প্রেরিত্‌ 26 - Chakma Bible

¹ সেক্কে আগ্রিপ্প পৌলরে কলঅ, “তর্ নিজোর্ পক্ষে কধা কবাত্যে তরে অনুমতি দিয়্যে গেলঅ।” সেক্কে পৌলে আঢ্ বাবেইনে নিজোর্ পক্ষে এ কধাগান্ কলঅ,

² ও রাজা আগ্রিপ্প, যিহূদীগুনে মরে যেদক্কানি দুষ্ দুয়োন্ সিয়েনি বিরুদ্ধে তঅ মুজুঙোত্ এচ্চ্যে মর্ নিজোর্ পক্ষে কধা কবার্ সুযোগ্ পেইয়োং বিলি মুই নিজোরে ভাগ্যত্তে মনে গরঙর্,

³ বিশেষ গুরিনে যেক্কে যিহূদীগুনোর্ সুদোম আর তর্কর্ বেপারানি তর্ গমেডালে জানা আঘে। ইয়েনত্তে ধৈজ্জ্য ধুরি মঅ কধানি শুনিবাত্যে মুই তরে বিশেষ্ গুরি কোজোলি গরঙর্।

⁴ চিগনত্তুন্ ধুরিনে, অত্তাৎ মর্ জিংকানির্ আরাম্ভত্তুন্ ধুরিনে মর্ নিজোর্ দেজত্ আর যেরেদি যিরূশালেম মানুচ্চুনো ইধু মুই কেধোক্ক্যেন্ গুরিনে জিংকানি কাদেয়োং যিহূদীগুনে বেক্কুনে সিয়েনি কোই পারন্।

⁵ তারা ভালোক্ দিন ধুরিনেই মরে চিনোন্ আর মনে কলে এ সাক্ষ্যগান্ দি পারন্, আমা ধর্মর্ ফরীশী নাঙে যে গড়া দল্ আঘে মুই সেই ফরীশীর্ জিংকানি কাদেয়োং।

⁶ গোজেনে আমা পূরোণি মানুচ্চুনো ইধু যে এগেম্ গোজ্যে সিয়েনি মুই আজা রাগেয়োং বিলি ইক্কিনে মর্ বিচের্ গরা অর্।

⁷ আমা বারবো গুট্টির্ মানুচ্চুনে দিনে-রেদে মন্-পরাণ্ দিইনে গোজেনর্ সেবা গুরিনে সেই এগেমান্ দেগিবার্ আজায় আঘন্।

⁸ গোজেনে যে মরাগুনোরে জেদা গরে এ কধাগান্ বিশ্বেজ্ গরেদে ধোক্ক্যেন্ নয় বিলি তুমি কিত্তে মনে গরর্?

⁹ মুই নিজে বিশ্বেজ্ গত্তুং, নাসরত যীশুর্ বিরুদ্ধে যিয়েনি গরা যায় সিয়েনি বেক্কানি মর্ গরানা উচিত্,

¹⁰ আর ঠিগ্ সিয়েনি মুই যিরূশালেমত্ গত্তুং। আজল্ ধর্মগুরুগুনোত্তুন্ খেমতা পেইনে মুই খ্রীষ্ট উগুরে বিশ্বেজি ভালোক্ জনরে জেলোত্ দিদুং আর তারারে মারে ফেলেবার্ সময়োত্ তারা বিরুদ্ধে ভোট দিদুং।

¹¹ তারারে সাজা দিবাত্যে মুই প্রায় এক সমাজ-ঘরত্তুন্ অন্য সমাজ-ঘরত্ যেদুং আর যীশুর্ বিরুদ্ধে কধা কবাত্যে মুই তারা উগুরে জোর্ গুরিদুং। তারা উগুরে মর্ এদক্ রাগ এলঅ যে, তারা উগুরে অত্যেচার্ গুরিবাত্যে মুই বিদেজর্ শঅরানিত্ সং যেদুং।

¹² এবাবোত্যেগুরি এক পল্লা আজল্ ধর্মগুরুগুনোত্তুন্ খেমতা আর উগুম লোইনে মুই দামেস্কত্ যাঙর্।

¹³ মহারাজ্, সেক্কে বেলান্ প্রায় দিবুজ্যে। পধত্ বেলানত্তুন্অ জ্বোল্‌জোল্ল্যা এক্কান্ পহ্‌র স্বর্গত্তুন্ মর্ আর মঅ সমাজ্যেগুনোর চেরোকিত্ত্যেদি জ্বলা ধুরিলো।

¹⁴ আমি বেক্কুনে মাদিত্ পড়ি গেলং আর মুই শুনিলুং ইব্রীয় ভাষায় কন্না যেন মরে কত্তে, শৌল, শৌল, কিত্ত্যে তুই মঅ উগুরে অত্যেচার্ গরর্? কাদা বোজেয়্যে লুদিগো মুয়োত্ লাদি মারিনে কি তুই নিজোর্ ক্ষতি ন-গরর্?

¹⁵ সেক্কে মুই কলুং, প্রভু, তুই কন্না?

¹⁶ প্রভু কলঅ, মুই যীশু, যিবে উগুরে তুই অত্যেচার্ গরর্। ইক্কিনে উঠ্, তঅ টেঙত্ ভর্ দিইনে থিয়্যে। সেবাগুরিয়্যে আর সাক্ষী ইজেবে তরে নেযেবাত্তে মুই তরে দেগা দিলুং। তুই মরে যেবাবোত্যে দেগিলে আর মুই তরে যিয়েন্ দেগেম্ সিয়েন তুই অন্যগুনো ইধু কবে।

^17-18 তর্ নিজো মানুচ্চুনোত্তুন্ আর অযিহূদীগুনো আঢত্তুন্ মুই তরে রোক্ষ্যে গুরিম। তারা চোগ্‌কুন্ মেলি দিবাত্যে আর আন্ধারত্তুন্ পহ্‌রত্ আহ্ শদান খেমতার্ আঢত্তুন্ গোজেন ইধু ফিরেই আনিবাত্যে মুই তরে তারা ইধু দিপাধাঙর্, যেন মঅ উগুরে বিশ্বেজর্ কারনে তারা পাপর্ ক্ষেমা পান্ আর গোজেন নাঙে যিগুনোরে যুদো গুরি থুয়ো ওইয়্যে তারা ইধু জাগা পান্।

¹⁹ রাজা আগ্রিপ্প, ইয়েনত্যে স্বর্গত্তুন্ এ দর্শনর্ মাধ্যমে মরে যিয়েনি কুয়ো ওইয়্যে সিয়েনির অবাধ্য মুই ন-অং।

²⁰ যিগুনে দামেস্কত্ আঘন্ পত্তমে তারা ইধু, সে পরেদি যিগুনে যিরূশালেমত্ আর গোদা যিহূদিয়া রেজ্যত্ আঘন্ তারা ইধু আহ্ অযিহূদীগুনো ইধুয়ো মুই প্রচার গোজ্জ্যং, পাপত্তুন্ মনানি ফিরেইনে গোজেন ইন্দি তারার্ ফিরেনা উচিত্, আর এমন্‌ কাম্ গরানা উচিত্ যিয়েন্দোই প্রমাণ পায় যে, তারা মনানি ফিরেয়োন্।

²¹ ইয়েনত্তে যিহূদীগুনে মরে উবোসনা-ঘরত্ ধুরিনে মারে ফেলেবার্ চেষ্টা গোজ্জ্যন্।

²² মাত্তর্ গোজেনে এচ্চ্যে সং মরে এজাল্ দি এজের্ আর সেনত্তে মুই ইয়েনত্ থিয়্যেইনে চিগোন্-দাঙর্ বেক্কুনো ইধু সাক্ষ্য দোঙর্। ভাববাদীগুনে আর মোশি যিয়েনি ঘুদিবার কধা কোই যেইয়োন্ সিয়েনির বারেদি মুই কিচ্চু ন-কঙর্।

²³ সেই কধাগান্ অলঅ ইয়েন্, মশীহত্তুন্ দুঘ্ ভুগো পড়িবো আর তার্ মরণত্তুন্ পত্তমে জেদা ওই উদিনে তার্ নিজো জাদর্ মানুচ্চুনো ইধু আর অযিহূদীগুনো ইধু পহ্‌র রেজ্যর্ পৌইদ্যেনে ফগদাং গরা পড়িবো।

²⁴ পৌলে এবাবোত্যেগুরি যেক্কে নিজো পক্ষে কধা কর্ সেক্কে ফীষ্ট তারে মানা গুরি রঅ ছাড়িনে কলঅ, “পৌল, তুই পাগল্ ওই যেয়োচ্। তুই বোউত্ পড়াশুনো গোজ্জ্যস্ আর সেই পড়াশুনোগানে তরে পাগল্ বানেয়্যে।”

²⁵ সেক্কে পৌলে কলঅ, “মান্যবর্ ফীষ্ট, মুই পাগল্ নয়। মুই যিয়েন্ কঙর্ সিয়েন সত্য আর যুক্তিবলা।

²⁶ রাজা দঅ ইয়েনি বেক্কানি হবর্ পায় আর মুই তা সমারে বেক্‌ কধানি খুলোমেলা গুরি কোই পারং। আর এ কধাগান্ মুই ঘেচ্চেকগুরি হবর্ পাং যে, ইয়েনির্ কিচ্চু তার্ অজানা নয়, কারন এ বেক্‌ ঘটনাগানি দঅ ঘুমুরোত্ ন-ঘদে।

²⁷ রাজা আগ্রিপ্প, তুই কি ভাববাদীগুনোর্ কধা বিশ্বেজ্ গরচ্? মুই কোই পারং তুই গরচ্।”

²⁸ সেক্কে আগ্রিপ্প পৌলরে কলঅ, “তুই কি এদক্ কম সময়ো ভিদিরে মরে খ্রীষ্টান গুরিবার্ চেষ্টা গরর্।”

²⁹ পৌলে কলঅ, “সময় কম্ ওক্ বা বেশ্ ওক্, মুই গোজেন ইধু এ তবনাগান্ গরং যে, বানা তুই নয়, মাত্তর্ যিগুনে এচ্চ্যে মঅ কধানি শুন্ন্যন্ তারা বেক্কুনে যেন মঅ ধোক্ক্যেন্ অন্-বানা এই শিগোলান্ বাদে।”

³⁰ সেক্কে রাজা উদিলো আর তা সমারে সমারে আজল্ শাসনগুরিয়্যে ফীষ্ট আর বর্ণীকী আহ্ যিগুনে তারা সমারে বৈই এলাক্ বেক্কুনে উদিনে থিয়েলাক্।

³¹ সে পরেদি তারা সেই ঘরানত্তুন্ গেলাক্‌কোই আর একজন আরেকজনরে কুয়ো কি গুরিলাক্, “এ মানুচ্চো মরণর্ সাজা পেবার্ বা জেল্ খাদেদে ধোক্ক্যেন্ কিচ্চু ন-গরে।”

³² আগ্রিপ্প ফীষ্টরে কলঅ, “এ মানুচ্চো যুনি সম্রাট ইধু আবিত্তি ন-গত্ত সালে তারে ইরি দিয়্যে যেদঅ।”