি ইক্কিনে মুই তমারে গুড়ি গুরিম।

¹⁴ যিগুনে যাদিমাদি দাবা দি পারন তারা নিজোরে রোক্ষ্যে গুরি ন-পারিবাক্, বোলীগুনে তারার্ বলান্ দেগেই ন-পারিবাক্ আর যোদ্ধাগুনে নিজো পরাণান্ বাজেই ন-পারিবাক্।

¹⁵ ধনুবলাগুনে উজুগুরিনে থিয়্যেই ন-পারিবাক্, যাদিমাদি দাবা যেইয়্যে মানুচ্চুনে ধেই ন-পারিবাক্; এমন কি, ঘোড়া চালেয়্যেবোয়ো নিজো পরাণান রোক্ষ্যে গুরি ন-পারিবো।

¹⁶ যোদ্ধাগুনে ভিদিরে যে বেগত্তুন্ সাহসী তেয়ো সেদিন্যে লাংটা-বাংটা ওইনে ধেই যেবঅ। মুই লগেপ্রভু এ কধাগান কঙর্।”