প্রেরিত্ 16 - Chakma Bibleপৌল আর সীল সমারে তীমথিয় 1 পরেদি পৌল দর্বী আর লুস্ত্রা শঅরত্ গেলাক্। সিয়েনত্ তীমথিয় নাঙে এক্কো শিচ্চ্য থেদঅ। তার মাবো এলঅ খ্রীষ্ট উগুরে বিশ্বেজি এক্কো যিদূদী মিলে, মাত্তর্ তা বাবে জাদে গ্রীক এলঅ। 2 লুস্ত্রা আর ইকনিয় শঅরর্ বিশ্বেজি ভেইয়ুনে তীমথিয়রে অমকদ বাঈনী গুরিদাক্। 3 পৌল তীমথিয়রে সমারে নিবাত্তে চেইয়্যে বিলি তারে সুন্নত গোরেল, কিয়া সেই জাগানিত্ যে যিহূদীগুনে থেদাক্ তারা কোই পারিদাক্ তীমথিয় বাপ্পো এক্কো গ্রীক। 4 পরেদি তারা সেই শঅরানি ভিদিরেদি গেলাক্ আর যিরূশালেমর প্রচারক্কুনে আহ্ মন্ডলীর নেতাগুনে যে কয়েক্কান সুদোম ঠিগ্ গোজ্যন্ সিয়েন মানুচ্চুনোরে জানেলাক্ আর সেই বেক্ সুদোমানি পালেবাত্তে কলাক্। 5 এবাবোত্যেগুরি মন্ডলীগুনোর মানুচ্চুনে খ্রীষ্টান ধর্ম-বিশ্বেজত্ মনানি দরমর ওই উদিলাক্ আর তারা জনেদি দিন দিন বাড়ি যাহ্ ধুরিলাক্। ম্যাসিডোনিয়া রেজ্যত্ পৌল 6 পবিত্র আত্মাগানে পৌল আর তা সমাজ্যেগুনোরে এশিয়া রেজ্যত্ প্রচার গুরিবাত্তে ন-দিলো। সেক্কে তারা ফরুগিয়া আর গালাতিয়া রেজ্যর্ বেক্ জাগানিত্ গেলাক্। 7 পরেদি মুশিয়ার দুযিত্ লুমিনে তারা বিথুনিয়া রেজ্যত্ যেবাত্তে চেষ্টা গুরিলাক্, মাত্তর্ যীশুর আত্মাগানে তারারে যেবাত্তে ন-দিলো। 8 ইয়েনত্যে তারা মুশিয়া ভিদিরেদি ত্রোয়া শঅরত্ গেলাক্। 9 রেদোত্ পৌলে এক্কান দর্শনত্ দেগিলো, ম্যাসিডোনিয়া রেজ্যর্ এক্কো মানুচ্ থিয়্যেইনে তারে কোজোলি গুরিনে কত্তে, “ম্যাসিডোনিয়াত্ এইনে আমারে সাহায্য গত্তি।” 10 পৌলে এ দর্শনান্ দেগানার পরেদি আমি ম্যাসিডোনিয়াত্ যেবাত্তে সেক্কে যুক্কোল্ অলং, কিয়া আমি বুঝিলোং ম্যাসিডোনিয়া মানুচ্চুনো ইধু খ্রীষ্ট পৌইদ্যেনে গম্ হবর্ প্রচার গুরিবাত্ত্যে গোজেনে আমারে ডাক্ক্যে। লুদিয়া বিশ্বেজি অলঅ 11 পরেদি আমি ত্রোয়া ফেলেইনে জাহাজত্ গুরি সোজা সামথ্রাকী দ্বীবোত্ গেলং আর তার্ কেল্যে নিয়াপলি শঅরত্ এলং। 12 সিয়োত্তুন আমি ফিলিপী শঅরত্ গেলং। এ ফিলিপীগান ম্যাসিডোনিয়ার সেই চাগালার্ আজল্ শঅর্। সিদুগো মানুচ্চুনে রোম রেজ্যর্ প্রজা এলাক্। আমি কয়েকদিন সেই শঅরত্ থেলং। 13 আমি জিরেবার্ দিনোত্ শঅরর্ গেদো বারেদি গাঙান ইধু গেলং; মনে গুরিলোং সিধু যিহূদীগুনোর তবনা গুরিবার জাগা আঘে। সিধু যে মিলেগুনে এগত্তর্ ওইয়োন আমি তারা ইধু বৈইনে কধা কুয়ো ধল্লং। 14 যিগুনে শুনোদন্ তারা ভিদিরে থুয়াতীরা শঅরর্ লুদিয়া নাঙে এক্কো মিলে এলঅ। তে বিগুনী রংয়র্ কাবর বেবসা গুরিদো। যিহূদী ন-অলেয়ো তে গোজেনর্ উবোসনা গুরিদো। প্রভু লুদিয়ার্ মনান্ এমন্ গুরিনে মিলি দিলো যাতে তে পৌলর কধা মন দিইনে শুনিনে বিশ্বেজ্ গরে। 15 ইয়েন্দোই তে আর তা ঘরর্ বেক্কুনে বাপ্তিষ্ম ললাক্। ইয়েন পরেদি তে ইয়েন কোইনে আমারে বাত্ত্যেল, “যুনি মরে তুমি প্রভুর্ উগুরে বিশ্বেজি বিলি মনে গরঅ সালে মঅ ঘরত্ এইনে থাগগি।” এ কধাগান্ কোইনে তে আমারে কোজোলি গুরিনে তা ঘরত্ নেযেল। পৌল আর সীল জেল্খানাত্ 16 একদিন্ন্যে যেক্কে আমি সেই তবনা গুরিবার্ জাগানত্ যেইর্ সেক্কে এক্কো চাগরাণীর্ লগে আমার্ দেগা অলঅ। তারে এক্কো ভান্ন্যেই আত্মায় পেইয়্যে যিয়েনত্তে তে আগাম্ কধা কোই পাত্ত। সিয়েন্দোই তা গিরোজ্সোর্ লাভ্ অদঅ। 17 সেই মিলেবো পৌল আর আমা পিজেদি যাদে যাদে রঅ ছাড়িনে কদঅ, “এ মানুচ্চুনে দাঙর্ গোজেনর্ চাগর্। কেধোক্ক্যেন্ গুরিনে পাপত্তুন্ উদ্ধোর্ পাহ্ যায়, ইগুনে সিয়েনই তমা ইধু কদন্।” 18 তে ভালোক্ দিন সং এবাবোত্যে গুরিলো। যেরেদি পৌলে এদ্ক্ তোচ্চ্যে পেলঅ যে, তে পিজেদি ফিরিনে সেই ভান্ন্যেই আত্মাবোরে কলঅ, “যীশু খ্রীষ্টর্ নাঙে মুই তরে উগুম দুয়োঙর্, এ মিলেবো ভিদিরেত্তুন্ নিগিলি যাহ্।” আর সেক্কে সেই আত্মাবো নিগিলি গেলঅ। 19 লাভর্ আজাগান্ গেলগোই দেগিনে মিলেবোর গিরোজ্চুনে পৌল আর সীলরে ধুরিনে শঅর্ কেন্দ্রত্ নেতাগুনো ইধু টানি নেযেলাক্। 20 সে পরেদি তারা শাসনগুরিয়্যেগুনো ইধু তারারে নেযেইনে কলাক্, “এ মানুচ্চুনে আমা শঅরত্ যাগুলুক্ বাজেই দুয়োন। ইগুনে যিহূদী। 21 ইগুনে এমন্ আচার-বেবহার পৌইদ্যেনে শিক্ষ্যে দেদন্ যিয়েনি রোমীয় ইজেবে আমাত্যে মানি লনা বা পালানা আইনোর্ উগুদো কাম্।” 22 অন্য মানুচ্চুনেয়ো পৌল আর সীল বিরুদ্ধে তারা সমারে মিজেলাক্। সেক্কে শাসনগুরিয়্যেগুনে উগুম্ দিলাক্ যেন তারার কাবর্-চুগোড়ানি ফাদি ফেলেইনে বেত্ মারা অয়। 23 অমকদ বেত্ মারানার্ পরেদি তারারে জেল্খানাত্ থুয়ো অলঅ, আর গমেডালে চুগি দিবাত্যে জেল-নেতাবোরে উগুম্ দিয়্যে অলঅ। 24 জেল-নেতাবো সেই উগুমান পেইনে পৌল আর সীলরে জেল ভিদিরে ঘরত্ নেযেল আর গাচ্কল্ দিইনে তারার্ টেঙানি বানি থলাক্। 25 সেক্কে প্রায় রেত্ সম্মাক্ ওইয়্যে। পৌল আর সীলে তবনা গত্তন্ আর গোজেনর্ নাঙে বাঈনী-গীত্ গাদন্। অন্য বন্দীগুনে সিয়েন্ শুনোদন্। 26 এমন্ সময়োত্ আদিক্ক্যেগুরি এক্কো অমকদ ভূজোল্ বেলঅ্ আর সিয়েন্দোই জেল্খানার্ গড়াগান্ সং গির্গিরেই উদিলো। আর সেলক্কে জেল্খানার্ বেক্ দুয়োরানি আর বন্দীগুনোর্ শিগোলানি খুলি গেলঅ। 27 জেল-চুগিদার্বো জাগি উদিলো আর জেলোর্ দোরানি খুলো দেগিনে ছুরি নিগিলেনেই নিজোরে খুন্ গুরিবাত্যে চেলঅ। তে মনে গোজ্জ্যেদে বেক্ বন্দীগুন্ ধেই যেইয়োন্। 28 সেক্কে পৌলে রঅ ছাড়িনে কলঅ, “থামা, নিজোরে ক্ষতি ন-গুরিবে; আমি বেক্কুনে ইধু আঘিই।” 29 সেক্কে সেই জেল-চুগিদার্বো একজনরে চেরাগ্ আনিবার্ কধা কোইনে নিজে ধাবা ধাবা ভিদিরে গেলঅ আর দরে গির্গিরেদে গির্গিরেদে পৌল আর সীল টেঙত্ পড়িলো। 30 সে পরেদি তে পৌল আর সীলরে বারেদি আনিনে পুযোর্ গুরিলো, “কধে চাং, পাপত্তুন্ উদ্ধোর্ পেবাত্যে মত্তুন্ কি গরা পুরিবো?” 31 তারা কলাক্, “তুই আর তঅ পরিবার প্রভু যীশু উগুরে বিশ্বেজ্ গরঅ, সালে পাপত্তুন্ উদ্ধোর্ পেবা।” 32 পৌল আর সীল সেক্কে জেল-চুগিদার্বোরে আর তা ঘরর্ বেক্কুনো ইধু প্রভুর্ কধা কলাক্। 33 জেল-চুগিদার্বো সেই রেদোত্ পৌল আর সীলরে নেযেইনে তারার্ কিয়্যেগানির্ কাবা জাগানি ধোই দিলো, তে আর তার্ পরিবারর্ অন্য বেক্কুনে সেক্কে বাপ্তিষ্ম ললাক্। 34 সে পরেদি তে পৌল আর সীলরে নিজো ঘরত্ নেযেইনে হেবাত্তে দিলো। গোজেন উগুরে বিশ্বেজ্ গুরিনে তার্ পরিবারর্ বেক্কুনে অমকদ হুজি অলাক্। 35 তার্ কেল্যে বেইন্ন্যা মাদান্ শাসন গুরিয়্যেগুনে তারার্ কামগুরিয়্যেগুনোরে দিইনে কোই পাধেলাক্, “সে মানুচ্চুনোরে ইরি-দুয়ো।” 36 সেক্কে জেল-চুগিদার্বো পৌলরে কলঅ, “তরে আর সীলরে ইরি দিবাত্যে শাসনগুরিয়্যেগুনে কোই পাধেয়োন। তুমি ইক্কিনে নিগিলি এজঅ আর গমেডালে যগোই।” 37 সেক্কে পৌলে সেই জেল-চুগুদারুনোরে কলঅ, “আমি রোমীয়, আমা বিচের্ ন-গুরিনে বেক্কুনো মুজুঙোত্ বেত্ মারা ওইয়্যে আর জেলোত্ দিয়্যে ওইয়্যে। ইক্কিনে কি শাসনগুরিয়্যেগুনে আমারে ভিদিরে ভিদিরে ইরি দিবাত্তে চান্? সিয়েন ন-অবঅ; তারা নিজে এইনে আমারে বারেদি নেযাদোক্।” 38 সেই জেল-চাগরুনে সেক্কে এ কধাগান্ শাসনগুরিয়্যেগুনোরে জানেলাক্। শাসনগুরিয়্যেগুনে যেক্কে শুনিলাক্ পৌল আর সীল রোমীয় সেক্কে তারা দোরেলাক্। 39 তারা পৌল আর সীল ইধু যেইনে ক্ষেমা চেলাক্ আর তারারে জেল বারেদি আনিনে শঅরান্ ছাড়ি যেবাত্তে কোজোলি গুরিলাক্। 40 পৌল আর সীল জেল্খানাত্তুন্ নিগিলিনেই লুদিয়ার্ ঘরত্ গেলাক্। সিধু বিশ্বেজি ভেইয়ুনো সমারে তারার্ দেগা অলঅ। ভেইয়ুনোরে উৎসাহ দেনার্ পরেদি তারা সিয়োত্তুন গেলাক্কোই। |
Copyright © 2021 Bangladesh Bible Society
Bangladesh Bible Society