প্রেরিত্ 24 - Chakma Bibleপৌলর্ বিচের্ 1 পাচ্ দিন পরেদি দাঙর্ ধর্মগুরু অননিয় কয়েক্কো যিহূদী বুড়ো নেতা আর তর্তুল্ল নাঙে এক্কো উকিলোরে নেযেইনে কৈসরিয়াত্ গেলঅ আর পৌল বিরুদ্ধে আজল্ শাসন গুরিয়্যেবো ইধু আবিত্তি জানেল। 2-3 পৌলরে ডাগি আনা অলে পরেদি তর্তুল্ল ইয়েন কোইনে পৌলরে দুষ্ দেগা ধুরিলো, ও সর্মানিত ফীলিক্স, তঅ অধীনোত্ আমি ভালোক্ দিন ধুরিনে ভারি সুগে শান্দিয়্যে আঘিই। তুই তর্ জ্ঞানদোই এ জাদর্ বোউত্ ভালেদি গোজ্জ্যস্। ইয়েনত্যে আমি নিত্য বেক্ জাগানিত্ তরে আমা রিবেঙত্তুন্ ভালেদি জানেই। 4 মাত্তর্ তর্ সময় যেন আর বর্বাদ্ ন-অয় ইয়েনত্তে মুই এ কোজোলিগান্ গরঙর্, তুই দোয়্যে গুরিনে আমা কধাগান্ শুন্। আমি এক্কেনা কধালোই বেক্কানি কবং। 5 “আমি দেক্ক্যেই এ মানুচ্চো এক্কো ফি-বলা; আমিযে তে যাগুলুগ্ বাজেই দি থায়। গোদা পিত্থিমীর্ যিহূদীগুনো ইধু তে যাগুলুগ্ বাজেই দিইনে বেড়ায়। তে নাসরতীয় নাঙে এক্কো ধর্ম-বিরুদ্ধ দলর্ নেতা। 6-7 উবোসনা-ঘর সুমুত্তো তে অপবিত্র গুরিবার চেষ্টা গোজ্জ্যে বিলি আমি তারে ধোজ্জ্যেই। 8 আমি তারে যেদক্কানি দুষ্ দির্, তুই নিজে তারে জেরা গুরিলে বেক্কানি হবর্ পেবে।” 9 এই বেক্ কধানি যে সত্য সিয়েনত্ যিহূদীগুনেয়ো হাম্ খেলাক্। 10 সেক্কে আজল্ শাসনগুরিয়্যেবো পৌলরে ইজিরে দিলে পৌলে কুয়ো ধুরিলো, মুই কোই পারং, বেশ্ ভালোক্ বজর্ ধুরিনে তুই এই যিহূদী জাদর্ বিচের্ গুরি এজর্; সেনত্তে মুই অমকদ হুজি ওইনে নিজোর্ পক্ষে কধা কঙর্। 11 এচ্চ্যে বার দিনোত্তুন্ বেশ্ ন-অয় মুই উবোসনা গুরিবাত্যে যিরূশালেমত্ যেয়োং। তুই হবর্ ললে সিয়েন সহজে জানি পরিবে। 12 মরে যিগুনে দুষ্ দেদন্ তারা উবোসনা-ঘরত্ মরে কারঅ সমারে কধা সলাসুলি গত্তে ন-দেগন্ বা সমাজ-ঘরত্ বা শহরত্ অন্য কন জাগাত্ মানুচ্চুনোরে উচ্চোমি তুলি দেদেয়ো ন-দেগন্। 13 ইক্কিনে মঅ বিরুদ্ধে তারা যে দুষ্চান দেগাদন্ সিয়েনর্ প্রমাণ তারা তইধু দি ন-পারিবাক্। 14 যিয়েন ওক্, এ কধাগান্ মুই তইধু স্বিগের্ গরঙর্ যে, যীশু খ্রীষ্টর্ পধতান্, যিবেরে তারা ধর্ম-বিরুদ্ধে পধ্ কন্, মুই সে পধেদি মর্ পুরোণি মানুচ্চুনোর গোজেন উবোসনা গুরি থাং। মোশির রীতি-সুদোম লগে যিয়েনির্ মিল্ আঘে সিয়েনি আর ভাববাদীগুনোর্ লেঘানি মুই বিশ্বেজ্ গরং। 15 তারা যেবাবোত্যে আজা গরন্ সেবাবোত্যে আমার্অ গোজেন উগুরে এ আজাগান্ আগেদে যে, গম্ বা বজং বেক্কুনোরে আরঅ জেদা গরা অবঅ। 16 সেনত্তে মুই গোজেন আর মান্জ্য ইধু আমিযে মর্ বিবেগরে সাব্ রাগেবার চেষ্টা গরং। 17 “ভালোক্ বজর্ পরেদি মুই যিরূশালেমত্ যেয়োং যেন মঅ জাদর্ নাঢা মানুচ্চুনোরে কিজু টেঙা-পৌইজ্যে দি পারং আর য়েমান উৎসর্ব গুরি পারং। 18 নিজোরে সিজি গরানার্ পরেদি যেক্কে মুই সেই কামান্ গরঙর্ সেক্কে তারা মরে উবোসনা-ঘরত্ দেক্ক্যন্। মঅ কায়কুরে মান্জ্যর্ ভিড়্অ ন-অয় বা মল্লোই কনঅ যাগুলুগ্অ ন-অয়। 19 মাত্তর্ এশিয়া রেজ্যর্ কয়েক্কো যিহূদী সিধু এলাক্। তইধু সেই যিহূদীগুনোর্ এজানা উচিত্ এলঅ আর মরে দুষ্ দিবার্ যুনি কিজু থায় সালে তারাত্তুন্ সিয়েন দেনা উচিত্ এলঅ। 20 বাহ্ ইয়েনত্ যিগুনে আঘন্ তারাত্তুন্ কোদোক্, যেক্কে মুই দাঙর্ তেম্মাং মুজুঙোত্ থিয়্যেয়োং সেক্কে তারা মর্ কি দুষ্ পেইয়োন। 21 বানা এ এক্কান পৌইদ্যেনে তারা মরে দুষ্ দি পারন্, মুই তারা মুজুঙোত্ থিয়্যেইনে দাঙর্ রঅ গুরিনে কোইয়োং, মরাগুনোর্ আরঅ জেদা ওই উদোনা বেপার্লোই এচ্চ্যে তমা মুজুঙোত্ মর্ বিচের্ অর্।” 22 যীশুর্ পধ পৌইদ্যেনে ফীলিক্সে ভারী গমেদালে কোই পাত্ত। তে বিচের্ গরানা বন্ধ গুরিনে কলঅ, “আজল্ সেনাপতিবো লুসিয় এজানার্ পরেদি মুই তমা বিচেরান্ থুম্ গুরিম্।” 23 তে পৌলরে চুগি দিবাত্যে শত উগুরে সেনাপতিবোরে উগুম্ দিলো, মাত্তর্ তারে কিজু খুলোমেলা গুরি থবাত্তে কলঅ। তে অনুমতি দিলো যেন পৌল সমাজ্যেগুনে এইনে দরকার্ মজিম্ তারে দেগাশুনো গুরি পারন্। 24 কয়েক দিন পরেদি ফীলিক্সে তার্ যিহূদী মোগ্ দ্রুষিল্লারে লগে গুরিনে আনিলো। তে পৌলরে ডাগিনে তাত্তুন্ খ্রীষ্ট যীশু উগুরে বিশ্বেজর্ কধা শুনিলো। 25 যেক্কে পৌলে গমেডালে চলানা, নিজোরে দমন্ রাগানা আর আগাম্ বিচের পৌইদ্যেনে কলঅ, সেক্কে ফীলিক্সে দোরেইনে কলঅ, “তুই ইক্কে যাহ্; সময়-সুযোগ্ মজিম মুই তরে ডাগিম্।” 26 তে আজা গোজ্জ্যেদে পৌলে তারে গুষ্ দিবো। সেনত্তে বার্বার্ পৌলরে ডাগি আনিনে তে তা সমারে কধা কদঅ। 27 দ্বি বজর্ পার্ ওই গেলে পরেদি ফীলিক্স জাগানত্ পর্কীয় ফীষ্ট এলঅ। ফীলিক্সে যিহূদীগুনোরে হুজী গুরিবাত্যে পৌলরে জেল্খানাত্ থোই গেলঅ। |
Copyright © 2021 Bangladesh Bible Society
Bangladesh Bible Society