প্রেরিত্ 20 - Chakma Bibleম্যাসিডোনিয়া আর আখায়া রেজ্যত্ 1 যাগুলুগ্ থামানার্ পরেদি পৌলে শিচ্চ্যগুনোরে ডাগিনে পাদেল। তারারে উচ্চোমি তুলি দিবার্ পরেদি তারাত্তুন্ বিদেয় লোইনে তে ম্যাসিডোনিয়া ইন্দি লদ্ দিলো। 2-3 ম্যাসিডোনিয়া ভিদিরেদি যেবার্ অক্তত্ তে ভালোক্কানি কধা কোইনে মানুচ্চুনোরে উচ্চোমি তুলি দিলো। পরেদি তে গ্রীস, অত্তাৎ আখায়া রেজ্যত্ যেইনে সিধু তিন মাস সং থেলঅ। সে পরেদি তে জাহাজত্ গুরি সিরিয়া দেজত্ লদ্ দিবার্ আগে হবর্ পেলঅ যিহূদীগুনে তা বিরুদ্ধে কুজুরোমি গত্তন্। সেক্কে তে আরঅ ম্যাসিডোনিয়া ভিদিরেদি ফিরি যানা ঠিগ্ গুরিলো। 4 বিরয়াত্তুন্ পুর্হর পুয়ো সোপাত্র, থিষলনীকীত্তুন্ আরিষ্টার্খ আর সিকুন্দ, দর্বীত্তুন্ গাইয়, তীমথিয় আর এশিয়াত্তুন্ তুখিক আর ত্রফিমোত্ পৌল সমারে গেলাক্। 5 এ মানুচ্চুনে আগেদি যেইনে ত্রোয়া শঅরত্ আমাত্যে বাজ্জ্যেই থেলাক্। 6 সদানেইয়্যে রুটি পরবর্ পরেদি আমি পানি পধেদি ফিলিপীত্তুন্ লদ্ দিলোং আর পাচ্ দিন পরেদি ত্রোয়াত তারা সমারে মিজেলং। ত্রোয়াত আমি সাত দিন সং এলং। উতুখ্রে জীংকানি দান 7 সাপ্তার্ পত্তম্ দিনোত্ প্রভুর্ ভোজ্ গুরিবাত্তে আমি একসমারে এগত্তর্ অলং। সেক্কে পৌলে মানুচ্চুনো ইধু ফগদাং গরা ধুরিলো। তার্ কেল্যে তার্ যেবার্ কধা এলঅ বিলি তে রেদ্ সংভাগ্ সং কধা কনাত্ থেলঅ। 8 আমি উগুরে তালাত্ যে ঘরানত্ এগত্তর্ ওইয়্যেই সিধু ভালোক্কুন্ বাত্তি এলাক্। 9 উতুখ্ নাঙে এক্কো গাবুর্ মরদ্ সেই ঘরর্ জানালা উগুরে বৈই এলঅ। পৌলে ভালক্কন্ সং কধা কোইয়্যে বিলিনে তে লারে গুরিনে ঘুমোত্ পড়িলো। ঘুম্ বেশ্ অলে পরেদি তে তিন তালাত্তুন্ তলেদি পড়ি গেলঅ আর তারে মরা অবস্থায় তুলি নেযা অলঅ। 10 সেক্কে পৌলে তলেদি লামিলো আর সেই গাবুর্ মরত্তোরে আযাবোধে ধুরিনে কলঅ, “তুমি ন-দোরেয়ো, তে জেদা আঘে।” 11 ইয়েনর্ পরেদি পৌলে আরঅ উগুরে তলাত্ যেইনে প্রভুর্ ভোজ্ গুরিলো আর ভালক্কন্ ধুরিনে বেন্যেমাদান্ সং কধা কনার্ পরেদি তে গেলগোই। 12 মানুচ্চুনে সেই গাবুর্ মরত্তোরে জেদা অবস্থায় ঘরত্ নেযেলাক্ আর জদবদে মনানিরে বুঝেই পারিলাক্। ইফিষত্তুন্ পৌলর বিদেয় 13 আমি আগে যেইনে জাহাজত্ উদিনে আঃস বন্দর্অ ইন্দি লদ্ দিলোং। সিয়েনত্তুন্ পৌলরে তুলি লবার্ কধা এলঅ। তারে তুলি লবার্ কধা তে আমারে কোইয়্যে কিয়া তে আঢিবার্ পধেদি সিধু যেবাত্তে চেইয়্যে। 14 আঃস আমা সমারে তার্ দেগা অলে পরেদি আমি তারে জাহাজত্ তুলিলোং আর মিতুলীনীত্ এলং। 15 তার্ কেল্যে আমি সিয়োত্তুন লদ্ দিইনে খীয় দ্বীপ কুরে লুমিলোং। সে পরেদি দিন্নোত্ আমি সাগর্ পার্ ওইনে সামঃ দ্বীপোত্ গেলং। সে পরেদি দিন্নোত্ আমি মিলীদ্ বন্দরত্ যেইনে লুমিলোং। 16 এশিয়া রেজ্যত্ পৌলর্ যাতে দেরি গরা ন-পরে সেনত্তে তে ঠিগ্ গোজ্জ্যেদে, তে ইফিষত্ ন-থামেইনে তা কায়-কুরেদি যেবগোই। যিরূশালেমত্ লুমিবাত্যে তে হিজেহিচ্চ্যে গুরিলো যেন সম্ভব অলে পঞ্চাশত্তমী দিনোত্ সিধু থেই পারে। 17 পৌলে মিলীতত্তুন্ ইফিষত্ মানুচ্ পাধেইনে সিধুগো মন্ডলীর নেতাগুনোরে ডাগিলো। 18 তারা সিধু লুমিলে পরেদি পৌলে তারারে কলঅ, এশিয়া রেজ্যত্ এজানার্ পরেদি পত্তম্ দিনোত্তুন্ ধুরি নিত্য তমা সমারে মুই কেধোক্ক্যেন্ গুরি কাদেয়োং সিয়েন দঅ তুমি হবর্ পঅ। 19 যিহূদীগুনোর নানান্ কুজুরোমির্ কারনে মত্তুন্ জদবদে পোরোক্ষ্যেত্ পরা পোজ্জ্যে, মাত্তর্ মুই খুব্ নম্র গুরিনে চোগো পানিলোই প্রভুর্ চাগর্ ওইনে তার্ সেবা গোজ্জ্যং। 20 তমার যাতে এজাল্ অয় এমন কনঅ কিজু মুই তমা ইধু ন-কোইনে জুরো গুরি ন-থাং, বরং বারেদি খুলোমেলাগুরি আর তমা ঘরে ঘরে শিক্ষ্যে দুয়োং আর প্রচার গোজ্জ্যং। 21 যিহূদী আর গ্রীক্কুনো ইধু মুই জদবদে জোর্ দিইনে কোইয়োং, পাপত্তুন্ মনানি ফিরেইনে গোজেন ইন্দি তারারে ফিরেই পুড়িবো আর আমা প্রভু যীশু উগুরে বিশ্বেজ্ গরা পুড়িবো। 22 ইক্কিনে মুই পবিত্র আত্মার্ বাধ্য ওইনে যিরূশালেমত্ যাঙর্। সিধু মঅ উগুরে কি ঘুদিবো সিয়েন মুই হবর্ ন-পাং। 23 মুই বানা এ কধাগান্ হবর্ পাং, পবিত্র আত্মাগানে পত্তি শঅরত্ মরে এ কধাগান্ জানেই দেত্তে, মত্তুন্ জেলোত্ যাহ্ পড়িবো আর দুঘ্ পাহ্ পড়িবো। 24 মাত্তর্ মইধু মঅ পরাণানর্ কনঅ দাম নেই। মর্ ইয়েন বানা এক্কান আওজ্, যেন মুই থুম্ সং যেই পারং, অত্তাৎ প্রভু যীশু যে কামর্ ভারান্ মরে দিয়্যে সিয়েন শেজ্ গুরি পারং, সে কামান্ অলঅ গোজেনর্ দোয়্যের্ গম্ হবরান পৌইদ্যেনে সাক্ষি দেনা। 25 ইক্কিনে মুই এ কধাগান্ কোই পারং, তমার্ যিগুনো ইধু মুই যেইনে গোজেন রেজ্য পৌইদ্যেনে প্রচার গোজ্জ্যং তারাত্তুন্ কনজনে মরে আর ন-দেগিবাক্। 26 সেনত্তে এইচ্চ্যে মুই তমারে গমেডালে কঙত্তে, কারর্ লো-গানর্ দায়ী মুই নয়, 27 কিয়া গোজেনে কি চায় সিয়েন তমারে জানেবাত্তে মুই কনদিন্অ পিজেদি ন-ফিরোং। 28 তুমি নিজো পৌইদ্যেনে উজিয়ার্ থাগঅ, আর পবিত্র আত্মা যে বিশ্বেজি দলর্ ভারান্ পরিচালগ্ ইজেবে তমা উগুরে দিয়্যে তারা পৌইদ্যেনেয়ো উজিয়ার্ থাগঅ। গরগ্কো যেবাবোত্যেগুরি তা ভেড়া পালুনোরে দেগাশুনো গরে ঠিগ্ সেবাবোত্যেগুরি তুমিয়ো গরগ্ ইজেবে গোজেন মন্ডলীর্ দেগাশুনো গরঅ। গোজেনে সেই মন্ডলীবোরে নিজো লো-গান্দোই কিন্যে। 29 মুই হবর্ পাং, মুই যানার্ পরেদি মানুচ্চুনে চিৎ ন-পুজ্যে হোক্যে বাঘ ধোক্ক্যেন্ গুরি তমা ইধু এবাক্ আর ভেড়া পালুনোর্ ক্ষতি গুরিবাক্। 30 এমন্ কি, তমা নিজো ভিদিরেত্তুন্ মানুচ্চুনে উদিনে গোজেনর্ সত্যগানরে মিজে বানেবার্ চেষ্টা গুরিবাক্ যেন বিশ্বেজিগুনোরে নিজো দলত্ টানি পারন্। 31 ইয়েনত্তে তুমি উজিয়ার্ থাগঅ। ইদোত্ রাগেবা, তিন বজর্ সং দিন-রেদ্ চোগো পানিলোই মুই তমারে পত্তিজনরে উজিয়ার্ গোজ্জ্যং, কনদিন্অ জুরো গুরি ন-থাগঅ। 32 গোজেন ইধু আর তার্ কধানি আঢত্ ইক্কিনে মুই তমারে তুলি দোঙর্। গোজেনর্ কধানি তার্ দোয়্যের্ পৌইদ্যেনে কয়, আর তমারে দাঙর্ গুরিবার্ খেমতা সেই কধানির্ আঘে। ইয়েনি বাদে গোজেনে তার্ নিজো মানুচ্চুনোত্তে যিয়েনি থোইয়্যে সেই কধানিয়ে তমারে সিয়েনিয়ো দি পারিবো। 33 কারঅ সনা, রূবো বা কাবড়-চুগোর উগুরে মুই লুভ্ ন-গরং। 34 তুমি নিজেই দঅ কোই পারঅ, মর্ এই দ্বিয়েন আঢ্ মর্ আর মঅ সমাজ্জ্যেগুনোর্ অভাব দূর্ গোজ্যে। 35 মুই যিয়েনি গোজ্জ্যং সিয়েনি বেক্কানি তমারে দেগেয়োং, এবাবোত্যেগুরি জদবদে কাম্ গুরিনে বল্পোজ্যেগুনোরে সাহায্য গরানা উচিত্ আর প্রভু যীশুর্ এ কধাগান আমাত্তুন্ ইদোত্ রাগানা উচিত, পানাত্তুন্ দেনাত্ আরঅ বেশ্ আশিদ্বাদ আঘে। 36 এ কধাগান্ কনার্ পরেদি পৌলে বেক্কুনো সমারে আদু পাড়িনে তবনা গুরিলো। 37 যেরেদি মন্ডলীর্ নেতাগুনে বেক্কুনে পৌলরে আযাবোধে ধুরিনে চুমিলাক্ আর কানাকুদি গরা ধুরিলাক্। 38 পৌলর্ মুয়োন্ আর্ তারা ন-দেগিবাক্, বিশেষ গুরিনে এ কধাগানত্যে তারা অমকদ মনত্ দুঘ্ পেলাক্। ইয়েনর্ পরেদি তারা তা লগে লগে জাহাজ্চান সং গেলাক্। |
Copyright © 2021 Bangladesh Bible Society
Bangladesh Bible Society