প্রেরিত্ 27 - Chakma Bibleপৌলে রোম পধত্ 1 জাহাজত্ গুরিনে আমারে ইটালীত নেযানা ঠিগ্ অলে পরেদি পৌল আরঅ কয়েক্কো বন্দীরে যুলিয় নাঙে এক্কো শত উগুরে সেনাপতি আঢত্ দিয়্যে অলঅ। যুলিয় এলঅ সম্রাটর নিজোর্ সৈন্যদলর্ এক্কো শত উগুরে সেনাপতি। 2 আমি আদ্রামুত্তীয় বন্দরর্ এক্কান্ জাহাজত্ উদিনে লদ্ দিলোং। এশিয়ার্ নানান্ বন্দরত্ যেবাত্যে জাহাজ্চান্ যুক্কোল্ ওই এলঅ। ম্যাসিডোনিয়া রেজ্যর্ থিষলনীকী শঅরর্ আরিষ্টর্খ আমা সমারে এলঅ। 3 আমা জাহাজ্চান তার্ কেল্যে সীদোনত্ থামেল। যুলিয় পৌল সমারে ভারী গম্ বেবহার গুরিলো আর তারে তা সমাজ্যেগুনো ইধু যেবার অনুমতি দিলো যেন তা সমাজ্যেগুনে তারে দরকারি পযাপিরা দি পারন্। 4 যেরেদি সিয়েনত্তুন্ আরঅ আমা জাহাজ্চান ছাড়িলো। বৈয়্যেরান্ আমা উগুদো মোক্ক্যেন্দি থানায় সাইপ্রাস দ্বীপ যিয়েনদি বৈয়্যের্ ন-এলঅ আমি সিয়েনদি যাহ্ ধুরিলোং। 5 যেরেদি আমি কিলিকিয়া আর পাম্ফুলিয়া মুজুঙোত্ যে সাগরান্ এলঅ সেই সাগরান্ পার্ ওইনে লুকিয়া রেজ্যর্ মুরা শঅরত্ লুমিলোং। 6 শত উগুরে সেনাপতিবো সিধু আলেক্জান্দ্রিয়ার্ এক্কান্ জাহাজ পেলঅ। সেই জাহাজ্চান ইটালী দেজত্ যার্ বিলিনে তে আমারে লোইনে সেই জাহাজ্চানত্ উদিলো। 7 আমা জাহাজ্চান্ ভালোক্ দিন ধুরিনে অমকদ লারে লারে চলিনে কনবাবদে ক্লীদোন্ শঅরর্ কায়কুরে লুমিলো, মাত্তর্ বৈয়্যেরানে আমারে আর্ উজেই যেবাত্তে ন-দিলো। সেক্কে আমি ক্রীত দ্বীপর্ যে ধাগেদি বৈয়্যের্ ন-এলঅ সেই ধাগেদি গুরিনে সল্মোনীর কায়-কুরেদি গেলং। 8 সাগর পার্ ধুরিনে কনবাবদে যেইনে আমি দোল্ বল্পেইয়্যে জাগা (পোতাশ্রয়) নাঙে এক্কান জাগাত্ লুমিলোং। সিয়েন কায়কুরে এলদে লাসেয়া শঅরান্। 9 এবোত্যেগুরি ভালোক্ দিন বিদি গেলঅ। সেক্কে উবোস্ থানা-পরব্ থুম্ ওইনে জার্কাল প্রায় এচ্চ্যে। সেনত্তে জাহাজত্ গুরি যানা সেক্কে এক্কান্ দযার্ বেপার অলঅ। ইয়েনত্তে পৌলে জাহাজর্ মানুচ্চুনোরে উজিয়ার্ গুরিবাত্তে কলঅ, 10 “চঅ, মুই দেগঙর্ আমা এ লদ্ দেনাগান্ ভারী ক্ষতি অবঅ। সেই ক্ষতিগান্ যে বানা জাহাজর্ আর পযাপিরার্ অবঅ সিয়েন নয়. আমা জিংকানির্-অ ক্ষতি অবঅ।” 11 মাত্তর্ শত উগুরে সেনাপতিবো পৌল কধা ন-শুনিনে জাহাজর্ কেপ্তিন্ আর জাহাজর্ গিরোজ কধা শুনিলো। 12 বন্দর্বো জার্কাল কাদেবার্ যগাজ্যে জাগা নয় বিলিনে বেশ্ ভাগ্ মান্জ্যে ঠিগ্ গুরিলাক্, সিয়েনত্তুন্ লদ্ দিইনে সম্ভব অলে ফৈণীকত্ যেইনে জার্কাল্লো কাদা অবঅ। ফৈণীক্কান এলদে ক্রীট দ্বীপর্ জাহাজ্ থামেবার জাগা। এ জাগানর্ দোগিণ-পজিমে আর উত্তর-পোজিমে খুলো-মেলা এলঅ। ঝড় 13 পরেদি যেক্কে লারে লারে দোগিণো বৈয়্যের্ বাহ্ ধুরিলো সেক্কে তারা মনে গুরিলাক্ তারা যিয়েন চেয়োন্ সিয়েনই ওইয়্যে। ইয়েনত্তে তারা জাহাজর্ নোংগর্ তুলিনে ক্রীট দ্বীপর্ পারেদি গেলাক্। 14 মাত্তর্ এক্কেনা পরেদি সেই দ্বীপোত্তুন্ উরাকুলো বিলি এক্কান্ দর্গরেপারা তুফান আরাম্ভ অলঅ, আর জাহাজ্চান সেই তুফানত্ পড়িলো। 15 আমি বৈয়্যের মুয়োত্ উজেই যেই ন-পারিলোং; সেনত্তে উজেই যানার্ চেট্ট্যা ছাড়ি দিইনে জাহাজ্চান বৈয়্যেরত্ ভাজেই দিলোং। 16 যেরেদি কৌদা নাঙে চিগোন দ্বীপর্ যে কিত্ত্যেদি বৈয়্যের্ ন-এলঅ আমি সিন্দি লদ্ দিলোং আর জাহাজত্ যে নৌকোগান্ থায় সেই নৌকোগানরে ভারী দুঘে ভস্ত অনার্ আঢত্তুন্ আমি বাজেলং। 17 মানুচ্চুনে নৌকোগান্ জাহাজত্ টানি তুলিলাক্ আর সে পরেদি দুড়িলোই জাহাজর্ খোলান্ বানিলাক্ যেন সিয়েনর্ তক্তানি ফারগ্ ন-অয়। সুর্তী নাঙে সাগর চরত্ জাহাজ্ আক্সো যেবার্ দরে পালানি লামেইনে জাহাজ্চান বৈয়্যেরত্ চলিবাত্তে দিয়্যে অলঅ। 18 ঝড়র্ জদবদে আঘাতে আমা জাহাজ্চান এমন্ গুরিনে দুলের্, তার্ কেল্যে মানুচ্চুনে জাহাজর্ পযাপিরানি পানিত্ ফেলেই দিয়্যে ধুরিলাক্। 19 তিন দিনোত্ তারা নিজো আঢে জাহাজর্ সাজ-সরঞ্জামানিয়ো ফেলেই দিলাক্। 20 ভালোক্ দিন ধুরিনে বেলান বা তারা কিচ্চু দেগা ন-গেলঅ আর জদবদে ঝড় বাহ্ ধুরিলো। যেরেদি আমি রোক্ষ্যে পেবার্ বেক্ আজাগানি ছাড়ি দিলোং। 21 মানুচ্চুনে ভালোক্ দিন ধুরিনে কিচ্চু ন-খান্ বিলি পৌলে তারা মুজুঙোত্ থিয়্যেইনে কলঅ, “চঅ, মঅ কধাগান্ শুনিনে ক্রীট দ্বীপত্তুন্ জাহাজ্চান ন-ছাড়ানা তমার্ উচিত্ এলঅ। সালে এ দযা আর ক্ষতিগানত্তুন্ তুমি রোক্ষ্যে পেদা। 22 মাত্তর্ ইক্কিনে মুই তমারে কোজোলী গরঙর্, তুমি মনত্ সাহচ্ রাগঅ, কারন তমাত্তুন্ কনজনে ন-মুরিবাক্; বানা এ জাহাজ্চান বর্বাদ্ অবঅ। 23 মুই যিবের্ মানুচ্ আর মুই যিবেরে সেবা গরং সেই গোজেনর্ এক্কো দূত্ গেল্লে রেদোত্ মঅ কায়কুরে থিয়্যেইনে কলঅ, 24 ‘পৌল, ন-দোরেচ্। তত্তুন্ সম্রাট কৈসর মুজুঙোত্ থিয়্যে পরিবো। এ জাহাজ্চানত্ যিগুনে তঅ সমারে যাদন্ তারার্ বেক্কুনো জিংকানি গোজেনে দোয়্যে গুরিনে দান গোজ্জ্যে।’ 25 ইয়েনত্যে তুমি মনত্ সাহচ্ রাগঅ। গোজেন উগুরে মর্ এ বিশ্বেজ্চান আঘে, তে মরে যিয়েন কোইয়্যে সিয়েন-ই অবঅ। 26 সালে আমি কন্ দ্বীপ উগুরে যেইনে পড়িবোং।” জাহাজ-ডুবোনা 27 আমি আদ্রিয়া সাগর উগুরেদি এবাবোত্যেগুরি যানাত্ থেলং। ঝড়র্ চৌদ্দো দিনোত্ রেত্-সম্বাগত্ নাবিক্কুনোর্ ইদোত্ অলঅ তারা কুল চরত্ এচ্চ্যন্। 28 তারা মাবি চেলাক্ সিধুগোর্ পানিগান্ আশি আত্ মুঢ়্ এলঅ। ইয়েনর্ খানক্কন্ বাদে তারা আরঅ মাবি চেলাক্, সিয়েনত্ পানি ষায়েট্ আত্ পানি। 29 পাত্তরত্ বারি হেবার্ দরে তারা জাহাজর্ পিজেদিত্তুন্ চেরান্ নোংগর ফেলেই দিলাক্ আর দিনো পহ্রত্যে তবনা গরা ধুরিলাক্। 30 যেরেদি জাহাজর্ নাবিক্কুনে ধেই যেবার্ আজায় জাহাজ মুজুঙোত্তুন্ নোংগর্ ফেলেবার্ ভান্ গুরিনে জাহাজর্ নৌকোগান্ সাগরত্ লামেই দিলাক্। 31 সেক্কে পৌলে শত উগুরে সেনাপতিবোরে আর সৈন্যগুনোরে কলঅ, “এ নাবিক্কুনে জাহাজত্ ন-থেলে তুমি রোক্ষ্যে ন-পেবা।” 32 সেক্কে সৈন্যগুনে নৌকো দুড়িগান্ কাবি দিলাক্ যাতে নৌকোগান্ পানিত্ পড়ে। 33 বেন্ন্যে পহ্র অবার্ আগেদি পৌলে বেক্কুনোরে কিজু হেবাত্তে কোজোলী গুরিনে কলঅ, “এচ্চ্যে চৌদ্দ দিন অলঅ, কি অবঅ ন-অবঅ সেই চিন্তে গুরিনে তুমি ন-হেইনে আঘঅ-কনঅ হানা ন-খঅ। 34 ইক্কিনে মুই তমারে কিজু হেবাত্তে কোজোলী গরঙর্। বাঁজি থেবাত্যে তমার্ দঅ কিজু হানা দরকার্। দেগিবা, তমা মাঢাগুনোর্ এক্কান্ চুল্অ বর্বাদ্ ন-অবঅ।” 35 এ কধাগান্ কোইনে পৌলে রুটি লোইনে তারা বেক্কুনো মুজুঙোত্ গোজেনরে ভালেদি জানেল আর সিয়েন ভাঙিনে হা ধুরিলো। 36 সেক্কে তারা বেক্কুনে সাহচ্ পেইনে হা ধুরিলাক্। 37 আমি জাহাজত্ বেক্কুনে দ্বিশ ছিয়েত্তুর্জন এলং। 38 বেক্কুনে পেট ভরে সং হেইনে পরেদি জাহাজর্ ভরান্ কমেবাত্যে বেক্ গমুন্ সাগরত্ ফেলেই দিয়্যে অলঅ। 39 বেন্ন্যে মাদান্ তারা জাগায়ান্ চিনি ন-পারিলাক্, মাত্তর্ এমন্ এক্কান চিগোন সাগর্ দেগিলাক্ যিয়েনর কুলোচরান্ বালুলোই ভরা এলঅ। সেক্কে তারা ঠিগ্ গুরিলাক্, সম্ভব অলে জাহাজ্চান সেই পারত্ তুলি দিবাক্। 40 ইয়েনত্যে তারা জাহাজর্ নোংগরানি কাবিনে সাগরত্ ফেলেই দিলাক্ আর পাঙেই বানিবার্ দুড়িগানি খুলি দিলাক্। ইয়েনর্ পরেদি তারা বৈয়্যের মুয়োত্ মুজুঙেদি পাল্ তুলি দিলাক্ আর পার ইন্দি উজেই যেইনে চরত্ আক্সো গেলাক্। 41 মুজুঙেদি ধাক্কান্ সবরে বৈই যানায় জাহাজ্চান অচল্ অলঅ আর তুবোল বারিত্ পিজেদিগান কট্টা কট্টা ওইনে ভাঙি যা ধুরিলো। 42 সেক্কে সৈন্যগুনে বন্দীগুনোরে মারে ফেলেবাক্ বিলিনে ঠিগ্ গুরিলাক্, যেন তারাত্তুন্ কেঅ সাজুরিনেই ধেই যেই ন-পারন্। 43 মাত্তর্ শত উগুরে সেনাপতিবো পৌলর্ পরাণান্ বাজেবাত্যে চেইয়্যে বিলিনে সৈন্যগুনোরে মনেমন্জক্কা কাম্ গুরিবাত্তে ন-দিলো। তে উগুম দিলো, যিগুনে সাজুরি জানন্ সিগুনে পত্তমে জাহাজত্তুন্ ঝাম্ দিইনে কুলো চরত্ যেইনে উদোদোক্, 44 আর বাগি বেক্কুনে জাহাজর্ তক্তা বা অন্য কনঅ কট্টা ধুরিনে সিয়েনত্ যাদোক্। এবাবোত্যেগুরি বেক্কুনে গমেডালে কুলো চরত্ লুমিলাক্। |
Copyright © 2021 Bangladesh Bible Society
Bangladesh Bible Society