আমোষ 1 - Chakma Bible

¹ তকোয়র গরগ্‌‌কুনো ভিদিরে আমোষে অলদে এক্কো। সেক্কে যিহূদার রাজা এলদে উষিয় আর ইস্রায়েলর রাজা এলদে যিহোয়াশর পুয়ো যারবিয়াম। ভূজোলর্ দ্বিবজর্ আগে ইস্রায়েল পৌইদ্যেনে গোজেন আমোষরে যিয়েনি দেগেয়্যে সিয়েনি তে কোইয়্যে।

ইস্রায়েলর পাড়াল্যেগুনোর্ বিচের্

² আমোষে কলঅ, “লগেপ্রভু সিয়োনত্তুন্ রঅ ছাড়ের্ আর যিরূশালেমত্তুন্ জোরে জোরে কধা কর্। সেনত্তে গরগ্‌‌কুনোর চড়াইদ্যে ভূইয়ানি বেক্কানি শুগেই যার্ আর কর্মিল মুড়োবো মাঢাত্ গাজপালা মুরি যার্।”

³ লগেপ্রভু কত্তে, “দামেস্কর তিনেন্ পাপ, এমন কি, চেরান্ পাপত্তে মুই হামাক্কায় তারে সাজা দিম, কিত্যে লুয়োর্ কাদাবলা মাড়েদে-মেশিনদোই তে গিলিয়দরে মাজ্যে।

⁴ সেনত্তে মুই হসায়েলর রাজঘরান উগুরে আগুন পাদেম; সিয়েনে বিন্‌‌হদদর্ ঘরানিরে পুড়ি ফেলেব।

⁵ মুই দামেস্কর গেদো হুক্কো ভাঙি ফেলেম; মুই আবন কলগর্ মানুচ্চুনোরে আর বৈৎ-এদনত্ যে মানুচ্চো রাজলুদিক্কো ধুরি আঘে তারে ভস্ত গুরিম। অরামর মানুচ্চুনোরে বন্দী ওইনে কীরে ইদু যেবাক্।”

⁶ লগেপ্রভু কত্তে, “গাজার তিনেন্ পাপ, এন্ কি, চেরান পাপর্ কারনে মুই ঘেচ্চেকগুরি তারে সাজা দিম, কিত্যে তে কয়েক্কান আদামর্ বেক মানুচ্চুনোরে বন্দী গুরিনে ইদোম আঢত্ তুলি দিয়্যে।

⁷ সেনত্তে মুই গাজার দেবাল উগুরে আগুন পাদেম; সিয়েনে তার ঘরানিরে পুড়ি ফেলেব।

⁸ মুই অস্‌‌দোদ মানুচ্চুনোরে আর অস্কিলোনত্ যে মানুচ্চো রাজলুদিক্কো ধুরি আঘে তারে ভস্ত গুরিম। মুই ইক্রোণ বিরুদ্ধে মঅ আঢ্‌‌তান তুলিম, সেক্কে পলেষ্টীয়গুনোর বাঁজি থেইয়্যে মানুচ্চুনে মুরি যেবাক্।”‌‌

⁹ লগেপ্রভু কত্তে, “সোরর তিনেন্ পাপ, এন্ কি, চেরান্ পাপর্ কারনে মুই হামাক্কায় তারে সাজা দিম, কিত্যে ভেইয়ো লগে ভেইয়োর্ চুক্তি এলাফেলা গুরিনে তে কয়েক্কান আদামর্ বেক মানুচ্চুনোরে বন্দী গুরিনে ইদোম আঢত্ তুলি দিয়্যে।

¹⁰ সেনত্তে মুই সোর দেবাল উগুরে আগুন পাধেই দিম; সিয়েনে তার্ ঘরানি পুড়ি ফেলেব।”

¹¹ লগেপ্রভু কত্তে, “ইদোমর তিনেন্ পাপ, এমন কি, চেরান পাপর কারনে মুই হামাক্কায় তারে সাজা দিম, কিত্যে বেক্ মেয়্যে-দোয়্যেনি ছাড়িনে তে লাম্বা ছুরিলোই তা ভেইবোরে লোড়েয়্যে। ইয়েনি বাদেয়ো তার্ অমকদ রাগ নিত্য দেগা দিয়্যে আর তে সিয়েন্ মন ভিদিরে রাগেয়্যে।

¹² সেনত্তে মুই তৈমন উগুরে আগুন পাদেম; সিয়েনে বস্রার ঘরানিরে পুড়ি ফেলেব।”

¹³ লগেপ্রভু কত্তে, “অম্মোনর তিনেন্ পাপ, এমন কি, চেরান পাপর্ কারনে মুই হামাক্কায় তারে সাজা দিম, কিত্যে তা দুজিগান বাড়েবাত্তে তে গিলিয়দর্ পিদিলী মিলেগুনোর্ পেট্‌‌‌তুন ফাদি দিয়্যে।

¹⁴ সেনত্তে যুদ্ধো দিনোত্ যুদ্ধোর্ রঅত্, দর্‌‌‌‌গরেপারা ঝড় ধোক্ক্যেন যুদ্ধোত্ মুই রব্বার দেবালত্ আগুন বাজেই দিম; সিয়েনে তার্ ঘরানি পুড়ি ফেলেব।

¹⁵ তার্ রাজা আর তার শাজন্‌গুরিয়্যেগুনোরে এক সমারে বন্দী গুরিনে নেযা অবঅ।”