প্রেরিত্ 9 - Chakma Bibleশৌলর মন বদলানা 1-2 ইন্দি শৌলে প্রভুর শিচ্চ্যগুনোরে মারে ফেলেব বিলি দর্ দেগার্। দামেস্ক শঅরর্ সমাজ-ঘরানিত্ দিবাত্যে তে দাঙর্ ধর্মগুরুবো ইধু যেইনে চিধিগান চেলঅ। যিদুক্কুন্ মান্জ্যে যীশুর পধেদি চলন্, তারা মরদ্ ওক্ কি মিলে ওক্, তারারে পেলে যেন তারারে বানিনে যিরূশালেমত্ আনি পারে সেই খেমতাগানত্তে তে সেই চিধিগান চেইয়্যে। 3 পধেদি যাদে যাদে যেক্কে তে দামেস্ক ইধু লুমিলো সেক্কে স্বর্গত্তুন্ অদাঢত্ তা চেরোকিত্ত্যেদি পহ্র গুরি পড়িলো। 4 তে মাদিত্ পড়ি গেলঅ আর শুনিলো কন্না যেন তারে কত্তে, “শৌল, শৌল, কিত্ত্যে তুই মঅ উগুরে অত্যেচার্ গরর্?” 5 শৌলে পুযোর্ গুরিলো, “প্রভু, তুই কন্না?” 6 তে কলঅ, “মুই যীশু, যিবে উগুরে তুই অত্যেচার্ গরর্। ইক্কিনে তুই উদিনে শঅরত্ যাহ্, কি গরা পুরিবো সিয়েন তরে কুয়ো অবঅ।” 7 যে মানুচ্চুনে শৌল সমারে যাদন্ তারা আমক্ ওইনে থিয়্যেই রলাক্। তারা কধানি শুন্ন্যন্ মাত্তর্ কাররে ন-দেগন্। 8 যেরেদি শৌলে মাদিত্তুন্ উদিলো, মাত্তর্ চোগ্কুন মেলিলে পরেদি কিচ্চু ন-দেগিলো। সেক্কে তা সমাজ্জ্যেগুনে আঢ্তানি ধুরিনে তারে দামেস্কত্ নেযেলাক্। 9 তিন দিন সং শৌলে চোগেদি ন-দেগিলো আর কিচ্চু ন-হেলঅ। 10 দামেস্ক শঅরত্ অননিয় নাঙে এক্কো শিচ্চ্য এলঅ। প্রভু তারে দর্শন দিইনে কলঅ, “অননিয়।” জোবত্ তে কলঅ, “প্রভু, এইয়্যে দঅ মুই।” 11-12 প্রভু তারে কলঅ, “উজু নাঙে যে পধ্তান আঘে তুই সে পধ্তানত্ যাহ্। সিধু যিহূদার ঘরত্ শৌল নাঙে তার্ষ শঅরর্ এক্কো মান্জ্যরে তগাগোই। তে তবনা গরের্ আর দর্শনত্ দেক্ক্যে, অননিয় নাঙে এক্কো মানুচ্ এইনে তা কিয়্যেগানত্ আঢ্ বাজেয়্যে যেন তে আরঅ চোগেদি দেগে।” 13 অননিয় কলঅ, “প্রভু, মুই ভালোকজন মুয়োত্ এ মানুচ্চো পৌইদ্যেনে শুন্ন্যং, যিরূশালেমত্ তঅ মানুচ্চুনো উগুরে তে কদক্ অত্যেচার্ গোজ্জ্যে। 14 ইয়েনিবাদে যিগুনে তঅ নাঙে তবনা গরন্ তারারে ধুরিবাত্তে আজল্ ধর্মগুরুগুনোত্তুন্ অধিকার লোইনে তে ইধু এচ্চ্যে।” 15 মাত্তর্ প্রভু অননিয়রে কলঅ, “তুই যাহ্, কিয়া অযিহূদীগুনোর আহ্ তারার্ রাজাগুনোর আর ইস্রায়েলীয়গুনো ইধু মঅ পৌইদ্যেনে ফগদাং গুরিবাত্যে মুই এ মানুচ্চোরে বেঈ লোইয়োং। 16 মত্যেই কত্তমান্ দুঘ্ যে তাত্তুন্ পাহ্ পুরিবো সিয়েন মুই তারে দেগেম্।” 17 সেক্কে অননিয় যেইনে সেই ঘর ভিদিরে সুমিলো আর শৌল কিয়্যেগানত্ আঢ্ দিইনে কলঅ, “ভেই শৌল, ইধু এবার্ পধত্ যে তরে দেগা দিয়্যে তে প্রভু যীশু। তেয়ই মরে পাধেয়্যে যেন তুই তর্ দেগিবার খেমতাগান্ ফিরি পাজ্ আর পবিত্র আত্মায় পরিপুরোণ অচ্।” 18-19 সেক্কে শৌল চোগ্কুনোত্তুন্ আঁশ ধোক্ক্যেন কিজু এক্কান পড়ি গেলঅ আহ্ তে আরঅ দেগিলো। ইয়েন পরেদি তে উদিনে পানিত্ বাপ্তিষ্ম ললঅ আর হানা-দানা গুরিনে বলান্ ফিরি পেলঅ। দামেস্কত্ আর যিরূশালেমত্ শৌলে 20 সে পরেদি সময় বর্বাদ ন-গুরিনে তে নানান্ সমাজ-ঘরত্ এ কধাগান ফগদাং গরা ধুরিলো যে, যীশুই গোজেনর্ পুয়ো। 21 যিগুনে তা কধানি শুনিদাক্ তারা আমক্ ওইনে পুযোর্ গুরিদাক্, “যিরূশালেমত্ যিগুনে যীশুর্ নাঙে তবনা গুরিদাক্ তারারে যে অত্যেচার্ গুরিদো ইবে কি সেই মানুচ্চো নয়? ইধুয়ো যিগুনে সিয়েনি গরন্ তারারে বানিনে আজল্ ধর্মগুরুগুনো ইধু নেযেবাত্তে তে কি ইধু ন-এজে?” 22 মাত্তর্ শৌলে আরঅ খেমতাবলা ওই উদিলো আর যীশুই যে মশীহ সিয়েন প্রমাণ গুরিলো। ইয়েন্দোই দামেস্কর্ যিহূদীগুনে বেদমা ধোক্ক্যেন ওই গেলাক্। 23 ইয়েনর ভালোক্ দিন পরেদি যিহূদীগুনে তারে মারে ফেলেবাত্তে কুজুরোমি গরা ধুরিলাক্। 24 মাত্তর্ শৌলে তারার্ কুজুরোমি গুরিবার কধাবাত্তানি হবর্ পেলঅ। তারে মারে ফেলেবাত্তে যিহূদীগুনে শঅরর্ গেট্টুনোত্ দিনে-রেদে চুগি দিয়্যে ধুরিলাক্। 25 মাত্তর্ একদিন্ন্যে রেদোত্ শৌলর শিচ্চ্যগুনে এক্কো খারাঙত্ গুরিনে দেবালর এক্কান জানালা ভিদিরেদি তারে তলেদি লামেই দিলাক্। 26 শৌলে যিরূশালেমত্ এইনে শিচ্চ্যগুনো সমারে মিজেবাত্তে চেষ্টা গুরিলো, মাত্তর্ তারা বেক্কুনে তারে দোরেলাক্। তারা বিশ্বেজ্ গুরি ন-পারিলাক্ যে, শৌলে ঘেইচ্চ্যেক্ গুরি এক্কো শিচ্চ্য ওইয়্যে। 27 মাত্তর্ বার্ণবা তারে সমারে গুরি দিপাধেয়্যে প্রচারক্কুনো ইধু নেযেইনে তারারে জানেল, দামেস্কর্ পধত্ শৌলে কেধোক্ক্যেন্ গুরি প্রভু যীশুরে দেগিলো আর প্রভু তা সমারে কেধোক্ক্যেন গুরি কধা কোইয়্যে, আর দামেস্কত্ যীশু পৌইদ্যেনে তে কেধোক্ক্যেন্ গুরি সাহজ্ গুরিনে প্রচার গোজ্জ্যে। 28 ইয়েন পরেদি শৌলে যিরূশালেমত্ শিচ্চ্যগুনো সমারে থেলঅ আর তারা সমারে আঢাউদো গুরিদো আর প্রভু পৌইদ্যেনে সাহচ্ লোইনে প্রচার গুরি বেড়েদ। 29 যে যিহূদীগুনে গ্রীক ভাষা কদাক্ তারা সমারে তে কধা কদঅ আর তর্ক গুরিদো, মাত্তর্ এ যিহূদীগুনে তারে মারে ফেলেবাত্তে চেষ্টা গরা ধুরিলাক্। 30 বিশ্বেজি ভেইয়ুনে এ কধাগান শুনিনে তারে কৈসরিয়া শঅরত্ নেযেলাক্ আর যেরেদি তারে তার্ষ শঅরত্ পাধেই দিলাক্। 31 সেক্কে যিহূদিয়া, গালীল আর শমরিয়া রেজ্যর্ মন্ডলীগুনোত্ শান্তি এলঅ, আর সেই মন্ডলীগুন উঠ্যন্। সেনত্তে প্রভু উগুরে ভোক্তি আর পবিত্র আত্মার্ উচ্চোমিলোই তারা জনেদি বাড়দন্। ঐনিয় আর দর্কা 32 পিতরে বেক্ জাগানিত্ ঘুরি বেড়াদে বেড়াদে লুদ্দা আদামত্ গোজেনর যে মানুচ্চুন এলাক্ তারা ইধু এলঅ। 33 সেই আদামত্ ঐনিয় নাঙে এক্কো মানুচ্ এলঅ। তে বেশৎ রুগে আট্ট্য বজর্ ধুরিনে বিচ্চোনত্ পড়ি এলঅ। 34 পিতরে তারে দেগিনে কলঅ, “ঐনিয়, যীশু খ্রীষ্ট তরে গম্ গুরিলো। উঠ্, তঅ বিচ্চোনান্ তুলি নেযা।” আর সেক্কে ঐনিয় উদিনে থিয়্যেল। 35 সেক্কে লুদ্দা আর শারোণ আদামর্ বেক্ মানুচ্চুনে ঐনিয়রে দেগিনে প্রভু ইন্দি ফিরিলাক্। 36 যাফো শঅরত্ টাবিথা নাঙে এক্কো মিলে শিচ্চ্য এলঅ। গ্রীক ভাষায় এ নাঙানর্ অত্ত দর্কা। তে আমিযে অন্যগুনোরে উপকার গুরিদো আর নাঢা মানুচ্চুনোরে সাহায্য গুরিদো। 37 তে অসুগ্ ওইনে মুরি যেইয়্যে, আর মানুচ্চুনে তারে গাদেইনে উগুরে গুদিবোত্ থোইয়োন্। 38 যাফো এলদে লুদ্দার কায়কুরে; ইয়েনত্তে শিচ্চ্যগুনে যেক্কে শুনিলাক্, পিতরে লুদ্দাত্ আঘে সেক্কে তারা দ্বিজন মানুচ্ তা ইধু পাধেইনে তারে এ কোজোলিগান্ গুরিলাক্, “তুই যাদিমাদি গুরিনে আমা ইধু আয়।” 39 সেক্কে পিতরে তারা সমারে গেলঅ। তে সিধু লুমোনার্ পরেদি সে উগুরে গুদিবোত্ তারে নেযা অলঅ। বেক্ রানি মিলেগুনে সেক্কে পিতর চেরোকিত্ত্যেদি থিয়্যেইনে কানা ধুরিলাক্ আর দর্কা বাঁজি থাগদে যে সিলুমুন আর অন্য কাবর্-চুগোড়ানি বানেয়্যে সিয়েনি পিতররে দেগেলাক্। 40 সেক্কে পিতরে তারারে বেক্কুনোরে ঘরত্তুন্ নিগিলেই দিইনে আদু পারিনে তবনা গুরিলো। পরেদি সেই মরা মিলেবো ইন্দি ফিরিনে কলঅ, “টাবিথা, উঠ্।” সেক্কে দর্কা চোগ্কুন মেলিলো আর পিতররে দেগিনে উদিনে বলঅ। 41 সেক্কে পিতরে তা আঢ্তানি ধুরিনে তারে উদিনে থিয়্যেবাত্তে বল্ দিলো। যেরেদি তে গোজেন মানুচ্চুনোরে আর রানি মিলেগুনোরে ডাগিনে তারারে দেগেল যে, দর্কা বাঁজি উঠ্যে। 42 এ কধাগান যাফো শঅরর্ বেক্কুনে কোই পারিলাক্ আর ভালোক্জনে প্রভু উগুরে বিশ্বেজ্ গুরিলাক্। 43 পিতরে যাফোদত্ শিমোন নাঙে এক্কো মান্জ্য ঘরত্ বেজ্ কিজু দিন কাদেল। এই শিমোনে চামড়্ কাম গুরিদো। |
Copyright © 2021 Bangladesh Bible Society
Bangladesh Bible Society