প্রেরিত্ 17 - Chakma Bibleপৌল আর সীল থিষলনীকী শঅরত্ 1 পৌল আর সীল আম্ফিপলি আর আপল্লোনিয়া শঅর ভিদিরেন্দি থিষলনীকী শঅরত্ গেলাক্। সিধু যিহূদীগুনোর এক্কান্ সমাজ-ঘর এলঅ। 2 পৌল তার্ সুদোম্ মজিম সেই সমাজ-ঘরত্ গেলঅ আর পর পর তিন পল্লা জিরেবার্ দিনোত্ মানুচ্চুনো সমারে পবিত্র বোইবোত্তুন্ কলঅ। 3 তে মানুচ্চুনোরে বুঝেল আর প্রমাণ গুরিলো, মশীহর্ দুঘ্ ভুগোনার আর মরণত্তুন্ জেদা ওই উদিবার্ দরকার্ এলঅ। তে কলঅ, “যে যীশুর্ কধানি মুই তমা ইধু ফগদাং গরঙর্ সেই যীশুই অলঅ মশীহ।” 4 এ কধাগান্ শুনিনে কয়েক্কো যিহূদী বিশ্বেজ্ গুরিনে পৌল আর সীল সমারে মিজেলাক্। ইগুন্ বাদে গোজেন-ভক্ত বোউত্ গ্রীক আর বোউত্ বিশেষ বিশেষ মিলেয়ো তারা সমারে মিজেলাক্। 5 মাত্তর্ যিহূদীগুনে ইংসে গুরিনে বাজারত্তুন্ কয়েক্কো পাজি মানুচ্ যগার্ গুরি আনিনে ভীড় জমেলাক্ আর শঅর ভিদিরে যাগুলুগ্ বাজেই দিলাক্। সে পরেদি পৌল আর সীলরে তোগেইনে বারে মানুচ্চুনো ইধু তারারে আনিবাত্যে তারা যাসোন ঘরঅ উগুরে যেন ঝাবেই পড়িলাক্, 6 মাত্তর্ সিধু তারা তারারে ন-পেলাক্। সেক্কে তারা যাসোন আর কয়েক্কো বিশ্বেজি ভেইয়োরে টানি নেযেইনে শঅর-নেতাগুনো ইধু গেলাক্ আর রঅ ছাড়িনে কলাক্, “যে মানুচ্চুনে গোদা দুনিয়েগান্ উলোত্-পালত্ গোজ্জ্যন্ তারা ইক্কিনে ইধুয়ো লুম্মোন্দি; 7 আর যাসোনে তা নিজো ঘরত্ সিগুনোরে জাগা দিয়্যে। তারা বেক্কুনে সম্রাট কৈসরর্ উগুম্ অমান্য গুরিনে কদন্, তে বাদে যীশু নাঙে আরঅ এক্কো রাজা আঘে।” 8 এ বেক্ কধানি কোইনে সেই যিহূদীগুনে নেতাগুনোরে আর মানুচ্চুনোরে মনানি যাগুলুগ্ গুরি দিলাক্। 9 মাত্তর্ যাসোন আর অন্যগুনে জামিনো টেঙা দিলে পরেদি তারা তারারে ইরি দিলাক্। বিরয়া শঅরত্ 10 রেত্ অলে পরেদি বিশ্বেজি ভেইয়ুনে পৌল আর সীলরে বিরয়াত্ পাধেই দিলাক্। সিধু লুমিনে তারা যিহূদীগুনোর্ সমাজ-ঘরত গেলাক্। 11 থিষলনীকীর্ যিহূদীগুনোত্তুন্ বিরয়া শঅরর্ যিহূদীগুনো মনানি বোউৎ বেশ্ খুলোমেলা এলঅ। তারা জদবদে আওচ্ গুরিনে গোজেনর্ কধা শুনিনে সিয়েনি মানি ললাক্। পৌলে যিয়েনি কোইয়্যে সিয়েনি সত্য নাহি চেবাত্যে পত্তিদিন্ তারা বোইয়োত্ তোগেদাক্। 12 বোউত্ যিহূদী যীশু উগুরে বিশ্বেজ্ গুরিলাক্; ইগুন্ বাদে বোউত্ নামিদামী গ্রীক মিলে আর মরদ্অ বিশ্বেজ্ গুরিলাক্। 13 থিষলনীকীর্ যিহূদীগুনে যেক্কে শুনিলাক্ পৌলে বিরয়াত্ গোজেনর্ কধা ফগদাং গরের্ সেক্কে তারা সিধুয়ো গেলাক্ আর মানুচ্চুনোরে উচ্চোমি তুলি দিইনে যাগুলুগ্ বাজেই দিলাক্। 14 বিশ্বেজি ভেইয়ুনে সেক্কে পৌলরে সাগর পারত্ পাধেই দিলাক্, মাত্তর্ সীল আর তীমথিয় বিরয়াত্ থেলাক্। 15 যে মানুচ্চুনে পৌলরে সমারে গুরি নেযাদন্ তারা তারে এথেন্স শঅরত্ আনিলাক্। সে পরেদি সেই মানুচ্চুনে সীল আর তীমথিয়ত্যে এ উগুমান্দোই বিরয়াত্ ফিরি গেলাক্, সীল আর তীমথিয় যেদক্ ঝাদি-মাদি পারন্ যেইনে যেন পৌল সমারে মিজেই পারন্। এথেন্স শহরত্ 16 পৌল এথেন্স শঅরত্ সীল আর তীমথিয়ত্যে বাজ্জেই থেবার্ অক্তত্ সেই শঅরান্ মূত্তিলোই ভরা দেগিলো। সেক্কে তা মনান্ অমকদ গম্ ন-লাগিলো। 17 তে সমাজ-ঘর ভিদিরে যিহূদীগুনো সমারে আর গোজেন-ভক্ত গ্রীক্কুনো সমারে তেম্মাং গরা ধুরিলো। ইগুন বাদে যিগুনে বাজারত্ এদাক্ তারা সমারেয়ো তে দিনোর্ পর্ দিন তেম্মাং গরা ধুরিলো। 18 সেক্কে ইপীকুরীয় আর স্তোয়িকীয় দলর্ কয়েক্কো মাষ্টর্ পৌল সমারে কধা সলাসুলি বাজেলাক্। তারাত্তুন্ কয়েকজনে কলাক্, “এই কোধোগিবো কি কবার্ চার্।” আর অন্যগুনে কলাক্, “মনে অয় তে বিদেশী দেব-দেবীর্ কধা ফগদাং গরের্।” তারা এ কধাগান্ কলাক্ কারন পৌলে যীশু পৌইদ্যেনে আর মরণত্তুন্ জেদা ওই উদোনা পৌইদ্যেনে ফগদাং গরের্। 19 সেক্কে সেই মাষ্টরুনে পৌলরে আরেয়পাগের সভা মুজুঙোত্ আনিলাক্। সিধু তারা পৌলরে পুযোর্ গুরিলাক্, “যে নুয়ো শিক্ষ্যেগান্ তুই দুয়োর্ সিয়েন কি, সিয়েন্ কি আমি জানি পারিই? 20 কিত্তেই তুই এমন্ কয়েক্কান কধা কর্ যিয়েনি আমা কানত্ বেধোক্ক্যা লাগের্। সেনত্তে এ বেক্ কধানির্ অত্তগান্ কি সিয়েনি আমি জানিবার্ চেই।” 21 তারা এ কধাগান্ কলাক্ কিয়া এথেন্সর বেক্ মানুচ্চুনে আর সেই শঅরত্ যে বিদেশীগুনে থেদাক্ তারা বানা নুয়ো নুয়ো বেপারানিলোই কধা কন্ আর শুনিনে সময় কাধেদাক্। 22 সেক্কে পৌলে আরেয়পাগের সভাত্ থিয়্যেইনে কলঅ, এথেন্স শঅরর্ মানুচ্চুন শুনো। মুই দেগঙত্তে, তুমি বেক্কানিন্দিত্তুন্ অমকদ ধর্ম-ভক্ত, 23 কিয়া মুই ঘুরি বেড়েবার্ অক্তত্ তমা উবোসনার্ জিনিস্চানি যেক্কে চাঙর্ সেক্কে এমন্ এক্কো পূজো দেগিলুং যিবে উগুরে লেগা আঘে, অচিনে দেবেদার্ নাঙে। তুমি ন-চিনিনে যিবের্ উবোসনা গরর্ তা পৌইদ্যেনে মুই তমা ইধু প্রচার গরঙর্। 24 গোজেন, যিবে এ পিত্থিমীগান্ আর সিয়েন ভিদিরে যিয়েনি আঘে বেক্কানি বানেয়্যে, তেয়ই স্বর্গ আর পিত্থিমীর্ গিরোজ্। তে আঢ্তোই বানেয়্যে কনঅ মন্দিরোত্ বজত্তি ন-গরে। 25 তার কনঅ অভাব নেই, সেনত্তে মান্জ্য আঢত্তুন্ পূজো গুজি লবার্অ তার দরকার্ নেই, কিয়া তেয়ই বেক্ মানুচ্চুনোরে জিংকানি, পরাণান্ আর অন্য বেক্কানি দান গরে। 26 তে এক্কো মান্জ্যত্তুন্ বেক্ জাদর্ মানুচ্চুন বানেয়্যে যেন তারা গোদা পিত্থিমীগানত্ বজত্তি গরন্। তারা কক্কে কুধু বজত্তি গুরিবাক্ সিয়েন্অ তে ঠিগ্ গুরি দিয়্যে। 27 গোজেনে এ কামান্ গোজ্জ্যে যেন মান্জ্যে তগাদে তগাদে তারে পেবার্ আজায় তারে তগান্। মাত্তর্ আজলে তে আমা কুরেত্তুন্ দূরোত্ নয়, 28 কিয়া তা বল্লোই আমি জিংকানি কাদেই আর আঢাউদো গুরিই আহ্ জেদায়ো থেই। তমারে কয়েক্কো কবিয়ো কোইয়োন, আমিয়ো তার্ পুয়ো। 29 সালে আমি যেক্কে গোজেনর্ পুয়ো সেক্কে গোজেনরে মান্জ্য আঢ্তোই আর চিন্তেশক্তিলোই বানেয়্যে সনা, রূবো বা পাত্তর মূত্তি মনে গরানা আমার্ উচিত্ নয়। 30 আগ দিনো মানুচ্চুনে হবর্ ন-পেদাক্ বিলি গোজেনে ইয়েনি দেগিনেয়ো ন-দেগে। মাত্তর্ ইক্কিনে তে বেক্ জাগানিত্ বেক্ মানুচ্চুনোরে পাপত্তুন্ মনানি ফিরেবাত্তে উগুম্ দের্, 31 কিয়া তে এমন্ এক্কো দিন ঠিগ্ গোজ্যে যেদিন্ন্যে তার্ বেঈ লোইয়্যে মানুচ্চোলোই তে গমেডালে মান্জ্যর্ বিচের্ গুরিবো। তে সেই মানুচ্চোরে মরণত্তুন্ জেদা গুরি তুলিনে বেক্ মানুচ্চুনো ইধু ইয়েনর্ প্রমাণ্ দিয়্যে। 32 মরণত্তুন্ আরঅ জেদা ওই উদিবার্ কধা শুনিনে মানুচ্চুনোত্তুন্ কয়েকজনে মুয়োনি বেঙা গুরিলাক্, মাত্তর্ অন্যগুনে কলাক্, “এ পৌইদ্যেনে তমা কধানি আমি আরঅ শুনিবোং।” 33 সেক্কে পৌলে সেই তেম্মাঙত্তুন্ গেলগোই। 34 কয়েক্কো মান্জ্যে পৌল সমারে মিজেলাক্ আর বিশ্বেজ্ গুরিলাক্। সেই বিশ্বেজিগুনো ভিদিরে দিয়নুষিয় নাঙে আরেয়পাগের সভার একজন, দামারিস্ নাঙে এক্কো মিলে আর তারা সমারে আরঅ কয়েকজন এলাক্। |
Copyright © 2021 Bangladesh Bible Society
Bangladesh Bible Society