প্রেরিত্ 3 - Chakma Bibleলেং ভিখেরী গম্ অনা 1 একদিন্ন্যে বেল্যেমাদান্ তিনটায় তবনা গুরিবার সময়োত্ পিতর আর যোহনে উবোসনা-ঘরত যাদন্। 2 মানুচ্চুনে পত্তিদিন এক্কো মান্জ্যরে বুয়োই আনিনে উবোসনা-ঘরর দোল্ নাঙে দোরান কুরে থদাক্। তে জর্মত্তুন্ ধুরি লেং এলঅ। যিগুনে উবোসনা-ঘরত্ যেদাক্ তারা ইধু ভিক্ষ্যে মাগিবাত্যে তারে সিয়েনত্ থুয়ো অদঅ। 3 পিতর আর যোহনরে উবোসনা-ঘরত সমাদে দেগিনে তে তারা ইধু ভিক্ষ্যে মাগিলো। 4 পিতর আর যোহনে উজু গুরি তা ইন্দি রিনি চেলাক্। সে পরেদি পিতরে কলঅ, “আমা ইন্দি রিনি চাহ্।” 5 সেক্কে সে মানুচ্চো তারাত্তুন্ কিজু পেবার্ আজায় তারা ইন্দি রিনি চেলঅ। 6 সেক্কে পিতরে কলঅ, “মঅ ইধু সোনা-রূবো কিচ্চু নেই, মাত্তর্ যিয়েন আঘে সিয়েনই তরে দোঙর্। নাসরতর যীশু খ্রীষ্টর নাঙে উদিনে থিয়্যে আর আঢি বেড়া।” 7 পরেদি তে মানুচ্চোর্ ডেন্ আঢ্তান্ ধুরিনে তারে তুলিলো আর সেক্কেনে তা টেঙানি আর টেঙমূড়িগুন দর অলঅ। 8 তে ফাল্ মারি উদিনে থিয়্যেল আর আঢা মারিলো। পরেদি তে আঢ্তে আঢ্তে, ফাল্ মাত্তে মাত্তে আর গোজেনরে বাঈনী গত্তে গত্তে তারা সমারে উবোসনা-ঘরত্ গেলঅ। 9-10 মানুচ্চুনে তারে আঢদে আর গোজেনর বাঈনী গত্তে দেগিনে চিনি পারিলাক্ যে, ইবে সেই একই মানুচ্, যে উবোসনা-ঘরর দোল্ নাঙে দোরান কুরে বুয়োইনে ভিক্ষ্যে মাগিদো। তার যিয়েনি ঘোট্যে সিয়েনিলোই মানুচ্চুনে অমকদ আমক্ ওই গেলাক্। পিতরে উবোসনা-ঘরত্ 11 মাত্তর্ ভিখেরিবো পিতর আর যোহনর পিজেত্তুন্ ন-লুড়িলো। মানুচ্চুনে পিতরর্ সেই কামত্ আমক্ ওইনে তারা ইধু ধাবা ধাবা এলাক্। 12 শলোমন নাঙে যে বারান্দাগান এলঅ তারা সেক্কে সিয়েনত্ এলাক্। এ বেপারান্ দেগিনে পিতরে মানুচ্চুনোরে কলঅ, ইস্রায়েলীয়গুন, ইয়েন্দোই তুমি কিত্ত্যেই আমক্ অর্? আমা নিজো বল্লোই বা গোজেন উগুরে ভক্তির্ গুণে ইবেরে আঢিবার বলান্ দুয়োং মনে গুরিনে কিত্ত্যেই বা তুমি আমা ইন্দি রিনি চেই আঘঅ? 13 অব্রাহাম, ইস্হাক আর যাকোবর গোজেন, অত্তাৎ আমা পূরোণি মানুচ্চুনোর গোজেন এ কামান্দোই নিজোর চাগর্ যীশুর মহিমাগান্ ফগদাং গোজ্যে। তুমি দঅ যীশুরে মারে ফেলেবাত্যে ধুরি দুয়ো। পীলাতে তারে ইরি দিবাত্তে চেইয়্যে, মাত্তর্ তুমি পীলাত মুজুঙোত্ তারে অস্বিগের্ গোজ্য। 14 তুমি সেই পবিত্র আর ন্যায়বলা মানুচ্চোরে অস্বীগের্ গুরিনে এক্কো খুনীরে তমা ইধু ইরি দিবাত্তে কোইয়ো। 15 যিবে জিংকানি দিয়্যে তারে তুমি মারে ফেল্ল্য, মাত্তর্ গোজেনে মরণত্তুন্ তারে জেদা গুরি তুল্ল্যে; আর আমি সিয়েনর্ সাক্ষী। 16 এই যে মানুচ্চোরে তুমি দেগর্ আর যিবেরে তুমি চিনো, যীশু উগুরে বিশ্বেজর্ কারনে, যীশু নাঙর্ গুণে সে খেমতাগান পেইয়্যে। যীশুর মাধ্যমে যে বিশ্বেজ্চান এজে সেই বিশ্বেজ্চানই তমা বেক্কুনো মুজুঙোত্ তারে পুরোপুরি গুরি গম্ গুরি তুল্ল্যে। 17 ইক্কুনি ভেইলগ্, মুই কোই পারং তমা নেতাগুনো ধোক্ক্যেন্ তুমিয়ো ন-বুঝিনে যীশুরে ক্রুশোত্ দুয়ো। 18 মাত্তর্ গোজেনে ভালোক্ দিন আগে বেক্ ভাববাদীগুনোর মাধ্যমে কোইয়্যেদে তার মশীহর কষ্ট ভোগ গরা পুরিবো; আর সে কধাগান গোজেনে এবাবোত্যে গুরি পূরেই দিবো। 19 ইয়েনত্যে তুমি পাপত্তুন্ মনানি ফিরেইনে গোজেন ইন্দি ফিরো যেন তমা পাপ্পানি পুযি ফেলা অয়; 20 আর ইয়োত্ যেন গোজেনর সেই মশীহরে, অত্তাৎ যীশুরে পাধেই দিইনে তমারে তাজা গুরি তুলি পারে। তমাত্তে তারেই বেঈ নেযা ওইয়্যে। 21 গোজেনে বেক্কানি যে আরঅ আগ অবস্থায় ফিরেই আনিবো সিয়েন ভালোক্ দিন আগে পবিত্র ভাববাদীগুনোর মাধ্যমে কোইয়্যে। তে যেদ্ক্ দিন সং তার সে কধাগান্ ন-পুরোই সেদক্ দিন সং যীশুত্তুন্ স্বর্গত্ থাহ্ পরিবো। 22 মোশি কোইয়্যেদে, তমার প্রভু গোজেনে তমা ইস্রায়েলীয় ভেইয়ুনো ভিদিরেত্তুন্ তমাত্তে মঅ ধোক্ক্যেন্ এক্কো ভাববাদী বানেব। তা কধামজিম তমাত্তুন্ চলা পড়িবো। 23 যে তার কধাগান ন-শুনিবো তারে তা মানুচ্চুনোত্তুন্ এক্কুবারে ভস্ত গরা অবঅ। 24 “ইয়েন বাদে শমূয়েলত্তুন্ ধুরি আরাম্ভ গুরিনে যিদুক্কুন ভাববাদী কন কিজু কোই যেইয়োন তারায়ো এ সময়বোর কধা আগেদি কোই যেইয়োন, 25 আর তুমি দঅ সেই ভাববাদীগুনোর বংশধর। তমা পূরোণি মানুচ্চুনোত্তে গোজেনে যে সুদোমান গোজ্যে, তুমি দঅ তার্ ভাগিদার। গোজেনে অব্রাহামরে এ কধাগান কোইনে সেই সুদোমান থিদেবর্ গোজ্যে, ‘তঅ গুট্টির্ মাধ্যমে পিত্থিমীর বেক্ জাদ্তুনে বর্ পেবাক্।’ 26 তমা পত্তিজনরে ভান্ন্যেই পধত্তুন্ ফিরেইনে বর্ দিবাত্তে গোজেনে তা চাগর্ যীশুরে ঠিগ্ গুরিনে পত্তমে তমা ইধু পাধেয়্যে।” |
Copyright © 2021 Bangladesh Bible Society
Bangladesh Bible Society