প্রেরিত্ 15 - Chakma Bibleযিরূশালেমর্ তেম্মাং 1 যিহূদীয়া রেজ্যত্তুন্ কয়েক্কো মানুচ্ সিরিয়া দেজর্ আন্তিয়খিয়াত্ এলাক্ আর বিশ্বেজি ভেইয়ুনোরে ইয়েন কোইনে শিক্ষ্যে দিয়্যে ধুরিলাক্, “মোশির রীতি-সুদোম মজিম্ তমার চুনুগুলো মাঢাবো কাবা ন-অলে তুমি কনঅ বাবদে পাপত্তুন্ উদ্ধোর্ পেই ন-পারঅ।” 2 সেক্কে পৌল আর বার্ণবা সমারে এ মানুচ্চুনোর্ জদবদে কধা তর্কাতর্কি অলঅ। যেরেদি থিগ্ অলঅ যে, পৌল আর বার্ণবা আন্তিয়খিয়ার কয়েক্কো বিশ্বেজিরে সমারে লোইনে যিরূশালেমত্ যেবাক্ আর দিপাধেয়্যেগুনো সমারে আর মন্ডলী নেতাগুনো সমারে এ পৌইদ্যেনে কধাবাত্তা কবাক্। 3 আন্তিয়খিয়া মন্ডলী তারার্ যেবার্ বেবস্থা গুরি দিলাক্। ফৈনিকিয়া আর শমরিয়া রেজ্যর্ ভিদিরেদি যেবার্ অক্তত্ পৌল আর বার্ণবা মানুচ্চুনোরে জানেলাক্, অযিহূদীগুনে কেধোক্ক্যেন গুরি গোজেন ইন্দি ফিজ্জ্যন্। এ হবরান্ শুনিনে বিশ্বেজি ভেইয়ুন বেক্কুনে অমকদ হুজি অলাক্। 4 যেক্কে পৌল আর বার্ণবা যিরূশালেমত্ এলাক্ সেক্কে মন্ডলীর মানুচ্চুনে, নেতাগুনে আর প্রচারক্কুনে আওজ্ গুরিনে তারারে মানি ললাক্। তারারে দিইনে গোজেনে যিয়েনি গোজ্জ্যে সিয়েনি বেক্কানি তারা বেক্কুনোরে কলাক্। 5 ফরীশী দলর্ কয়েক্কো মানুচ্ বিশ্বেজি ওইয়োন। সেই বিশ্বেজিগুনে উদি থিয়েইনে কলাক্, “অযিহূদীগুনোরে চুনুগুলোগুনোর মাঢাগুন কাবি দেনা দরকার্ আর তারা যেন মোশির রীতি-সুদোমানি পালন গরন্ সেনত্তে তারারে উগুম্ দেনা দরকার্।” 6 সেক্কে প্রচারক্কুনে আর মন্ডলীর নেতাগুনে এ পৌইদ্যেনে চিন্তে গুরিবাত্তে এক জাগাত্ এগত্তর্ অলাক্। 7 বোউত্ তেম্মাং গরানার্ পরেদি পিতরে উদিনে তারারে কলঅ, “ভেইলগ্, তুমি দঅ কোই পারঅ যে, ভালোক্ দিন আগে তমা ভিদিরেত্তুন্ গোজেনে মরে বেঈ লোইয়্যে যাতে অযিহূদীগুনে মঅ মুয়োত্তুন্ গম্ হবরর্ কধা শুনিনে বিশ্বেজ্ গরন্। 8 গোজেনে বেক্কুনোর্ মনানি কোই পারে। তে আমারে যেবাবোত্যেগুরি পবিত্র আত্মাগান দান গোজ্যে, অযিহূদীগুনোরেয়ো সেবাবোত্যেগুরি পবিত্র আত্মাগান দান গুরিনে সাক্ষী দিয়্যেদে যে, তারায়ো পাপত্তুন্ উদ্ধোর্ পেইয়োন। 9 তে আমারে আর তারা ভিদিরে যুদো বিলিনে কিচ্চু ন-থয়, কিয়া তারা বিশ্বেজ্ গোজ্যন্ বিলিনে তে তারা মনানিয়ো সাব্ গোজ্যে। 10 সালে আমা পূরোণি মানুচ্চুনে বা আমি যে পোজাভুগি বুয়োই ন-পারিই সেই পোজা ভুগিবো অযিহূদী বিশ্বেজিগুনো কানাত্ তুলি দিইনে কিত্ত্যে তুমি গোজেনরে যগা চেবার্ চেষ্টা গরর্? 11 আমি বিশ্বেজ্ গুরিই যে, প্রভু যীশুর্ দোয়্যেই অযিহূদী বিশ্বেজিগুনে যেবাবোত্যেগুরি পাপত্তুন্ উদ্ধোর্ পেইয়োন সেবাবোত্যেগুরি আমিয়ো উদ্ধোর্ পেইয়্যেই।” 12 সেক্কে তেম্মাঙত্ বেক্কুনে জুরো ওই গেলাক্ আর পৌল আহ্ বার্ণবার মাধ্যমে গোজেনে অযিহূদীগুনো ভিদিরে যেদক্কানি আমক্ কাম্ গোজ্যে সিয়েনি তারা মুয়োদি শুনো ধুরিলাক্। 13 তারার্ কধা কনা থুম্ অলে পরেদি যাকোবে কলঅ, “ভেইলগ্, শুনো। 14 গোজেনে তার্ নিজোর্ মানুচ্ অবাত্যে অযিহূদীগুনোত্তুন্ কয়েক্কো মান্জ্যরে বেঈ লোইনে দেগেয়্যেদে যে, অযিহূদীগুনোত্যেয়ো তার্ চিন্তে আঘে। এ কধাগান শিমোন-পিতরে আমারে কোইয়্যে। 15 এ কধাগান সমারে ভাববাদীগুনোর কধাগান্অ মিল্ আঘে, কিয়া বোইবোত্ লেগা আঘে: 16 ‘ইয়েনর পরেদি মুই এইনে দায়ূদোর পড়ি যেইয়্যে ঘরান্ আরঅ বানেম্। যিয়েন্ ভস্ত ওই যেইয়্যে সিয়েন আরঅ তুলিম্, আরঅ সিয়েন থিক্ গুরিম্; 17 যেন অন্য বেক্ মানুচ্চুনে, অত্তাৎ যিদুক্কুন অযিহূদীরে মর্ বিলিনে ডাগা ওইয়্যে তারা মরে তোগেই পারন্।’ প্রভু, যিবে ইয়েনি বেক্ কামানি গরে তে এ কধানি কর্, আর প্রভুই এ বেক্ক্যানি গরের্। 18 ভালোক্ দিন আগেত্তুন্ ধুরি ইবে তা মনঅ ভিদিরে এলঅ।” 19 যাকোবে আরঅ কলঅ, “ইয়েনত্যে মর্ মতে যে অযিহূদীগুনে গোজেন ইন্দি ফিজ্জ্যন্ তারারে দুঘ্ দেনা আমার্ উচিত্ নয়। 20 সিয়েনত্তুন্ বরং আমি তারা ইধু এ কধাগান লিগিই যে, তারা যেন মূত্তি সমারে এগত্তর্ বেক্কানিত্তুন্ আর বেক্ সিনেলিত্তুন্ দূরোত্ থান্, আর তদা চিবিনে মাজ্যে য়েমান য়েরা আর লো যেন তারা ন-খান্। 21 এই উগুমানি তারারে দেনা গম্, কিয়া মোশি যিয়েন কোইয়্যে সিয়েন পত্তি শঅরত্ ভালোক্ দিন আগেত্তুন্ ধুরি ফগদাং গরা অর্ আর তে যিয়েন লিগি যেয়্যে সিয়েন পত্তি জিরেবার দিনোত্ সমাজ-ঘরানিত্ পড়া অর্।” অযিহূদীগুনো ইধু লেগা চিধি 22 সেক্কে প্রচারক্কুনে, মন্ডলী নেতাগুনে আর মন্ডলী অন্য বেক্ মানুচ্চুনে থিগ্ গুরিলাক্ যে, তারা নিজোর্ কয়েক্কো মান্জ্যরে বেঈ লোইনে পৌল আর বার্ণবা সমারে আন্তিয়খিয়াত্ পাধেই দিবাক্। তারা যিহূদী আর সীলরে বেঈ ললাক্। এই যিহূদারে বর্শাব্বা বিলি ডাগা অদঅ। বিশ্বেজি ভেইয়ুনো ভিদিরে এ দ্বিজনে নেতা এলাক্। 23 তারা সমারে এ চিধিগান পাধা অলঅ: আন্তিয়খিয়া, সিরিয়া আর কিলিকিয়ার অযিহূদী বিশ্বেজি ভেইয়ুনো ইধু আমি প্রচারক্কুনে আর মন্ডলী নেতাগুনে, অত্তাৎ তমা ভেইয়ুনে এ চিধিগান লিগির্। তমার্ ভালেদি ওক্। 24 “আমি শুনিলোং, আমা ভিদিরেত্তুন্ কয়েকজনে যেইনে ভালোক্কানি কধা কোইনে তমা মনানি যাগুলুগ্ গুরিনে দুঘ্ দুয়োন, মাত্তর্ আমি তারারে এবাবোত্যে কাম্ গুরিবাত্তে ন-কোই। 25 ইয়েনত্যে আমি বেক্কুনে একমত ওইনে কয়েকজনরে বেঈ লোইনে আমার কোচ্পেইয়্যে সমাজ্যে বার্ণবা আর পৌল সমারে তমা ইধু তারারে পাধেলুং। 26 বার্ণবা আর পৌলে আমা প্রভু যীশু খ্রীষ্টত্ত্যে মরণর্ মুয়োমি ওইয়োন। 27 আমি যিহূদা আর সীলরে পাধেলং যেন আমি যিয়েন লিগির্ সিয়েন তারা তমা ইধু মুয়োন্দিয়ো কন্। 28 পবিত্র আত্মা আর আমি ইয়েনই গম্ মনে গুরিলোং যে, এ দরকারী বেপারানি বাদে আর কনঅ কিছুলোই তমা উগুরে যেন দুষ্চান দিয়্যে ন-অয়। 29 সেই দরকারী বেপারানি অলঅ-তুমি মূর্ত্তি ইধু উৎসর্ব গোজ্যে হানা ন-হেবা, লো ন-হেবা, তদা চিবিনে মাজ্যে য়েমান য়েরা ন-হেবা আর কনঅ বাবোত্যে সিনেলী ন-গুরিবা। ইয়েনি গরানাত্তুন্ দূরোত্ থেলে তুমি গম্ গুরিবা। বিদায়।” 30 পৌল, বার্ণবা আর সেই মানুচ্চুনোরে দিপাধা অলে পরেদি তারা আন্তিয়খিয়াত্ গেলাক্। সিধু তারা মন্ডলী মানুচ্চুনোরে এগত্তর্ গুরিনে সেই চিধিগান তারারে দিলাক্। 31 মানুচ্চুনে চিধিগান পড়িলাক্ আর সিয়েন্অ ভিদিরে যে সান্তনার্ কধা এলঅ সিয়েন্দোই হুজি অলাক্। 32 যিহূদা আর সীল নিজেয়ো এলাক্ ভাববাদী, সেনত্তে তারা ভালোক্কানি কধা কোইনে সিধুগোর্ ভেইয়ুনোরে উচ্চোমি তুলি দিলাক্ আর তারা বিশ্বেজ্চান বাড়েইনে তারারে দরমর গুরি তুলিলাক্। 33-34 আন্তিয়খিয়াত্ তারা কয়েক দিন কাদেলাক্। যিরূশালেমর্ যিগুনে যিহূদা আর সীলরে আন্তিয়খিয়াত্ পাধেয়োন, আন্তিয়খিয়ার্ ভেইয়ুনে তারারে ভালেদি জানেইনে যিহূদা আর সীলরে আরঅ তারা ইধু ফেরৎ পাধেই দিলাক্, 35 মাত্তর্ পৌল আর বার্ণবা আন্তিয়খিয়াত্ রলাক্। সিধু তারা আরঅ ভালোকজন সমারে প্রভুর কধা শিক্ষ্যে দেনা আর ফগদাং গরা ধুরিলাক্। পৌল আর বার্ণবার্ কধার্ অমিল্ 36 কয়েক দিন বাদে পৌল বার্ণবারে কলঅ, “যেদক্কানি জাগাত্ আমি প্রভুর কধা ফগদাং গোজ্যেই, যেই, ইক্কিনে সেই বেক্ জাগানিত্ ফিরি যেইনে বিশ্বেজি ভেইয়ুনো সমারে দেগা গুরিই আর তারা কেধোক্ক্যেন্ আগন্ সিয়েন চেইয়োই।” 37 সেক্কে বার্ণবা যোহনরে সমারে লবাত্তে চেলঅ। এই যোহনরে মার্ক বিলিনেয়ো ডাগা অদঅ। 38 মাত্তর্ পৌলে তারে সমারে নেযানা গম্ বিলিনে মনে ন-গুরিলো, কিয়া মার্কে পাম্ফুলিয়াত্ তারারে ফেলেইনে যেয়্যেগোই আর তারা সমারে আর্ কাম্ ন-গরে। 39 সেক্কে পৌল আর বার্ণবা ভিদিরে এমন্ কধার্ অমিল্ অলঅ যে, তারা একজন আরেক্ জনত্তুন্ ফারগ্ ওই গেলাক্। বার্ণবা মার্করে লোইনে জাহাজত্ গুরি সাইপ্রাস দ্বিপোত্ গেলঅ, আর পৌল সীলরে বেঈ নেযেল। 40 সেক্কে আন্তিয়খিয়ার ভেইয়ুনে পৌল আর সীলরে প্রভুর্ দোইয়্যের্ আঢত্ তুলি দিলে পরেদি তারা লদ্ দিলাক্। 41 পৌল সিরিয়া আর কিলিকিয়া ভিদিরেদি যেইনে বেক্ মন্ডলীগুনোর বিশ্বেজ্ বাড়েইনে তারারে আরঅ দরমর গুরি তুলিলো। |
Copyright © 2021 Bangladesh Bible Society
Bangladesh Bible Society