প্রেরিত্ 7 - Chakma Bibleদাঙর্ তেম্মাঙ মুজুঙোত্ স্তিফান 1 সেক্কে দাঙর্ ধর্মগুরুবো স্তিফানরে পুযোর্ গুরিলো, “ইয়েনি বেক্কানি কি সত্য?” 2 জোবত্ স্তিফানে কলঅ, ও মর্ ভেইয়ুন্ আর বাব্লগ্, মঅ কধাগান শুনো। আমা পূরোণি মানুচ্ অব্রাহামে হারণ শঅরত্ বজত্তি গুরিবার আগেদি যেক্কে মেসোপতেমিয়া দেজত্ এলঅ সেক্কে বাঈনী গুরিবার গোজেনে তারে দেগা দিইনে কোইয়্যেদে, 3 তুই তর্ দেশ আর ইত্ত্যকুদুম্মো ফেলেইনে মুই যে দেশ্চান তরে দেগেম্ সেই দেজত্ যাহ্। 4 সেনত্তে তে কল্দীয়গুনো দেশ্চান ছাড়িনে হারণ শঅরত্ যেইনে বজত্তি গুরিলো। যে দেজত্ তুমি ইক্কে বজত্তি গরর্ গোজেনে অব্রাহামরে তা বাবর্ মরণর পরেদি সিধু দিপাধেয়্যে। 5 নিজোর অধিকারত্যে গোজেনে অব্রাহামরে সিয়েনত্ কিচ্চু ন-দিলো, এক্কান ঠেং রাগাইদ্যে ধোক্ক্যেন ভূইয়ো নয়। মাত্তর্ গোজেনে তাইধু এগেম্ গোজ্যেদে যে, তারে আর সে পরেদি তা গুট্টিগুনোত্ত্যে অধিকার ইজেবে তে সেই দেশ্চান দিবো। মাত্তর্ সেক্কে অব্রাহামর কনঅ পুয়ো-ছা ন-এলঅ। 6 গোজেনে তারে কলঅ, তঅ গুট্টিগুনে বিদেজত্ বজত্তি গুরিবাক্। মান্জ্যে তারারে চাগর্ বানেবাক্ আর চেরশত্ বজর ধুরিনে তারা উগুরে অত্যেচার্ গুরিবাক্। 7 গোজেনে আরঅ কলঅ, যে জাদ্তো তারারে চাগর্ বানেব সেই জাদ্তোরে মুই সাজা দিম্। যেরেদি তারা সেই দেজত্তুন্ নিগিলি এইনে এ জাগানত্ মর্ উবোসনা গুরিবাক্। 8 সে পরেদি গোজেনে তার বেবস্থার চিহ্নো ইজেবে চুনুগুলো মাঢাবো কাবিবার সুদোম দিলো। ইয়েন পরেদি অব্রাহাম পুয়ো ইস্হাকর জর্ম অলঅ আর জর্মর্ আট্ট্য দিনোত্ তে তারে চুনুগুলো মাঢাবো কাবিলো। যেরেদি ইস্হাকে যাকোবর সুন্নত গোরেল আর যাকোবে সেই বারজন গুট্টির বাব্পুনোরে সুন্নত গোরেল। 9-10 সেই গুট্টির বাব্পুনে ইংসে গুরিনে যোষেফরে চাগর্ ইজেবে মিসর দেজত্ বেজি দুয়োন। মাত্তর্ গোজেনে যোষেফ লগে থেইনে বেক্ দুঘোত্তুন্ আর দজাত্তুন্ তারে রোক্ষ্যে গুরিলো। ইয়েন বাদে গোজেনে যোষেফরে জ্ঞান দান গুরিলো আর মিসরর্ রাজা ফরৌণ সুনজরত্ আনিলো। সেনত্তে ফরৌণে তারে মিসর শাসনগুরিয়্যে আর নিজো ঘরর্ সদ্দার্ বানেল। 11 সে পরেদি গোদা মিসর আর কনান্ দেজত্ ভাদরাত্ দেগা দিলো। সিয়েন্দোই যেক্কে খুব্ দুঘ্ অলঅ সেক্কে আমা পূরোণি মানুচ্চুনে হানা ন-পেলাক্। 12 মাত্তর্ মিসরত্ হানা আঘে শুনিনে যাকোবে আমা পূরোণি মানুচ্চুনোরে পত্তমে একবার সিধু দিপাধেল। 13 দ্বিপল্লাত্ যোষেফে ভেইয়ুনোরে জানেল তে কন্না। সেক্কে ফরৌণে যোষেফ পরিবার পৌইদ্যেনে হবর্ পেলঅ। 14 ইয়েন পরেদি যোষেফে তা বাব্পো যাকোবরে আর পরিবারর অন্য বেক্কুনোরে ডাগি আনিবাত্যে দিপাধেল। তারা জনেদি বেক্কুনে মিলিনে পাচাত্তোরজন এলাক্। 15 যাকোবে মিসরত্ গেলঅ, আহ্ সিধু তে আর আমা পূরোণি মানুচ্চুনে মুরি গেলাক্। 16 তারার কিয়্যেগানি শিখিমোত্ আনিনে গোর্ দিয়্যে অলঅ। এ গোর জাগায়ান অব্রাহামে শিখিম শঅরর্ হমোর পুয়োগুনোত্তুন্ রুবো দিইনে আগেদি কিন্ন্যে। 17 অব্রাহাম ইধু গোজেনে যে এগেম্ গোজ্যে সিয়েন পুরেবার্ অক্তবো যেক্কে কায়কুরে এলঅ সেক্কে দেগা গেলঅ মিসরত্ আমা মানুচ্চুন অমকদ জনেদি বেশ্ ওইয়োন। 18 ইয়েন পরেদি মিসরত্ আর এক্কো রাজা অলঅ। তে যোষেফ পৌইদ্যেনে কিচ্চু কোই ন-পারিদো। 19 সেই রাজাবো আমা মানুচ্চুনোরে থোগেদ আর আমা পূরোণি মানুচ্চুনোরে অমকদ অত্যেচার্ গুরিদো। এমন্ কি, তারার যিদুক্কুন চিগোন গুরো জোর্মেদাক্ সিগুন যেনে মরন্ সেনত্তে সেই চিগোন গুরোগুনোরে বারেদি ফেলেই থবাত্তে বাধ্য গুরিদো। 20 সে অক্তত্ মোশির জর্ম অলঅ। তারে দেগদে অমকদ দোল্ এলঅ। তিন মাস সং তে তা বাব ঘরত্ আদরে থেলঅ। 21 পরেদি যেক্কে তারে বারেদি ফেলেই থুয়ো অলঅ সেক্কে ফরৌণর ঝিবো তারে নেযেইনে নিজো পুয়ো ধোক্ক্যেন মানুচ্ গুরিলো। 22 মোশি মিসরীয়গুনোর বেক্ শিক্ষ্যেলোই শিক্ষিত অলঅ, আর তে কধালোই আর কামে খেমতাবলা এলঅ। 23 মোশির বয়স্চান যেক্কে চল্লিশ বজর্ সেক্কে তে তার ইস্রায়েলীয় ভেইয়ুনো সমারে দেগা গুরিবাত্যে চেলঅ। 24 এক্কো মিসরীয়রে এক্কো ইস্রায়েলীয় উগুরে ভান্ন্যেই বেবহার গত্তে দেগিনে তে সেই ইস্রায়েলীয়বোরে বল্ দিবাত্যে গেলঅ আর সেই মিসরীয়বোরে মারে ফেলেইনে তা কেনাগান শুজিলো। 25 মোশি মনে গোজ্জ্যেদে, তা নিজো মানুচ্চুনে বুঝিবাক্ গোজেনে তারে দিইনে তারারে উদ্ধোর্ গুরিবো, মাত্তর্ তারা সিয়েন বুঝি ন-পারিলাক্। 26 তার কেল্যে মোশি দ্বিজন ইস্রায়েলীয়রে মারামারি গত্তে দেগিলো। সেক্কে তে তারারে মিলেই দিবাত্যে কলঅ, ও, তুমি দঅ ভেই ভেই; সালে একজন আরেকজন সমারে কিত্ত্যে এবাবোত্যে বজং বেবহার গরর্? 27 মাত্তর্ যে মানুচ্চো বজং বেবহার গোজ্যে তে মোশিরে ঢাক্কা মারিনে সোরেই দিইনে কলঅ, আমা উগুরে কন্না তরে শাসনগুরিয়্যে আর বিচেরগুরিয়্যে বানেয়্যে? 28 গেল্লে কেল্ল্যে যেবাবোত্যে গুরি সেই মিসরীয়বোরে মারে ফেল্ল্যচ্, মরেয়ো কি সেবাবোত্যে গুরি মারে ফেলেবাত্তে চাজ্? 29 এ কধাগান শুনিনে মোশি ধেই যেইনে মিদিয়ন দেজত্ বজত্তি গরা ধল্ল। সিধু তার দ্বিবে পুয়োর্ জর্ম অলঅ। 30 সে পরেদি চল্লিশ বজর্ বিদি গেলঅ। সিনাই মুড়োবো ইধু যে ধূল্যেচর-চাগালাগান আঘে সিধু এক্কো জ্বোল্জোল্যে ঝুবো আগুনো ভিদিরে এক্কো স্বর্গদূত্ মোশিরে দেগা দিলো। 31 ইয়েন দেগিনে মোশি আমক্ ওই গেলঅ। গমেদালে চেবাত্যে কায় কুরে গেলে পরেদি তে প্রভুর এ কধাগান শুনিলো, 32 মুই তর্ পূরোণি মানুচ্চুনোর গোজেন-অব্রাহাম, ইস্হাক আর যাকোবর গোজেন। সেক্কে মোশি দরে গির্গিরা ধল্ল; রিনি চেবার্ সাহচ্ তার্ ন-অলঅ। 33 “সেক্কে প্রভু তারে কলঅ, তঅ টেঙ জদানি খুয়োই ফেলা, কিয়া যে জাগানত্ তুই থিয়্যেই আঘচ্ সিয়েন্ পবিত্র। 34 মিসর দেজত্ মঅ মানুচ্চুনো উগুরে যে অত্যেচার্ অর্ সিয়েন মুই দেক্ক্যং। মুই তারার্ কোজোলি গরানাগানি শুন্ন্যং আর তারারে উদ্ধোর্ গুরিবাত্যে লামি এচ্চ্যং। ইক্কিনে মুই তরে মিসর দেজত্ ফেরৎ পাধেম্।” 35 ইবে সেই একই মোশি যিবেরে ইস্রায়েলীয়গুনে ইয়েন কোইনে ফিরেই দুয়োন, কন্না তরে শাসনগুরিয়্যে আর বিচেরগুরিয়্যে বানেয়্যে? যে স্বর্গদূত্তো সেই ঝুবো ভিদিরেত্তুন্ মোশিরে দেগা দিয়্যে সেই স্বর্গদূত্তো মাধ্যমে গোজেনে নিজে এ মোশিরে ইস্রায়েলীয়গুনোর শাসনগুরিয়্যে আর উদ্ধোর গুরিয়্যে ইজেবে মিসরত্ পাধেয়্যে। 36 এ মোশিই মিসর দেজত্তুন্ ইস্রায়েলীয়গুনোরে নিগিলেই আন্ন্যে আর মিসর দেজত্, লোহিত সাগরত্ আর চল্লিশ বজর্ সং ধূল্যেচর-চাগালাত্ ভালোক্কানি আমক্ অবার্ কাম্ গোজ্যে। 37 ইবে সেই মোশি যিবে ইস্রায়েলীয়গুনোরে কোইয়্যেদে, তমার গোজেনে তমা ইস্রায়েলীয় ভেইয়ুনো ভিদিরেত্তুন্ তমাত্তে মঅ ধোক্ক্যেন্ এক্কো ভাববাদী বানেব। 38 এই মোশি ধূল্যেচর-চাগালাত্ ইস্রায়েলীগুনোর সেই দল ভিদিরে আমা পূরোণি মানুচ্চুনো সমারে এলঅ। যে স্বর্গদূত্তো সিনাই মুড়োবোত্ কধা কোইয়্যে এই মোশি সেই স্বর্গদূত্তো সমারে সিধু এলঅ। আমারে দিবাত্যে সত্য কধানি এ মোশি সিধু পেইয়্যে। 39-40 মাত্তর্ আমা পূরোণি মানুচ্চুনে মোশিরে মানি লবাত্তে ন-চেলাক্। সিয়েনর বদলে তারা মোশিরে এলাফেলা গুরিনে মিসর দেজ ইন্দি মন ফিরেইনে হারোণরে কলাক্, আমারে পধ দেগেই নেযেবাত্যে দেব-দেবেদা বানেই দে, কিয়া যে মোশি আমারে মিসর দেজত্তুন্ নিগিলেই আন্ন্যে তার কি ওইয়্যে আমি কোই ন-পারিই। 41 এ সময়ানত্ তারা গোরু ছঅ ধোক্ক্যেন্ গুরি এক্কো মূর্ত্তি বানেয়োন। তারা সেই মূর্ত্তিবো ইধু য়েমান ডালি দুয়োন্ আর নিজো আঢে যিবে বানেয়োন সিবেলোই তারা এক্কো খুজীর্ উৎসব গোজ্যন্। 42 মাত্তর্ গোজেনে মুয়োন্ ফিরেল আর আগাজর্ চানানরে-বেলানরে-তারাগুনোরে পূজিবাত্তে তারারে ফেলেই রাগেল। এই একই কধাগান ভাববাদীগুনোর বোইবোত্ লেগা আঘে- ও ইস্রায়েলর মানুচ্চুন, ধূল্যেচর-চাগালাত্ সেই চল্লিশ বজর্ তুমি কি মঅ নাঙে কনঅ য়েমান বা অন্য কনঅ জিনিস্ উৎসর্ব গোজ্য? 43 না, মাত্তর্ পূজো গুরিবাত্যে যে মূর্ত্তিবো তুমি বানেয়ো সেই মোলক দেবেদার মূর্ত্তিবো আর তমার রিফণ দেবেদার তারাবো তুমি বুয়োই নেযেয়ো। সেনত্তে মুই বাবিল দেজর্ উই পারত্ বন্ধী ইজেবে তমারে পাধেই দিম। 44 সাক্ষ্য-তাম্বুবো ধূল্যেচর-চাগালাত্ আমা পূরোণি মানুচ্চুনো সমারে এলঅ। গোজেনে মোশিরে যেবাবোত্যেগুরি উগুম দিয়্যে আর মোশি যে নক্শাগান দেক্ক্যে সেবাবোত্যেগুরি এই তাম্বুবো বানা ওইয়্যে। 45 আমা পূরোণি মানুচ্চুনে সে তাম্বুলান্ পেইনে তারার্ নেতা যিহোশূয়র অধীনোত্ সিয়েন নিজো সমারে আমা এ দেজত্ আন্ন্যন্। গোজেনে সেক্কে তারা মুজুঙোত্ থেইনে অন্য জাদ্তুনোরে ধাবেই দিয়্যে আর তারা এ দেশ্চান গজক্ গোজ্জ্যন্। দায়ূদোর সময় সং সেই তাম্বুলান্ এ দেজত্ এলঅ। 46 দায়ূদে গোজেনর বর্ পেইনে যাকোব গোজেনর থেবার্ ঘরান বানেবাত্যে অনুমতি চেয়্যে; 47 মাত্তর্ শলোমনে তাত্যে ঘর্ বানেয়্যে। 48 মাত্তর্ দাঙর্ গোজেনে মান্জ্যর্ বানেয়্যে ঘরত্ ন-থায়। ভাববাদীবো কোইয়্যেদে যে, 49 প্রভু কয়, স্বর্গ মর্ সিংহাসন, পিত্থিমীগান মর্ টেং থবার্ জাগা; মত্তে কিবাবোত্যে ঘর্ তুমি বানেবা? মর্ জিরেবার জাগায়ান্ কুদু অবঅ? 50 ইয়েনি বেক্ জিনিস্চানি কি মুই নিজো আঢে ন-বানাং? 51 ও একবুচ্চ্যে জাদ্! অযিহূদীগুনো ধোক্ক্যেন্ তমার কানানি আর মনানি, আর তুমিয়ো ঠিগ্ তমা পূরোণি মানুচ্চুনো ধোক্ক্যেন্। তুমি আমিযে পবিত্র আত্মাগানরে মানা গুরি থাগঅ। 52 এমন্ কনঅ ভাববাদী আঘে কি, যিবেরে তমা পূরোণি মানুচ্চুনে অত্যেচার্ ন-গরন্? এমন্ কি, যিগুনে সেই গম্ মান্জ্যর্, অত্তাৎ খ্রীষ্ট এবার্ কধাগান আগে কোইয়োন তারারেয়ো তারা মারে ফেল্ল্যন্। আর ইক্কিনে তুমি যীশুরে শত্রুগুনো আঢত্ ধুরি দিইনে তারে খুন্ গোরেইয়ো। 53 স্বর্গদূত্তুনো মাধ্যমে তমা ইধু দঅ রীতি-সুদোম দিয়্যে ওইয়্যে, মাত্তর্ তুমি সিয়েন ন-পালঅ। স্তিফানর্ মরাণা 54 ইয়েনি বেক্ কধানি শুনিনে সেই নেতাগুনে রাগে আগুন্ ওই গেলাক্ আর স্তিফান বিরুদ্ধে দাত্ কামাড়া ধুরিলাক্। 55 মাত্তর্ স্তিফানে পবিত্র আত্মালোই ভর্পুনোং ওইনে স্বর্গ ইন্দি রিনি চেইনে গোজেনর্ মহিমাগান্ দেগিলো। তে যীশুরে গোজেনর্ ডেনেদি থিয়্যেই থাগদে দেগিনে কলঅ, 56 “চঅ, মুই দেগঙর্ স্বর্গগান খুলো আঘে আর গোজেনর্ ডেনেদি মান্জ্যপুয়োবো থিয়্যেই আঘে।” 57 ইয়েন্দোই তারা কানত্ আংগুল্ দিলাক্ আর রঅ ছাড়িনে একসমারে স্তিফান উগুরে ঝাবেই পল্ল্যাক্। 58 যেরেদি তারা তারে পাত্তর্ মারিবাত্তে টানিনে শঅর বারেদি নেযেলাক্, আর সাক্ষীগুনে তারা উগুরে কাবড়ানি খুলিনে শৌল নাঙে এক্কো গাবুজ্জ্যে মরদ ঠেংঅ কুরে থলাক্। 59 যেক্কে সাক্ষীগুনে স্তিফানরে পাত্তর্ মারদন্ সেক্কে তে তবনা গুরিনে কলদে, “প্রভু যীশু, মঅ আত্মাগানরে গুজি লঅ।” 60 পরেদি তে আঢু পাড়িনে রঅ ছাড়িনে কলঅ, “প্রভু, ইগুনোর্ এ পাপ্পানি ন-ধুরিচ্।” এ কধাগান কোইনে তে মুরি গেলঅ। |
Copyright © 2021 Bangladesh Bible Society
Bangladesh Bible Society