প্রেরিত্‌ 23 - Chakma Bible

¹ পৌলে সোজা দাঙর্ তেম্মাঙ মানুচ্চুনো ইন্দি রিনি চেইনে কলঅ, “মর্ ভেইয়ুন, মুই এচ্চ্যে সং গম্ বিবেক্ দিইনে গোজেনরে ভাবিনে মর্ কামানি পালেয়োং।”

² এ কধাগান্ শুনিনে আজল্ ধর্মগুরু অননিয় পৌল কায়-কুরে যিগুনে থিয়্যেই এলাক্ তারারে পৌল মূয়োনত্ আঘাত্ গুরিবাত্তে উগুম দিলো।

³ সেক্কে পৌলে অননিয়রে কলঅ, “ভন্ড, গোজেনে তরেয়ো আঘাত্ গুরিবো। আইন মজিম মর্ বিচের্ গুরিবাত্তে তুই সিয়েনত্ বোচ্চ্যস্, মাত্তর্ মরে পিদিবাত্তে উগুম দিইনে দঅ তুই নিজেই আইন ভাঙ্যস্।”

⁴ যিগুনে পৌল কায়-কুরে থিয়্যেই এলাক্ তারা তারে কলাক্, “তুই গোজেনর্ দাঙর্ ধর্মগুরুবোরে অগমান্ গরর্।”

⁵ সেক্কে পৌলে কলঅ, “ভেইলগ্, মুই হবর্ ন-পেদুং, ইবে দাঙর্ ধর্মগুরু। যুনি হবর্ পেদুং সে কধাগান্ ন-কদুং, কিয়া পবিত্র বোইবোত্ লেগা আঘে, ‘তর্ জাদর্ নেতাবোরে অসর্মান ন-গোজ্জ্য।’ ”

⁶ সেই দাঙর্ তেম্মাঙর্ এক দল যে সদ্দূকী আর অন্য দল অলঅ ফরীশী, এ কধাগান হবর্ পেইনে পৌলে দাঙর্ তেম্মাঙত্ রঅ ছাড়িনে কলঅ, “মর্ ভেইয়ুন, মুই এক্কো ফরীশী আর ফরীশীর পুয়ো। মর্ বিচের্ অর্ কিয়া মুই বিশ্বেজ্ গরং, মরাগুনে আরঅ জেদা ওই উদিবাক্।”

⁷ তার্ এ কধাগান্দোই ফরীশী আর সদ্দূকীগুনো ভিদিরে কোল্-কোজ্জ্যে আরাম্ভ অলঅ। ইয়েন্দোই দাঙর্ তেম্মাঙ মানুচ্চুনে ভাগ্ ওই গেলাক্,

⁸ কারন সদ্দূকীগুনে কন্দে, “মরাগুনে আর্ জেদা ওই ন-উদিবাক্।” ইয়েন বাদে তারা আরঅ কন্, স্বর্গদূত্-অ নেই, কনঅ আত্মায়ো নেই; মাত্তর্ ফরীশীগুনে ইয়েনি বেক্কানি বিচ্চ্যেজ্ গরন্।

⁹ সেক্কে ভারী কোল্-কোজ্জ্যে আরাম্ভ অলঅ আর ফরীশী দলর্ কয়েক্কো ধর্ম-মাষ্টর উদিনে রঅ ছাড়ি ছাড়ি কধা কুয়ো ধুরিলাক্। তারা কলাক্, “আমি এ মানুচ্চোর্ কনঅ দুষ্ ন-দেগির্। অয়ত কনঅ আত্মা বা কনঅ স্বর্গদূতে তা সমারে কধা কোইয়্যে।”

¹⁰ সেই কোল্-কোজ্জ্যেগান্ এদক্ দাঙর্ অলঅ যে, আজল্ সেনাপতিবো দোরেলদে যে যুনি তারা পৌলরে কট্টা কট্টা গুরি ফেলান্। তে সৈন্যগুনোরে উগুম্ দিলো যেন তারা যেইনে মানুচ্চুনো আঢত্তুন্ পৌলরে ছাড়েই আনিনে কেম্পত্ নেযান্।

¹¹ তার্ কেল্যে রেদোত্ প্রভু পৌল কায়কুরে থিয়্যেইনে কলঅ, “সাহসী অ, যিরূশালেমত্ যেবাবোত্যে গুরি তুই মঅ পৌইদ্যেনে সাক্ষ্য দুয়োচ্ সেবাবোত্যেগুরি রোমত্অ তত্তুন্ সাক্ষ্য দিয়্যে পড়িবো।”

পৌলরে মারে ফেলেবার্ কুজুরোমি

¹² তার্ কেল্যে বেন্যেমাদান্ যিহূদীগুনে এক্কান্ কুজুরোমি গুরিলাক্ আর পৌলরে মারেই ন-ফেলানা সং কিচ্চু ন-হেবাক্ বিলিনে সমত্ খেলাক্।

¹³ চল্লিশ জনত্তুন্অ বেশ্ মান্‌জ্যে এ কুজুরোমিগান্ গুরিলাক্।

¹⁴ তারা আজল্ ধর্মগুরুগুনোর আর যিহূদী বুড়ো নেতাগুনো ইধু যেইনে কলাক্, “পৌলরে মারেই ন-ফেলানা সং আমি কিচ্চু ন-হেবং বিলি জদবদে সমত্ খেইয়্যেই।

¹⁵ ইক্কিনে তুমি আর দাঙর্ তেম্মাঙর্ মানুচ্চুনে এ পৌইদ্যেনে আরঅ গমেদালে বিজিরে-চেবার্ নাঙে পৌলরে তমা মুজুঙোত্ আনিবাত্যে আজল্ সেনাপতিবো ইধু হবর্ পাধ। তে ইধু লুমিবার আগে আমি তারে শেজ্ গুরি ফেলেবাত্যে যুক্কোল্ ওই আঘিই।”

¹⁶ মাত্তর্ পৌল ভাগিনেবো এ কুজুরোমির্ কধাগান শুনিনে কেম্পত্ গেলঅ আর পৌলরে সেই হবরান্ জানেল।

¹⁷ সেক্কে পৌলে এক্কো শত উগুরে সেনাপতিরে ডাগিনে কলঅ, “এ গাবুজ্জ্যে পুয়োবোরে আজল্ সেনাপতিবো ইধু নেযা। তাইধু ইবের্ কিজু কবার্ আঘে।”

¹⁸ সেক্কে সেই শত উগুরে সেনাপতিবো সেই গাবুজ্জ্যে পুয়োবোরে নেযেইনে আজল্ সেনাপতিবো ইধু যেইনে কলঅ, “বন্দী পৌলে মরে ডাগিনে এ গাবুজ্জ্যে পুয়োবোরে তইধু আনিবাত্যে কলঅ, কারন তইধু তার্ নাকি কিজু হবার্ আঘে।”

¹⁹ আজল্ সেনাপতিবো সেক্কে সেই গাবুজ্জ্যে পুয়োবোর্ আঢ্‌তানি ধুরিনে এক কিত্তেদি নেযেইনে কলঅ, “মরে তুই কি কবাত্তে চাজ্?”

²⁰ সেই গাবুজ্জ্যে পুয়োবো কলঅ, “যিহূদীগুনে ঠিগ্ গোজ্জ্যন্দে, পৌল পৌইদ্যেনে আরঅ গমেডালে হবর্ লবার্ নাঙে তারে এজেত্তে কেল্ল্যে দাঙর্ তেম্মাঙ মুজুঙোত্ নেযেবাত্যে তরে কোজোলি গুরিবাক্।

²¹ তুই তারা কধালোই রাজী ন-অবে, কারন চল্লিশ জনত্তুন্অ বেশ্ মানুচ্ লুগিনে পৌলরে বাজ্জেই আগন্। পৌলরে খুন্ ন-গরানা সং এ মুনুচ্চুনে কিচ্চু ন-হেবাক্ বিলিনে সমত্ খেইয়োন্। তারা যুক্কোল্ ওইনে ইক্কিনে বানা তর্ রাজী অনাগান্ বাজ্জ্যেই আঘন্।”

²² আজল্ সেনাপতিবো সেই গাবুজ্জ্যে পুয়োবোরে বিদেয় দিবার্ সময়োত্ এ উগুমান দিলো, “এ কধাগান্ যে তুই মরে জানেয়োচ্ সিয়েন কাররে ন-কোচ্।”

পৌলরে কৈসরিয়াত্ পাধা অলঅ

²³ পরেদি আজল্ সেনাপতিবো তার্ দ্বিজন শত উগুরে সেনাপতিগুনোরে ডাগিনে কলঅ, “দ্বিশত্ সাধারণ সৈন্য, সত্তুর্ জন ঘোড়াবলা সৈন্য আর দ্বিশত্ শেলবলা সৈন্যরে এচ্চ্যে রেত্ নটা সময়োত্ কৈসরিয়াত্ যেবাত্যে যুক্কোল্ রাগঅ।

²⁴ আর পৌলত্যেয়ো ঘোড়ার্ বেবস্থা গরঅ যাতে তারে গমেডালে আজল্ শাসনগুরিয়্যে ফীলিক্স ইধু নেযা যায়।”

²⁵ আজল্ সেনাপতিবো এ চিধিগান্ লিগিলো:

²⁶ মুই, ক্লৌদিয় লুসিয়, আজল্ শাসনগুরিয়্যে ফীলিক্স ইধু এ চিধিগান্ লেগঙর্। মর্ ভালেদিগান্ গুজি লঅ।

²⁷ “যিহূদীগুনে এ মানুচ্চোরে ধুরিনে প্রায় খুন্ গুরি ফেল্ল্যন্, মাত্তর্ মুই মঅ সৈন্যগুনোরে নেযেইনে তারে উদ্ধোর্ গুরি আন্ন্যং; কিয়া মুই কোই পারিলুং তে এক্কো রোমীয়।

²⁸ পরেদি মুই জানিবাত্তে চেলুং কিত্ত্যে মান্‌জ্যে তারে দুষী গত্তন্। সেনত্তে তারার্ দাঙর্ তেম্মাঙ ইধু মুই তারে নেযেলুং।

²⁹ মুই বুঝি পারিলুং, তারার্ ধর্মর্ রীতি-সুদোম পৌইদ্যেনে তারা তারে দুষী গত্তন্, মাত্তর্ মুরিবার বা জেলোত্ যাইদ্যে ধোক্ক্যেন্ এমন কনঅ দুষ্ তার্ নেই।

³⁰ যেক্কে মুই হবর্ পেলুং মানুচ্চুনে পৌল বিরুদ্ধে কুজুরোমি গত্তন্ সেক্কে মুই তারে তইধু পাধেলুং। যিগুনে তারে দুষী বানেয়োন তারারেয়ো মুই উগুম্ দিলুং যেন তারা ইবের্ দুষো পৌইদ্যেনে তইধু কন্।”

³¹ সেক্কে সৈন্যগুনে আজল্ সেনাপতিবোর্ উগুম মজিম পৌলরে রেদোত্ তারা সমারে আন্তিপাত্রি শঅরান সং নেযেলাক্।

³² তার্ কেল্যে তারা ঘোড়াবলা সৈন্যগুনো সমারে পৌলরে পাধেই দিইনে কেম্পত্ ফিরি গেলাক্।

³³ ঘোড়াবলা সৈন্যগুনে কৈসরিয়াত্ লুমিনে চিধিগান্ আর পৌলরে আজল্ শাসন গুরিয়্যেবোর্ আঢত্ দিলাক্।

³⁴ আজল্ শাসন গুরিয়্যেবো চিধিগান্ পড়িনে পৌলে কুদুগোর্ মানুচ্‌ সিয়েন পুযোর্ গুরিলো। পৌলে যে কিলিকিয়া রেজ্যর্ মানুচ্‌ সে কধাগান্ কোই পারিনে তে কলঅ,

³⁵ “তরে যিগুনে দুষী বানেয়োন তারা ইধু লুমিলে পরেদি মুই তঅ কধানি শুনিম।” যেরেদি তে রাজা হেরোদর্ ঘর-জেলোত্ পৌলরে চুগি দিইনে থবাত্যে কলঅ।